EeseDharmaSanātana Library
8अध्याय 8
Śukla Yajurveda Mādhyaṃdina ka Adhyay 8.
63 shlokउ॒प॒या॒मगृ॑हीतोऽस्यादि॒त्येभ्य॑स्त्वा । विष्ण॑ उरुगायै॒ष ते॒ सोम॒स्तᳪ र॑क्षस्व॒ मा त्वा॑ दभन् ।। १ ।।
u॒pa॒yā॒magṛ॑hīto’syādi॒tyebhya॑stvā | viṣṇa॑ urugāyai॒ṣa te॒ soma॒staᳪ ra॑kṣasva॒ mā tvā॑ dabhan | | १ | |
क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ ।
उपो॒पेन्नु म॑घव॒न् भूय॒ इन्नु ते॒ दानं॑ दे॒वस्य॑ पृच्यत आदि॒त्येभ्य॑स्त्वा ।। २ ।।
ka॒dā ca॒na sta॒rīra॑si॒ nendra॑ saścasi dā॒śuṣe॑ | upo॒pennu ma॑ghava॒n bhūya॒ innu te॒ dānaṃ॑ de॒vasya॑ pṛcyata ādi॒tyebhya॑stvā | | २ | |
क॒दा च॒न प्र यु॑च्छस्यु॒भे नि पा॑सि॒ जन्म॑नी ।
तुरी॑यादित्य॒ सव॑नं त इन्द्रि॒यमात॑स्थाव॒मृतं॑ दि॒व्या॒दि॒त्येभ्य॑स्त्वा ।। ३ ।।
ka॒dā ca॒na pra yu॑cchasyu॒bhe ni pā॑si॒ janma॑nī | turī॑yāditya॒ sava॑naṃ ta indri॒yamāta॑sthāva॒mṛtaṃ॑ di॒vyā॒di॒tyebhya॑stvā | | ३ | |
य॒ज्ञो दे॒वानां॒ प्रत्ये॑ति सु॒म्नमादि॑त्यासो॒ भव॑ता मृड॒यन्त॑: ।
आ वो॒ऽर्वाची॑ सुम॒तिर्व॑वृत्याद॒होश्चि॒द्या व॑रिवो॒वित्त॒रास॑दादि॒त्येभ्य॑स्त्वा ।। ४ ।।
ya॒jño de॒vānāṃ॒ pratye॑ti su॒mnamādi॑tyāso॒ bhava॑tā mṛḍa॒yanta॑: | ā vo॒’rvācī॑ suma॒tirva॑vṛtyāda॒hości॒dyā va॑rivo॒vitta॒rāsa॑dādi॒tyebhya॑stvā | | ४ | |
विव॑स्वन्नादित्यै॒ष ते॑ सोमपी॒थस्तस्मि॑न् मत्स्व ।
श्रद॑स्मै नरो॒ वच॑से दधातन॒ यदा॑शी॒र्दा दम्प॑ती वा॒मम॑श्नु॒तः ।
पुमा॑न् पु॒त्रो जा॑यते वि॒न्दते॒ वस्वधा॑ वि॒श्वाहा॑र॒प ए॑धते गृ॒हे ।। ५ ।।
viva॑svannādityai॒ṣa te॑ somapī॒thastasmi॑n matsva | śrada॑smai naro॒ vaca॑se dadhātana॒ yadā॑śī॒rdā dampa॑tī vā॒mama॑śnu॒taḥ | pumā॑n pu॒tro jā॑yate vi॒ndate॒ vasvadhā॑ vi॒śvāhā॑ra॒pa e॑dhate gṛ॒he | | ५ | |
वा॒मम॒द्य स॑वितर्वा॒ममु॒ श्वो दि॒वे दि॑वे वा॒मम॒स्मभ्य॑ᳪ सावीः ।
वा॒मस्य॒ हि क्षय॑स्य देव॒ भूरे॑र॒या धि॒या वा॑म॒भाज॑: स्याम ।। ६ ।।
vā॒mama॒dya sa॑vitarvā॒mamu॒ śvo di॒ve di॑ve vā॒mama॒smabhya॑ᳪ sāvīḥ | vā॒masya॒ hi kṣaya॑sya deva॒ bhūre॑ra॒yā dhi॒yā vā॑ma॒bhāja॑: syāma | | ६ | |
उ॒प॒या॒मगृ॑हीतोऽसि सावि॒त्रो॒ऽसि चनो॒धाश्च॑नो॒धा अ॑सि॒ चनो॒ मयि॑ धेहि ।
जिन्व॑ य॒ज्ञं जिन्व॑ य॒ज्ञप॑तिं॒ भगा॑य दे॒वाय॑ त्वा सवि॒त्रे ।। ७ ।।
u॒pa॒yā॒magṛ॑hīto’si sāvi॒tro॒’si cano॒dhāśca॑no॒dhā a॑si॒ cano॒ mayi॑ dhehi | jinva॑ ya॒jñaṃ jinva॑ ya॒jñapa॑tiṃ॒ bhagā॑ya de॒vāya॑ tvā savi॒tre | | ७ | |
उ॒प॒या॒मगृ॑हीतोऽसि सु॒शर्मा॑ऽसि सुप्रतिष्ठा॒नो बृ॒हदु॑क्षाय॒ नम॑: ।
विश्वे॑भ्यस्त्वा दे॒वेभ्य॑ ए॒ष ते॒ योनि॒र्विश्वे॑भ्यस्त्वा दे॒वेभ्य॑: ।। ८ ।।
u॒pa॒yā॒magṛ॑hīto’si su॒śarmā॑’si supratiṣṭhā॒no bṛ॒hadu॑kṣāya॒ nama॑: | viśve॑bhyastvā de॒vebhya॑ e॒ṣa te॒ yoni॒rviśve॑bhyastvā de॒vebhya॑: | | ८ | |
