दीर्घायुःप्राप्तिः।
१- ५ भृग्वङ्गिराः। वनस्पतिः, यक्ष्मनाशनम्। अनुष्टुप्, १ विराट् प्रस्तारपङ्क्तिः।
दश॑वृक्ष मु॒ञ्चेमं रक्ष॑सो॒ ग्राह्या॒ अधि॒ यैनं॑ ज॒ग्राह॒ पर्व॑सु ।
अथो॑ एनं वनस्पते जी॒वानां॒ लो॒क॑मु॑न्नय ॥१॥
आगा॒दुद॑गाद॒यं जी॒वानां॒ व्रात॒मप्य॑गात्।
अभू॑दु पु॒त्राणां॑ पि॒ता नृ॒णां च॒ भग॑वत्तमः ॥२॥
अधी॑ती॒रध्य॑गाद॒यमधि॑ जीवपु॒रा अ॑गान्।
श॒तं ह्य॑स्य भि॒षजः॑ स॒हस्र॑मु॒त वी॒रुधः॑ ॥३॥
दे॒वास्ते॑ ची॒तिम॑विदन् ब्र॒ह्माण॑ उ॒त वी॒रुधः॑ ।
ची॒तिं ते॒ विश्वे॑ दे॒वा अवि॑द॒न् भूम्या॒मधि॑ ॥४॥
यश्च॒कार॒ स निष्क॑र॒त् स ए॒व सुभि॑षक्तमः ।
स ए॒व तुभ्यं॑ भेष॒जानि॑ कृ॒णव॑द् भि॒षजा॒ शुचिः॑ ॥५॥
dīrghāyuḥprāptiḥ | १- ५ bhṛgvaṅgirāḥ | vanaspatiḥ, yakṣmanāśanam | anuṣṭup, १ virāṭ prastārapaṅktiḥ | daśa॑vṛkṣa mu॒ñcemaṃ rakṣa॑so॒ grāhyā॒ adhi॒ yainaṃ॑ ja॒grāha॒ parva॑su | atho॑ enaṃ vanaspate jī॒vānāṃ॒ lo॒ka॑mu॑nnaya || १ || āgā॒duda॑gāda॒yaṃ jī॒vānāṃ॒ vrāta॒mapya॑gāt | abhū॑du pu॒trāṇāṃ॑ pi॒tā nṛ॒ṇāṃ ca॒ bhaga॑vattamaḥ || २ || adhī॑tī॒radhya॑gāda॒yamadhi॑ jīvapu॒rā a॑gān | śa॒taṃ hya॑sya bhi॒ṣajaḥ॑ sa॒hasra॑mu॒ta vī॒rudhaḥ॑ || ३ || de॒vāste॑ cī॒tima॑vidan bra॒hmāṇa॑ u॒ta vī॒rudhaḥ॑ | cī॒tiṃ te॒ viśve॑ de॒vā avi॑da॒n bhūmyā॒madhi॑ || ४ || yaśca॒kāra॒ sa niṣka॑ra॒t sa e॒va subhi॑ṣaktamaḥ | sa e॒va tubhyaṃ॑ bheṣa॒jāni॑ kṛ॒ṇava॑d bhi॒ṣajā॒ śuciḥ॑ || ५ ||