शालानिर्माणम्।
१-९ ब्रह्मा। शाला, वास्तोष्पतिः। त्रिष्टुप्, २ विराड् जगती, ३ बृहती, ६ शक्वरीगर्भा जगती,
७ आर्षी अनुष्टुप्, ८ भुरिक्, ९अनुष्टुप्।
इ॒हैव ध्रु॒वां नि मि॑नोमि॒ शालां॒ क्षेमे॑ तिष्ठाति घृ॒तमु॒क्षमा॑णा ।
तां त्वा॑ शाले॒ सर्व॑वीराः सु॒वीरा॒ अरि॑ष्टवीरा॒ उप॒ सं च॑रेम ॥१॥
इ॒हैव ध्रु॒वा प्रति॑ तिष्ठ शा॒लेऽश्वा॑वती॒ गोम॑ती सू॒नृता॑वती ।
ऊर्ज॑स्वती घृ॒तव॑ती॒ पय॑स्व॒त्युच्छ्र॑यस्व मह॒ते सौभ॑गाय ॥२॥
ध॒रु॒ण्य॒ऽसि शाले बृ॒हच्छ॑न्दाः॒ पूति॑धान्या ।
आ त्वा॑ व॒त्सो ग॑मे॒दा कु॑मा॒र आ धे॒नवः॑ सा॒यमा॒स्पन्द॑मानाः ॥३॥
इ॒मां शालां॑ सवि॒ता वा॒युरिन्द्रो॒ बृह॒स्पति॒र्नि मि॑नोतु प्रजा॒नन्।
उ॒क्षन्तू॒द्ना म॒रुतो॑ घृ॒तेन॒ भगो॑ नो॒ राजा॒ नि कृ॒षिं त॑नोतु ॥४॥
मान॑स्य पत्नि शरणा स्योना दे॒वी दे॒वेभि॒र्निमिता॒स्यग्रे॑ ।
तृणं॒ वसा॑ना सु॒मना॑ अस॒स्त्वमथा॒स्मभ्यं॑ स॒हवी॑रं र॒यिं दाः॑ ॥५॥
ऋ॒तेन॑ स्थूणा॒मधि॑ रोह वंशो॒ग्रो वि॒राज॒न्नप॑ वृङ्क्ष्व॒ शत्रू॑न्।
मा ते॑ रिषन्नुपस॒त्तारो॑ गृ॒हाणां॑ शाले श॒तं जी॑वेम श॒रदः॒ सर्व॑वीराः ॥६॥
एमां कु॑मा॒रस्तरु॑ण॒ आ व॒त्सो जग॑ता स॒ह।
एमां प॑रि॒स्रुतः॑ कु॒म्भ आ द॒ध्नः क॒लशै॑रगुः ॥७॥
पू॒र्णं ना॑रि॒ प्र भ॑र कु॒म्भमे॒तं घृ॒तस्य॒ धारा॑म॒मृते॑न॒ संभृ॑ताम्।
इ॒मां पा॒तॄन॒मृते॑ना॒ सम॑ङ्ग्धीष्टापू॒र्तम॒भि र॑क्षात्येनाम्॥८॥
इ॒मा आपः॒ प्र भ॑राम्यय॒क्ष्मा य॑क्ष्म॒नाश॑नीः ।
गृ॒हानुप॒ प्र सी॑दाम्य॒मृते॑न स॒हाग्निना॑ ॥९॥
śālānirmāṇam | १-९ brahmā | śālā, vāstoṣpatiḥ | triṣṭup, २ virāḍ jagatī, ३ bṛhatī, ६ śakvarīgarbhā jagatī, ७ ārṣī anuṣṭup, ८ bhurik, ९anuṣṭup | i॒haiva dhru॒vāṃ ni mi॑nomi॒ śālāṃ॒ kṣeme॑ tiṣṭhāti ghṛ॒tamu॒kṣamā॑ṇā | tāṃ tvā॑ śāle॒ sarva॑vīrāḥ su॒vīrā॒ ari॑ṣṭavīrā॒ upa॒ saṃ ca॑rema || १ || i॒haiva dhru॒vā prati॑ tiṣṭha śā॒le’śvā॑vatī॒ goma॑tī sū॒nṛtā॑vatī | ūrja॑svatī ghṛ॒tava॑tī॒ paya॑sva॒tyucchra॑yasva maha॒te saubha॑gāya || २ || dha॒ru॒ṇya॒’si śāle bṛ॒haccha॑ndāḥ॒ pūti॑dhānyā | ā tvā॑ va॒tso ga॑me॒dā ku॑mā॒ra ā dhe॒navaḥ॑ sā॒yamā॒spanda॑mānāḥ || ३ || i॒māṃ śālāṃ॑ savi॒tā vā॒yurindro॒ bṛha॒spati॒rni mi॑notu prajā॒nan | u॒kṣantū॒dnā ma॒ruto॑ ghṛ॒tena॒ bhago॑ no॒ rājā॒ ni kṛ॒ṣiṃ ta॑notu || ४ || māna॑sya patni śaraṇā syonā de॒vī de॒vebhi॒rnimitā॒syagre॑ | tṛṇaṃ॒ vasā॑nā su॒manā॑ asa॒stvamathā॒smabhyaṃ॑ sa॒havī॑raṃ ra॒yiṃ dāḥ॑ || ५ || ṛ॒tena॑ sthūṇā॒madhi॑ roha vaṃśo॒gro vi॒rāja॒nnapa॑ vṛṅkṣva॒ śatrū॑n | mā te॑ riṣannupasa॒ttāro॑ gṛ॒hāṇāṃ॑ śāle śa॒taṃ jī॑vema śa॒radaḥ॒ sarva॑vīrāḥ || ६ || emāṃ ku॑mā॒rastaru॑ṇa॒ ā va॒tso jaga॑tā sa॒ha | emāṃ pa॑ri॒srutaḥ॑ ku॒mbha ā da॒dhnaḥ ka॒laśai॑raguḥ || ७ || pū॒rṇaṃ nā॑ri॒ pra bha॑ra ku॒mbhame॒taṃ ghṛ॒tasya॒ dhārā॑ma॒mṛte॑na॒ saṃbhṛ॑tām | i॒māṃ pā॒tṝna॒mṛte॑nā॒ sama॑ṅgdhīṣṭāpū॒rtama॒bhi ra॑kṣātyenām || ८ || i॒mā āpaḥ॒ pra bha॑rāmyaya॒kṣmā ya॑kṣma॒nāśa॑nīḥ | gṛ॒hānupa॒ pra sī॑dāmya॒mṛte॑na sa॒hāgninā॑ || ९ ||