कामस्य इषुः।
१-६ भृगुः। मित्रावरुणौ, कामेषुः। अनुष्टुप्।
उ॒त्तु॒दस्त्वोत् तु॑दतु॒ मा धृ॑थाः॒ शय॑ने॒ स्वे।
इषुः॒ काम॑स्य॒ या भी॒मा तया॑ विध्यामि त्वा हृ॒दि॥१॥
आ॒धीप॑र्णां॒ काम॑शल्या॒मिषुं॑ संक॒ल्पकु॑ल्मलाम्।
तां सुसं॑नतां कृ॒त्वा कामो॑ विध्यतु त्वा हृ॒दि॥२॥
या प्ली॒हानं॑ शो॒षय॑ति॒ काम॒स्येषुः॒ सुसं॑नता ।
प्रा॒चीन॑पक्षा॒ व्योऽषा॒ तया॑ विध्यामि त्वा हृ॒दि॥३॥
शु॒चा वि॒द्धा व्योऽषया॒ शुष्का॑स्या॒भि स॑र्प मा ।
मृ॒दुर्निम॑न्युः॒ केव॑ली प्रियवा॒दिन्यनु॑व्रता ॥४॥
आजा॑मि॒ त्वाज॑न्या॒ परि॑ मा॒तुरथो॑ पि॒तुः ।
यथा॒ मम॒ क्रता॒वसो॒ मम॑ चि॒त्तमु॒पाय॑सि ॥५॥
व्यऽस्यै मित्रावरुणौ हृ॒दश्चि॒त्तान्य॑स्यतम्।
अथै॑नामक्र॒तुं कृ॒त्वा ममै॒व कृ॑णुतं॒ वशे॑ ॥६॥
kāmasya iṣuḥ | १-६ bhṛguḥ | mitrāvaruṇau, kāmeṣuḥ | anuṣṭup | u॒ttu॒dastvot tu॑datu॒ mā dhṛ॑thāḥ॒ śaya॑ne॒ sve | iṣuḥ॒ kāma॑sya॒ yā bhī॒mā tayā॑ vidhyāmi tvā hṛ॒di || १ || ā॒dhīpa॑rṇāṃ॒ kāma॑śalyā॒miṣuṃ॑ saṃka॒lpaku॑lmalām | tāṃ susaṃ॑natāṃ kṛ॒tvā kāmo॑ vidhyatu tvā hṛ॒di || २ || yā plī॒hānaṃ॑ śo॒ṣaya॑ti॒ kāma॒syeṣuḥ॒ susaṃ॑natā | prā॒cīna॑pakṣā॒ vyo’ṣā॒ tayā॑ vidhyāmi tvā hṛ॒di || ३ || śu॒cā vi॒ddhā vyo’ṣayā॒ śuṣkā॑syā॒bhi sa॑rpa mā | mṛ॒durnima॑nyuḥ॒ keva॑lī priyavā॒dinyanu॑vratā || ४ || ājā॑mi॒ tvāja॑nyā॒ pari॑ mā॒turatho॑ pi॒tuḥ | yathā॒ mama॒ kratā॒vaso॒ mama॑ ci॒ttamu॒pāya॑si || ५ || vya’syai mitrāvaruṇau hṛ॒daści॒ttānya॑syatam | athai॑nāmakra॒tuṃ kṛ॒tvā mamai॒va kṛ॑ṇutaṃ॒ vaśe॑ || ६ ||