EeseDharmaSanātana Library
9अध्याय 9
Śukla Yajurveda Mādhyaṃdina ka Adhyay 9.
40 shlokदेव॑ सवित॒: प्रसु॑व य॒ज्ञं प्रसु॑व य॒ज्ञप॑तिं॒ भगा॑य ।
दि॒व्यो ग॑न्ध॒र्वः के॑तु॒पूः केतं॑ नः पुनातु वा॒चस्पति॒र्वाजं॑ नः स्वदतु॒ स्वाहा॑ ।। १ ।।
deva॑ savita॒: prasu॑va ya॒jñaṃ prasu॑va ya॒jñapa॑tiṃ॒ bhagā॑ya | di॒vyo ga॑ndha॒rvaḥ ke॑tu॒pūḥ ketaṃ॑ naḥ punātu vā॒caspati॒rvājaṃ॑ naḥ svadatu॒ svāhā॑ | | १ | |
ध्रु॑व॒सदं॑ त्वा नृ॒षदं॑ मन॒:सद॑मुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् ।
अ॑प्सु॒षदं॑ त्वा घृत॒सदं॑ व्योम॒सद॑मुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् ।
पृथि॒वी॒सदं॑ त्वाऽन्तरिक्ष॒सदं॑ दिवि॒सदं॑ देव॒सदं॑ नाक॒सद॑मुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् ।। २ ।।
dhru॑va॒sadaṃ॑ tvā nṛ॒ṣadaṃ॑ mana॒:sada॑mupayā॒magṛ॑hīto॒’sīndrā॑ya tvā॒ juṣṭaṃ॑ gṛhṇāmye॒ṣa te॒ yoni॒rindrā॑ya tvā॒ juṣṭa॑tamam | a॑psu॒ṣadaṃ॑ tvā ghṛta॒sadaṃ॑ vyoma॒sada॑mupayā॒magṛ॑hīto॒’sīndrā॑ya tvā॒ juṣṭaṃ॑ gṛhṇāmye॒ṣa te॒ yoni॒rindrā॑ya tvā॒ juṣṭa॑tamam | pṛthi॒vī॒sadaṃ॑ tvā’ntarikṣa॒sadaṃ॑ divi॒sadaṃ॑ deva॒sadaṃ॑ nāka॒sada॑mupayā॒magṛ॑hīto॒’sīndrā॑ya tvā॒ juṣṭaṃ॑ gṛhṇāmye॒ṣa te॒ yoni॒rindrā॑ya tvā॒ juṣṭa॑tamam | | २ | |
अ॒पाᳪ रस॒मुद्व॑यस॒ᳪ सूर्ये॒ सन्त॑ᳪ स॒माहि॑तम् । अ॒पाᳪ रस॑स्य॒ यो रस॒स्तं वो॑ गृह्णाम्युत्त॒ममु॑पया॒मगृ॑हीतो॒ सीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् ।। ३ ।।
a॒pāᳪ rasa॒mudva॑yasa॒ᳪ sūrye॒ santa॑ᳪ sa॒māhi॑tam | a॒pāᳪ rasa॑sya॒ yo rasa॒staṃ vo॑ gṛhṇāmyutta॒mamu॑payā॒magṛ॑hīto॒ sīndrā॑ya tvā॒ juṣṭaṃ॑ gṛhṇāmye॒ṣa te॒ yoni॒rindrā॑ya tvā॒ juṣṭa॑tamam | | ३ | |
ग्रहा॑ ऊर्जाहुतयो॒ व्यन्तो॒ विप्रा॑य म॒तिम् । तेषां॒ विशि॑प्रियाणां वो॒ऽहमिष॒मूर्ज॒ᳪ सम॑ग्रभमुपया॒मगृ॑हीतो॒ऽसीन्द्रा॑य त्वा॒ जुष्टं॑ गृह्णाम्ये॒ष ते॒ योनि॒रिन्द्रा॑य त्वा॒ जुष्ट॑तमम् । स॒म्पृचौ॑ स्थ॒: सं मा॑ भ॒द्रेण॑ पृङ्क्तं वि॒पृचौ॑ स्थो॒ वि मा॑ पा॒प्मना॑ पृङ्क्तम् ।। ४ ।।
grahā॑ ūrjāhutayo॒ vyanto॒ viprā॑ya ma॒tim | teṣāṃ॒ viśi॑priyāṇāṃ vo॒’hamiṣa॒mūrja॒ᳪ sama॑grabhamupayā॒magṛ॑hīto॒’sīndrā॑ya tvā॒ juṣṭaṃ॑ gṛhṇāmye॒ṣa te॒ yoni॒rindrā॑ya tvā॒ juṣṭa॑tamam | sa॒mpṛcau॑ stha॒: saṃ mā॑ bha॒dreṇa॑ pṛṅktaṃ vi॒pṛcau॑ stho॒ vi mā॑ pā॒pmanā॑ pṛṅktam | | ४ | |
