विश्वकर्मा।
१-५ अङ्गिराः। विश्वकर्मा। त्रिष्टुप्, १ बृहतीगर्भा, ४-५ भुरिक्।
ये भ॒क्षय॑न्तो॒ न वसू॑न्यानृ॒धुर्यान॒ग्नयो॑ अ॒न्वत॑प्यन्त॒ धिष्ण्याः॑ ।
या तेषा॑मव॒या दुरि॑ष्टिः॒ स्विऽष्टिं न॒स्तां कृ॑णवद् वि॒श्वक॑र्मा ॥१॥
य॒ज्ञप॑ति॒मृष॑यः॒ एन॑साहु॒र्निर्भ॑क्तं प्र॒जा अ॑नुत॒प्यमा॑नम्।
म॒थ॒व्या॒ऽन्त्स्तो॒कानप॒ यान् र॒राध॒ सं न॒ष्टेभिः॑ सृजतु वि॒श्वक॑र्मा ॥२॥
अ॒दा॒न्यान्त्सो॑म॒पान् मन्य॑मानो य॒ज्ञस्य॑ वि॒द्वान्त्स॑म॒ये न धीरः॑ ।
यदेन॑श्चकृ॒वान् ब॒द्ध ए॒ष तं वि॑श्वकर्म॒न् प्र मु॑ञ्चा स्व॒स्तये॑ ॥३॥
घो॒रा ऋष॑यो॒ नमो॑ अस्त्वेभ्य॒श्चक्षु॒र्यदे॑षां॒ मन॑सश्च स॒त्यम्।
बृह॒स्पत॑ये महिष द्यु॒मन्नमो॒ विश्व॑कर्म॒न् नम॑स्ते पा॒ह्य॑१स्मा॑न्॥४॥
य॒ज्ञस्य॒ चक्षुः॒ प्रभृ॑ति॒र्मुखं॑ च वा॒चा श्रोत्रे॑ण॒ मन॑सा जुहोमि ।
इ॒मं य॒ज्ञं वित॑तं वि॒श्वक॑र्म॒णा दे॒वा य॑न्तु सुमन॒स्यमा॑नाः ॥५॥
viśvakarmā | १-५ aṅgirāḥ | viśvakarmā | triṣṭup, १ bṛhatīgarbhā, ४-५ bhurik | ye bha॒kṣaya॑nto॒ na vasū॑nyānṛ॒dhuryāna॒gnayo॑ a॒nvata॑pyanta॒ dhiṣṇyāḥ॑ | yā teṣā॑mava॒yā duri॑ṣṭiḥ॒ svi’ṣṭiṃ na॒stāṃ kṛ॑ṇavad vi॒śvaka॑rmā || १ || ya॒jñapa॑ti॒mṛṣa॑yaḥ॒ ena॑sāhu॒rnirbha॑ktaṃ pra॒jā a॑nuta॒pyamā॑nam | ma॒tha॒vyā॒’ntsto॒kānapa॒ yān ra॒rādha॒ saṃ na॒ṣṭebhiḥ॑ sṛjatu vi॒śvaka॑rmā || २ || a॒dā॒nyāntso॑ma॒pān manya॑māno ya॒jñasya॑ vi॒dvāntsa॑ma॒ye na dhīraḥ॑ | yadena॑ścakṛ॒vān ba॒ddha e॒ṣa taṃ vi॑śvakarma॒n pra mu॑ñcā sva॒staye॑ || ३ || gho॒rā ṛṣa॑yo॒ namo॑ astvebhya॒ścakṣu॒ryade॑ṣāṃ॒ mana॑saśca sa॒tyam | bṛha॒spata॑ye mahiṣa dyu॒mannamo॒ viśva॑karma॒n nama॑ste pā॒hya॑१smā॑n || ४ || ya॒jñasya॒ cakṣuḥ॒ prabhṛ॑ti॒rmukhaṃ॑ ca vā॒cā śrotre॑ṇa॒ mana॑sā juhomi | i॒maṃ ya॒jñaṃ vita॑taṃ vi॒śvaka॑rma॒ṇā de॒vā ya॑ntu sumana॒syamā॑nāḥ || ५ ||