सपत्नहाऽग्निः।
१-५ शौनकः(सम्पत्कामः) अग्निः। त्रिष्टुप्, ४ चतुष्पदार्षी पङ्क्तिः, ५ विराट् प्रस्तारपङ्क्तिः।
समा॑स्त्वाग्न ऋ॒तवो॑ वर्धयन्तु संवत्स॒रा ऋष॑यो॒ यानि॑ स॒त्या।
सं दि॒व्येन॑ दीदिहि रोच॒नेन॒ विश्वा॒ आ भा॑हि प्र॒दिश॒श्चत॑स्रः ॥१॥
सं चे॒ध्यस्वा॑ग्ने॒ प्र च॑ वर्धये॒ममुच्च॑ तिष्ठ मह॒ते सौभ॑गाय ।
मा ते॑ रिषन्नुपस॒त्तारो॑ अग्ने ब्र॒ह्माण॑स्ते य॒शसः॑ सन्तु॒ मान्ये॥२॥
त्वाम॑ग्ने वृणते ब्राह्म॒णा इ॒मे शि॒वो अ॑ग्ने सं॒वर॑णे भवा नः ।
स॒प॒त्न॒हाग्ने॑ अभिमाति॒जिद् भ॑व॒ स्वे गये॑ जागृ॒ह्यप्र॑युछन्॥३॥
क्ष॒त्रेणा॑ग्ने॒ स्वेन॒ सं र॑भस्व मि॒त्रेणा॑ग्ने मित्र॒धा य॑तस्व ।
स॒जा॒तानां॑ मध्यमे॒ष्ठा राज्ञा॑मग्ने वि॒हव्यो॑ दीदिही॒ह॥४॥
अति॒ निहो॒ अति॒ सृधोऽत्यचि॑त्ती॒रति॒ द्विषः॑ ।
विश्वा॒ ह्यऽग्ने दुरि॒ता त॑र॒ त्वमथा॒स्मभ्यं॑ स॒हवी॑रं र॒यिं दाः॑
sapatnahā’gniḥ | १-५ śaunakaḥ(sampatkāmaḥ) agniḥ | triṣṭup, ४ catuṣpadārṣī paṅktiḥ, ५ virāṭ prastārapaṅktiḥ | samā॑stvāgna ṛ॒tavo॑ vardhayantu saṃvatsa॒rā ṛṣa॑yo॒ yāni॑ sa॒tyā | saṃ di॒vyena॑ dīdihi roca॒nena॒ viśvā॒ ā bhā॑hi pra॒diśa॒ścata॑sraḥ || १ || saṃ ce॒dhyasvā॑gne॒ pra ca॑ vardhaye॒mamucca॑ tiṣṭha maha॒te saubha॑gāya | mā te॑ riṣannupasa॒ttāro॑ agne bra॒hmāṇa॑ste ya॒śasaḥ॑ santu॒ mānye || २ || tvāma॑gne vṛṇate brāhma॒ṇā i॒me śi॒vo a॑gne saṃ॒vara॑ṇe bhavā naḥ | sa॒pa॒tna॒hāgne॑ abhimāti॒jid bha॑va॒ sve gaye॑ jāgṛ॒hyapra॑yuchan || ३ || kṣa॒treṇā॑gne॒ svena॒ saṃ ra॑bhasva mi॒treṇā॑gne mitra॒dhā ya॑tasva | sa॒jā॒tānāṃ॑ madhyame॒ṣṭhā rājñā॑magne vi॒havyo॑ dīdihī॒ha || ४ || ati॒ niho॒ ati॒ sṛdho’tyaci॑ttī॒rati॒ dviṣaḥ॑ | viśvā॒ hya’gne duri॒tā ta॑ra॒ tvamathā॒smabhyaṃ॑ sa॒havī॑raṃ ra॒yiṃ dāḥ॑