वर्चः प्राप्तिः।
१-६ वसिष्ठः। वर्चः, बृहस्पतिः, विश्वे देवाः। अनुष्टुप्, १ विराट् त्रिष्टुप्,
३ पञ्चपदा परानुष्टुप् विराडतिजगती, ४ त्र्यवसाना षट् पदा जगती।
ह॒स्ति॒व॒र्च॒सं प्र॑थतां बृ॒हद् यशो॒ अदि॑त्या॒ यत् त॒न्वः संब॒भूव॑ ।
तत् सर्वे॒ सम॑दु॒र्मह्य॑मे॒तद् विश्वे॑ दे॒वा अदि॑तिः स॒जोषाः॑ ॥१॥
मि॒त्रश्च॒ वरु॑ण॒श्चेन्द्रो॑ रु॒द्रश्च॑ चेततु । दे॒वासो॑ वि॒श्वधा॑यस॒स्ते मा॑ञ्जन्तु॒ वर्च॑सा ॥२॥
येन॑ ह॒स्ती वर्च॑सा संब॒भूव॒ येन॒ राजा॑ मनु॒ष्येऽष्व॒प्स्व॑१न्तः ।
येन॑ दे॒वा दे॒वता॒मग्र आय॒न् तेन॒ माम॒द्य वर्च॒साग्ने॑ वर्च॒स्विनं॑ कृणु ॥३॥
यत् ते॒ वर्चो॑ जातवेदो बृ॒हद् भ॑व॒त्याहु॑तेः ।
याव॒त् सूर्य॑स्य॒ वर्च॑ आसु॒रस्य॑ च ह॒स्तिनः॑ ।
ताव॑न्मे अ॒श्विना॒ वर्च॒ आ ध॑त्तां॒ पुष्क॑रस्रजा ॥४॥
याव॒च्चत॑स्रः प्र॒दिश॒श्चक्षु॒र्याव॑त् समश्नु॒ते।
ताव॑त् स॒मैत्वि॑न्द्रि॒यं मयि॒ तद्ध॑स्तिवर्च॒सम्॥५॥
हस्ती मृ॒गाणां॑ सु॒षदा॑मति॒ष्ठावा॑न् ब॒भूव॒ हि।
तस्य॒ भगे॑न॒ वर्च॑सा॒भि षि॑ञ्चामि॒ माम॒हम्॥६॥
varcaḥ prāptiḥ | १-६ vasiṣṭhaḥ | varcaḥ, bṛhaspatiḥ, viśve devāḥ | anuṣṭup, १ virāṭ triṣṭup, ३ pañcapadā parānuṣṭup virāḍatijagatī, ४ tryavasānā ṣaṭ padā jagatī | ha॒sti॒va॒rca॒saṃ pra॑thatāṃ bṛ॒had yaśo॒ adi॑tyā॒ yat ta॒nvaḥ saṃba॒bhūva॑ | tat sarve॒ sama॑du॒rmahya॑me॒tad viśve॑ de॒vā adi॑tiḥ sa॒joṣāḥ॑ || १ || mi॒traśca॒ varu॑ṇa॒ścendro॑ ru॒draśca॑ cetatu | de॒vāso॑ vi॒śvadhā॑yasa॒ste mā॑ñjantu॒ varca॑sā || २ || yena॑ ha॒stī varca॑sā saṃba॒bhūva॒ yena॒ rājā॑ manu॒ṣye’ṣva॒psva॑१ntaḥ | yena॑ de॒vā de॒vatā॒magra āya॒n tena॒ māma॒dya varca॒sāgne॑ varca॒svinaṃ॑ kṛṇu || ३ || yat te॒ varco॑ jātavedo bṛ॒had bha॑va॒tyāhu॑teḥ | yāva॒t sūrya॑sya॒ varca॑ āsu॒rasya॑ ca ha॒stinaḥ॑ | tāva॑nme a॒śvinā॒ varca॒ ā dha॑ttāṃ॒ puṣka॑rasrajā || ४ || yāva॒ccata॑sraḥ pra॒diśa॒ścakṣu॒ryāva॑t samaśnu॒te | tāva॑t sa॒maitvi॑ndri॒yaṃ mayi॒ taddha॑stivarca॒sam || ५ || hastī mṛ॒gāṇāṃ॑ su॒ṣadā॑mati॒ṣṭhāvā॑n ba॒bhūva॒ hi | tasya॒ bhage॑na॒ varca॑sā॒bhi ṣi॑ñcāmi॒ māma॒ham || ६ ||