विजयाय प्रार्थना।
१-४ अथर्वा। १ वसवः, इन्द्रः, पूषा, वरुणः, मित्रः, अग्निः, आदित्याः, विश्वेदेवाः, २ देवाः, सूर्यः, अग्निः, हिरण्यं, ३-४ अग्निः (जातवेदाः)। त्रिष्टुप्।
अ॒स्मिन् वसु॒ वस॑वो धारय॒न्त्विन्द्रः॑ पू॒षा वरु॑णो मि॒त्रो अ॒ग्निः ।
इ॒ममा॑दि॒त्या उ॒त॒ विश्वे॑ च दे॒वा उत्त॑रस्मि॒न् ज्योति॑षि धारयन्तु ॥१॥
अ॒स्य दे॑वाः प्र॒दिशि॒ ज्यो॑तिरस्तु॒ सूर्यो॑ अ॒ग्निरु॒त वा॒ हिर॑ण्यम्।
स॒पत्ना॑ अ॒स्मदध॑रे भवन्तूत्त॒मं नाक॒मधि॑ रोहये॒मम्॥२॥
येनेन्द्रा॑य स॒मभ॑रः॒ पयां॑स्युत्त॒मेन॒ ब्रह्म॑णा जातवेदः ।
तेन॒ त्वम॑ग्न इ॒ह व॑र्धये॒मं स॑जा॒तानां॒ श्रैष्ठ्य॒ आ धे॑ह्येनम्॥३॥
ऐषां॑ य॒ज्ञमु॒त वर्चो॑ ददे॒ऽहं रा॒यस्पोष॑मु॒त चि॒त्तान्य॑ग्ने ।
स॒पत्ना॑ अ॒स्मदध॑रे भवन्तूत्त॒मं नाक॒मधि॑ रोहये॒मम्॥४॥
vijayāya prārthanā | १-४ atharvā | १ vasavaḥ, indraḥ, pūṣā, varuṇaḥ, mitraḥ, agniḥ, ādityāḥ, viśvedevāḥ, २ devāḥ, sūryaḥ, agniḥ, hiraṇyaṃ, ३-४ agniḥ (jātavedāḥ) | triṣṭup | a॒smin vasu॒ vasa॑vo dhāraya॒ntvindraḥ॑ pū॒ṣā varu॑ṇo mi॒tro a॒gniḥ | i॒mamā॑di॒tyā u॒ta॒ viśve॑ ca de॒vā utta॑rasmi॒n jyoti॑ṣi dhārayantu || १ || a॒sya de॑vāḥ pra॒diśi॒ jyo॑tirastu॒ sūryo॑ a॒gniru॒ta vā॒ hira॑ṇyam | sa॒patnā॑ a॒smadadha॑re bhavantūtta॒maṃ nāka॒madhi॑ rohaye॒mam || २ || yenendrā॑ya sa॒mabha॑raḥ॒ payāṃ॑syutta॒mena॒ brahma॑ṇā jātavedaḥ | tena॒ tvama॑gna i॒ha va॑rdhaye॒maṃ sa॑jā॒tānāṃ॒ śraiṣṭhya॒ ā dhe॑hyenam || ३ || aiṣāṃ॑ ya॒jñamu॒ta varco॑ dade॒’haṃ rā॒yaspoṣa॑mu॒ta ci॒ttānya॑gne | sa॒patnā॑ a॒smadadha॑re bhavantūtta॒maṃ nāka॒madhi॑ rohaye॒mam || ४ ||