वीर-प्रसूतिः।
१-६ ब्रह्मा। चन्द्रमा, योनिः, द्यावापृथिवी। अनुष्टुप्, ५ उपरिष्टाद् भुरिग्बृहती, ६ स्कंधोग्रीवी बृहती।
येन॑ वे॒हद् ब॒भूवि॑थ ना॒शया॑म॒सि तत् त्वत्।
इ॒दं तद॒न्यत्र॒ त्वदप॑ दू॒रे नि द॑ध्मसि ॥१॥
आ ते॒ योनिं॒ गर्भ॑ एतु॒ पुमा॒न् बाण॑ इवेषु॒धिम्।
आ वी॒रोऽत्र॑ जायतां पु॒त्रस्ते॒ दश॑मास्यः ॥२॥
पुमां॑सं पु॒त्रं ज॑नय॒ तं पुमा॒ननु॑ जायताम्।
भवा॑सि पु॒त्राणां॑ मा॒ता जा॒तानां॑ ज॒नया॑श्च॒ यान्॥३॥
यानि॑ भ॒द्राणि॒ बीजा॑न्यृष॒भा ज॒नय॑न्ति च ।
तैस्त्वं पु॒त्रं वि॑न्दस्व॒ सा प्र॒सूर्धेनु॑का भव ॥४॥
कृ॒णोमि॑ ते प्राजाप॒त्यमा योनिं॒ गर्भ॑ एतु ते ।
वि॒न्दस्व॒ त्वं पु॒त्रं ना॑रि॒ यस्तुभ्यं॒ शमस॒च्छमु॒ तस्मै॒ त्वं भव॑ ॥५॥
यासां॒ द्यौः पि॒ता पृ॑थि॒वी मा॒ता स॑मु॒द्रो मूलं॑ वी॒रुधां॑ ब॒भूव॑ ।
तास्त्वा॑ पुत्र॒विद्या॑य॒ दैवीः॒ प्राव॒न्त्वोष॑धयः ॥६॥
vīra-prasūtiḥ | १-६ brahmā | candramā, yoniḥ, dyāvāpṛthivī | anuṣṭup, ५ upariṣṭād bhurigbṛhatī, ६ skaṃdhogrīvī bṛhatī | yena॑ ve॒had ba॒bhūvi॑tha nā॒śayā॑ma॒si tat tvat | i॒daṃ tada॒nyatra॒ tvadapa॑ dū॒re ni da॑dhmasi || १ || ā te॒ yoniṃ॒ garbha॑ etu॒ pumā॒n bāṇa॑ iveṣu॒dhim | ā vī॒ro’tra॑ jāyatāṃ pu॒traste॒ daśa॑māsyaḥ || २ || pumāṃ॑saṃ pu॒traṃ ja॑naya॒ taṃ pumā॒nanu॑ jāyatām | bhavā॑si pu॒trāṇāṃ॑ mā॒tā jā॒tānāṃ॑ ja॒nayā॑śca॒ yān || ३ || yāni॑ bha॒drāṇi॒ bījā॑nyṛṣa॒bhā ja॒naya॑nti ca | taistvaṃ pu॒traṃ vi॑ndasva॒ sā pra॒sūrdhenu॑kā bhava || ४ || kṛ॒ṇomi॑ te prājāpa॒tyamā yoniṃ॒ garbha॑ etu te | vi॒ndasva॒ tvaṃ pu॒traṃ nā॑ri॒ yastubhyaṃ॒ śamasa॒cchamu॒ tasmai॒ tvaṃ bhava॑ || ५ || yāsāṃ॒ dyauḥ pi॒tā pṛ॑thi॒vī mā॒tā sa॑mu॒dro mūlaṃ॑ vī॒rudhāṃ॑ ba॒bhūva॑ | tāstvā॑ putra॒vidyā॑ya॒ daivīḥ॒ prāva॒ntvoṣa॑dhayaḥ || ६ ||