दुःखनाशनम्।
१-६ वामदेवः। द्यावापृथिवी, देवाः। अनुष्टुप्, ४ चतुष्पदा निचृद्बृहती, ६भुरिक्।
क॒र्शफ॑स्य विश॒फस्य॒ द्यौः पि॒ता पृ॑थि॒वी मा॒ता।
यथा॑भिच॒क्र दे॑वा॒स्तथाप॑ कृणुता॒ पुनः॑ ॥१॥
अ॒श्रे॒ष्माणो॑ अधारय॒न् तथा॒ तन्मनु॑ना कृ॒तम्।
कृणोमि॒ वध्रि॒ विष्क॑न्धं मुष्काब॒र्हो गवा॑मिव ॥२॥
पि॒शङ्गे॒ सूत्रे॒ खृग॑लं॒ तदा ब॑ध्नन्ति वे॒धसः॑ ।
श्र॒व॒स्युं शुष्मं॑ काब॒वं वध्रिं॑ कृण्वन्तु ब॒न्धुरः॑ ॥३॥
येना॑ श्रवस्यव॒श्चर॑थ दे॒वा इ॑वासुरमा॒यया॑ ।
शुनां॑ क॒पिरि॑व॒ दूष॑णो॒ बन्धु॑रा काब॒वस्य॑ च ॥४॥
दुष्ट्यै॒ हि त्वा॑ भ॒त्स्यामि॑ दूषयि॒ष्यामि॑ काब॒वम्।
उदा॒शवो॒ रथा॑ इव श॒पथे॑भिः सरिष्यथ ॥५॥
एक॑शतं॒ विष्क॑न्धानि॒ विष्ठि॑ता पृथि॒वीमनु॑ ।
तेषां॒ त्वामग्रे॒ उज्ज॑हरुर्म॒णिं वि॑ष्कन्ध॒दूष॑णम्॥६॥
duḥkhanāśanam | १-६ vāmadevaḥ | dyāvāpṛthivī, devāḥ | anuṣṭup, ४ catuṣpadā nicṛdbṛhatī, ६bhurik | ka॒rśapha॑sya viśa॒phasya॒ dyauḥ pi॒tā pṛ॑thi॒vī mā॒tā | yathā॑bhica॒kra de॑vā॒stathāpa॑ kṛṇutā॒ punaḥ॑ || १ || a॒śre॒ṣmāṇo॑ adhāraya॒n tathā॒ tanmanu॑nā kṛ॒tam | kṛṇomi॒ vadhri॒ viṣka॑ndhaṃ muṣkāba॒rho gavā॑miva || २ || pi॒śaṅge॒ sūtre॒ khṛga॑laṃ॒ tadā ba॑dhnanti ve॒dhasaḥ॑ | śra॒va॒syuṃ śuṣmaṃ॑ kāba॒vaṃ vadhriṃ॑ kṛṇvantu ba॒ndhuraḥ॑ || ३ || yenā॑ śravasyava॒ścara॑tha de॒vā i॑vāsuramā॒yayā॑ | śunāṃ॑ ka॒piri॑va॒ dūṣa॑ṇo॒ bandhu॑rā kāba॒vasya॑ ca || ४ || duṣṭyai॒ hi tvā॑ bha॒tsyāmi॑ dūṣayi॒ṣyāmi॑ kāba॒vam | udā॒śavo॒ rathā॑ iva śa॒pathe॑bhiḥ sariṣyatha || ५ || eka॑śataṃ॒ viṣka॑ndhāni॒ viṣṭhi॑tā pṛthi॒vīmanu॑ | teṣāṃ॒ tvāmagre॒ ujja॑harurma॒ṇiṃ vi॑ṣkandha॒dūṣa॑ṇam || ६ ||