इन्द्र॑स्य॒ वज्रो॑ऽसि वाज॒सास्त्वया॒यं वाज॑ᳪ से॑त् । वाज॑स्य॒ नु प्र॑स॒वे मा॒तरं॑ म॒हीमदि॑तिं॒ नाम॒ वच॑सा करामहे ।
यस्या॑मि॒दं विश्वं॒ भुव॑नमावि॒वेश॒ तस्यां॑ नो दे॒वः स॑वि॒ता धर्म॑ साविषत् ।। ५ ।।
indra॑sya॒ vajro॑’si vāja॒sāstvayā॒yaṃ vāja॑ᳪ se॑t | vāja॑sya॒ nu pra॑sa॒ve mā॒taraṃ॑ ma॒hīmadi॑tiṃ॒ nāma॒ vaca॑sā karāmahe | yasyā॑mi॒daṃ viśvaṃ॒ bhuva॑namāvi॒veśa॒ tasyāṃ॑ no de॒vaḥ sa॑vi॒tā dharma॑ sāviṣat | | ५ | |
अ॒प्स्वन्तर॒मृत॑म॒प्सु भे॑ष॒जम॒पामु॒त प्रश॑स्ति॒ष्वश्वा॒ भव॑त वा॒जिन॑: ।
देवी॑रापो॒ यो व॑ ऊ॒र्मिः प्रतू॑र्तिः क॒कुन्मा॑न् वाज॒सास्तेना॒यं वाज॑ᳪ सेत् ।। ६ ।।
a॒psvantara॒mṛta॑ma॒psu bhe॑ṣa॒jama॒pāmu॒ta praśa॑sti॒ṣvaśvā॒ bhava॑ta vā॒jina॑: | devī॑rāpo॒ yo va॑ ū॒rmiḥ pratū॑rtiḥ ka॒kunmā॑n vāja॒sāstenā॒yaṃ vāja॑ᳪ set | | ६ | |
वातो॑ वा॒ मनो॑ वा गन्ध॒र्वाः स॒प्तवि॑ᳪशतिः । ते अग्रेऽश्व॑मयुञ्जँ॒स्ते अ॑स्मिञ्ज॒वमा द॑धुः ।। ७ ।।
vāto॑ vā॒ mano॑ vā gandha॒rvāḥ sa॒ptavi॑ᳪśatiḥ | te agre’śva॑mayuñjam॒̐ste a॑smiñja॒vamā da॑dhuḥ | | ७ | |
वात॑रᳪहा भव वाजिन्यु॒ज्यमा॑न॒ इन्द्र॑स्येव॒ दक्षि॑णः श्रि॒यैधि॑ ।
यु॒ञ्जन्तु॑ त्वा म॒रुतो॑ विश्व॒वेद॑स॒ आ ते॒ त्वष्टा॑ प॒त्सु ज॒वं द॑धातु ।। ८ ।।
vāta॑raᳪhā bhava vājinyu॒jyamā॑na॒ indra॑syeva॒ dakṣi॑ṇaḥ śri॒yaidhi॑ | yu॒ñjantu॑ tvā ma॒ruto॑ viśva॒veda॑sa॒ ā te॒ tvaṣṭā॑ pa॒tsu ja॒vaṃ da॑dhātu | | ८ | |
ज॒वो यस्ते॑ वाजि॒न्निहि॑तो॒ गुहा॒ यः श्ये॒ने परी॑त्तो॒ अच॑रच्च॒ वाते॑ ।
तेन॑ नो वाजि॒न् वल॑वा॒न् बले॑न वाज॒जिच्च॒ भव॒ सम॑ने च पारयि॒ष्णुः ।
वाजि॑नो वाजजितो॒ वाज॑ᳪ सरि॒ष्यन्तो॒ बृह॒स्पते॑र्भा॒गमव॑जिघ्रत ।। ९ ।।
ja॒vo yaste॑ vāji॒nnihi॑to॒ guhā॒ yaḥ śye॒ne parī॑tto॒ aca॑racca॒ vāte॑ | tena॑ no vāji॒n vala॑vā॒n bale॑na vāja॒jicca॒ bhava॒ sama॑ne ca pārayi॒ṣṇuḥ | vāji॑no vājajito॒ vāja॑ᳪ sari॒ṣyanto॒ bṛha॒spate॑rbhā॒gamava॑jighrata | | ९ | |
दे॒वस्या॒हᳪ स॑वि॒तुः स॒वे स॒त्यस॑वसो॒ बृह॒स्पते॑रुत्त॒मं नाक॑ᳪ रुहेयम् ।
दे॒वस्या॒हᳪ स॑वि॒तुः स॒वे स॒त्यस॑वस॒ इन्द्र॑स्योत्त॒मं नाक॑ᳪ रुहेयम् ।
दे॒वस्या॒हᳪ स॑वि॒तुः स॒वे स॒त्यप्र॑सवसो॒ बृह॒स्पते॑रुत्त॒मं नाक॑मरुहम् ।
