पशवः।
१-५ अथर्वा। १ पशुपतिः, २ देवाः, ३ अग्निः विश्वाकर्मा, ४ वायुः प्रजापतिः, ५ आशीः। त्रिष्टुप्।
य ईशे॑ पशु॒पतिः॑ पशू॒नां चतु॑ष्पदामु॒त यो द्वि॒पदा॑म्।
निष्क्री॑तः॒ स य॒ज्ञियं॑ भा॒गमे॑तु रा॒यस्पोषा॒ यज॑मानं सचन्ताम्॥१॥
प्र॒मु॒ञ्चन्तो॒ भुव॑नस्य॒ रेतो॑ गा॒तुं ध॑त्त॒ यज॑मानाय देवाः ।
उ॒पाकृ॑तं शशमा॒नं यदस्था॑त् प्रि॒यं दे॒वाना॒मप्ये॑तु॒ पाथः॑ ॥२॥
ये ब॒ध्यमा॑न॒मनु॒ दीध्या॑ना अ॒न्वैक्ष॑न्त॒ मन॑सा॒ चक्षु॑षा च ।
अ॒ग्निष्टानग्रे॒ प्र मु॑मोक्तु दे॒वो वि॒श्वक॑र्मा प्र॒जया॑ संररा॒णः ॥३॥
ये ग्रा॒म्याः प॒शवो॑ वि॒श्वरू॑पा विरू॑पाः सन्तो॑ बहु॒धैक॑रूपाः ।
वा॒युष्टानग्रे॒ प्र मु॑मोक्तु दे॒वः प्र॒जाप॑तिः प्र॒जया॑ संररा॒णः ॥४॥
प्र॒जा॒नन्तः॒ प्रति॑ गृह्णन्तु॒ पूर्वे॑ प्रा॒णमङ्गे॑भ्यः॒ पर्या॒चर॑न्तम्।
दिवं॑ गच्छ॒ प्रति॑ तिष्ठा॒ शरी॑रैः स्व॒र्गं या॑हि प॒थिभि॑र्देव॒यानैः॑ ॥५॥
paśavaḥ | १-५ atharvā | १ paśupatiḥ, २ devāḥ, ३ agniḥ viśvākarmā, ४ vāyuḥ prajāpatiḥ, ५ āśīḥ | triṣṭup | ya īśe॑ paśu॒patiḥ॑ paśū॒nāṃ catu॑ṣpadāmu॒ta yo dvi॒padā॑m | niṣkrī॑taḥ॒ sa ya॒jñiyaṃ॑ bhā॒game॑tu rā॒yaspoṣā॒ yaja॑mānaṃ sacantām || १ || pra॒mu॒ñcanto॒ bhuva॑nasya॒ reto॑ gā॒tuṃ dha॑tta॒ yaja॑mānāya devāḥ | u॒pākṛ॑taṃ śaśamā॒naṃ yadasthā॑t pri॒yaṃ de॒vānā॒mapye॑tu॒ pāthaḥ॑ || २ || ye ba॒dhyamā॑na॒manu॒ dīdhyā॑nā a॒nvaikṣa॑nta॒ mana॑sā॒ cakṣu॑ṣā ca | a॒gniṣṭānagre॒ pra mu॑moktu de॒vo vi॒śvaka॑rmā pra॒jayā॑ saṃrarā॒ṇaḥ || ३ || ye grā॒myāḥ pa॒śavo॑ vi॒śvarū॑pā virū॑pāḥ santo॑ bahu॒dhaika॑rūpāḥ | vā॒yuṣṭānagre॒ pra mu॑moktu de॒vaḥ pra॒jāpa॑tiḥ pra॒jayā॑ saṃrarā॒ṇaḥ || ४ || pra॒jā॒nantaḥ॒ prati॑ gṛhṇantu॒ pūrve॑ prā॒ṇamaṅge॑bhyaḥ॒ paryā॒cara॑ntam | divaṃ॑ gaccha॒ prati॑ tiṣṭhā॒ śarī॑raiḥ sva॒rgaṃ yā॑hi pa॒thibhi॑rdeva॒yānaiḥ॑ || ५ ||