प्रजाभी राज्ञः संवरणम्।
१-७ अथर्वा। इन्द्रः, २ पञ्च प्रदिशः, ४ अश्विनौ, मित्रावरुणौ, विश्वे देवाः, मरुतः,
५ द्यावापृथिवी। त्रिष्टुप्, १ जगती, ४-५ भुरिक्।
आ त्वा॑ गन् रा॒ष्ट्रं स॒ह वर्च॒सोदि॑हि प्रा॑ङ्वि वि॒शां पति॑रेक॒राट् त्वं वि रा॑ज ।
सर्वा॑स्त्वा राजन् प्र॒दिशो॑ ह्वयन्तूप॒सद्यो॑ नम॒स्योऽ भवे॒ह॥१॥
त्वां विशो॑ वृणतां रा॒ज्याऽय॒ त्वामि॒माः प्र॒दिशः॒ पञ्च॑ दे॒वीः ।
वर्ष्म॑न् रा॒ष्ट्रस्य॑ क॒कुदि॑ श्रयस्व॒ ततो॑ न उ॒ग्रो वि भ॑जा॒ वसू॑नि ॥२॥
अच्छ॑ त्वा यन्तु ह॒विनः॑ सजा॒ता अ॒ग्निर्दू॒तो अ॑जि॒रः सं च॑रातै ।
जा॒याः पु॒त्राः सु॒मन॑सो भवन्तु ब॒हुं ब॒लिं प्रति॑ पश्यासा उ॒ग्रः ॥३॥
अ॒श्विना॒ त्वाग्रे॑ मि॒त्रावरु॑णो॒भा विश्वे॑ दे॒वा म॒रुत॑स्त्वा ह्वयन्तु ।
अधा॒ मनो॑ वसु॒देया॑य कृणुष्व॒ ततो॑ न उ॒ग्रो वि भ॑जा॒ वसू॑नि ॥४॥
आ प्र द्र॑व पर॒मस्याः॑ परा॒वतः॑ शि॒वे ते॒ द्यावा॑पृथि॒वी उ॒भे स्ता॑म्।
तद॒यं राजा॒ वरु॑ण॒स्तथा॑ह॒ स त्वा॒यम॑ह्व॒त् स उपे॒दमेहि॑ ॥५॥
इन्द्रे॑न्द्र मनु॒ष्याः॒३ परे॑हि॒ सं ह्यज्ञा॑स्था॒ वरु॑णैः संविदा॒नः ।
स त्वा॒यम॑ह्व॒त् स्वे स॒धस्थे॒ स दे॒वान् य॑क्ष॒त् स उ॑ कल्पया॒द् विशः॑ ॥६॥
प॒थ्याऽ रे॒वती॑र्बहु॒धा विरू॑पाः॒ सर्वाः॑ सं॒गत्य॒ वरी॑यस्ते अक्रन्।
तास्त्वा॒ सर्वाः॑ संविदा॒ना ह्व॑यन्तु दश॒मीमु॒ग्रः सु॒मना॑ वशे॒ह॥७॥
prajābhī rājñaḥ saṃvaraṇam | १-७ atharvā | indraḥ, २ pañca pradiśaḥ, ४ aśvinau, mitrāvaruṇau, viśve devāḥ, marutaḥ, ५ dyāvāpṛthivī | triṣṭup, १ jagatī, ४-५ bhurik | ā tvā॑ gan rā॒ṣṭraṃ sa॒ha varca॒sodi॑hi prā॑ṅvi vi॒śāṃ pati॑reka॒rāṭ tvaṃ vi rā॑ja | sarvā॑stvā rājan pra॒diśo॑ hvayantūpa॒sadyo॑ nama॒syo’ bhave॒ha || १ || tvāṃ viśo॑ vṛṇatāṃ rā॒jyā’ya॒ tvāmi॒māḥ pra॒diśaḥ॒ pañca॑ de॒vīḥ | varṣma॑n rā॒ṣṭrasya॑ ka॒kudi॑ śrayasva॒ tato॑ na u॒gro vi bha॑jā॒ vasū॑ni || २ || accha॑ tvā yantu ha॒vinaḥ॑ sajā॒tā a॒gnirdū॒to a॑ji॒raḥ saṃ ca॑rātai | jā॒yāḥ pu॒trāḥ su॒mana॑so bhavantu ba॒huṃ ba॒liṃ prati॑ paśyāsā u॒graḥ || ३ || a॒śvinā॒ tvāgre॑ mi॒trāvaru॑ṇo॒bhā viśve॑ de॒vā ma॒ruta॑stvā hvayantu | adhā॒ mano॑ vasu॒deyā॑ya kṛṇuṣva॒ tato॑ na u॒gro vi bha॑jā॒ vasū॑ni || ४ || ā pra dra॑va para॒masyāḥ॑ parā॒vataḥ॑ śi॒ve te॒ dyāvā॑pṛthi॒vī u॒bhe stā॑m | tada॒yaṃ rājā॒ varu॑ṇa॒stathā॑ha॒ sa tvā॒yama॑hva॒t sa upe॒damehi॑ || ५ || indre॑ndra manu॒ṣyāḥ॒३ pare॑hi॒ saṃ hyajñā॑sthā॒ varu॑ṇaiḥ saṃvidā॒naḥ | sa tvā॒yama॑hva॒t sve sa॒dhasthe॒ sa de॒vān ya॑kṣa॒t sa u॑ kalpayā॒d viśaḥ॑ || ६ || pa॒thyā’ re॒vatī॑rbahu॒dhā virū॑pāḥ॒ sarvāḥ॑ saṃ॒gatya॒ varī॑yaste akran | tāstvā॒ sarvāḥ॑ saṃvidā॒nā hva॑yantu daśa॒mīmu॒graḥ su॒manā॑ vaśe॒ha || ७ ||