EeseDharmaSanātana Library
30काण्ड 2 · सूक्त 30
Atharvaveda Śaunaka Kand 2, Sukta 30.
5 shlokयथे॒दं भूम्या॒ अधि॒ तृणं॒ वातो॑ मथा॒य॑ति ।
ए॒वा म॑थ्नामि ते मनो॒ यथा॒ मां का॒मिन्यसो॒ यथा॒ मन्नाप॑गा॒ असः॑ ॥१॥
yathe॒daṃ bhūmyā॒ adhi॒ tṛṇaṃ॒ vāto॑ mathā॒ya॑ti | e॒vā ma॑thnāmi te mano॒ yathā॒ māṃ kā॒minyaso॒ yathā॒ mannāpa॑gā॒ asaḥ॑ || १ ||
सं चेन्नया॑थो अश्विना का॒मिना॒ सं च॒ वक्ष॑थः ।
सं वां॒ भगा॑सो अग्मत॒ सं चि॒त्तानि॒ समु॑ व्र॒ता ॥२॥
saṃ cennayā॑tho aśvinā kā॒minā॒ saṃ ca॒ vakṣa॑thaḥ | saṃ vāṃ॒ bhagā॑so agmata॒ saṃ ci॒ttāni॒ samu॑ vra॒tā || २ ||
यत् सु॑प॒र्णा वि॑व॒क्षवो॑ अनमी॒वा वि॑व॒क्षवः॑ ।
तत्र॑ मे गछता॒द्धवं॑ श॒ल्य इ॑व॒ कुल्म॑लं॒ यथा॑ ॥३॥
yat su॑pa॒rṇā vi॑va॒kṣavo॑ anamī॒vā vi॑va॒kṣavaḥ॑ | tatra॑ me gachatā॒ddhavaṃ॑ śa॒lya i॑va॒ kulma॑laṃ॒ yathā॑ || ३ ||
यदन्त॑रं॒ तद् बाह्यं॒ यद् बाह्यं॒ तदन्त॑रम्।
क॒न्याऽनां वि॒श्वरू॑पाणां॒ मनो॑ गृभायौषधे ॥४॥
yadanta॑raṃ॒ tad bāhyaṃ॒ yad bāhyaṃ॒ tadanta॑ram | ka॒nyā’nāṃ vi॒śvarū॑pāṇāṃ॒ mano॑ gṛbhāyauṣadhe || ४ ||
एयम॑ग॒न् पति॑कामा॒ जनि॑कामो॒ऽहमाग॑मम्।
अश्वः॒ कनि॑क्रद॒द् यथा॒ भगे॑ना॒हं स॒हाग॑मम् ॥५॥
eyama॑ga॒n pati॑kāmā॒ jani॑kāmo॒’hamāga॑mam | aśvaḥ॒ kani॑krada॒d yathā॒ bhage॑nā॒haṃ sa॒hāga॑mam || ५ ||