उ॒प॒या॒मगृ॑हीतोऽसि॒ बृह॒स्पति॑सुतस्य देव सोम त॒ इन्दो॑रिन्द्रि॒याव॑त॒: पत्नी॑वतो॒ ग्रहाँ॑२ ऋध्यासम् ।
अ॒हं प॒रस्ता॑द॒हम॒वस्ता॒द्यद॒न्तरि॑क्षं॒ तदु॑ मे पि॒ताऽभू॑त् ।
अ॒हᳪ सूर्य॑मुभ॒यतो॑ ददर्शा॒हं दे॒वानां॑ पर॒मं गुहा॒ यत् ।। ९ ।।
u॒pa॒yā॒magṛ॑hīto’si॒ bṛha॒spati॑sutasya deva soma ta॒ indo॑rindri॒yāva॑ta॒: patnī॑vato॒ grahām̐॑२ ṛdhyāsam | a॒haṃ pa॒rastā॑da॒hama॒vastā॒dyada॒ntari॑kṣaṃ॒ tadu॑ me pi॒tā’bhū॑t | a॒haᳪ sūrya॑mubha॒yato॑ dadarśā॒haṃ de॒vānāṃ॑ para॒maṃ guhā॒ yat | | ९ | |
अग्ना३इ॒ पत्नी॑वन्त्स॒जूर्दे॒वेन॒ त्वष्ट्रा॒ सोमं॑ पिब॒ स्वाहा॑ ।
प्र॒जाप॑ति॒र्वृषा॑ऽसि रेतो॒धा रेतो॒ मयि॑ धेहि प्र॒जाप॑तेस्ते॒ वृष्णो॑ रेतो॒धसो॑ रेतो॒धाम॑शीय ।। १० ।।
agnā३i॒ patnī॑vantsa॒jūrde॒vena॒ tvaṣṭrā॒ somaṃ॑ piba॒ svāhā॑ | pra॒jāpa॑ti॒rvṛṣā॑’si reto॒dhā reto॒ mayi॑ dhehi pra॒jāpa॑teste॒ vṛṣṇo॑ reto॒dhaso॑ reto॒dhāma॑śīya | | १० | |
उ॒प॒या॒मगृ॑हीतोऽसि॒ हरि॑रसि हारियोज॒नो हरि॑भ्यां त्वा । हर्यो॑र्धा॒ना स्थ॑ स॒हसो॑मा॒ इन्द्रा॑य ।। ११ ।।
u॒pa॒yā॒magṛ॑hīto’si॒ hari॑rasi hāriyoja॒no hari॑bhyāṃ tvā | haryo॑rdhā॒nā stha॑ sa॒haso॑mā॒ indrā॑ya | | ११ | |
यस्ते॑ अश्व॒सनि॑र्भ॒क्षो यो गो॒सनि॒स्तस्य॑ त इ॒ष्टय॑जुष स्तु॒तसो॑मस्य श॒स्तोक्थ॒स्योप॑हूत॒स्योप॑हूतो भक्षयामि ।। १२ ।।
yaste॑ aśva॒sani॑rbha॒kṣo yo go॒sani॒stasya॑ ta i॒ṣṭaya॑juṣa stu॒taso॑masya śa॒stoktha॒syopa॑hūta॒syopa॑hūto bhakṣayāmi | | १२ | |
दे॒वकृ॑त॒स्यैन॑सोऽव॒यज॑नमसि मनु॒ष्य॒कृत॒स्यैन॑सोऽव॒यज॑नमसि पि॒तृकृ॑त॒स्यैन॑सोऽव॒यज॑नमस्या॒त्मकृ॑तस्यैनसोऽव॒यज॑नम॒स्येन॑स एनसोऽव॒यज॑नमसि ।
यच्चा॒हमेनो॑ वि॒द्वाँश्च॒कार॒ यच्चावि॑द्वाँ॒स्तस्य॒ सर्वस्यैन॑सोऽव॒यज॑नमसि ।। १३ ।।
de॒vakṛ॑ta॒syaina॑so’va॒yaja॑namasi manu॒ṣya॒kṛta॒syaina॑so’va॒yaja॑namasi pi॒tṛkṛ॑ta॒syaina॑so’va॒yaja॑namasyā॒tmakṛ॑tasyainaso’va॒yaja॑nama॒syena॑sa enaso’va॒yaja॑namasi | yaccā॒hameno॑ vi॒dvām̐śca॒kāra॒ yaccāvi॑dvām॒̐stasya॒ sarvasyaina॑so’va॒yaja॑namasi | | १३ | |
सं वर्च॑सा॒ पय॑सा॒ सं त॒नूभि॒रग॑न्महि॒ मन॑सा॒ सᳪ शि॒वेन॑ ।
त्वष्टा॑ सु॒दत्रो॒ वि द॑धातु॒ रायोऽनु॑मार्ष्टु त॒न्वो यद्विलि॑ष्टम् ।। १४ ।।
saṃ varca॑sā॒ paya॑sā॒ saṃ ta॒nūbhi॒raga॑nmahi॒ mana॑sā॒ saᳪ śi॒vena॑ | tvaṣṭā॑ su॒datro॒ vi da॑dhātu॒ rāyo’nu॑mārṣṭu ta॒nvo yadvili॑ṣṭam | | १४ | |
समि॑न्द्र णो॒ मन॑सा नेषि॒ गोभि॒: सᳪ सू॒रिभि॑र्मघव॒न्त्सᳪ स्व॒स्त्या ।
सं ब्रह्म॑णा दे॒वकृ॑तं॒ यदस्ति॒ सं दे॒वाना॑ᳪ सुम॒तौ य॒ज्ञिया॑ना॒ᳪ स्वाहा॑ ।। १५ ।।
sami॑ndra ṇo॒ mana॑sā neṣi॒ gobhi॒: saᳪ sū॒ribhi॑rmaghava॒ntsaᳪ sva॒styā | saṃ brahma॑ṇā de॒vakṛ॑taṃ॒ yadasti॒ saṃ de॒vānā॑ᳪ suma॒tau ya॒jñiyā॑nā॒ᳪ svāhā॑ | | १५ | |
सं वर्च॑सा॒ पय॑सा॒ सं त॒नूभि॒रग॑न्महि॒ मन॑सा॒ सᳪ शि॒वेन॑ ।
