क्रिमिनाशनम्।
१-६ कण्वः। आदित्यः। अनुष्टुप्, १ त्रिपाद्भुरिग्गायत्री, ६ चतुष्पान्निचृदुष्णिक्।
उ॒द्यन्ना॑दि॒त्यः क्रिमी॑न् हन्तु नि॒म्रोच॑न् हन्तु र॒श्मिभिः॑ ।
ये अ॒न्तः क्रिम॑यो॒ गवि॑ ॥१॥
वि॒श्वरू॑पं चतुर॒क्षं क्रिमिं॑ सा॒रङ्ग॒मर्जु॑नम्।
शृ॒णाम्य॑स्य पृ॒ष्टीरपि॑ वृश्चामि॒ यच्छिरः॑ ॥२॥
अ॒त्रि॒वद् वः॑ क्रिमयो हन्मि कण्व॒वज्ज॑मदग्नि॒वत्।
अ॒गस्त्य॑स्य॒ ब्रह्म॑णा॒ सं पि॑नष्म्य॒हं क्रिमी॑न्॥३॥
ह॒तो राजा॒ क्रिमी॑णामु॒तैषां॑ स्थ॒पति॑र्ह॒तः ।
ह॒तो ह॒तमा॑ता॒ क्रिमि॑र्ह॒तभ्रा॑ता ह॒तस्व॑सा ॥४॥
ह॒तासो॑ अस्य वे॒शसो॑ ह॒तासः॒ परि॑वेशसः ।
अथो॒ ये क्षु॑ल्ल॒का इ॑व॒ सर्वे॒ ते क्रिम॑यो ह॒ताः ॥५॥
प्र ते॑ शृणामि॒ शृङ्गे॒ याभ्यां॑ वितुदा॒यसि॑ ।
भि॒नाद्मि॑ ते कु॒षुम्भं॒ यस्ते॑ विष॒धानः॑ ॥६॥
krimināśanam | १-६ kaṇvaḥ | ādityaḥ | anuṣṭup, १ tripādbhuriggāyatrī, ६ catuṣpānnicṛduṣṇik | u॒dyannā॑di॒tyaḥ krimī॑n hantu ni॒mroca॑n hantu ra॒śmibhiḥ॑ | ye a॒ntaḥ krima॑yo॒ gavi॑ || १ || vi॒śvarū॑paṃ catura॒kṣaṃ krimiṃ॑ sā॒raṅga॒marju॑nam | śṛ॒ṇāmya॑sya pṛ॒ṣṭīrapi॑ vṛścāmi॒ yacchiraḥ॑ || २ || a॒tri॒vad vaḥ॑ krimayo hanmi kaṇva॒vajja॑madagni॒vat | a॒gastya॑sya॒ brahma॑ṇā॒ saṃ pi॑naṣmya॒haṃ krimī॑n || ३ || ha॒to rājā॒ krimī॑ṇāmu॒taiṣāṃ॑ stha॒pati॑rha॒taḥ | ha॒to ha॒tamā॑tā॒ krimi॑rha॒tabhrā॑tā ha॒tasva॑sā || ४ || ha॒tāso॑ asya ve॒śaso॑ ha॒tāsaḥ॒ pari॑veśasaḥ | atho॒ ye kṣu॑lla॒kā i॑va॒ sarve॒ te krima॑yo ha॒tāḥ || ५ || pra te॑ śṛṇāmi॒ śṛṅge॒ yābhyāṃ॑ vitudā॒yasi॑ | bhi॒nādmi॑ te ku॒ṣumbhaṃ॒ yaste॑ viṣa॒dhānaḥ॑ || ६ ||