दे॒वस्या॒हᳪ स॑वि॒तुः स॒वे स॒त्यप्र॑सवस॒ इन्द्र॑स्योत्त॒मं नाक॑मरुहम् ।। १० ।।
de॒vasyā॒haᳪ sa॑vi॒tuḥ sa॒ve sa॒tyasa॑vaso॒ bṛha॒spate॑rutta॒maṃ nāka॑ᳪ ruheyam | de॒vasyā॒haᳪ sa॑vi॒tuḥ sa॒ve sa॒tyasa॑vasa॒ indra॑syotta॒maṃ nāka॑ᳪ ruheyam | de॒vasyā॒haᳪ sa॑vi॒tuḥ sa॒ve sa॒tyapra॑savaso॒ bṛha॒spate॑rutta॒maṃ nāka॑maruham | de॒vasyā॒haᳪ sa॑vi॒tuḥ sa॒ve sa॒tyapra॑savasa॒ indra॑syotta॒maṃ nāka॑maruham | | १० | |
बृह॑स्पते॒ वाजं॑ जय॒ बृह॒स्पत॑ये॒ वाचं॑ वदत॒ बृह॒स्पतिं॒ वाजं॑ जापयत ।
इन्द्र॒ वाजं॑ ज॒येन्द्रा॑य॒ वाचं॑ वद॒तेन्द्रं॒ वाजं॑ जापयत ।। ११ ।।
bṛha॑spate॒ vājaṃ॑ jaya॒ bṛha॒spata॑ye॒ vācaṃ॑ vadata॒ bṛha॒spatiṃ॒ vājaṃ॑ jāpayata | indra॒ vājaṃ॑ ja॒yendrā॑ya॒ vācaṃ॑ vada॒tendraṃ॒ vājaṃ॑ jāpayata | | ११ | |
ए॒षा व॒: सा स॒त्या सं॒वाग॑भू॒द्यया॒ बृह॒स्पतिं॒ वाज॒मजी॑जप॒ताजी॑जपत॒ बृह॒स्पतिं॒ वाजं॒ वन॑स्पतयो॒ विमु॑च्यध्वम् ।
ए॒षा व॒: सा स॒त्या सं॒वाग॑भू॒द्ययेन्द्रं॒ वाज॒मजी॑जप॒ताजी॑जप॒तेन्द्रं॒ वाजं॒ वन॑स्पतयो॒ विमु॑च्यध्वम् ।। १२ ।।
e॒ṣā va॒: sā sa॒tyā saṃ॒vāga॑bhū॒dyayā॒ bṛha॒spatiṃ॒ vāja॒majī॑japa॒tājī॑japata॒ bṛha॒spatiṃ॒ vājaṃ॒ vana॑spatayo॒ vimu॑cyadhvam | e॒ṣā va॒: sā sa॒tyā saṃ॒vāga॑bhū॒dyayendraṃ॒ vāja॒majī॑japa॒tājī॑japa॒tendraṃ॒ vājaṃ॒ vana॑spatayo॒ vimu॑cyadhvam | | १२ | |
दे॒वस्या॒हᳪ स॑वि॒तुः स॒वे स॒त्यप्र॑सवसो॒ बृह॒स्पते॑र्वाज॒जितो॒ वाजं॑ जेषम् ।
वाजि॑नो वाजजि॒तोऽध्व॑न स्कभ्नु॒वन्तो॒ योज॑ना॒ मिमा॑ना॒: काष्ठां॑ गच्छत ।। १३ ।।
de॒vasyā॒haᳪ sa॑vi॒tuḥ sa॒ve sa॒tyapra॑savaso॒ bṛha॒spate॑rvāja॒jito॒ vājaṃ॑ jeṣam | vāji॑no vājaji॒to’dhva॑na skabhnu॒vanto॒ yoja॑nā॒ mimā॑nā॒: kāṣṭhāṃ॑ gacchata | | १३ | |
ए॒ष स्य वा॒जी क्षि॑प॒णिं तु॑रण्यति ग्री॒वायां॑ ब॒द्धो अ॑पिक॒क्ष आ॒सनि॑ ।
क्रतुं॑ दधि॒क्रा अनु॑ स॒ᳪसनि॑ष्यदत्प॒थामङ्का॒ᳪस्यन्वा॒पनी॑पण॒त् स्वाहा॑ ।। १४ ।।
e॒ṣa sya vā॒jī kṣi॑pa॒ṇiṃ tu॑raṇyati grī॒vāyāṃ॑ ba॒ddho a॑pika॒kṣa ā॒sani॑ | kratuṃ॑ dadhi॒krā anu॑ sa॒ᳪsani॑ṣyadatpa॒thāmaṅkā॒ᳪsyanvā॒panī॑paṇa॒t svāhā॑ | | १४ | |
उ॒त स्मा॑स्य॒ द्रुव॑तस्तुरण्य॒तः प॒र्णं न वेरनु॑वाति प्रग॒र्धिन॑: ।
श्ये॒नस्ये॑व॒ ध्रज॑तो अङ्क॒सं परि॑ दधि॒क्राव्ण॑: स॒होर्जा तरि॑त्रत॒: स्वाहा॑ ।। १५ ।।