त्वष्टा॑ सु॒दत्रो॒ वि द॑धातु॒ रायोऽनु॑मार्ष्टु त॒न्वो यद्विलि॑ष्टम् ।। १६ ।।
saṃ varca॑sā॒ paya॑sā॒ saṃ ta॒nūbhi॒raga॑nmahi॒ mana॑sā॒ saᳪ śi॒vena॑ | tvaṣṭā॑ su॒datro॒ vi da॑dhātu॒ rāyo’nu॑mārṣṭu ta॒nvo yadvili॑ṣṭam | | १६ | |
धा॒ता रा॒तिः स॑वि॒तेदं जु॑षन्तां प्र॒जाप॑तिर्निधि॒पा दे॒वो अ॒ग्निः ।
त्वष्टा॒ विष्णु॑: प्र॒जया॑ सᳪररा॒णा यज॑मानाय॒ द्रवि॑णं दधात॒ स्वाहा॑ ।। १७ ।।
dhā॒tā rā॒tiḥ sa॑vi॒tedaṃ ju॑ṣantāṃ pra॒jāpa॑tirnidhi॒pā de॒vo a॒gniḥ | tvaṣṭā॒ viṣṇu॑: pra॒jayā॑ saᳪrarā॒ṇā yaja॑mānāya॒ dravi॑ṇaṃ dadhāta॒ svāhā॑ | | १७ | |
सु॒गा वो॑ देवा॒: सद॑ना अकर्म॒ य आ॑ज॒ग्मेदᳪ सव॑नं जुषा॒णाः ।
भर॑माणा॒ वह॑माना ह॒वीᳪष्य॒स्मे ध॑त्त वसवो॒ वसू॑नि॒ स्वाहा॑ ।। १८ ।।
su॒gā vo॑ devā॒: sada॑nā akarma॒ ya ā॑ja॒gmedaᳪ sava॑naṃ juṣā॒ṇāḥ | bhara॑māṇā॒ vaha॑mānā ha॒vīᳪṣya॒sme dha॑tta vasavo॒ vasū॑ni॒ svāhā॑ | | १८ | |
याँ२ आऽव॑ह उश॒तो दे॑व दे॒वाँस्तान् प्रेर॑य॒ स्वे अ॑ग्ने स॒धस्थे॑ ।
ज॒क्षि॒वाᳪस॑: पपि॒वाjस॑श्च॒ विश्वेऽसुं॑ घ॒र्मᳪ स्व॒राति॑ष्ठ॒तानु॒ स्वाहा॑ ।। १९ ।।
yām̐२ ā’va॑ha uśa॒to de॑va de॒vām̐stān prera॑ya॒ sve a॑gne sa॒dhasthe॑ | ja॒kṣi॒vāᳪsa॑: papi॒vājsa॑śca॒ viśve’suṃ॑ gha॒rmaᳪ sva॒rāti॑ṣṭha॒tānu॒ svāhā॑ | | १९ | |
व॒यᳪ हि त्वा॑ प्रय॒ति य॒ज्ञे अ॒स्मिन्न॑ग्ने॒ होता॑र॒मवृ॑णीमही॒ह ।
ऋध॑गया॒ ऋध॑गु॒ताश॑मिष्ठाः प्रजा॒नन् य॒ज्ञमुप॑ याहि वि॒द्वान्त्स्वाहा॑ ।। २० ।।
va॒yaᳪ hi tvā॑ praya॒ti ya॒jñe a॒sminna॑gne॒ hotā॑ra॒mavṛ॑ṇīmahī॒ha | ṛdha॑gayā॒ ṛdha॑gu॒tāśa॑miṣṭhāḥ prajā॒nan ya॒jñamupa॑ yāhi vi॒dvāntsvāhā॑ | | २० | |
देवा॑ गातुविदो गा॒तुं वि॒त्त्वा गा॒तुमि॑त । मन॑सस्पत इ॒मं दे॑व य॒ज्ञᳪ स्वाहा॒ वाते॑ धाः ।। २१ ।।
devā॑ gātuvido gā॒tuṃ vi॒ttvā gā॒tumi॑ta | mana॑saspata i॒maṃ de॑va ya॒jñaᳪ svāhā॒ vāte॑ dhāḥ | | २१ | |
यज्ञ॑ य॒ज्ञं ग॑च्छ य॒ज्ञपतिं॑ गच्छ॒ स्वां योनिं॑ गच्छ॒ स्वाहा॑ ।
ए॒ष ते॑ य॒ज्ञो य॑ज्ञपते स॒हसू॑क्तवाक॒: सर्व॑वीर॒स्तं जु॑षस्व॒ स्वाहा॑ ।। २२ ।।
yajña॑ ya॒jñaṃ ga॑ccha ya॒jñapatiṃ॑ gaccha॒ svāṃ yoniṃ॑ gaccha॒ svāhā॑ | e॒ṣa te॑ ya॒jño ya॑jñapate sa॒hasū॑ktavāka॒: sarva॑vīra॒staṃ ju॑ṣasva॒ svāhā॑ | | २२ | |
माहि॑र्भू॒र्मा पृदा॑कुः । उ॒रुᳪ हि राजा॒ वरु॑णश्च॒कार॒ सूर्या॑य॒ पन्था॒मन्वे॑त॒वा उ॑ ।
अ॒पदे॒ पादा॒ प्रति॑धातवेऽकरु॒ताप॑व॒क्ता हृ॑दया॒विध॑श्चित् ।
नमो॒ वरु॑णाया॒भिष्ठि॑तो॒ वरु॑णस्य॒ पाश॑: ।। २३ ।।
māhi॑rbhū॒rmā pṛdā॑kuḥ | u॒ruᳪ hi rājā॒ varu॑ṇaśca॒kāra॒ sūryā॑ya॒ panthā॒manve॑ta॒vā u॑ | a॒pade॒ pādā॒ prati॑dhātave’karu॒tāpa॑va॒ktā hṛ॑dayā॒vidha॑ścit | namo॒ varu॑ṇāyā॒bhiṣṭhi॑to॒ varu॑ṇasya॒ pāśa॑: | | २३ | |
अ॒ग्नेरनी॑कम॒प आ वि॑वेशा॒पां नपा॑त् प्रति॒रक्ष॑न्नसु॒र्य॒म् ।
दमे॑दमे स॒मिधं॑ यक्ष्यग्ने॒ प्रति॑ ते जि॒ह्वा घृ॒तमुच्च॑रण्य॒त् स्वाहा॑ ।। २४ ।।
