पृश्निपर्णी।
१-५ चातनः। पृश्निपर्णी वनस्पतिः। अनुष्टुप्, ४ भुरिक्।
शं नो॑ दे॒वी पृ॑श्निप॒र्ण्यशं॒ निरृ॑त्या अकः ।
उ॒ग्रा हि क॑ण्व॒जम्भ॑नी॒ ताम॑भक्षि॒ सह॑स्वतीम्॥१॥
सह॑माने॒यं प्र॑थ॒मा पृ॑श्निप॒र्ण्यऽजायत ।
तया॒हं दु॒र्णाम्नां॒ शिरो॑ वृ॒श्चामि॑ श॒कुने॑रिव ॥२॥
अ॒राय॑मसृ॒क्पावा॑नं॒ यश्च॑ स्फा॒तिं जिही॑र्षति ।
ग॒र्भा॒दं कण्वं॑ नाशय॒ पृश्नि॑पर्णि॒ सह॑स्व च ॥३॥
गि॒रिमे॑नाँ॒ आ वे॑शय॒ कण्वा॑न् जीवित॒योप॑नान्।
तांस्त्वं दे॑वि पृश्निपर्ण्य॒ग्निरि॑वानु॒दह॑न्निहि ॥४॥
परा॑च एना॒न् प्र णु॑द॒ कण्वा॑न् जीवित॒योप॑नान्।
तमां॑सि॒ यत्र॒ गच्छ॑न्ति॒ तत् क्र॒व्यादो॑ अजीगमम्॥५॥
pṛśniparṇī | १-५ cātanaḥ | pṛśniparṇī vanaspatiḥ | anuṣṭup, ४ bhurik | śaṃ no॑ de॒vī pṛ॑śnipa॒rṇyaśaṃ॒ nirṛ॑tyā akaḥ | u॒grā hi ka॑ṇva॒jambha॑nī॒ tāma॑bhakṣi॒ saha॑svatīm || १ || saha॑māne॒yaṃ pra॑tha॒mā pṛ॑śnipa॒rṇya’jāyata | tayā॒haṃ du॒rṇāmnāṃ॒ śiro॑ vṛ॒ścāmi॑ śa॒kune॑riva || २ || a॒rāya॑masṛ॒kpāvā॑naṃ॒ yaśca॑ sphā॒tiṃ jihī॑rṣati | ga॒rbhā॒daṃ kaṇvaṃ॑ nāśaya॒ pṛśni॑parṇi॒ saha॑sva ca || ३ || gi॒rime॑nām॒̐ ā ve॑śaya॒ kaṇvā॑n jīvita॒yopa॑nān | tāṃstvaṃ de॑vi pṛśniparṇya॒gniri॑vānu॒daha॑nnihi || ४ || parā॑ca enā॒n pra ṇu॑da॒ kaṇvā॑n jīvita॒yopa॑nān | tamāṃ॑si॒ yatra॒ gaccha॑nti॒ tat kra॒vyādo॑ ajīgamam || ५ ||