u॒ta smā॑sya॒ druva॑tasturaṇya॒taḥ pa॒rṇaṃ na veranu॑vāti praga॒rdhina॑: | śye॒nasye॑va॒ dhraja॑to aṅka॒saṃ pari॑ dadhi॒krāvṇa॑: sa॒horjā tari॑trata॒: svāhā॑ | | १५ | |
शं नो॑ भवन्तु वा॒जिनो॒ हवे॑षु दे॒वता॑ता मि॒तद्र॑वः स्व॒र्काः ।
ज॒म्भय॒न्तोऽहिं॒ वृक॒ᳪ रक्षा॑सि॒ सने॑म्य॒स्मद्यु॑यव॒न्नमी॑वाः ।। १६ ।।
śaṃ no॑ bhavantu vā॒jino॒ have॑ṣu de॒vatā॑tā mi॒tadra॑vaḥ sva॒rkāḥ | ja॒mbhaya॒nto’hiṃ॒ vṛka॒ᳪ rakṣā॑si॒ sane॑mya॒smadyu॑yava॒nnamī॑vāḥ | | १६ | |
ते नो॒ अर्व॑न्तो हवन॒श्रुतो॒ हवं॒ विश्वे॑ शृण्वन्तु वा॒जिनो॑ मि॒तद्र॑वः ।
स॒ह॒स्र॒सा मे॒धसा॑ता सनि॒ष्यवो॑ म॒हो ये धन॑ᳪ समि॒थेषु॑ जभ्रि॒रे ।। १७ ।।
te no॒ arva॑nto havana॒śruto॒ havaṃ॒ viśve॑ śṛṇvantu vā॒jino॑ mi॒tadra॑vaḥ | sa॒ha॒sra॒sā me॒dhasā॑tā sani॒ṣyavo॑ ma॒ho ye dhana॑ᳪ sami॒theṣu॑ jabhri॒re | | १७ | |
वाजे॑-वाजेऽवत वाजिनो नो॒ धने॑षु विप्रा अमृता ऋतज्ञाः ।
अ॒स्य मध्व॑: पिबत मा॒दय॑ध्वं तृ॒प्ता या॑त प॒थिभि॑र्देव॒यानै॑: ।। १८ ।।
vāje॑-vāje’vata vājino no॒ dhane॑ṣu viprā amṛtā ṛtajñāḥ | a॒sya madhva॑: pibata mā॒daya॑dhvaṃ tṛ॒ptā yā॑ta pa॒thibhi॑rdeva॒yānai॑: | | १८ | |
आ मा॒ वाज॑स्य प्रस॒वो ज॑गम्या॒देमे द्यावा॑पृथि॒वी वि॒श्वरू॑पे ।
आ मा॑ गन्तां पि॒तरा॑ मा॒तरा॒ चा मा॒ सोमो॑ अमृत॒त्वेन॑ गम्यात् ।
वाजि॑नो वाजजितो॒ वाज॑ᳪ ससृ॒वाᳪसो॒ बृह॒स्पते॑र्भा॒गमव॑जिघ्रत निमृजा॒नाः ।। १९ ।।
ā mā॒ vāja॑sya prasa॒vo ja॑gamyā॒deme dyāvā॑pṛthi॒vī vi॒śvarū॑pe | ā mā॑ gantāṃ pi॒tarā॑ mā॒tarā॒ cā mā॒ somo॑ amṛta॒tvena॑ gamyāt | vāji॑no vājajito॒ vāja॑ᳪ sasṛ॒vāᳪso॒ bṛha॒spate॑rbhā॒gamava॑jighrata nimṛjā॒nāḥ | | १९ | |
आ॒पये॒ स्वाहा॑ स्वा॒पये॒ स्वाहा॑ ऽपि॒जाय॒ स्वाहा॑ क्रत॑वे॒ स्वाहा॒ वस॑वे॒ स्वाहा॑ ऽह॒र्पत॑ये॒ स्वाहा॑
ऽह्ने॑ मु॒ग्धाय॒ स्वाहा॑ मु॒ग्धाय॑ वैनᳪशि॒नाय॒ स्वाहा॑ विन॒ᳪशिन॑ आन्त्याय॒नाय॒ स्वाहा ऽन्त्या॑य भौव॒नाय॒ स्वाहा॒ भुव॑नस्य॒ पत॑ये॒ स्वाहाऽधि॑पतये॒ स्वाहा॑ ।। २० ।।
ā॒paye॒ svāhā॑ svā॒paye॒ svāhā॑ ’pi॒jāya॒ svāhā॑ krata॑ve॒ svāhā॒ vasa॑ve॒ svāhā॑ ’ha॒rpata॑ye॒ svāhā॑ ’hne॑ mu॒gdhāya॒ svāhā॑ mu॒gdhāya॑ vainaᳪśi॒nāya॒ svāhā॑ vina॒ᳪśina॑ āntyāya॒nāya॒ svāhā ’ntyā॑ya bhauva॒nāya॒ svāhā॒ bhuva॑nasya॒ pata॑ye॒ svāhā’dhi॑pataye॒ svāhā॑ | | २० | |