a॒gneranī॑kama॒pa ā vi॑veśā॒pāṃ napā॑t prati॒rakṣa॑nnasu॒rya॒m | dame॑dame sa॒midhaṃ॑ yakṣyagne॒ prati॑ te ji॒hvā ghṛ॒tamucca॑raṇya॒t svāhā॑ | | २४ | |
स॒मु॒द्रे ते॒ हृद॑यम॒प्स्वन्तः सं त्वा॑ विश॒न्त्वोष॑धीरु॒ताप॑: ।
य॒ज्ञस्य॑ त्वा यज्ञपते सू॒क्तोक्तौ॑ नमोवा॒के वि॑धेम॒ यत्स्वाहा॑ ।। २५ ।।
sa॒mu॒dre te॒ hṛda॑yama॒psvantaḥ saṃ tvā॑ viśa॒ntvoṣa॑dhīru॒tāpa॑: | ya॒jñasya॑ tvā yajñapate sū॒ktoktau॑ namovā॒ke vi॑dhema॒ yatsvāhā॑ | | २५ | |
देवी॑राप ए॒ष वो॒ गर्भ॒स्तᳪ सुप्री॑त॒ᳪ सुभृ॑तं बिभृत ।
देव॑ सोमै॒ष ते॑ लो॒कस्तस्मि॒ञ्छं च॒ वक्ष्व॒ परि॑ च॒ वक्ष्व॑ ।। २६ ।।
devī॑rāpa e॒ṣa vo॒ garbha॒staᳪ suprī॑ta॒ᳪ subhṛ॑taṃ bibhṛta | deva॑ somai॒ṣa te॑ lo॒kastasmi॒ñchaṃ ca॒ vakṣva॒ pari॑ ca॒ vakṣva॑ | | २६ | |
अव॑भृथ निचुम्पुण निचे॒रुर॑सि निचुम्पु॒णः ।
अव॑ देवैर्दे॒वकृ॑त॒मेनो॑ऽयासिष॒मव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि ।
दे॒वाना॑ᳪ स॒मिद॑सि ।। २७ ।।
ava॑bhṛtha nicumpuṇa nice॒rura॑si nicumpu॒ṇaḥ | ava॑ devairde॒vakṛ॑ta॒meno॑’yāsiṣa॒mava॒ martyai॒rmartya॑kṛtaṃ puru॒rāvṇo॑ deva ri॒ṣaspā॑hi | de॒vānā॑ᳪ sa॒mida॑si | | २७ | |
एज॑तु॒ दश॑मास्यो॒ गर्भो॑ ज॒रायु॑णा स॒ह । यथा॒ऽयं वा॒युरेज॑ति॒ यथा॑ समु॒द्र एज॑ति ।
ए॒वा॒यं दश॑मास्यो॒ अस्र॑ज्ज॒रायु॑णा स॒ह ।। २८ ।।
eja॑tu॒ daśa॑māsyo॒ garbho॑ ja॒rāyu॑ṇā sa॒ha | yathā॒’yaṃ vā॒yureja॑ti॒ yathā॑ samu॒dra eja॑ti | e॒vā॒yaṃ daśa॑māsyo॒ asra॑jja॒rāyu॑ṇā sa॒ha | | २८ | |
यस्यै॑ ते य॒ज्ञियो॒ गर्भो॒ यस्यै॒ योनि॑र्हिरण्यी ।
अङ्गा॒न्यह्रु॑ता॒ यस्य॒ तं मा॒त्रा सम॑जीगम॒ᳪ स्वाहा॑ ।। २९ ।।
yasyai॑ te ya॒jñiyo॒ garbho॒ yasyai॒ yoni॑rhiraṇyī | aṅgā॒nyahru॑tā॒ yasya॒ taṃ mā॒trā sama॑jīgama॒ᳪ svāhā॑ | | २९ | |
पुरुद॒स्मो विषु॑रूप॒ इन्दु॑र॒न्तर्म॑हि॒मान॑मानञ्ज॒ धीर॑: ।
एक॑पदीं द्वि॒पदीं॑ त्रि॒पदीं॒ चतु॒ष्पदीम॒ष्टाप॑दीं॒ भुव॒नानु॑ प्रथन्ता॒ᳪ स्वाहा॑ ।। ३० ।।
puruda॒smo viṣu॑rūpa॒ indu॑ra॒ntarma॑hi॒māna॑mānañja॒ dhīra॑: | eka॑padīṃ dvi॒padīṃ॑ tri॒padīṃ॒ catu॒ṣpadīma॒ṣṭāpa॑dīṃ॒ bhuva॒nānu॑ prathantā॒ᳪ svāhā॑ | | ३० | |
मरु॑तो॒ यस्य॒ हि क्षये॑ पा॒था दि॒वो वि॑महसः । स सु॑गो॒पात॑मो॒ जन॑: ।। ३१ ।।
maru॑to॒ yasya॒ hi kṣaye॑ pā॒thā di॒vo vi॑mahasaḥ | sa su॑go॒pāta॑mo॒ jana॑: | | ३१ | |
म॒ही द्यौः पृ॑थि॒वी च॑ न इ॒मं य॒ज्ञं मि॑मिक्षताम् । पि॒पृ॒तां नो॒ भरी॑मभिः ।। ३२ ।।
ma॒hī dyauḥ pṛ॑thi॒vī ca॑ na i॒maṃ ya॒jñaṃ mi॑mikṣatām | pi॒pṛ॒tāṃ no॒ bharī॑mabhiḥ | | ३२ | |
आ ति॑ष्ठ वृत्रह॒न्रथं॑ यु॒क्ता ते॒ ब्रह्म॑णा॒ हरी॑ । अ॒र्वा॒चीन॒ᳪ सु ते॒ मनो॒ ग्रावा॑ कृणोतु व॒ग्नुना॑ ।
उ॒प॒या॒मगृ॑हीतो॒ऽसीन्द्रा॑य त्वा षोड॒शिन॑ ए॒ष ते॒ योनि॒रिन्द्रा॑य त्वा षोड॒शिने॑ ।। ३३ ।।
