यक्ष्मनाशनम्।
१-४ भृग्वङ्गिराः। यक्ष्मनाशनम्। जगती(त्रिष्टुप्), ४ अनुष्टुप्।
ज॒रा॒यु॒जः प्र॑थ॒म उ॒स्रियो॒ वृषा॒ वात॑भ्रजा स्त॒नय॑न्नेति वृ॒ष्ट्या।
स नो॑ मृडाति त॒न्व ऋजु॒गो रु॒जन् य एक॒मोज॑स्त्रे॒धा वि॑चक्र॒मे॥१॥
अङ्गे॑ अङ्गे शो॒चिषा॑ शिश्रिया॒णं न॑म॒स्यन्त॑स्त्वा ह॒विषा॑ विधेम ।
अ॒ङ्कान्त्स॑म॒ङ्कान् ह॒विषा॑ विधेम॒ यो अग्र॑भी॒त् पर्वा॑स्या॒ ग्रभी॑ता ॥२॥
मु॒ञ्च शी॑र्ष॒क्त्या उ॒त का॒स ए॑नं॒ परु॑ष्परुरावि॒वेशा॒ यो अ॑स्य ।
यो अ॑भ्र॒जा वा॑त॒जा यश्च॒ शुष्मो॒ वन॒स्पती॑न्त्सचतां॒ पर्व॑तांश्च ॥३॥
शं मे॒ पर॑स्मै॒ गात्रा॑य॒ शम॒स्त्वव॑राय मे ।
शं मे॑ च॒तुर्भ्यो॒ अङ्गे॑भ्यः॒ शम॑स्तु त॒न्वे॒३मम॑ ॥४॥
yakṣmanāśanam | १-४ bhṛgvaṅgirāḥ | yakṣmanāśanam | jagatī(triṣṭup), ४ anuṣṭup | ja॒rā॒yu॒jaḥ pra॑tha॒ma u॒sriyo॒ vṛṣā॒ vāta॑bhrajā sta॒naya॑nneti vṛ॒ṣṭyā | sa no॑ mṛḍāti ta॒nva ṛju॒go ru॒jan ya eka॒moja॑stre॒dhā vi॑cakra॒me || १ || aṅge॑ aṅge śo॒ciṣā॑ śiśriyā॒ṇaṃ na॑ma॒syanta॑stvā ha॒viṣā॑ vidhema | a॒ṅkāntsa॑ma॒ṅkān ha॒viṣā॑ vidhema॒ yo agra॑bhī॒t parvā॑syā॒ grabhī॑tā || २ || mu॒ñca śī॑rṣa॒ktyā u॒ta kā॒sa e॑naṃ॒ paru॑ṣparurāvi॒veśā॒ yo a॑sya | yo a॑bhra॒jā vā॑ta॒jā yaśca॒ śuṣmo॒ vana॒spatī॑ntsacatāṃ॒ parva॑tāṃśca || ३ || śaṃ me॒ para॑smai॒ gātrā॑ya॒ śama॒stvava॑rāya me | śaṃ me॑ ca॒turbhyo॒ aṅge॑bhyaḥ॒ śama॑stu ta॒nve॒३mama॑ || ४ ||