आयु॑र्य॒ज्ञेन॑ कल्पतां प्रा॒णो य॒ज्ञेन॑ कल्पतां॒ चक्षु॑र्य॒ज्ञेन॑ कल्पतातां॒ᳪ श्रोत्रं॑ य॒ज्ञेन॑ कल्पतां॒ पृ॒ष्ठं य॒ज्ञेन॑ कल्पतां॒ य॒ज्ञो य॒ज्ञेन॑ कल्पताम् ।
प्र॒जाप॑तेः प्र॒जा अ॑भूम॒ स्व॒र्देवा अगन्मा॒मृता॑ अभूम ।। २१ ।।
āyu॑rya॒jñena॑ kalpatāṃ prā॒ṇo ya॒jñena॑ kalpatāṃ॒ cakṣu॑rya॒jñena॑ kalpatātāṃ॒ᳪ śrotraṃ॑ ya॒jñena॑ kalpatāṃ॒ pṛ॒ṣṭhaṃ ya॒jñena॑ kalpatāṃ॒ ya॒jño ya॒jñena॑ kalpatām | pra॒jāpa॑teḥ pra॒jā a॑bhūma॒ sva॒rdevā aganmā॒mṛtā॑ abhūma | | २१ | |
अ॒स्मे वो॑ अस्त्विन्द्रि॒यम॒स्मे नृ॒म्णमु॒त क्रतु॑र॒स्मे वर्चा॑ᳪसि सन्तु वः । नमो॑ मा॒त्रे पृ॑थि॒व्यै॒ नमो॑ मा॒त्रे पृ॑थि॒व्या इ॒यं ते॒ राड् य॒न्ताऽसि॒ यम॑नो ध्रु॒वो॒ऽसि ध॒रुण॑: । कृ॒ष्यै त्वा॒ क्षेमा॑य त्वा र॒य्यै त्वा॒ पोषा॑य त्वा ।। २२ ।।
a॒sme vo॑ astvindri॒yama॒sme nṛ॒mṇamu॒ta kratu॑ra॒sme varcā॑ᳪsi santu vaḥ | namo॑ mā॒tre pṛ॑thi॒vyai॒ namo॑ mā॒tre pṛ॑thi॒vyā i॒yaṃ te॒ rāḍ ya॒ntā’si॒ yama॑no dhru॒vo॒’si dha॒ruṇa॑: | kṛ॒ṣyai tvā॒ kṣemā॑ya tvā ra॒yyai tvā॒ poṣā॑ya tvā | | २२ | |
वाज॑स्ये॒मं प्र॑स॒वः सु॑षु॒वेऽग्रे॒ सोम॒ᳪ राजा॑न॒मोष॑धीष्व॒प्सु । ता अ॒स्मभ्यं॒ मधु॑मतीर्भवन्तु व॒यᳪ रा॒ष्ट्रे जा॑गृयाम पु॒रोहि॑ता॒: स्वाहा॑ ।। २३ ।।
vāja॑sye॒maṃ pra॑sa॒vaḥ su॑ṣu॒ve’gre॒ soma॒ᳪ rājā॑na॒moṣa॑dhīṣva॒psu | tā a॒smabhyaṃ॒ madhu॑matīrbhavantu va॒yaᳪ rā॒ṣṭre jā॑gṛyāma pu॒rohi॑tā॒: svāhā॑ | | २३ | |
वाज॑स्ये॒मां प्र॑स॒वः शि॑श्रिये॒ दिव॑मि॒मा च॒ विश्वा॒ भुव॑नानि स॒म्राट् ।
अदि॑त्सन्तं दापयति प्रजा॒नन्त्स नो॑ र॒यिᳪ सर्व॑वीरं॒ नि य॑च्छतु॒ स्वाहा॑ ।। २४ ।।
vāja॑sye॒māṃ pra॑sa॒vaḥ śi॑śriye॒ diva॑mi॒mā ca॒ viśvā॒ bhuva॑nāni sa॒mrāṭ | adi॑tsantaṃ dāpayati prajā॒nantsa no॑ ra॒yiᳪ sarva॑vīraṃ॒ ni ya॑cchatu॒ svāhā॑ | | २४ | |
वाज॑स्य॒ नु प्र॑स॒व आ ब॑भूवे॒मा च॒ विश्वा॒ भुव॑नानि स॒र्वत॑: ।
सने॑मि॒ राजा॒ परि॑ याति वि॒द्वान् प्र॒जां पुष्टिं॑ व॒र्धय॑मानो अ॒स्मे स्वाहा॑ ।। २५ ।।
vāja॑sya॒ nu pra॑sa॒va ā ba॑bhūve॒mā ca॒ viśvā॒ bhuva॑nāni sa॒rvata॑: | sane॑mi॒ rājā॒ pari॑ yāti vi॒dvān pra॒jāṃ puṣṭiṃ॑ va॒rdhaya॑māno a॒sme svāhā॑ | | २५ | |