ā ti॑ṣṭha vṛtraha॒nrathaṃ॑ yu॒ktā te॒ brahma॑ṇā॒ harī॑ | a॒rvā॒cīna॒ᳪ su te॒ mano॒ grāvā॑ kṛṇotu va॒gnunā॑ | u॒pa॒yā॒magṛ॑hīto॒’sīndrā॑ya tvā ṣoḍa॒śina॑ e॒ṣa te॒ yoni॒rindrā॑ya tvā ṣoḍa॒śine॑ | | ३३ | |
यु॒क्ष्वा हि के॒शिना॒ हरी॒ वृष॑णा कक्ष्य॒प्रा । अथा॑ न इन्द्र सोमपा गि॒रामुप॑श्रुतिं चर ।
उ॒प॒या॒मगृ॑हीतो॒ऽसीन्द्रा॑य त्वा षोड॒शिन॑ ए॒ष ते॒ योनि॒रिन्द्रा॑य त्वा षोड॒शिने॑ ।। ३४ ।।
yu॒kṣvā hi ke॒śinā॒ harī॒ vṛṣa॑ṇā kakṣya॒prā | athā॑ na indra somapā gi॒rāmupa॑śrutiṃ cara | u॒pa॒yā॒magṛ॑hīto॒’sīndrā॑ya tvā ṣoḍa॒śina॑ e॒ṣa te॒ yoni॒rindrā॑ya tvā ṣoḍa॒śine॑ | | ३४ | |
इन्द्र॒मिद्धरी॑ वह॒तोऽप्र॑तिधृष्टशवसम् । ऋषी॑णां च स्तु॒तीरुप॑ य॒ज्ञं च॒ मानु॑षाणाम् ।
उ॒प॒या॒मगृ॑हीतो॒ सीन्द्रा॑य त्वा षोड॒शिने॑ ए॒ष ते॒ योनि॒रिन्द्रा॑य त्वा षोड॒शिने॑ ।। ३५ ।।
indra॒middharī॑ vaha॒to’pra॑tidhṛṣṭaśavasam | ṛṣī॑ṇāṃ ca stu॒tīrupa॑ ya॒jñaṃ ca॒ mānu॑ṣāṇām | u॒pa॒yā॒magṛ॑hīto॒ sīndrā॑ya tvā ṣoḍa॒śine॑ e॒ṣa te॒ yoni॒rindrā॑ya tvā ṣoḍa॒śine॑ | | ३५ | |
यस्मा॒न्न जा॒तः परो॑ अ॒न्यो अस्ति॒ य आ॑वि॒वेश॒ भुव॑नानि॒ विश्वा॑ ।
प्र॒जाप॑तिः प्र॒जया॑ सᳪररा॒णस्त्रीणि॒ ज्योती॑ᳪषि सचते॒ स षो॑डशी ।। ३६ ।।
yasmā॒nna jā॒taḥ paro॑ a॒nyo asti॒ ya ā॑vi॒veśa॒ bhuva॑nāni॒ viśvā॑ | pra॒jāpa॑tiḥ pra॒jayā॑ saᳪrarā॒ṇastrīṇi॒ jyotī॑ᳪṣi sacate॒ sa ṣo॑ḍaśī | | ३६ | |
इन्द्र॑श्च स॒म्राड्वरु॑णश्च॒ राजा तौ ते भ॒क्षं च॑क्रतु॒रग्र॑ ए॒तम् ।
तयो॑र॒हमनु॑ भ॒क्षं भ॑क्षयामि॒ वाग्दे॒वी जु॑षा॒णा सोम॑स्य तृप्यतु स॒ह प्रा॒णेन॒ स्वाहा॑ ।। ३७ ।।
indra॑śca sa॒mrāḍvaru॑ṇaśca॒ rājā tau te bha॒kṣaṃ ca॑kratu॒ragra॑ e॒tam | tayo॑ra॒hamanu॑ bha॒kṣaṃ bha॑kṣayāmi॒ vāgde॒vī ju॑ṣā॒ṇā soma॑sya tṛpyatu sa॒ha prā॒ṇena॒ svāhā॑ | | ३७ | |
अग्ने॒ पव॑स्व॒ स्वपा॑ अ॒स्मे वर्च॑: सु॒वीर्य॑म् । दध॑द्र॒यिं मयि॒ पोष॑म् ।
उ॒प॒या॒मगृ॑हीतोऽस्य॒ग्नये॑ त्वा॒ वर्च॑स ए॒ष ते॒ योनि॑र॒ग्नये॑ त्वा॒ वर्च॑से ।
अग्ने॑ वर्चस्वि॒न्वर्च॑स्वाँ॒स्त्वं दे॒वेष्वसि॒ वर्च॑स्वान॒हं म॑नु॒ष्ये॑षु भूयासम् ।। ३८ ।।
agne॒ pava॑sva॒ svapā॑ a॒sme varca॑: su॒vīrya॑m | dadha॑dra॒yiṃ mayi॒ poṣa॑m | u॒pa॒yā॒magṛ॑hīto’sya॒gnaye॑ tvā॒ varca॑sa e॒ṣa te॒ yoni॑ra॒gnaye॑ tvā॒ varca॑se | agne॑ varcasvi॒nvarca॑svām॒̐stvaṃ de॒veṣvasi॒ varca॑svāna॒haṃ ma॑nu॒ṣye॑ṣu bhūyāsam | | ३८ | |
उ॒त्तिष्ठ॒न्नोज॑सा स॒ह पी॒त्वी शिप्रे॑ अवेपयः । सोम॑मिन्द्र च॒मू सु॒तम् ।
उ॒प॒या॒मगृ॑हीतो॒ऽसीन्द्रा॑य॒ त्वौज॑स ए॒ष ते॒ योनि॒रिन्द्रा॑य त्वौजसे ।
इन्द्रौ॑जिष्ठौजि॑ष्ठ॒स्त्वं दे॒वेष्वस्योजि॑ष्ठो॒ऽहं म॑नु॒ष्ये॒षु भूयासम् ।। ३९ ।।
u॒ttiṣṭha॒nnoja॑sā sa॒ha pī॒tvī śipre॑ avepayaḥ | soma॑mindra ca॒mū su॒tam | u॒pa॒yā॒magṛ॑hīto॒’sīndrā॑ya॒ tvauja॑sa e॒ṣa te॒ yoni॒rindrā॑ya tvaujase | indrau॑jiṣṭhauji॑ṣṭha॒stvaṃ de॒veṣvasyoji॑ṣṭho॒’haṃ ma॑nu॒ṣye॒ṣu bhūyāsam | | ३९ | |
