मधुविद्या।
१-५ अथर्वा।मधुवनस्पतिः। अनुष्टुप्।
इ॒यं वी॒रुन्मधु॑जाता॒ मधु॑ना त्वा खनामसि ।
मधो॒रधि॒ प्रजा॑तासि॒ सा नो॒ मधु॑मतस्कृधि ॥१॥
जि॒ह्वाया॒ अग्रे॒ मधु॑ मे जिह्वामू॒ले म॒धूल॑कम्।
ममेदह॒ क्रता॒वसो॒ मम॑ चि॒त्तमु॒पाय॑सि ॥२॥
मधु॑मन्मे नि॒क्रम॑णं॒ मधु॑मन्मे प॒राय॑णम्।
वा॒चा व॑दामि॒ मधु॑मद् भू॒यासं॒ मधु॑संदृशः ॥३॥
मधो॑रस्मि॒ मधु॑तरो म॒दुघा॒न्मधु॑मत्तरः ।
मामित् किल॒ त्वं वनाः॒ शाखां॒ मधु॑मतीमिव ॥४॥
परि॑ त्वा परित॒त्नुने॒क्षुणा॑गा॒मवि॑द्विषे ।
यथा॒ मां का॒मिन्यसो॒ यथा॒ मन्नाप॑गा॒ असः॑ ॥५॥
madhuvidyā | १-५ atharvā | madhuvanaspatiḥ | anuṣṭup | i॒yaṃ vī॒runmadhu॑jātā॒ madhu॑nā tvā khanāmasi | madho॒radhi॒ prajā॑tāsi॒ sā no॒ madhu॑mataskṛdhi || १ || ji॒hvāyā॒ agre॒ madhu॑ me jihvāmū॒le ma॒dhūla॑kam | mamedaha॒ kratā॒vaso॒ mama॑ ci॒ttamu॒pāya॑si || २ || madhu॑manme ni॒krama॑ṇaṃ॒ madhu॑manme pa॒rāya॑ṇam | vā॒cā va॑dāmi॒ madhu॑mad bhū॒yāsaṃ॒ madhu॑saṃdṛśaḥ || ३ || madho॑rasmi॒ madhu॑taro ma॒dughā॒nmadhu॑mattaraḥ | māmit kila॒ tvaṃ vanāḥ॒ śākhāṃ॒ madhu॑matīmiva || ४ || pari॑ tvā parita॒tnune॒kṣuṇā॑gā॒mavi॑dviṣe | yathā॒ māṃ kā॒minyaso॒ yathā॒ mannāpa॑gā॒ asaḥ॑ || ५ ||