दीर्घायुःप्राप्तिः।
१-५ अथर्वा। अग्निः, २-३ बृहस्पतिः, ४-५ विश्वे देवाः। त्रिष्टुप्, ४ अनुष्टुप्, ५ विराड् जगती।
आ॒युर्दा अ॑ग्ने ज॒रसं॑ वृणा॒नो घृ॒तप्र॑तीको घृ॒तपृ॑ष्ठो अग्ने ।
घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रान॒भि र॑क्षतादि॒मम्॥१॥
परि॑ धत्त ध॒त्त नो॒ वर्च॑से॒मं ज॒रामृ॑त्युं कृणुत दी॒र्घमायुः॑ ।
बृह॒स्पतिः॒ प्राय॑च्छ॒द् वास॑ ए॒तत् सोमा॑य॒ राज्ञे॒ परि॑धात॒वा उ॑ ॥२॥
परी॒दं वासो॑ अधिथाः स्व॒स्तयेऽभू॑र्गृष्टी॒नाम॑भिशस्ति॒पा उ॑ ।
श॒तं च॒ जीव॑ श॒रदः॑ पुरू॒ची रा॒यश्च॒ पोष॑मुप॒संव्य॑यस्व ॥३॥
एह्यश्मा॑न॒मा ति॒ष्ठाश्मा॑ भवतु ते त॒नूः ।
कृ॒ण्वन्तु॒ विश्वे॑ दे॒वा आयु॑ष्टे श॒रदः॑ श॒तम्॥४॥
यस्य॑ ते॒ वासः॑ प्रथमवा॒स्यं॑१ हरा॑म॒स्तं त्वा॒ विश्वे॑ऽवन्तु दे॒वाः ।
तं त्वा॒ भ्रात॑रः सु॒वृधा॒ वर्ध॑मान॒मनु॑ जातन्तां ब॒हवः॒ सुजा॑तम्॥५॥
dīrghāyuḥprāptiḥ | १-५ atharvā | agniḥ, २-३ bṛhaspatiḥ, ४-५ viśve devāḥ | triṣṭup, ४ anuṣṭup, ५ virāḍ jagatī | ā॒yurdā a॑gne ja॒rasaṃ॑ vṛṇā॒no ghṛ॒tapra॑tīko ghṛ॒tapṛ॑ṣṭho agne | ghṛ॒taṃ pī॒tvā madhu॒ cāru॒ gavyaṃ॑ pi॒teva॑ pu॒trāna॒bhi ra॑kṣatādi॒mam || १ || pari॑ dhatta dha॒tta no॒ varca॑se॒maṃ ja॒rāmṛ॑tyuṃ kṛṇuta dī॒rghamāyuḥ॑ | bṛha॒spatiḥ॒ prāya॑ccha॒d vāsa॑ e॒tat somā॑ya॒ rājñe॒ pari॑dhāta॒vā u॑ || २ || parī॒daṃ vāso॑ adhithāḥ sva॒staye’bhū॑rgṛṣṭī॒nāma॑bhiśasti॒pā u॑ | śa॒taṃ ca॒ jīva॑ śa॒radaḥ॑ purū॒cī rā॒yaśca॒ poṣa॑mupa॒saṃvya॑yasva || ३ || ehyaśmā॑na॒mā ti॒ṣṭhāśmā॑ bhavatu te ta॒nūḥ | kṛ॒ṇvantu॒ viśve॑ de॒vā āyu॑ṣṭe śa॒radaḥ॑ śa॒tam || ४ || yasya॑ te॒ vāsaḥ॑ prathamavā॒syaṃ॑१ harā॑ma॒staṃ tvā॒ viśve॑’vantu de॒vāḥ | taṃ tvā॒ bhrāta॑raḥ su॒vṛdhā॒ vardha॑māna॒manu॑ jātantāṃ ba॒havaḥ॒ sujā॑tam || ५ ||