क्षेत्रियरोगनाशनम्।
१-५ भृग्वङ्गिराः। वनस्पतिः, यक्ष्म नाशनम्। अनुष्टुप्, ३ पथ्यापङ्क्तिः,
४ विराट्, ५ निचृत्पथ्यापङ्क्तिः।
उद॑गातां॒ भग॑वती वि॒चृतौ॒ नाम॒ तार॑के ।
वि क्षे॑त्रि॒यस्य॑ मुञ्चतामध॒मं पाश॑मुत्त॒मम्॥१॥
अपे॒यं रात्र्यु॑च्छ॒त्वपो॑च्छन्त्वभि॒कृत्व॑रीः ।
वी॒रुत् क्षे॑त्रिय॒नाश॒न्यप॑ क्षेत्रि॒यमु॑च्छतु ॥२॥
ब॒भ्रोरर्जु॑नकाण्डस्य॒ यव॑स्य ते पला॒ल्या तिल॑स्य तिलपि॒ञ्ज्या।
वीरुत् क्षे॑त्रिय॒नाश॒न्यप॑ क्षेत्रि॒यमु॑च्छतु ॥३॥
नम॑स्ते॒ लाङ्ग॑लेभ्यो॒ नम॑ ईषायु॒गेभ्यः॑ ।
वी॒रुत् क्षे॑त्रिय॒नाश॒न्यप॑ क्षेत्रि॒यमु॑च्छतु ॥४॥
नमः॑ सनिस्रसा॒क्षेभ्यो॒ नमः॑ संदे॒श्येऽभ्यः ।
नमः॒ क्षेत्र॑स्य॒ पत॑ये वी॒रुत् क्षे॑त्रिय॒नाश॒न्यप॑ क्षेत्रि॒यमु॑छतु ॥५॥
kṣetriyaroganāśanam | १-५ bhṛgvaṅgirāḥ | vanaspatiḥ, yakṣma nāśanam | anuṣṭup, ३ pathyāpaṅktiḥ, ४ virāṭ, ५ nicṛtpathyāpaṅktiḥ | uda॑gātāṃ॒ bhaga॑vatī vi॒cṛtau॒ nāma॒ tāra॑ke | vi kṣe॑tri॒yasya॑ muñcatāmadha॒maṃ pāśa॑mutta॒mam || १ || ape॒yaṃ rātryu॑ccha॒tvapo॑cchantvabhi॒kṛtva॑rīḥ | vī॒rut kṣe॑triya॒nāśa॒nyapa॑ kṣetri॒yamu॑cchatu || २ || ba॒bhrorarju॑nakāṇḍasya॒ yava॑sya te palā॒lyā tila॑sya tilapi॒ñjyā | vīrut kṣe॑triya॒nāśa॒nyapa॑ kṣetri॒yamu॑cchatu || ३ || nama॑ste॒ lāṅga॑lebhyo॒ nama॑ īṣāyu॒gebhyaḥ॑ | vī॒rut kṣe॑triya॒nāśa॒nyapa॑ kṣetri॒yamu॑cchatu || ४ || namaḥ॑ sanisrasā॒kṣebhyo॒ namaḥ॑ saṃde॒śye’bhyaḥ | namaḥ॒ kṣetra॑sya॒ pata॑ye vī॒rut kṣe॑triya॒nāśa॒nyapa॑ kṣetri॒yamu॑chatu || ५ ||