ज्वर-नाशनम्।
१-४ भृग्वङ्गिराः । यक्ष्मनाशनोऽग्निः। त्रिष्टुप्,२-३ विराड् गर्भा, ४पुरोऽनुष्टुप्।
यद॒ग्निरापो॒ अद॑हत् प्र॒विश्य॒ यत्राकृ॑ण्वन् धर्म॒धृतो॒ नमां॑सि ।
तत्र॑ त आहुः पर॒मं ज॒नित्रं॒ स नः॑ संवि॒द्वान् परि॑ वृङ्ग्धि तक्मन्॥१॥
यद्य॒र्चि॑र्यदि॒ वासि॑ शो॒चिः श॑कल्ये॒षि यदि॑ वा ते ज॒नित्र॑म्।
ह्रूडु॒र्नामा॑सि हरितस्य देव॒ स नः॑ संवि॒द्वान् परि॑ वृङ्ग्धि तक्मन्॥२॥
यदि॑ शो॒को यदि॑ वाभिशो॒को यदि॑ वा॒ राज्ञो॒ वरु॑ण॒स्यासि॑ पु॒त्रः ।
ह्रू॒डु॒र्नामा॑सि हरितस्य देव॒ स नः॑ संवि॒द्वान् परि॑ वृङ्ग्धि तक्मन्॥३॥
नमः॑ शी॒ताय॑ त॒क्मने॒ नमो॑ रू॒राय॑ शो॒चिषे॑ कृणोमि ।
यो अ॑न्ये॒द्युरु॑भय॒द्युर॒भ्येति॒ तृती॑यकाय॒ नमो॑ अस्तु त॒क्मने॑ ॥४॥
jvara-nāśanam | १-४ bhṛgvaṅgirāḥ | yakṣmanāśano’gniḥ | triṣṭup,२-३ virāḍ garbhā, ४puro’nuṣṭup | yada॒gnirāpo॒ ada॑hat pra॒viśya॒ yatrākṛ॑ṇvan dharma॒dhṛto॒ namāṃ॑si | tatra॑ ta āhuḥ para॒maṃ ja॒nitraṃ॒ sa naḥ॑ saṃvi॒dvān pari॑ vṛṅgdhi takman || १ || yadya॒rci॑ryadi॒ vāsi॑ śo॒ciḥ śa॑kalye॒ṣi yadi॑ vā te ja॒nitra॑m | hrūḍu॒rnāmā॑si haritasya deva॒ sa naḥ॑ saṃvi॒dvān pari॑ vṛṅgdhi takman || २ || yadi॑ śo॒ko yadi॑ vābhiśo॒ko yadi॑ vā॒ rājño॒ varu॑ṇa॒syāsi॑ pu॒traḥ | hrū॒ḍu॒rnāmā॑si haritasya deva॒ sa naḥ॑ saṃvi॒dvān pari॑ vṛṅgdhi takman || ३ || namaḥ॑ śī॒tāya॑ ta॒kmane॒ namo॑ rū॒rāya॑ śo॒ciṣe॑ kṛṇomi | yo a॑nye॒dyuru॑bhaya॒dyura॒bhyeti॒ tṛtī॑yakāya॒ namo॑ astu ta॒kmane॑ || ४ ||