अपां भेषजम्।
१-४ सिन्धुद्वीपः।(अथर्वा कृतिर्वा)। (अपांनपात्,) आपः, २ आपः सोमोऽग्निश्च। गायत्री, ४ पथ्यापङ्क्तिः।
शं नो॑ दे॒वीर॒भिष्ट॑य॒ आपो॑ भवन्तु पी॒तये॑ । शं योर॒भि स्र॑वन्तु नः ॥१॥
अ॒प्सु मे॒ सोमो॑ अब्रवीद॒न्तर्विश्वा॑नि भेष॒जा।अ॒ग्निं च॑ वि॒श्वशं॑ भुवम्॥२॥
आपः॑ पृणी॒त भे॑ष॒जं वरू॑थं त॒न्वे॒३ म॑म । ज्योक् च॒ सूर्यं॑ दृ॒शे॑॥३॥
शं न॒ आपो॑ धन्व॒न्या॒३ शमु॑ सन्त्वनू॒प्याः ।
शं नः॑ खनि॒त्रिमा॒ आपः॒ शमु॒ याः कु॒म्भ आभृ॑ताः शि॒वा नः॑ सन्तु॒ वार्षि॑कीः॥४॥
apāṃ bheṣajam | १-४ sindhudvīpaḥ | (atharvā kṛtirvā) | (apāṃnapāt,) āpaḥ, २ āpaḥ somo’gniśca | gāyatrī, ४ pathyāpaṅktiḥ | śaṃ no॑ de॒vīra॒bhiṣṭa॑ya॒ āpo॑ bhavantu pī॒taye॑ | śaṃ yora॒bhi sra॑vantu naḥ || १ || a॒psu me॒ somo॑ abravīda॒ntarviśvā॑ni bheṣa॒jā | a॒gniṃ ca॑ vi॒śvaśaṃ॑ bhuvam || २ || āpaḥ॑ pṛṇī॒ta bhe॑ṣa॒jaṃ varū॑thaṃ ta॒nve॒३ ma॑ma | jyok ca॒ sūryaṃ॑ dṛ॒śe॑ || ३ || śaṃ na॒ āpo॑ dhanva॒nyā॒३ śamu॑ santvanū॒pyāḥ | śaṃ naḥ॑ khani॒trimā॒ āpaḥ॒ śamu॒ yāḥ ku॒mbha ābhṛ॑tāḥ śi॒vā naḥ॑ santu॒ vārṣi॑kīḥ || ४ ||