अदृ॑श्रमस्य के॒तवो॒ वि र॒श्मयो॒ जनाँ॒२ अनु॑ । भ्राज॑न्तो अ॒ग्नयो॑ यथा ।
उ॒प॒या॒मगृ॑हीतोऽसि॒ सूर्या॑य त्वा भ्रा॒जायै॒ष ते॒ योनि॒: सूर्या॑य त्वा भ्रा॒जाय॑ ।
सूर्य॑ भ्राजिष्ठ॒ भ्राजि॑ष्ठ॒स्त्वं दे॒वेष्वसि॒ भ्राजि॑ष्ठो॒ऽहं म॑नु॒ष्ये॒षु भूयासम् ।। ४० ।।
adṛ॑śramasya ke॒tavo॒ vi ra॒śmayo॒ janām॒̐२ anu॑ | bhrāja॑nto a॒gnayo॑ yathā | u॒pa॒yā॒magṛ॑hīto’si॒ sūryā॑ya tvā bhrā॒jāyai॒ṣa te॒ yoni॒: sūryā॑ya tvā bhrā॒jāya॑ | sūrya॑ bhrājiṣṭha॒ bhrāji॑ṣṭha॒stvaṃ de॒veṣvasi॒ bhrāji॑ṣṭho॒’haṃ ma॑nu॒ṣye॒ṣu bhūyāsam | | ४० | |
उदु॒ त्यं जा॒तवे॑दसं दे॒वं व॑हन्ति के॒तव॑: । दृ॒शे विश्वा॑य॒ सूर्य॑म् ।
उ॒प॒या॒मगृ॑हीतोऽसि॒ सूर्या॑य त्वा भ्रा॒जायै॒ष ते॒ योनि॒: सूर्या॑य त्वा भ्रा॒जाय॑ ।। ४१ ।।
udu॒ tyaṃ jā॒tave॑dasaṃ de॒vaṃ va॑hanti ke॒tava॑: | dṛ॒śe viśvā॑ya॒ sūrya॑m | u॒pa॒yā॒magṛ॑hīto’si॒ sūryā॑ya tvā bhrā॒jāyai॒ṣa te॒ yoni॒: sūryā॑ya tvā bhrā॒jāya॑ | | ४१ | |
आ जि॑घ्र क॒लशं॑ म॒ह्या त्वा॑ विश॒न्त्विन्द॑वः।
पुन॑रू॒र्जा नि व॑र्तस्व॒ सा न॑: स॒हस्रं॑ धुक्ष्वो॒रुधा॑रा॒ पय॑स्वती॒ पुन॒र्मा वि॑शताद्र॒यिः ।। ४२ ।।
ā ji॑ghra ka॒laśaṃ॑ ma॒hyā tvā॑ viśa॒ntvinda॑vaḥ | puna॑rū॒rjā ni va॑rtasva॒ sā na॑: sa॒hasraṃ॑ dhukṣvo॒rudhā॑rā॒ paya॑svatī॒ puna॒rmā vi॑śatādra॒yiḥ | | ४२ | |
इडे॒ रन्ते॒ हव्ये॒ काम्ये॒ चन्द्रे॒ ज्योतेऽदि॑ते॒ सर॑स्वति॒ महि॒ विश्रु॑ति ।
ए॒ता ते॑ अघ्न्ये॒ नामा॑नि दे॒वेभ्यो॑ मा सु॒कृतं॑ ब्रूतात् ।। ४३ ।।
iḍe॒ rante॒ havye॒ kāmye॒ candre॒ jyote’di॑te॒ sara॑svati॒ mahi॒ viśru॑ti | e॒tā te॑ aghnye॒ nāmā॑ni de॒vebhyo॑ mā su॒kṛtaṃ॑ brūtāt | | ४३ | |
वि न॑ इन्द्र॒ मृधो॑ जहि नी॒चा य॑च्छ पृतन्य॒तः ।
यो अ॒स्माँ२ अ॑भि॒दास॒त्यध॑रं गमया॒ तम॑: ।
उ॒प॒या॒मगृ॑हीतो॒ऽसीन्द्रा॑य त्वा वि॒मृधे॑ ए॒ष ते॒ योनि॒रिन्द्रा॑य त्वा वि॒मृधे॑ ।। ४४ ।।
vi na॑ indra॒ mṛdho॑ jahi nī॒cā ya॑ccha pṛtanya॒taḥ | yo a॒smām̐२ a॑bhi॒dāsa॒tyadha॑raṃ gamayā॒ tama॑: | u॒pa॒yā॒magṛ॑hīto॒’sīndrā॑ya tvā vi॒mṛdhe॑ e॒ṣa te॒ yoni॒rindrā॑ya tvā vi॒mṛdhe॑ | | ४४ | |
वा॒चस्पतिं॑ वि॒श्वक॑र्माणमू॒तये॑ मनो॒जुवं॒ वाजे॑ अ॒द्या हु॑वेम ।
स नो॒ विश्वा॑नि॒ हव॑नानि जोषद्वि॒श्वश॑म्भू॒रव॑से सा॒धुक॑र्मा ।
उ॒प॒या॒मगृ॑हीतो॒ऽसीन्द्रा॑य त्वा वि॒श्वक॑र्मणे
ए॒ष ते॒ योनि॒रिन्द्रा॑य त्वा वि॒श्वक॑र्मणे ।। ४५ ।।
vā॒caspatiṃ॑ vi॒śvaka॑rmāṇamū॒taye॑ mano॒juvaṃ॒ vāje॑ a॒dyā hu॑vema | sa no॒ viśvā॑ni॒ hava॑nāni joṣadvi॒śvaśa॑mbhū॒rava॑se sā॒dhuka॑rmā | u॒pa॒yā॒magṛ॑hīto॒’sīndrā॑ya tvā vi॒śvaka॑rmaṇe e॒ṣa te॒ yoni॒rindrā॑ya tvā vi॒śvaka॑rmaṇe | | ४५ | |
विश्व॑कर्मन् ह॒विषा॒ वर्ध॑नेन त्रा॒तार॒मिन्द्र॑मकृणोरव॒ध्यम् ।