सोम॒ᳪ राजा॑न॒मव॑से॒ऽग्निम॒न्वा॑रभामहे | आ॒दि॒त्यान्विष्णु॒ᳪ सूर्यं॑ ब्र॒ह्माणं॑ च॒ बृह॒स्पति॒ᳪ स्वाहा॑ ।। २६ ।।
soma॒ᳪ rājā॑na॒mava॑se॒’gnima॒nvā॑rabhāmahe | ā॒di॒tyānviṣṇu॒ᳪ sūryaṃ॑ bra॒hmāṇaṃ॑ ca॒ bṛha॒spati॒ᳪ svāhā॑ | | २६ | |
अ॒र्य॒मणं॒ बृह॒स्पति॒मिन्द्रं॒ दाना॑य चोदय । वाचं॒ विष्णु॒ᳪ सर॑स्वतीᳪ सवि॒तारं॑ च वा॒जिन॒ᳪ स्वाहा॑ ।। २७ ।।
a॒rya॒maṇaṃ॒ bṛha॒spati॒mindraṃ॒ dānā॑ya codaya | vācaṃ॒ viṣṇu॒ᳪ sara॑svatīᳪ savi॒tāraṃ॑ ca vā॒jina॒ᳪ svāhā॑ | | २७ | |
अग्ने॒ अच्छा॑ वदे॒ह न॒: प्रति॑ नः सु॒मना॑ भव । प्र नो॑ यच्छ सहस्रजि॒त्त्वᳪ हि ध॑न॒दा असि॒ स्वाहा॑ ।। २८ ।।
agne॒ acchā॑ vade॒ha na॒: prati॑ naḥ su॒manā॑ bhava | pra no॑ yaccha sahasraji॒ttvaᳪ hi dha॑na॒dā asi॒ svāhā॑ | | २८ | |
प्र नो॑ यच्छत्वर्य॒मा प्र पू॒षा प्र बृह॒स्पति॑: । प्र वाग्दे॒वी द॑दातु न॒: स्वाहा॑ ।। २९ ।।
pra no॑ yacchatvarya॒mā pra pū॒ṣā pra bṛha॒spati॑: | pra vāgde॒vī da॑dātu na॒: svāhā॑ | | २९ | |
दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
सर॑स्वत्यै वा॒चो य॒न्तुर्य॒न्त्रिये॑ दधामि॒ बृह॒स्पते॑ष्ट्वा॒ साम्रा॑ज्येना॒भि षि॑ञ्चाम्यसौ ।। ३० ।।
de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyām | sara॑svatyai vā॒co ya॒nturya॒ntriye॑ dadhāmi॒ bṛha॒spate॑ṣṭvā॒ sāmrā॑jyenā॒bhi ṣi॑ñcāmyasau | | ३० | |
अ॒ग्निरेका॑क्षरेण प्रा॒णमुद॑जय॒त्तमुज्जे॑षम॒श्विनौ॒ द्व्य॒क्षरेण द्वि॒पदो॑ मनु॒ष्यानुद॑जयतां॒ तानुज्जे॑षं॒ विष्णु॒स्त्र्य॒क्षरेण॒ त्रीँल्लो॒कानुद॑जय॒त्तानुज्जे॑षं॒ᳪ
सोम॒श्चतु॑रक्षरेण॒ चतु॑ष्पदः प॒शूनुद॑जय॒त्तानुज्जे॑षम् ।। ३१ ।।
a॒gnirekā॑kṣareṇa prā॒ṇamuda॑jaya॒ttamujje॑ṣama॒śvinau॒ dvya॒kṣareṇa dvi॒pado॑ manu॒ṣyānuda॑jayatāṃ॒ tānujje॑ṣaṃ॒ viṣṇu॒strya॒kṣareṇa॒ trīm̐llo॒kānuda॑jaya॒ttānujje॑ṣaṃ॒ᳪ soma॒ścatu॑rakṣareṇa॒ catu॑ṣpadaḥ pa॒śūnuda॑jaya॒ttānujje॑ṣam | | ३१ | |
पू॒षा पञ्चा॑क्षरेण॒ पञ्च॒ दिश॒ उद॑जय॒त्ता उज्जे॑षंᳪ सवि॒ता षड॑क्षरेण॒ षडृ॒तूनुद॑जय॒त्तानुज्जे॑षं म॒रुत॑: स॒प्ताक्ष॑रेण स॒प्त ग्रा॒म्यान् प॒शूनुद॑जयँ॒स्तानुज्जे॑षं॒ बृह॒स्पति॑र॒ष्टाक्ष॑रेण गाय॒त्रीमुद॑जय॒त्तामुज्जे॑षम् ।। ३२ ।।
