क्रिमिजम्भनम्।
१-५ कण्वः। मही, चन्द्रमाः। अनुष्टुप्, २, ४ उपरिष्टाद्विराड्बृहती, ३, ५ आर्षी त्रिष्टुप्।
इन्द्र॑स्य॒ या म॒ही दृ॒षत् क्रिमे॒र्विश्व॑स्य॒ तर्ह॑णी ।
तया॑ पिनष्मि॒ सं क्रिमी॑न् दृ॒षदा॒ खल्वाँ॑ इव ॥१॥
दृ॒ष्टम॒दृष्ट॑मतृह॒मथो॑ कु॒रूरु॑मतृहम्।
अ॒ल्गण्डू॒न्त्सर्वा॑न् छ॒लुना॒न् क्रिमी॒न् वच॑सा जम्भयामसि ॥२॥
अ॒ल्गण्डू॑न् हन्मि मह॒ता व॒धेन॑ दू॒ना अदू॑ना अर॒सा अ॑भूवन्।
शि॒ष्टानशि॑ष्टा॒न् नि ति॑रामि वा॒चा यथा॒ क्रिमी॑णां॒ नकि॑रु॒च्छिषा॑तै ॥३॥
अन्वा॑न्त्र्यं शीर्ष॒ण्य॑१मथो॒ पार्ष्टे॑यं॒ क्रिमी॑न्।
अ॒व॒स्क॒वं व्य॑ध्व॒रं क्रिमी॒न् वच॑सा जम्भयामसि ॥४॥
ये क्रिम॑यः॒ पर्व॑तेशु॒ वने॒ष्वोष॑धीषु प॒शुष्व॒प्स्व॑१न्तः ।
ये अ॒स्माकं॑ त॒न्वऽमाविवि॒शुः सर्वं॒ तद्ध॑न्मि॒ जनि॑म॒ क्रिमी॑णाम्॥५॥
krimijambhanam | १-५ kaṇvaḥ | mahī, candramāḥ | anuṣṭup, २, ४ upariṣṭādvirāḍbṛhatī, ३, ५ ārṣī triṣṭup | indra॑sya॒ yā ma॒hī dṛ॒ṣat krime॒rviśva॑sya॒ tarha॑ṇī | tayā॑ pinaṣmi॒ saṃ krimī॑n dṛ॒ṣadā॒ khalvām̐॑ iva || १ || dṛ॒ṣṭama॒dṛṣṭa॑matṛha॒matho॑ ku॒rūru॑matṛham | a॒lgaṇḍū॒ntsarvā॑n cha॒lunā॒n krimī॒n vaca॑sā jambhayāmasi || २ || a॒lgaṇḍū॑n hanmi maha॒tā va॒dhena॑ dū॒nā adū॑nā ara॒sā a॑bhūvan | śi॒ṣṭānaśi॑ṣṭā॒n ni ti॑rāmi vā॒cā yathā॒ krimī॑ṇāṃ॒ naki॑ru॒cchiṣā॑tai || ३ || anvā॑ntryaṃ śīrṣa॒ṇya॑१matho॒ pārṣṭe॑yaṃ॒ krimī॑n | a॒va॒ska॒vaṃ vya॑dhva॒raṃ krimī॒n vaca॑sā jambhayāmasi || ४ || ye krima॑yaḥ॒ parva॑teśu॒ vane॒ṣvoṣa॑dhīṣu pa॒śuṣva॒psva॑१ntaḥ | ye a॒smākaṃ॑ ta॒nva’māvivi॒śuḥ sarvaṃ॒ taddha॑nmi॒ jani॑ma॒ krimī॑ṇām || ५ ||