तस्मै॒ विश॒: सम॑नमन्त पू॒र्वीर॒यमु॒ग्रो वि॒हव्यो॒ यथास॑त् ।
उ॒प॒या॒मगृ॑हीतो॒ऽसीन्द्रा॑य त्वा वि॒श्वक॑र्मण
ए॒ष ते॒ योनि॒रिन्द्रा॑य त्वा वि॒श्वक॑र्मणे ।। ४६ ।।
viśva॑karman ha॒viṣā॒ vardha॑nena trā॒tāra॒mindra॑makṛṇorava॒dhyam | tasmai॒ viśa॒: sama॑namanta pū॒rvīra॒yamu॒gro vi॒havyo॒ yathāsa॑t | u॒pa॒yā॒magṛ॑hīto॒’sīndrā॑ya tvā vi॒śvaka॑rmaṇa e॒ṣa te॒ yoni॒rindrā॑ya tvā vi॒śvaka॑rmaṇe | | ४६ | |
उ॒प॒या॒मगृ॑हीतोऽस्य॒ग्नये॑ त्वा गाय॒त्रच्छ॑न्दसं गृह्णामीन्द्रा॑य त्वा त्रि॒ष्टुप्छ॑न्दसं गृह्णामि॒
विश्वे॑भ्यस्त्वा दे॒वेभ्यो॒ जग॑च्छन्दसं गृह्णाम्यनु॒ष्टुप्ते॑ऽभिग॒रः ।। ४७ ।।
u॒pa॒yā॒magṛ॑hīto’sya॒gnaye॑ tvā gāya॒traccha॑ndasaṃ gṛhṇāmīndrā॑ya tvā tri॒ṣṭupcha॑ndasaṃ gṛhṇāmi॒ viśve॑bhyastvā de॒vebhyo॒ jaga॑cchandasaṃ gṛhṇāmyanu॒ṣṭupte॑’bhiga॒raḥ | | ४७ | |
व्रेशी॑नां त्वा॒ पत्म॒न्ना धू॑नोमि कुकू॒नना॑नां त्वा॒ पत्म॒न्ना धू॑नोमि भ॒न्दना॑नां त्वा॒ पत्म॒न्ना धू॑नोमि म॒दिन्त॑मानां त्वा॒ पत्म॒न्ना धू॑नोमि म॒धुन्त॑मानां त्वा॒ पत्म॒न्ना धू॑नोमि शु॒क्रं त्वा॑ शु॒क्र आ धू॑नो॒म्यह्नो॑ रू॒पे सूर्य॑स्य र॒श्मिषु॑ ।। ४८ ।।
vreśī॑nāṃ tvā॒ patma॒nnā dhū॑nomi kukū॒nanā॑nāṃ tvā॒ patma॒nnā dhū॑nomi bha॒ndanā॑nāṃ tvā॒ patma॒nnā dhū॑nomi ma॒dinta॑mānāṃ tvā॒ patma॒nnā dhū॑nomi ma॒dhunta॑mānāṃ tvā॒ patma॒nnā dhū॑nomi śu॒kraṃ tvā॑ śu॒kra ā dhū॑no॒myahno॑ rū॒pe sūrya॑sya ra॒śmiṣu॑ | | ४८ | |
ककु॒भᳪ रू॒पं वृ॑ष॒भस्य॑ रोचते बृ॒हच्छु॒क्रः शु॒क्रस्य॑ पुरो॒गाः सोम॒: सोम॑स्य पुरो॒गाः ।
यत्ते॑ सोमा॒दा॑भ्यं॒ नाम॒ जागृ॑वि॒ तस्मै॑ त्वा गृह्णामि॒ तस्मै॑ ते सोम॒ सोमा॑य॒ स्वाहा॑ ।। ४९ ।।
kaku॒bhaᳪ rū॒paṃ vṛ॑ṣa॒bhasya॑ rocate bṛ॒hacchu॒kraḥ śu॒krasya॑ puro॒gāḥ soma॒: soma॑sya puro॒gāḥ | yatte॑ somā॒dā॑bhyaṃ॒ nāma॒ jāgṛ॑vi॒ tasmai॑ tvā gṛhṇāmi॒ tasmai॑ te soma॒ somā॑ya॒ svāhā॑ | | ४९ | |
उ॒शिक् त्वं दे॑व सोमा॒ग्नेः प्रि॒यं पाथोऽपी॑हि
व॒शी त्वं दे॑व सो॒मेन्द्र॑स्य प्रि॒यं पाथोऽपी॑ह्य॒स्मत्स॑खा॒ त्वं दे॑व सोम॒ विश्वे॑षां दे॒वानां॑ प्रि॒यं पाथोऽपी॑हि ।। ५० ।।
u॒śik tvaṃ de॑va somā॒gneḥ pri॒yaṃ pātho’pī॑hi va॒śī tvaṃ de॑va so॒mendra॑sya pri॒yaṃ pātho’pī॑hya॒smatsa॑khā॒ tvaṃ de॑va soma॒ viśve॑ṣāṃ de॒vānāṃ॑ pri॒yaṃ pātho’pī॑hi | | ५० | |
इ॒ह रति॑रि॒ह र॑मध्वमि॒ह धृति॑रि॒ह स्वधृ॑ति॒: स्वाहा॑ ।
उ॒प॒सृ॒जन् ध॒रुणं॑ मा॒त्रे ध॒रुणो॑ मा॒तरं॒ धय॑न् । रा॒यस्पोष॑म॒स्मासु॑ दीधर॒त्स्वाहा॑ ।। ५१ ।।
i॒ha rati॑ri॒ha ra॑madhvami॒ha dhṛti॑ri॒ha svadhṛ॑ti॒: svāhā॑ | u॒pa॒sṛ॒jan dha॒ruṇaṃ॑ mā॒tre dha॒ruṇo॑ mā॒taraṃ॒ dhaya॑n | rā॒yaspoṣa॑ma॒smāsu॑ dīdhara॒tsvāhā॑ | | ५१ | |
स॒त्रस्य॒ ऋद्धि॑र॒स्यग॑न्म॒ ज्योति॑र॒मृता॑ अभूम॒ ।
दिवं॑ पृथि॒व्या अध्याऽरु॑हा॒मावि॑दाम दे॒वान्त्स्व॒र्ज्योति॑: ।। ५२ ।।
