पुष्टिकर्म।
१-४ अथर्वा। सिन्धवः,(वाताः, पतत्रिणः)। अनुष्टुप्, १-२ भुरिक्पथ्या पङ्क्तिः।
सं सं स्र॑वन्तु॒ सिन्ध॑वः॒ सं वाताः॒ सं प॑त॒त्रिणः॑ ।
इ॒मं य॒ज्ञं प्र॒दिवो॑ मे जुषन्तां संस्रा॒व्येण ह॒विषा॑ जुहोमि ॥१॥
इ॒हैव हव॒मा या॑त म इ॒ह सं॑स्रावणा उ॒तेमं व॑र्धयता गिरः ।
इ॒हैतु॒ सर्वो॒ यः प॒शुर॒स्मिन् ति॑ष्ठतु॒ या र॒यिः ॥२॥
ये न॒दीनां॑ सं॒स्रव॒न्त्युत्सा॑सः॒ सद॒मक्षि॑ताः ।
तेभि॑र्मे॒ सर्वैः॑ संस्रा॒वैर्धनं॒ सं स्रा॑वयामसि ॥३॥
ये स॒र्पिषः॑ सं॒स्रव॑न्ति क्षी॒रस्य॑ चोद॒कस्य॑ च ।
तेभि॑र्मे॒ सर्वैः॑ संस्रा॒वैर्धनं॒ सं स्रा॑वयामसि ॥४॥
puṣṭikarma | १-४ atharvā | sindhavaḥ,(vātāḥ, patatriṇaḥ) | anuṣṭup, १-२ bhurikpathyā paṅktiḥ | saṃ saṃ sra॑vantu॒ sindha॑vaḥ॒ saṃ vātāḥ॒ saṃ pa॑ta॒triṇaḥ॑ | i॒maṃ ya॒jñaṃ pra॒divo॑ me juṣantāṃ saṃsrā॒vyeṇa ha॒viṣā॑ juhomi || १ || i॒haiva hava॒mā yā॑ta ma i॒ha saṃ॑srāvaṇā u॒temaṃ va॑rdhayatā giraḥ | i॒haitu॒ sarvo॒ yaḥ pa॒śura॒smin ti॑ṣṭhatu॒ yā ra॒yiḥ || २ || ye na॒dīnāṃ॑ saṃ॒srava॒ntyutsā॑saḥ॒ sada॒makṣi॑tāḥ | tebhi॑rme॒ sarvaiḥ॑ saṃsrā॒vairdhanaṃ॒ saṃ srā॑vayāmasi || ३ || ye sa॒rpiṣaḥ॑ saṃ॒srava॑nti kṣī॒rasya॑ coda॒kasya॑ ca | tebhi॑rme॒ sarvaiḥ॑ saṃsrā॒vairdhanaṃ॒ saṃ srā॑vayāmasi || ४ ||