मूत्रमोचनम्।
१-९ अथर्वा। १ पर्जन्यः, २ मित्रः, ३ वरुणः, ४ चन्द्रः, ५ सूर्यः, (१-९ मूत्रमोचनम्)। अनुष्टुप्, १-५ पथ्यापङ्क्तिः।
वि॒द्मा श॒रस्य॑ पि॒तरं॑ प॒र्जन्यं॑ श॒तवृ॑ष्ण्यम् ।
तेना॑ ते त॒न्वे॒३शं क॑रं पृथि॒व्यां ते॑ नि॒षेच॑नं ब॒हिष्टे॑ अस्तु॒ बालिति॑ ॥१॥
वि॒द्मा श॒रस्य॑ पि॒तरं॑ मि॒त्रं श॒तवृ॑ष्ण्यम् ।
ते॑ना ते त॒न्वे॒३ शं क॑रं पृथि॒व्यां ते॑ नि॒षेच॑नं ब॒हिष्टे॑ अस्तु॒ बालिति॑ ॥२॥
वि॒द्मा श॒रस्य॑ पि॒तरं॒ वरु॑णं श॒तवृ॑ष्ण्यम् ।
तेना॑ ते त॒न्वे॒३ शं क॑रं पृथि॒व्यां ते॑ नि॒षेच॑नं ब॒हिष्टे॑ अस्तु॒ बालिति॑ ॥३॥
वि॒द्मा श॒रस्य॑ पि॒तरं॑ च॒न्द्रं श॒तवृ॑ष्ण्यम् ।
तेना॑ ते त॒न्वे॒३ शं क॑रं पृथि॒व्यां ते॑ नि॒षेच॑नं ब॒हिष्टे॑ अस्तु॒ बालिति॑ ॥४॥
वि॒द्मा श॒रस्य॑ पि॒तरं॒ सूर्यं॑ श॒तवृ॑ष्ण्यम् ।
तेना॑ ते त॒न्वे॒३ शं क॑रं पृथि॒व्यां ते॑ नि॒षेच॑नं ब॒हिष्टे॑ अस्तु॒ बालिति॑ ॥५॥
यदा॒न्त्रेषु॑ गवी॒न्योर्यद्व॒स्तावधि॒ संश्रु॑तम् ।
ए॒वा ते॒ मूत्रं॑ मुच्यतां ब॒हिर्बालिति॑ सर्व॒कम्॥६॥
प्र ते॑ भिनद्मि॒ मेह॑नं॒ वर्त्रं॑ वेश॒न्त्या इ॑व ।
ए॒वा ते॒ मूत्रं॑ मुच्यतां ब॒हिर्बालिति॑ सर्व॒कम्॥७॥
विषि॑तं ते वस्तिबि॒लं स॑मु॒द्रस्यो॑द॒धेरि॑व ।
ए॒वा ते॒ मूत्रं॑ मुच्यतां ब॒हिर्बालिति॑ सर्व॒कम्॥८॥
यथे॑षु॒का प॒राप॑त॒दव॑सृ॒ष्टाधि॒ धन्व॑नः ।
ए॒वा ते॒ मूत्रं॑ मुच्यतां ब॒हिर्बालिति॑ सर्व॒कम्॥९॥
mūtramocanam | १-९ atharvā | १ parjanyaḥ, २ mitraḥ, ३ varuṇaḥ, ४ candraḥ, ५ sūryaḥ, (१-९ mūtramocanam) | anuṣṭup, १-५ pathyāpaṅktiḥ | vi॒dmā śa॒rasya॑ pi॒taraṃ॑ pa॒rjanyaṃ॑ śa॒tavṛ॑ṣṇyam | tenā॑ te ta॒nve॒३śaṃ ka॑raṃ pṛthi॒vyāṃ te॑ ni॒ṣeca॑naṃ ba॒hiṣṭe॑ astu॒ bāliti॑ || १ || vi॒dmā śa॒rasya॑ pi॒taraṃ॑ mi॒traṃ śa॒tavṛ॑ṣṇyam | te॑nā te ta॒nve॒३ śaṃ ka॑raṃ pṛthi॒vyāṃ te॑ ni॒ṣeca॑naṃ ba॒hiṣṭe॑ astu॒ bāliti॑ || २ || vi॒dmā śa॒rasya॑ pi॒taraṃ॒ varu॑ṇaṃ śa॒tavṛ॑ṣṇyam | tenā॑ te ta॒nve॒३ śaṃ ka॑raṃ pṛthi॒vyāṃ te॑ ni॒ṣeca॑naṃ ba॒hiṣṭe॑ astu॒ bāliti॑ || ३ || vi॒dmā śa॒rasya॑ pi॒taraṃ॑ ca॒ndraṃ śa॒tavṛ॑ṣṇyam | tenā॑ te ta॒nve॒३ śaṃ ka॑raṃ pṛthi॒vyāṃ te॑ ni॒ṣeca॑naṃ ba॒hiṣṭe॑ astu॒ bāliti॑ || ४ || vi॒dmā śa॒rasya॑ pi॒taraṃ॒ sūryaṃ॑ śa॒tavṛ॑ṣṇyam | tenā॑ te ta॒nve॒३ śaṃ ka॑raṃ pṛthi॒vyāṃ te॑ ni॒ṣeca॑naṃ ba॒hiṣṭe॑ astu॒ bāliti॑ || ५ || yadā॒ntreṣu॑ gavī॒nyoryadva॒stāvadhi॒ saṃśru॑tam | e॒vā te॒ mūtraṃ॑ mucyatāṃ ba॒hirbāliti॑ sarva॒kam || ६ || pra te॑ bhinadmi॒ meha॑naṃ॒ vartraṃ॑ veśa॒ntyā i॑va | e॒vā te॒ mūtraṃ॑ mucyatāṃ ba॒hirbāliti॑ sarva॒kam || ७ || viṣi॑taṃ te vastibi॒laṃ sa॑mu॒drasyo॑da॒dheri॑va | e॒vā te॒ mūtraṃ॑ mucyatāṃ ba॒hirbāliti॑ sarva॒kam || ८ || yathe॑ṣu॒kā pa॒rāpa॑ta॒dava॑sṛ॒ṣṭādhi॒ dhanva॑naḥ | e॒vā te॒ mūtraṃ॑ mucyatāṃ ba॒hirbāliti॑ sarva॒kam || ९ ||