अविः।
१-८ उद्दालकः। शितिपाद् अविः, ७ कामः, ८ भूमिः। अनुष्टुप्, १, ३ पथ्यापङ्क्तिः,
७ त्र्यवसाना षट्पदा उपरिष्टा द्दैवी बृहती ककुम्मतीगर्भा विराड् जगती, ८ उपरिष्टाद् बृहती।
यद् राजा॑नो वि॒भज॑न्त इष्टापू॒र्तस्य॑ षोड॒शं य॒मस्या॒मी स॑भा॒सदः॑ ।
अवि॒स्तस्मा॒त् प्र मु॑ञ्चति द॒त्तः शि॑ति॒पात् स्व॒धा॥१॥
सर्वा॒न् कामा॑न् पूरयत्या॒भव॑न् प्र॒भव॒न् भव॑न्।
आ॒कू॒ति॒प्रोऽवि॑र्द॒त्तः शि॑ति॒पान्नोप॑ दस्यति ॥२॥
यो ददा॑ति शिति॒पाद॒मविं॑ लो॒केन॒ संमि॑तम्।
स नाक॑म॒भ्यारो॑हति॒ यत्र॑ शु॒ल्को न क्रि॒यते॑ अब॒लेन॒ बली॑यसे ॥३॥
पञ्चा॑पूपं शिति॒पाद॒मविं॑ लो॒केन॒ संमि॑तम्।
प्र॒दा॒तोप॑ जीवति पितॄ॒णां लो॒केऽक्षि॑तम्॥४॥
पञ्चा॑पूपं शिति॒पाद॒मविं॑ लो॒केन॒ संमि॑तम्।
प्र॒दा॒तोप॑ जीवति सूर्यामा॒सयो॒रक्षि॑तम्॥५॥
इ॑रेव नो॑प दस्यति समुद्र॑इव प॑यो मह॑त्।
देवउ॑सवासि॑नाविव शितिपा॑न्नो॑प दस्यति ॥६॥
क इ॒दं कस्मा॑ अदा॒त् कामः॒ कामा॑यादात्।
कामो॑ दा॒ता कामः॑ प्रतिग्रही॒ता कामः॑ समु॒द्रमा वि॑वेश ।
कामे॑न त्वा॒ प्रति॑ गृह्णामि॒ कामै॒तत् ते॑ ॥७॥
भूमि॑ष्ट्वा॒ प्रति॑ गृह्णात्व॒न्तरि॑क्षमि॒दं म॒हत्।
माहं प्रा॒णेन॒ मात्मना॒ मा प्र॒जया॑ प्रति॒गृह्य॒ वि रा॑धिषि ॥८॥
aviḥ | १-८ uddālakaḥ | śitipād aviḥ, ७ kāmaḥ, ८ bhūmiḥ | anuṣṭup, १, ३ pathyāpaṅktiḥ, ७ tryavasānā ṣaṭpadā upariṣṭā ddaivī bṛhatī kakummatīgarbhā virāḍ jagatī, ८ upariṣṭād bṛhatī | yad rājā॑no vi॒bhaja॑nta iṣṭāpū॒rtasya॑ ṣoḍa॒śaṃ ya॒masyā॒mī sa॑bhā॒sadaḥ॑ | avi॒stasmā॒t pra mu॑ñcati da॒ttaḥ śi॑ti॒pāt sva॒dhā || १ || sarvā॒n kāmā॑n pūrayatyā॒bhava॑n pra॒bhava॒n bhava॑n | ā॒kū॒ti॒pro’vi॑rda॒ttaḥ śi॑ti॒pānnopa॑ dasyati || २ || yo dadā॑ti śiti॒pāda॒maviṃ॑ lo॒kena॒ saṃmi॑tam | sa nāka॑ma॒bhyāro॑hati॒ yatra॑ śu॒lko na kri॒yate॑ aba॒lena॒ balī॑yase || ३ || pañcā॑pūpaṃ śiti॒pāda॒maviṃ॑ lo॒kena॒ saṃmi॑tam | pra॒dā॒topa॑ jīvati pitṝ॒ṇāṃ lo॒ke’kṣi॑tam || ४ || pañcā॑pūpaṃ śiti॒pāda॒maviṃ॑ lo॒kena॒ saṃmi॑tam | pra॒dā॒topa॑ jīvati sūryāmā॒sayo॒rakṣi॑tam || ५ || i॑reva no॑pa dasyati samudra॑iva pa॑yo maha॑t | devau॑savāsi॑nāviva śitipā॑nno॑pa dasyati || ६ || ka i॒daṃ kasmā॑ adā॒t kāmaḥ॒ kāmā॑yādāt | kāmo॑ dā॒tā kāmaḥ॑ pratigrahī॒tā kāmaḥ॑ samu॒dramā vi॑veśa | kāme॑na tvā॒ prati॑ gṛhṇāmi॒ kāmai॒tat te॑ || ७ || bhūmi॑ṣṭvā॒ prati॑ gṛhṇātva॒ntari॑kṣami॒daṃ ma॒hat | māhaṃ prā॒ṇena॒ mātmanā॒ mā pra॒jayā॑ prati॒gṛhya॒ vi rā॑dhiṣi || ८ ||