स्वस्तये प्रार्थना।
१-७ अथर्वा। १ अग्निः, इन्द्रः, मित्रावरुणौ, अश्विनौ, भगः, पूषा, ब्रह्मणस्पतिः, सोमः, रुद्रः,
२-३ ५ भगः, आदित्यः, ४ इन्द्रः, ६ दधिक्रवा, अश्वाः, ७ उषाः। त्रिष्टुप्, १ आर्षी जगती, ४ भुरिक् पङ्क्तिः।
प्रा॒तर॒ग्निं प्रा॒तरिन्द्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।
प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं ह॑वामहे ॥१॥
प्रा॒त॒र्जितं॒ भग॑मु॒ग्रं ह॑वामहे व॒यं पु॒त्रमदि॑ते॒र्यो वि॑ध॒र्ता।
आ॒ध्रश्चि॒द् यं मन्य॑मानस्तु॒रश्चि॒द् राजा॑ चि॒द् यं भगं॑ भ॒क्षीत्याह॑ ॥२॥
भग॒ प्रणे॑त॒र्भग॒ सत्य॑राधो॒ भगे॒मां धिय॒मुद॑वा॒ दद॑न्नः ।
भग॒ प्र णो॑ जनय॒ गोभि॒रश्वै॒र्भग॒ प्र नृभि॑र्नृ॒वन्तः॑ स्याम ॥३॥
उ॒तेदानीं॒ भग॑वन्तः स्यामो॒त प्र॑पि॒त्व उ॒त मध्ये॒ अह्ना॑म्।
उ॒तोदि॑तौ मघव॒न्त्सूर्य॑स्य व॒यं दे॒वानां॑ सुम॒तौ स्या॑म ॥४॥
भग॑ ए॒व भग॑वाँ अस्तु दे॒वस्तेना॑ व॒यं भग॑वन्तः स्याम ।
तं त्वा॑ भग॒ सर्व॒ इज्जो॑हवीमि॒ स नो॑ भग पुरए॒ता भ॑वे॒ह॥५॥
सम॑ध्व॒रायो॒षसो॑ नमन्त दधि॒क्रावे॑व॒ शुच॑ये प॒दाय॑ ।
अ॒र्वा॒ची॒नं व॑सु॒विदं॒ भगं॑ मे॒ रथ॑मि॒वाश्वा॑ वा॒जिन॒ आ व॑हन्तु ॥६॥
अश्वा॑वती॒र्गोम॑तीर्न उ॒षा॑सो॑ वी॒रव॑तीः॒ सद॑मुछन्तु भ॒द्राः ।
घृ॒तं दुहा॑ना वि॒श्वतः॒ प्रपी॑ता यू॒यं पा॑त स्व॒स्तिभिः॒ सदा॑ नः ॥७॥
svastaye prārthanā | १-७ atharvā | १ agniḥ, indraḥ, mitrāvaruṇau, aśvinau, bhagaḥ, pūṣā, brahmaṇaspatiḥ, somaḥ, rudraḥ, २-३ ५ bhagaḥ, ādityaḥ, ४ indraḥ, ६ dadhikravā, aśvāḥ, ७ uṣāḥ | triṣṭup, १ ārṣī jagatī, ४ bhurik paṅktiḥ | prā॒tara॒gniṃ prā॒tarindraṃ॑ havāmahe prā॒tarmi॒trāvaru॑ṇā prā॒tara॒śvinā॑ | prā॒tarbhagaṃ॑ pū॒ṣaṇaṃ॒ brahma॑ṇa॒spatiṃ॑ prā॒taḥ soma॑mu॒ta ru॒draṃ ha॑vāmahe || १ || prā॒ta॒rjitaṃ॒ bhaga॑mu॒graṃ ha॑vāmahe va॒yaṃ pu॒tramadi॑te॒ryo vi॑dha॒rtā | ā॒dhraści॒d yaṃ manya॑mānastu॒raści॒d rājā॑ ci॒d yaṃ bhagaṃ॑ bha॒kṣītyāha॑ || २ || bhaga॒ praṇe॑ta॒rbhaga॒ satya॑rādho॒ bhage॒māṃ dhiya॒muda॑vā॒ dada॑nnaḥ | bhaga॒ pra ṇo॑ janaya॒ gobhi॒raśvai॒rbhaga॒ pra nṛbhi॑rnṛ॒vantaḥ॑ syāma || ३ || u॒tedānīṃ॒ bhaga॑vantaḥ syāmo॒ta pra॑pi॒tva u॒ta madhye॒ ahnā॑m | u॒todi॑tau maghava॒ntsūrya॑sya va॒yaṃ de॒vānāṃ॑ suma॒tau syā॑ma || ४ || bhaga॑ e॒va bhaga॑vām̐ astu de॒vastenā॑ va॒yaṃ bhaga॑vantaḥ syāma | taṃ tvā॑ bhaga॒ sarva॒ ijjo॑havīmi॒ sa no॑ bhaga purae॒tā bha॑ve॒ha || ५ || sama॑dhva॒rāyo॒ṣaso॑ namanta dadhi॒krāve॑va॒ śuca॑ye pa॒dāya॑ | a॒rvā॒cī॒naṃ va॑su॒vidaṃ॒ bhagaṃ॑ me॒ ratha॑mi॒vāśvā॑ vā॒jina॒ ā va॑hantu || ६ || aśvā॑vatī॒rgoma॑tīrna u॒ṣā॑so॑ vī॒rava॑tīḥ॒ sada॑muchantu bha॒drāḥ | ghṛ॒taṃ duhā॑nā vi॒śvataḥ॒ prapī॑tā yū॒yaṃ pā॑ta sva॒stibhiḥ॒ sadā॑ naḥ || ७ ||