शत्रुसेनासंमोहनम्।
१-६ अथर्वा। सेनामोहनम्, १-२ अग्निः, ३-४ इन्द्रः, ५ द्यौः, ६ मरुतः। त्रिष्टुप्, २-४ अनुष्टुप्।
अ॒ग्निर्नो॑ दू॒तः प्र॒त्येतु॑ वि॒द्वान् प्र॑ति॒दह॑न्न॒भिश॑स्ति॒मरा॑तिम्।
स चि॒त्तानि॑ मोहयतु॒ परे॑षां॒ निर्ह॑स्तांश्च कृणवज्जा॒तवे॑दाः ॥१॥
अ॒यम॒ग्निर॑मूमुह॒द् यानि॑ चि॒त्तानि॑ वो हृ॒दि।
वि वो॑ धम॒त्वोक॑सः॒ प्र वो॑ धमतु स॒र्वतः॑ ॥२॥
इन्द्र॑ चि॒त्तानि॑ मो॒हय॑न्न॒र्वाङाकू॑त्या चर ।
अ॒ग्नेर्वात॑स्य॒ ध्राज्या॒ तान् विषू॑चो॒ वि ना॑शय ॥३॥
व्याऽकूतय एषामि॒ताथो॑ चि॒त्तानि॑ मुह्यत ।
अथो॒ यद॒द्यैषां॑ हृदि तदे॑षां॒ परि॒ निर्ज॑हि ॥४॥
अ॒मीषां॑ चि॒त्तानि॑ प्रतिमो॒हय॑न्ती गृहा॒णाङ्गा॑न्यप्वे॒ परे॑हि ।
अ॒भि प्रेहि॒ निर्द॑ह हृ॒त्सु शोकै॒र्ग्राह्या॒मित्रां॒स्तम॑सा विध्य॒ शत्रू॑न्॥५॥
अ॒सौ या सेना॑ मरुतः॒ परे॑षाम॒स्मा॑नैत्य॒भ्योज॑सा॒ स्पर्ध॑माना ।
तां वि॑ध्यत॒ तम॒साप॑व्रतेन॒ यथै॑षाम॒न्यो अ॒न्यं न जा॒नात्॥६॥
śatrusenāsaṃmohanam | १-६ atharvā | senāmohanam, १-२ agniḥ, ३-४ indraḥ, ५ dyauḥ, ६ marutaḥ | triṣṭup, २-४ anuṣṭup | a॒gnirno॑ dū॒taḥ pra॒tyetu॑ vi॒dvān pra॑ti॒daha॑nna॒bhiśa॑sti॒marā॑tim | sa ci॒ttāni॑ mohayatu॒ pare॑ṣāṃ॒ nirha॑stāṃśca kṛṇavajjā॒tave॑dāḥ || १ || a॒yama॒gnira॑mūmuha॒d yāni॑ ci॒ttāni॑ vo hṛ॒di | vi vo॑ dhama॒tvoka॑saḥ॒ pra vo॑ dhamatu sa॒rvataḥ॑ || २ || indra॑ ci॒ttāni॑ mo॒haya॑nna॒rvāṅākū॑tyā cara | a॒gnervāta॑sya॒ dhrājyā॒ tān viṣū॑co॒ vi nā॑śaya || ३ || vyā’kūtaya eṣāmi॒tātho॑ ci॒ttāni॑ muhyata | atho॒ yada॒dyaiṣāṃ॑ hṛdi tade॑ṣāṃ॒ pari॒ nirja॑hi || ४ || a॒mīṣāṃ॑ ci॒ttāni॑ pratimo॒haya॑ntī gṛhā॒ṇāṅgā॑nyapve॒ pare॑hi | a॒bhi prehi॒ nirda॑ha hṛ॒tsu śokai॒rgrāhyā॒mitrāṃ॒stama॑sā vidhya॒ śatrū॑n || ५ || a॒sau yā senā॑ marutaḥ॒ pare॑ṣāma॒smā॑naitya॒bhyoja॑sā॒ spardha॑mānā | tāṃ vi॑dhyata॒ tama॒sāpa॑vratena॒ yathai॑ṣāma॒nyo a॒nyaṃ na jā॒nāt || ६ ||