pū॒ṣā pañcā॑kṣareṇa॒ pañca॒ diśa॒ uda॑jaya॒ttā ujje॑ṣaṃᳪ savi॒tā ṣaḍa॑kṣareṇa॒ ṣaḍṛ॒tūnuda॑jaya॒ttānujje॑ṣaṃ ma॒ruta॑: sa॒ptākṣa॑reṇa sa॒pta grā॒myān pa॒śūnuda॑jayam॒̐stānujje॑ṣaṃ॒ bṛha॒spati॑ra॒ṣṭākṣa॑reṇa gāya॒trīmuda॑jaya॒ttāmujje॑ṣam | | ३२ | |
मि॒त्रो नवा॑क्षरेण त्रि॒वृत॒ᳪ स्तोम॒मुद॑जय॒त्तमुज्जे॑षं॒ वरु॑णो॒ दशा॑क्षरेण वि॒राज॒मुद॑जय॒त्तामुज्जे॑ष॒मिन्द्र॒ ए॒काद॑शाक्षरेण त्रि॒ष्टुभ॒मुद॑जय॒त्तामुज्जे॑षं॒
विश्वे॑ दे॒वा द्वाद॑शाक्षरेण॒ जग॑ती॒मुद॑जयँ॒स्तामुज्जे॑षम् ।। ३३ ।।
mi॒tro navā॑kṣareṇa tri॒vṛta॒ᳪ stoma॒muda॑jaya॒ttamujje॑ṣaṃ॒ varu॑ṇo॒ daśā॑kṣareṇa vi॒rāja॒muda॑jaya॒ttāmujje॑ṣa॒mindra॒ e॒kāda॑śākṣareṇa tri॒ṣṭubha॒muda॑jaya॒ttāmujje॑ṣaṃ॒ viśve॑ de॒vā dvāda॑śākṣareṇa॒ jaga॑tī॒muda॑jayam॒̐stāmujje॑ṣam | | ३३ | |
वस॑व॒स्त्रयो॑दशाक्षरेण त्रयोद॒शᳪ स्तोम॒मुद॑जयँ॒स्तमुज्जे॑षंᳪ रु॒द्राश्चतु॑र्दशाक्षरेण चतुर्द॒शᳪ स्तोम॒मुद॑जयँ॒स्तमुज्जे॑षमादि॒त्याः पञ्च॑दशाक्षरेण पञ्चद॒शᳪ स्तोम॒मुद॑जयँ॒स्तमुज्जे॑ष॒मदि॑ति॒: षोड॑शाक्षरेण षोड॒शᳪ स्तोम॒मुद॑जय॒त्तमुज्जे॑षं प्र॒जाप॑तिः स॒प्तद॑शाक्षरेण सप्तद॒शᳪ स्तोम॒मुद॑जय॒त्तमुज्जे॑षम् ।। ३४ ।।
vasa॑va॒strayo॑daśākṣareṇa trayoda॒śaᳪ stoma॒muda॑jayam॒̐stamujje॑ṣaṃᳪ ru॒drāścatu॑rdaśākṣareṇa caturda॒śaᳪ stoma॒muda॑jayam॒̐stamujje॑ṣamādi॒tyāḥ pañca॑daśākṣareṇa pañcada॒śaᳪ stoma॒muda॑jayam॒̐stamujje॑ṣa॒madi॑ti॒: ṣoḍa॑śākṣareṇa ṣoḍa॒śaᳪ stoma॒muda॑jaya॒ttamujje॑ṣaṃ pra॒jāpa॑tiḥ sa॒ptada॑śākṣareṇa saptada॒śaᳪ stoma॒muda॑jaya॒ttamujje॑ṣam | | ३४ | |
ए॒ष ते॑ निरृते भा॒गस्तं जु॑षस्व॒ स्वाहा॒ऽग्निने॑त्रेभ्यो दे॒वेभ्य॑: पुर॒: सद्भ्य॒: स्वाहा॑ य॒मने॑त्रेभ्यो दे॒वेभ्यो॑ दक्षि॒णासद्भ्य॒: स्वाहा॑ वि॒श्वदे॑वनेत्रेभ्यो दे॒वेभ्य॑: पश्चा॒त्सद्भ्य॒: स्वाहा॑ मि॒त्रावरु॑णनेत्रेभ्यो वा म॒रुन्ने॑त्रेभ्यो वा दे॒वेभ्य॑ उत्तरा॒सद्भ्य॒: स्वाहा॒ सोम॑नेत्रेभ्यो दे॒वेभ्य॑ उपरि॒सद्भ्यो॒ दुव॑स्वद्भ्य॒: स्वाहा॑ ।। ३५ ।।
e॒ṣa te॑ nirṛte bhā॒gastaṃ ju॑ṣasva॒ svāhā॒’gnine॑trebhyo de॒vebhya॑: pura॒: sadbhya॒: svāhā॑ ya॒mane॑trebhyo de॒vebhyo॑ dakṣi॒ṇāsadbhya॒: svāhā॑ vi॒śvade॑vanetrebhyo de॒vebhya॑: paścā॒tsadbhya॒: svāhā॑ mi॒trāvaru॑ṇanetrebhyo vā ma॒runne॑trebhyo vā de॒vebhya॑ uttarā॒sadbhya॒: svāhā॒ soma॑netrebhyo de॒vebhya॑ upari॒sadbhyo॒ duva॑svadbhya॒: svāhā॑ | | ३५ | |
