वनस्पतिः।
१-६ अथर्वा। वनस्पतिः। अनुष्टुप्, ४ अनुष्टुब्गर्भा चतुष्पदा उष्णिक्, ६ उष्णिग्गर्भा पथ्यापङ्क्तिः।
इ॒मां ख॑ना॒म्योष॑धिं वी॒रुधां॒ बल॑वत्तमाम्।
यया॑ स॒पत्नीं॒ बाध॑ते॒ यया॑ संवि॒न्दते॒ पति॑म्॥१॥
उत्ता॑नपर्णे॒ सुभ॑गे॒ देव॑जूते॒ सह॑स्वति ।
स॒पत्नीं॑ मे॒ परा॑ णुद॒ पतिं॑ मे॒ केव॑लं कृधि ॥२॥
न॒हि ते॒ नाम॑ ज॒ग्राह॒ नो अ॒स्मिन् र॑मसे॒ पतौ॑ ।
परा॑मे॒व प॑रा॒वतं॑ स॒पत्नीं॑ गमयामसि ॥३॥
उत्त॑रा॒हमु॑त्तर॒ उत्त॒रेदुत्त॑राभ्यः ।
अ॒धः स॒पत्नी॒ या ममाध॑रा॒ साध॑राभ्यः ॥४॥
अ॒हम॑स्मि॒ सह॑मा॒नाथो॒ त्वम॑सि सास॒हिः ।
उ॒भे सह॑स्वती भू॒त्वा स॒पत्नीं॑ मे सहावहै ॥५॥
अ॒भि ते॑ऽधां॒ सह॑माना॒मुप॑ तेऽधां॒ सही॑यसीम्।
मामनु॒ प्र ते॒ मनो॑ व॒त्सं गौरि॑व धावतु प॒था वारि॑व धावतु ॥६॥
vanaspatiḥ | १-६ atharvā | vanaspatiḥ | anuṣṭup, ४ anuṣṭubgarbhā catuṣpadā uṣṇik, ६ uṣṇiggarbhā pathyāpaṅktiḥ | i॒māṃ kha॑nā॒myoṣa॑dhiṃ vī॒rudhāṃ॒ bala॑vattamām | yayā॑ sa॒patnīṃ॒ bādha॑te॒ yayā॑ saṃvi॒ndate॒ pati॑m || १ || uttā॑naparṇe॒ subha॑ge॒ deva॑jūte॒ saha॑svati | sa॒patnīṃ॑ me॒ parā॑ ṇuda॒ patiṃ॑ me॒ keva॑laṃ kṛdhi || २ || na॒hi te॒ nāma॑ ja॒grāha॒ no a॒smin ra॑mase॒ patau॑ | parā॑me॒va pa॑rā॒vataṃ॑ sa॒patnīṃ॑ gamayāmasi || ३ || utta॑rā॒hamu॑ttara॒ utta॒redutta॑rābhyaḥ | a॒dhaḥ sa॒patnī॒ yā mamādha॑rā॒ sādha॑rābhyaḥ || ४ || a॒hama॑smi॒ saha॑mā॒nātho॒ tvama॑si sāsa॒hiḥ | u॒bhe saha॑svatī bhū॒tvā sa॒patnīṃ॑ me sahāvahai || ५ || a॒bhi te॑’dhāṃ॒ saha॑mānā॒mupa॑ te’dhāṃ॒ sahī॑yasīm | māmanu॒ pra te॒ mano॑ va॒tsaṃ gauri॑va dhāvatu pa॒thā vāri॑va dhāvatu || ६ ||