कामिनीमनोऽभिमुखीकरणम्।
१-५ प्रजापतिः। १ मनः, २ अश्विनौ, ३-४ औषधिः, ५ दम्पती। अनुष्टुप्, १ पथ्यापङ्क्तिः, ३ भुरिक्।
यथे॒दं भूम्या॒ अधि॒ तृणं॒ वातो॑ मथा॒य॑ति ।
ए॒वा म॑थ्नामि ते मनो॒ यथा॒ मां का॒मिन्यसो॒ यथा॒ मन्नाप॑गा॒ असः॑ ॥१॥
सं चेन्नया॑थो अश्विना का॒मिना॒ सं च॒ वक्ष॑थः ।
सं वां॒ भगा॑सो अग्मत॒ सं चि॒त्तानि॒ समु॑ व्र॒ता॥२॥
यत् सु॑प॒र्णा वि॑व॒क्षवो॑ अनमी॒वा वि॑व॒क्षवः॑ ।
तत्र॑ मे गछता॒द्धवं॑ श॒ल्य इ॑व॒ कुल्म॑लं॒ यथा॑ ॥३॥
यदन्त॑रं॒ तद् बाह्यं॒ यद् बाह्यं॒ तदन्त॑रम्।
क॒न्याऽनां वि॒श्वरू॑पाणां॒ मनो॑ गृभायौषधे ॥४॥
एयम॑ग॒न् पति॑कामा॒ जनि॑कामो॒ऽहमाग॑मम्।
अश्वः॒ कनि॑क्रद॒द् यथा॒ भगे॑ना॒हं स॒हाग॑मम्॥५॥
kāminīmano’bhimukhīkaraṇam | १-५ prajāpatiḥ | १ manaḥ, २ aśvinau, ३-४ auṣadhiḥ, ५ dampatī | anuṣṭup, १ pathyāpaṅktiḥ, ३ bhurik | yathe॒daṃ bhūmyā॒ adhi॒ tṛṇaṃ॒ vāto॑ mathā॒ya॑ti | e॒vā ma॑thnāmi te mano॒ yathā॒ māṃ kā॒minyaso॒ yathā॒ mannāpa॑gā॒ asaḥ॑ || १ || saṃ cennayā॑tho aśvinā kā॒minā॒ saṃ ca॒ vakṣa॑thaḥ | saṃ vāṃ॒ bhagā॑so agmata॒ saṃ ci॒ttāni॒ samu॑ vra॒tā || २ || yat su॑pa॒rṇā vi॑va॒kṣavo॑ anamī॒vā vi॑va॒kṣavaḥ॑ | tatra॑ me gachatā॒ddhavaṃ॑ śa॒lya i॑va॒ kulma॑laṃ॒ yathā॑ || ३ || yadanta॑raṃ॒ tad bāhyaṃ॒ yad bāhyaṃ॒ tadanta॑ram | ka॒nyā’nāṃ vi॒śvarū॑pāṇāṃ॒ mano॑ gṛbhāyauṣadhe || ४ || eyama॑ga॒n pati॑kāmā॒ jani॑kāmo॒’hamāga॑mam | aśvaḥ॒ kani॑krada॒d yathā॒ bhage॑nā॒haṃ sa॒hāga॑mam || ५ ||