दीर्घायुः प्राप्तिः।
१-८ ब्रह्मा, भृग्वङ्गिराश्च। इन्द्राग्नी, आयुष्यं, यक्ष्मनाशनम्। त्रिष्टुप्, ४ शक्करीगर्भा जगती,
५-६ अनुष्टुप्, ७ उष्णिग्बृहतीगर्भा पथ्यापङ्क्तिः, ८ त्र्यवसाना षट् पदा बृहतीगर्भा जगती।
मु॒ञ्चामि॑ त्वा ह॒विषा॒ जीव॑नाय॒ कम॑ज्ञातय॒क्ष्मादु॒त रा॑जय॒क्ष्मात्।
ग्राहि॑र्ज॒ग्राह॒ यद्ये॒तदे॑नं॒ तस्या॑ इन्द्राग्नी॒ प्र मु॑मुक्तमेनम्॥१॥
यदि॑ क्षि॒तायु॒र्यदि॑ वा॒ परे॑तो॒ यदि॑ मृ॒त्योर॑न्ति॒कं नी॑त ए॒व।
तमा ह॑रामि॒ निरृ॑तेरु॒पस्था॒दस्पा॑र्शमेनं श॒तशा॑रदाय ॥२॥
स॒ह॒स्रा॒क्षेण॑ श॒तवी॑र्येण श॒तायु॑षा ह॒विषाहा॑र्षमेनम्।
इन्द्रो॒ यथै॑नं श॒रदो॒ नया॒त्यति॒ विश्व॑स्य दुरि॒तस्य॑ पा॒रम्॥३॥
श॒तं जी॑व श॒रदो॒ वर्ध॑मानः श॒तं हे॑म॒न्तान् छ॒तमु॑ वस॒न्तान्।
श॒तं त॒ इन्द्रो॑ अ॒ग्निः स॑वि॒ता बृह॒स्पतिः॑ श॒तायु॑षा ह॒विषाहा॑र्षमेनम्॥४॥
प्र वि॑शतं प्राणापानावन॒ड्वाहा॑विव व्र॒जम्।
व्य॑१न्ये य॑न्तु मृ॒त्यवो॒ याना॒हुरित॑रान् छ॒तम्॥५॥
इ॒हैव स्तं॑ प्राणापानौ॒ माप॑ गातमि॒तो यु॒वम्।
शरी॑रम॒स्याङ्गा॑नि ज॒रसे॑ वहतं॒ पुनः॑ ॥६॥
ज॒रायै॑ त्वा॒ परि॑ ददामि ज॒रायै॒ नि धु॑वामि त्वा ।
ज॒रा त्वा॑ भ॒द्रा ने॑ष्ट॒ व्य॑१न्ये य॑न्तु मृ॒त्यवो॒ याना॒हुरित॑रान् छ॒तम्॥७॥
अ॒भि त्वा॑ जरि॒माहि॑त॒ गामु॒क्षण॑मिव॒ रज्ज्वा ।
यस्त्वा॑ मृ॒त्युर॒भ्यध॑त्त॒ जाय॑मानं सुपा॒शया॑ ।
तं ते॑ स॒त्यस्य॒ हस्ता॑भ्या॒मुद॑मुञ्च॒द् बृह॒स्पतिः॑ ॥८॥
dīrghāyuḥ prāptiḥ | १-८ brahmā, bhṛgvaṅgirāśca | indrāgnī, āyuṣyaṃ, yakṣmanāśanam | triṣṭup, ४ śakkarīgarbhā jagatī, ५-६ anuṣṭup, ७ uṣṇigbṛhatīgarbhā pathyāpaṅktiḥ, ८ tryavasānā ṣaṭ padā bṛhatīgarbhā jagatī | mu॒ñcāmi॑ tvā ha॒viṣā॒ jīva॑nāya॒ kama॑jñātaya॒kṣmādu॒ta rā॑jaya॒kṣmāt | grāhi॑rja॒grāha॒ yadye॒tade॑naṃ॒ tasyā॑ indrāgnī॒ pra mu॑muktamenam || १ || yadi॑ kṣi॒tāyu॒ryadi॑ vā॒ pare॑to॒ yadi॑ mṛ॒tyora॑nti॒kaṃ nī॑ta e॒va | tamā ha॑rāmi॒ nirṛ॑teru॒pasthā॒daspā॑rśamenaṃ śa॒taśā॑radāya || २ || sa॒ha॒srā॒kṣeṇa॑ śa॒tavī॑ryeṇa śa॒tāyu॑ṣā ha॒viṣāhā॑rṣamenam | indro॒ yathai॑naṃ śa॒rado॒ nayā॒tyati॒ viśva॑sya duri॒tasya॑ pā॒ram || ३ || śa॒taṃ jī॑va śa॒rado॒ vardha॑mānaḥ śa॒taṃ he॑ma॒ntān cha॒tamu॑ vasa॒ntān | śa॒taṃ ta॒ indro॑ a॒gniḥ sa॑vi॒tā bṛha॒spatiḥ॑ śa॒tāyu॑ṣā ha॒viṣāhā॑rṣamenam || ४ || pra vi॑śataṃ prāṇāpānāvana॒ḍvāhā॑viva vra॒jam | vya॑१nye ya॑ntu mṛ॒tyavo॒ yānā॒hurita॑rān cha॒tam || ५ || i॒haiva staṃ॑ prāṇāpānau॒ māpa॑ gātami॒to yu॒vam | śarī॑rama॒syāṅgā॑ni ja॒rase॑ vahataṃ॒ punaḥ॑ || ६ || ja॒rāyai॑ tvā॒ pari॑ dadāmi ja॒rāyai॒ ni dhu॑vāmi tvā | ja॒rā tvā॑ bha॒drā ne॑ṣṭa॒ vya॑१nye ya॑ntu mṛ॒tyavo॒ yānā॒hurita॑rān cha॒tam || ७ || a॒bhi tvā॑ jari॒māhi॑ta॒ gāmu॒kṣaṇa॑miva॒ rajjvā | yastvā॑ mṛ॒tyura॒bhyadha॑tta॒ jāya॑mānaṃ supā॒śayā॑ | taṃ te॑ sa॒tyasya॒ hastā॑bhyā॒muda॑muñca॒d bṛha॒spatiḥ॑ || ८ ||