शान्तिः।
१-१० वसिष्ठः। अग्निः। त्रिष्टुप्, १ पुरोनुष्टुप्, २, ३, ८ भुरिक् ५ जगती,
६ उपरिष्टाद्विराड् बृहती, ७ विराड् गर्भा, ९ निचृदनुष्टुप्, १० अनुष्टुप्।
ये अ॒ग्नयो॑ अ॒प्स्व॑१न्तर्ये वृ॒त्रे ये पुरु॑षे॒ ये अश्म॑सु ।
य आ॑वि॒वेशोष॑धी॒र्यो वन॒स्पतीं॒स्तेभ्यो॑ अ॒ग्निभ्यो॑ हु॒तम॑स्त्वे॒तत्॥१॥
यः सोमे॑ अ॒न्तर्यो गोष्व॒न्तर्य आवि॑ष्टो॒ वयः॑सु॒ यो मृ॒गेषु॑ ।
य आ॑वि॒वेश॑ द्वि॒पदो॒ यश्चतु॑ष्पद॒स्तेभ्यो॑ अ॒ग्निभ्यो॑ हु॒तम॑स्त्वे॒तत्॥२॥
य इन्द्रे॑ण स॒रथं॒ याति॑ दे॒वो वै॑श्वान॒र उ॒त वि॑श्वदा॒व्यः ।
यं जोह॑वीमि॒ पृत॑नासु सास॒हिं तेभ्यो॑ अ॒ग्निभ्यो॑ हु॒तम॑स्त्वे॒तत्॥३॥
यो दे॒वो वि॒श्वाद् यमु॒ काम॑मा॒हुर्यं दा॒तारं॑ प्रतिगृ॒ह्णन्त॑मा॒हुः ।
यो धीरः॑ श॒क्रः प॑रि॒भूरदा॑भ्य॒स्तेभ्यो॑ अ॒ग्निभ्यो॑ हु॒तम॑स्त्वे॒तत्॥४॥
यं त्वा॒ होता॑रं॒ मन॑सा॒भि सं॑वि॒दुस्त्रयो॑दश भौव॒नाः पञ्च॑ मान॒वाः ।
व॒र्चो॒धसे॑ य॒शसे॑ सू॒नृता॑वते॒ तेभ्यो॑ अ॒ग्निभ्यो॑ हु॒तम॑स्त्वे॒तत्॥५॥
उ॒क्षान्ना॑य व॒शान्ना॑य॒ सोम॑पृष्ठाय वे॒धसे॑ ।
वै॒श्वा॒न॒रज्ये॑ष्ठेभ्य॒स्तेभ्यो॑ अ॒ग्निभ्यो॑ हु॒तम॑स्त्वे॒तत्॥६॥
दिवं॑ पृथि॒वीमन्व॒न्तरि॑क्षं॒ ये वि॒द्युत॑मनुसं॒चर॑न्ति ।
ये दि॒क्ष्व॑१न्तर्ये वाते॑ अ॒न्तस्तेभ्यो॑ अ॒ग्निभ्यो॑ हु॒तम॑स्त्वे॒तत्॥७॥
हिर॑ण्यपाणिं सवि॒तार॒मिन्द्रं॒ बृह॒स्पतिं॒ वरु॑णं मि॒त्रम॒ग्निम्।
विश्वा॑न् दे॒वानङ्गि॑रसो हवामह इ॒मं क्रव्यादं॑ शमयन्त्व॒ग्निम्॥८॥
शा॒न्तो अ॒ग्निः क्र॒व्याच्छा॒न्तः पु॑रुष॒रेष॑णः ।
अथो॒ यो वि॑श्वदा॒व्य॑१स्तं क्र॒व्याद॑मशीशमम्॥९॥
ये पर्व॑ताः॒ सोम॑पृष्ठा॒ आप॑ उत्तान॒शीव॑रीः ।
वातः॑ प॒र्जन्य॒ आद॒ग्निस्ते क्र॒व्याद॑मशीशमन्॥१०॥
śāntiḥ | १-१० vasiṣṭhaḥ | agniḥ | triṣṭup, १ puronuṣṭup, २, ३, ८ bhurik ५ jagatī, ६ upariṣṭādvirāḍ bṛhatī, ७ virāḍ garbhā, ९ nicṛdanuṣṭup, १० anuṣṭup | ye a॒gnayo॑ a॒psva॑१ntarye vṛ॒tre ye puru॑ṣe॒ ye aśma॑su | ya ā॑vi॒veśoṣa॑dhī॒ryo vana॒spatīṃ॒stebhyo॑ a॒gnibhyo॑ hu॒tama॑stve॒tat || १ || yaḥ some॑ a॒ntaryo goṣva॒ntarya āvi॑ṣṭo॒ vayaḥ॑su॒ yo mṛ॒geṣu॑ | ya ā॑vi॒veśa॑ dvi॒pado॒ yaścatu॑ṣpada॒stebhyo॑ a॒gnibhyo॑ hu॒tama॑stve॒tat || २ || ya indre॑ṇa sa॒rathaṃ॒ yāti॑ de॒vo vai॑śvāna॒ra u॒ta vi॑śvadā॒vyaḥ | yaṃ joha॑vīmi॒ pṛta॑nāsu sāsa॒hiṃ tebhyo॑ a॒gnibhyo॑ hu॒tama॑stve॒tat || ३ || yo de॒vo vi॒śvād yamu॒ kāma॑mā॒huryaṃ dā॒tāraṃ॑ pratigṛ॒hṇanta॑mā॒huḥ | yo dhīraḥ॑ śa॒kraḥ pa॑ri॒bhūradā॑bhya॒stebhyo॑ a॒gnibhyo॑ hu॒tama॑stve॒tat || ४ || yaṃ tvā॒ hotā॑raṃ॒ mana॑sā॒bhi saṃ॑vi॒dustrayo॑daśa bhauva॒nāḥ pañca॑ māna॒vāḥ | va॒rco॒dhase॑ ya॒śase॑ sū॒nṛtā॑vate॒ tebhyo॑ a॒gnibhyo॑ hu॒tama॑stve॒tat || ५ || u॒kṣānnā॑ya va॒śānnā॑ya॒ soma॑pṛṣṭhāya ve॒dhase॑ | vai॒śvā॒na॒rajye॑ṣṭhebhya॒stebhyo॑ a॒gnibhyo॑ hu॒tama॑stve॒tat || ६ || divaṃ॑ pṛthi॒vīmanva॒ntari॑kṣaṃ॒ ye vi॒dyuta॑manusaṃ॒cara॑nti | ye di॒kṣva॑१ntarye vāte॑ a॒ntastebhyo॑ a॒gnibhyo॑ hu॒tama॑stve॒tat || ७ || hira॑ṇyapāṇiṃ savi॒tāra॒mindraṃ॒ bṛha॒spatiṃ॒ varu॑ṇaṃ mi॒trama॒gnim | viśvā॑n de॒vānaṅgi॑raso havāmaha i॒maṃ kravyādaṃ॑ śamayantva॒gnim || ८ || śā॒nto a॒gniḥ kra॒vyācchā॒ntaḥ pu॑ruṣa॒reṣa॑ṇaḥ | atho॒ yo vi॑śvadā॒vya॑१staṃ kra॒vyāda॑maśīśamam || ९ || ye parva॑tāḥ॒ soma॑pṛṣṭhā॒ āpa॑ uttāna॒śīva॑rīḥ | vātaḥ॑ pa॒rjanya॒ āda॒gniste kra॒vyāda॑maśīśaman || १० ||