ये दे॒वा अ॒ग्निने॑त्राः पुर॒: सद॒स्तेभ्य॒: स्वाहा॒ ये दे॒वा य॒मने॑त्रा दक्षि॒णासद॒स्तेभ्य॒: स्वाहा॒ ये दे॒वा वि॒श्वदे॑वनेत्राः पश्चा॒त्सद॒स्तेभ्य॒: स्वाहा॒ ये दे॒वा मि॒त्रावरु॑णनेत्रा वा म॒रुन्ने॑त्रा वोत्तरा॒सद॒स्तेभ्य॒: स्वाहा॒ ये दे॒वाः सोम॑नेत्रा उपरि॒सदो॒ दुव॑स्वन्त॒स्तेभ्य॒: स्वाहा॑ ।। ३६ ।।
ye de॒vā a॒gnine॑trāḥ pura॒: sada॒stebhya॒: svāhā॒ ye de॒vā ya॒mane॑trā dakṣi॒ṇāsada॒stebhya॒: svāhā॒ ye de॒vā vi॒śvade॑vanetrāḥ paścā॒tsada॒stebhya॒: svāhā॒ ye de॒vā mi॒trāvaru॑ṇanetrā vā ma॒runne॑trā vottarā॒sada॒stebhya॒: svāhā॒ ye de॒vāḥ soma॑netrā upari॒sado॒ duva॑svanta॒stebhya॒: svāhā॑ | | ३६ | |
अग्ने॒ सह॑स्व॒ पृत॑ना अ॒भिमा॑ती॒रपा॑स्य । दु॒ष्टर॒स्तर॒न्नरा॑ती॒र्वर्चो॑ धा य॒ज्ञवा॑हसि ।। ३७ ।।
agne॒ saha॑sva॒ pṛta॑nā a॒bhimā॑tī॒rapā॑sya | du॒ṣṭara॒stara॒nnarā॑tī॒rvarco॑ dhā ya॒jñavā॑hasi | | ३७ | |
दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । उ॒पा॒ᳪशोर्वी॒र्ये॒ण जुहोमि ह॒तᳪ रक्ष॒: स्वाहा॒
रक्ष॑सां त्वा ब॒धायाब॑धिष्म॒ रक्षोऽब॑धिष्मा॒मुम॒सौ ह॒तः ।। ३८ ।।
de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyām | u॒pā॒ᳪśorvī॒rye॒ṇa juhomi ha॒taᳪ rakṣa॒: svāhā॒ rakṣa॑sāṃ tvā ba॒dhāyāba॑dhiṣma॒ rakṣo’ba॑dhiṣmā॒muma॒sau ha॒taḥ | | ३८ | |
स॒वि॒ता त्वा॑ स॒वाना॑ᳪ सुव॒ताम॒ग्निर्गृ॒हप॑तीना॒ᳪ सोमो॒ वन॒स्पती॑नाम् ।
बृह॒स्पति॑र्वा॒च इन्द्रो॒ ज्यैष्ठ्या॑य रु॒द्रः प॒शुभ्यो॑ मि॒त्रः स॒त्यो वरु॑णो॒ धर्म॑पतीनाम् ।। ३९ ।।
sa॒vi॒tā tvā॑ sa॒vānā॑ᳪ suva॒tāma॒gnirgṛ॒hapa॑tīnā॒ᳪ somo॒ vana॒spatī॑nām | bṛha॒spati॑rvā॒ca indro॒ jyaiṣṭhyā॑ya ru॒draḥ pa॒śubhyo॑ mi॒traḥ sa॒tyo varu॑ṇo॒ dharma॑patīnām | | ३९ | |
इ॒मं दे॑वा असप॒त्नᳪ सु॑वध्वं मह॒ते क्ष॒त्राय॑ मह॒ते ज्यैष्ठ्या॑य मह॒ते जान॑राज्या॒येन्द्र॑स्येन्द्रि॒याय॑ |
इ॒मम॒मुष्य॑ पु॒त्रम॒मुष्यै॑ पु॒त्रम॒स्यै वि॒श ए॒ष वो॑ऽमी॒ राजा॒ सोमो॒ऽस्माकं॑ ब्राह्म॒णाना॒ᳪ राजा॑ ।। ४० ।।
i॒maṃ de॑vā asapa॒tnaᳪ su॑vadhvaṃ maha॒te kṣa॒trāya॑ maha॒te jyaiṣṭhyā॑ya maha॒te jāna॑rājyā॒yendra॑syendri॒yāya॑ | i॒mama॒muṣya॑ pu॒trama॒muṣyai॑ pu॒trama॒syai vi॒śa e॒ṣa vo॑’mī॒ rājā॒ somo॒’smākaṃ॑ brāhma॒ṇānā॒ᳪ rājā॑ | | ४० | |