स्वराज्ये राज्ञः पुनः स्थापननम्।
१-६ अथर्वा। १ अग्निः, २ इन्द्रः, ३ वरुणः सोमः इन्द्रः, ४ श्येनः अश्विनौ, ५ इन्द्राग्नी विश्वे देवाः,
६ इन्द्रः। त्रिष्टुप्, ३ चतुष्पदा भुरिक्पङ्क्तिः, ५-६ अनुष्टुप्।
अ॑चिक्रदत् स्व॒पा इ॒ह भु॑व॒दग्ने॒ व्यऽचस्व॒ रोद॑सी उरू॒ची।
यु॒ञ्जन्तु॑ त्वा म॒रुतो॑ वि॒श्ववे॑दस॒ आमुं न॑य॒ नम॑सा रा॒तह॑व्यम्॥१॥
दू॒रे चि॒त् सन्त॑मरु॒षास॒ इन्द्र॒मा च्या॑वयन्तु स॒ख्याय॒ विप्र॑म्।
यद् गा॑य॒त्रीं बृ॑ह॒तीम॒र्कम॑स्मै सौत्राम॒ण्या दधृ॑षन्त दे॒वाः ॥२॥
अ॒द्भ्यस्त्वा॒ राजा॒ व॑रुणो ह्वयतु॒ सोम॑स्त्वा ह्वयतु॒ पर्व॑तेभ्यः ।
इन्द्र॑स्त्वा ह्वयतु वि॒ड्भ्य॑ आ॒भ्यः श्ये॒नो भू॒त्वा विश॒ आ प॑ते॒माः ॥३॥
श्ये॒नो ह॒व्यं न॑य॒त्वा पर॑स्मादन्यक्षे॒त्रेअप॑रुद्धं॒ चर॑न्तम्।
अ॒श्विना॒ पन्थां॑ कृणुतां सु॒गं त॑ इ॒मं स॑जाता अभि॒संवि॑शध्वम्॥४॥
ह्वय॑न्तु त्वा प्रतिज॒नाः प्रति॑ मित्रा अ॑वृषत ।
इ॒न्द्रा॒ग्नी विश्वे॑ दे॒वास्ते वि॒शि क्षेम॑मदीधरन्॥५॥
यस्ते॒ हवं वि॒वद॑त् सजा॒तो यश्च॒ निष्ट्यः॑ ।
अ॑पाञ्चमिन्द्र॒ तं कृ॒त्वाथे॒ममि॒हाव॑ गमय ॥६॥
svarājye rājñaḥ punaḥ sthāpananam | १-६ atharvā | १ agniḥ, २ indraḥ, ३ varuṇaḥ somaḥ indraḥ, ४ śyenaḥ aśvinau, ५ indrāgnī viśve devāḥ, ६ indraḥ | triṣṭup, ३ catuṣpadā bhurikpaṅktiḥ, ५-६ anuṣṭup | a॑cikradat sva॒pā i॒ha bhu॑va॒dagne॒ vya’casva॒ roda॑sī urū॒cī | yu॒ñjantu॑ tvā ma॒ruto॑ vi॒śvave॑dasa॒ āmuṃ na॑ya॒ nama॑sā rā॒taha॑vyam || १ || dū॒re ci॒t santa॑maru॒ṣāsa॒ indra॒mā cyā॑vayantu sa॒khyāya॒ vipra॑m | yad gā॑ya॒trīṃ bṛ॑ha॒tīma॒rkama॑smai sautrāma॒ṇyā dadhṛ॑ṣanta de॒vāḥ || २ || a॒dbhyastvā॒ rājā॒ va॑ruṇo hvayatu॒ soma॑stvā hvayatu॒ parva॑tebhyaḥ | indra॑stvā hvayatu vi॒ḍbhya॑ ā॒bhyaḥ śye॒no bhū॒tvā viśa॒ ā pa॑te॒māḥ || ३ || śye॒no ha॒vyaṃ na॑ya॒tvā para॑smādanyakṣe॒treapa॑ruddhaṃ॒ cara॑ntam | a॒śvinā॒ panthāṃ॑ kṛṇutāṃ su॒gaṃ ta॑ i॒maṃ sa॑jātā abhi॒saṃvi॑śadhvam || ४ || hvaya॑ntu tvā pratija॒nāḥ prati॑ mitrā a॑vṛṣata | i॒ndrā॒gnī viśve॑ de॒vāste vi॒śi kṣema॑madīdharan || ५ || yaste॒ havaṃ vi॒vada॑t sajā॒to yaśca॒ niṣṭyaḥ॑ | a॑pāñcamindra॒ taṃ kṛ॒tvāthe॒mami॒hāva॑ gamaya || ६ ||