विद्युत्।
१-४ भृग्वङ्गिराः। विद्युत्। अनुष्टुप्, ३ चतुष्पाद्विराड् जगती, ४ त्रिष्टुप्परा बृहतीगर्भा पङ्क्तिः।
नम॑स्ते अस्तु वि॒द्युते॒ नम॑स्ते स्तनयि॒त्नवे ।
नम॑स्ते अ॒स्त्वश्म॑ने॒ येना॑ दू॒डाशे॒ अस्य॑सि ॥१॥
नम॑स्ते प्रवतो नपा॒द्यत॒स्तपः॑ स॒मूह॑सि ।
मृ॒डया॑ नस्त॒नूभ्यो॒ मय॑स्तो॒केभ्य॑स्कृधि ॥२॥
प्रव॑तो नपा॒न्नम॑ ए॒वास्तु॒ तुभ्यं॒ नम॑स्ते हे॒तये॒ तपु॑षे च कृण्मः ।
वि॒द्म ते॒ धाम॑ पर॒मं गुहा॒ यत् स॑मु॒द्रे अ॒न्तर्नि॑हि॑तासि॒ नाभिः॑ ॥३॥
यां त्वा॑ दे॒वा असृ॑जन्त॒ विश्व॒ इषुं॑ कृण्वा॒ना अस॑नाय धृ॒ष्णुम्।
सा नो॑ मृड वि॒दथे॑ गृणा॒ना तस्यै॑ ते॒ नमो॑ अस्तु देवि ॥४॥
vidyut | १-४ bhṛgvaṅgirāḥ | vidyut | anuṣṭup, ३ catuṣpādvirāḍ jagatī, ४ triṣṭupparā bṛhatīgarbhā paṅktiḥ | nama॑ste astu vi॒dyute॒ nama॑ste stanayi॒tnave | nama॑ste a॒stvaśma॑ne॒ yenā॑ dū॒ḍāśe॒ asya॑si || १ || nama॑ste pravato napā॒dyata॒stapaḥ॑ sa॒mūha॑si | mṛ॒ḍayā॑ nasta॒nūbhyo॒ maya॑sto॒kebhya॑skṛdhi || २ || prava॑to napā॒nnama॑ e॒vāstu॒ tubhyaṃ॒ nama॑ste he॒taye॒ tapu॑ṣe ca kṛṇmaḥ | vi॒dma te॒ dhāma॑ para॒maṃ guhā॒ yat sa॑mu॒dre a॒ntarni॑hi॑tāsi॒ nābhiḥ॑ || ३ || yāṃ tvā॑ de॒vā asṛ॑janta॒ viśva॒ iṣuṃ॑ kṛṇvā॒nā asa॑nāya dhṛ॒ṣṇum | sā no॑ mṛḍa vi॒dathe॑ gṛṇā॒nā tasyai॑ te॒ namo॑ astu devi || ४ ||