शापमोचनम्।
१-५ अथर्वा। भैषज्यं, आयुः, वनस्पतिः। अनुष्टुप्, १ भुरिक्, ४ विराडुपरिष्टाद् बृहती।
अ॒घद्वि॑ष्टा दे॒वजा॑ता वी॒रुच्छ॑पथ॒योप॑नी ।
आपो॒ मल॑मिव॒ प्राणै॑क्षी॒त् सर्वा॒न् मच्छ॒पथाँ॒ अधि॑ ॥१॥
यश्च॑ साप॒त्नः श॒पथो॑ जा॒म्याः श॒पथ॑श्च॒ यः ।
ब्र॒ह्मा यन्म॑न्यु॒तः शपा॒त् सर्वं॒ तन्नो॑ अधस्प॒दम्॥२॥
दि॒वो मूल॒मव॑ततं पृथि॒व्या अध्युत्त॑तम्।
तेन॑ स॒हस्र॑काण्डेन॒ परि॑ णः पाहि वि॒श्वतः॑ ॥३॥
परि॒ मां परि॑ मे प्र॒जां परि॑ णः पाहि॒ यद्धन॑म्।
अरा॑तिर्नो॒ मा ता॑री॒न्मा न॑स्तारि॒षुर॒भिमा॑तयः ॥४॥
श॒प्तार॑मेतु श॒पथो॒ यः सु॒हार्त् तेन॑ नः स॒ह।
चक्षु॑र्मन्त्रस्य दु॒र्हार्दः॑ पृ॒ष्टीरपि॑ शृणीमसि ॥५॥
śāpamocanam | १-५ atharvā | bhaiṣajyaṃ, āyuḥ, vanaspatiḥ | anuṣṭup, १ bhurik, ४ virāḍupariṣṭād bṛhatī | a॒ghadvi॑ṣṭā de॒vajā॑tā vī॒ruccha॑patha॒yopa॑nī | āpo॒ mala॑miva॒ prāṇai॑kṣī॒t sarvā॒n maccha॒pathām॒̐ adhi॑ || १ || yaśca॑ sāpa॒tnaḥ śa॒patho॑ jā॒myāḥ śa॒patha॑śca॒ yaḥ | bra॒hmā yanma॑nyu॒taḥ śapā॒t sarvaṃ॒ tanno॑ adhaspa॒dam || २ || di॒vo mūla॒mava॑tataṃ pṛthi॒vyā adhyutta॑tam | tena॑ sa॒hasra॑kāṇḍena॒ pari॑ ṇaḥ pāhi vi॒śvataḥ॑ || ३ || pari॒ māṃ pari॑ me pra॒jāṃ pari॑ ṇaḥ pāhi॒ yaddhana॑m | arā॑tirno॒ mā tā॑rī॒nmā na॑stāri॒ṣura॒bhimā॑tayaḥ || ४ || śa॒ptāra॑metu śa॒patho॒ yaḥ su॒hārt tena॑ naḥ sa॒ha | cakṣu॑rmantrasya du॒rhārdaḥ॑ pṛ॒ṣṭīrapi॑ śṛṇīmasi || ५ ||