EeseDharmaSanātana Library
9काण्ड 3 · सूक्त 9
Atharvaveda Śaunaka Kand 3, Sukta 9.
6 shlokक॒र्शफ॑स्य विश॒फस्य॒ द्यौः पि॒ता पृ॑थि॒वी मा॒ता।
यथा॑भिच॒क्र दे॑वा॒स्तथाप॑ कृणुता॒ पुनः॑ ॥१॥
ka॒rśapha॑sya viśa॒phasya॒ dyauḥ pi॒tā pṛ॑thi॒vī mā॒tā | yathā॑bhica॒kra de॑vā॒stathāpa॑ kṛṇutā॒ punaḥ॑ || १ ||
अ॒श्रे॒ष्माणो॑ अधारय॒न् तथा॒ तन्मनु॑ना कृ॒तम्।
कृणोमि॒ वध्रि॒ विष्क॑न्धं मुष्काब॒र्हो गवा॑मिव ॥२॥
a॒śre॒ṣmāṇo॑ adhāraya॒n tathā॒ tanmanu॑nā kṛ॒tam | kṛṇomi॒ vadhri॒ viṣka॑ndhaṃ muṣkāba॒rho gavā॑miva || २ ||
पि॒शङ्गे॒ सूत्रे॒ खृग॑लं॒ तदा ब॑ध्नन्ति वे॒धसः॑ ।
श्र॒व॒स्युं शुष्मं॑ काब॒वं वध्रिं॑ कृण्वन्तु ब॒न्धुरः॑ ॥३॥
pi॒śaṅge॒ sūtre॒ khṛga॑laṃ॒ tadā ba॑dhnanti ve॒dhasaḥ॑ | śra॒va॒syuṃ śuṣmaṃ॑ kāba॒vaṃ vadhriṃ॑ kṛṇvantu ba॒ndhuraḥ॑ || ३ ||
येना॑ श्रवस्यव॒श्चर॑थ दे॒वा इ॑वासुरमा॒यया॑ ।
शुनां॑ क॒पिरि॑व॒ दूष॑णो॒ बन्धु॑रा काब॒वस्य॑ च ॥४॥
yenā॑ śravasyava॒ścara॑tha de॒vā i॑vāsuramā॒yayā॑ | śunāṃ॑ ka॒piri॑va॒ dūṣa॑ṇo॒ bandhu॑rā kāba॒vasya॑ ca || ४ ||
दुष्ट्यै॒ हि त्वा॑ भ॒त्स्यामि॑ दूषयि॒ष्यामि॑ काब॒वम्।
उदा॒शवो॒ रथा॑ इव श॒पथे॑भिः सरिष्यथ ॥५॥
duṣṭyai॒ hi tvā॑ bha॒tsyāmi॑ dūṣayi॒ṣyāmi॑ kāba॒vam | udā॒śavo॒ rathā॑ iva śa॒pathe॑bhiḥ sariṣyatha || ५ ||
एक॑शतं॒ विष्क॑न्धानि॒ विष्ठि॑ता पृथि॒वीमनु॑ ।
तेषां॒ त्वामग्रे॒ उज्ज॑हरुर्म॒णिं वि॑ष्कन्ध॒दूष॑णम् ॥६॥
eka॑śataṃ॒ viṣka॑ndhāni॒ viṣṭhi॑tā pṛthi॒vīmanu॑ | teṣāṃ॒ tvāmagre॒ ujja॑harurma॒ṇiṃ vi॑ṣkandha॒dūṣa॑ṇam || ६ ||