यक्ष्मनाशनम्।
१-७ भृग्वङ्गिराः। १-३ हरिणः, ४ तारके, ५ आपः, ६-७ यक्ष्मनाशनम्। अनुष्टुप्, ६ भुरिक्।
ह॒रि॒णस्य॑ रघु॒ष्यदोऽधि॑ शी॒र्षणि॑ भेष॒जम्।
स क्षे॑त्रि॒यं वि॒षाण॑या विषू॒चीन॑मनीनशत्॥१॥
अनु॑ त्वा हरि॒णो वृषा॑ प॒द्भिश्च॒तुर्भि॑रक्रमीत्।
विषा॑णे॒ वि ष्य॑ गुष्पि॒तं यद॑स्य क्षेत्रि॒यं हृ॒दि॥२॥
अ॒दो यद॑व॒रोच॑ते॒ चतु॑ष्पक्षमिव च्छ॒दिः ।
तेना॑ ते॒ सर्वं॑ क्षेत्रि॒यमङ्गे॑भ्यो नाशयामसि ॥३॥
अ॒मू ये दि॒वि सु॒भगे॑ वि॒चृतौ॒ नाम॒ तार॑के ।
वि क्षे॑त्रि॒यस्य॑ मुञ्चतामध॒मं पाश॑मुत्त॒मम्॥४॥
आप॒ इद् वा उ॑ भेष॒जीरापो॑ अमीव॒चात॑नीः ।
आपो॒ विश्व॑स्य भेष॒जीस्तास्त्वा॑ मुञ्चन्तु क्षेत्रि॒यात्॥५॥
यदा॑सु॒तेः क्रि॒यमा॑णायाः क्षेत्रि॒यं त्वा॑ व्यान॒शे।
वेदा॒हं तस्य॑ भेष॒जं क्षे॑त्रि॒यं ना॑शयामि॒ त्वत्॥६॥
अ॒प॒वा॒से नक्ष॑त्राणामपवा॒स उ॒षसा॑मु॒त।
अपा॒स्मत् सर्वं॑ दुर्भू॒तमप॑ क्षेत्रि॒यमु॑च्छतु ॥७॥
yakṣmanāśanam | १-७ bhṛgvaṅgirāḥ | १-३ hariṇaḥ, ४ tārake, ५ āpaḥ, ६-७ yakṣmanāśanam | anuṣṭup, ६ bhurik | ha॒ri॒ṇasya॑ raghu॒ṣyado’dhi॑ śī॒rṣaṇi॑ bheṣa॒jam | sa kṣe॑tri॒yaṃ vi॒ṣāṇa॑yā viṣū॒cīna॑manīnaśat || १ || anu॑ tvā hari॒ṇo vṛṣā॑ pa॒dbhiśca॒turbhi॑rakramīt | viṣā॑ṇe॒ vi ṣya॑ guṣpi॒taṃ yada॑sya kṣetri॒yaṃ hṛ॒di || २ || a॒do yada॑va॒roca॑te॒ catu॑ṣpakṣamiva ccha॒diḥ | tenā॑ te॒ sarvaṃ॑ kṣetri॒yamaṅge॑bhyo nāśayāmasi || ३ || a॒mū ye di॒vi su॒bhage॑ vi॒cṛtau॒ nāma॒ tāra॑ke | vi kṣe॑tri॒yasya॑ muñcatāmadha॒maṃ pāśa॑mutta॒mam || ४ || āpa॒ id vā u॑ bheṣa॒jīrāpo॑ amīva॒cāta॑nīḥ | āpo॒ viśva॑sya bheṣa॒jīstāstvā॑ muñcantu kṣetri॒yāt || ५ || yadā॑su॒teḥ kri॒yamā॑ṇāyāḥ kṣetri॒yaṃ tvā॑ vyāna॒śe | vedā॒haṃ tasya॑ bheṣa॒jaṃ kṣe॑tri॒yaṃ nā॑śayāmi॒ tvat || ६ || a॒pa॒vā॒se nakṣa॑trāṇāmapavā॒sa u॒ṣasā॑mu॒ta | apā॒smat sarvaṃ॑ durbhū॒tamapa॑ kṣetri॒yamu॑cchatu || ७ ||