sa॒trasya॒ ṛddhi॑ra॒syaga॑nma॒ jyoti॑ra॒mṛtā॑ abhūma॒ | divaṃ॑ pṛthi॒vyā adhyā’ru॑hā॒māvi॑dāma de॒vāntsva॒rjyoti॑: | | ५२ | |
यु॒वं तमि॑न्द्रापर्वता पुरो॒युधा॒ यो न॑: पृत॒न्यादप॒ तं त॒मिद्ध॑तं॒ वज्रे॑ण॒ तं त॒मिद्ध॑तम् ।
दू॒रे च॒त्ताय॑ छन्त्स॒द्गह॑नं॒ यदिन॑क्षत् ।
अ॒स्माक॒ᳪ शत्रू॒न्परि॑ शूर वि॒श्वतो॑ द॒र्मा द॑र्षीष्ट वि॒श्वत॑: ।
भूर्भुव॒: स्व॒: सुप्र॒जाः प्र॒जाभि॑: स्याम सु॒वीरा॑ वीरैः सु॒पोषा॒: पोषै॑: ।। ५३ ।।
yu॒vaṃ tami॑ndrāparvatā puro॒yudhā॒ yo na॑: pṛta॒nyādapa॒ taṃ ta॒middha॑taṃ॒ vajre॑ṇa॒ taṃ ta॒middha॑tam | dū॒re ca॒ttāya॑ chantsa॒dgaha॑naṃ॒ yadina॑kṣat | a॒smāka॒ᳪ śatrū॒npari॑ śūra vi॒śvato॑ da॒rmā da॑rṣīṣṭa vi॒śvata॑: | bhūrbhuva॒: sva॒: supra॒jāḥ pra॒jābhi॑: syāma su॒vīrā॑ vīraiḥ su॒poṣā॒: poṣai॑: | | ५३ | |
प॒र॒मे॒ष्ठ्य॒भिधी॑तः प्र॒जाप॑तिर्वा॒चि व्याहृ॑तायामन्धो॒ अच्छे॑तः ।
स॑वि॒ता स॒न्यां वि॒श्वक॑र्मा दी॒क्षायां॑ पू॒षा सो॑म॒क्रय॑ण्याम् ।। ५४ ।।
pa॒ra॒me॒ṣṭhya॒bhidhī॑taḥ pra॒jāpa॑tirvā॒ci vyāhṛ॑tāyāmandho॒ acche॑taḥ | sa॑vi॒tā sa॒nyāṃ vi॒śvaka॑rmā dī॒kṣāyāṃ॑ pū॒ṣā so॑ma॒kraya॑ṇyām | | ५४ | |
इन्द्र॑श्च म॒रुत॑श्च क्र॒यायो॒पोत्थि॒तो ऽसु॑रः प॒ण्यमा॑नो मि॒त्रः क्री॒तो विष्णु॑: शिपिवि॒ष्ट उ॒रावास॑न्नो॒ विष्णु॑र्न॒रन्धि॑षः ।। ५५ ।।
indra॑śca ma॒ruta॑śca kra॒yāyo॒potthi॒to ’su॑raḥ pa॒ṇyamā॑no mi॒traḥ krī॒to viṣṇu॑: śipivi॒ṣṭa u॒rāvāsa॑nno॒ viṣṇu॑rna॒randhi॑ṣaḥ | | ५५ | |
प्रो॒ह्यमा॑ण॒: सोम॒ आग॑तो॒ वरु॑ण आस॒न्द्यामास॑न्नो॒ ऽग्निराग्नी॑ध्र॒ इन्द्रो॑ हवि॒र्धाने॑ ऽथ॑र्वोपावह्रि॒यमा॑णः ।। ५६ ।।
pro॒hyamā॑ṇa॒: soma॒ āga॑to॒ varu॑ṇa āsa॒ndyāmāsa॑nno॒ ’gnirāgnī॑dhra॒ indro॑ havi॒rdhāne॑ ’tha॑rvopāvahri॒yamā॑ṇaḥ | | ५६ | |
विश्वे॑ दे॒वा अ॒ᳪशुषु॒ न्युप्तो॒ विष्णु॑राप्रीत॒पा आ॑प्या॒य्यमा॑नो य॒मः सू॒यमा॑ नो॒ विष्णु॑: सम्भ्रि॒यमा॑णो वा॒युः पू॒यमा॑नः शु॒क्रः पू॒तः शु॒क्र: क्षी॑र॒श्रीर्म॒न्थी स॑क्तु॒श्रीः ।। ५७ ।।
viśve॑ de॒vā a॒ᳪśuṣu॒ nyupto॒ viṣṇu॑rāprīta॒pā ā॑pyā॒yyamā॑no ya॒maḥ sū॒yamā॑ no॒ viṣṇu॑: sambhri॒yamā॑ṇo vā॒yuḥ pū॒yamā॑naḥ śu॒kraḥ pū॒taḥ śu॒kra: kṣī॑ra॒śrīrma॒nthī sa॑ktu॒śrīḥ | | ५७ | |
विश्वे॑ दे॒वाश्च॑म॒सेषून्नी॒तो ऽसु॒र्होमा॒योद्य॑तो रु॒द्रो हू॒यमा॑नो॒ वातो॒ऽभ्यावृ॑त्तो नृ॒चक्षा॒: प्रति॑ख्यातो
भ॒क्षो भ॒क्ष्यमा॑णः पि॒तरो॑ नाराश॒ᳪसाः ।। ५८ ।।
viśve॑ de॒vāśca॑ma॒seṣūnnī॒to ’su॒rhomā॒yodya॑to ru॒dro hū॒yamā॑no॒ vāto॒’bhyāvṛ॑tto nṛ॒cakṣā॒: prati॑khyāto bha॒kṣo bha॒kṣyamā॑ṇaḥ pi॒taro॑ nārāśa॒ᳪsāḥ | | ५८ | |
स॒न्नः सिन्धु॑रवभृ॒थायोद्य॑तः समु॒द्रो॒ऽभ्यवह्रि॒यमा॑णः स॑लि॒लः प्रप्लु॑तो
ययो॒रोज॑सा स्कभि॒ता रजा॑ᳪसि वी॒र्ये॑भिर्वी॒रत॑मा॒ शवि॑ष्ठा ।
या पत्ये॑ते॒ अप्र॑तीता॒ सहो॑भि॒र्विष्णू॑ अग॒न्वरु॑णा पू॒र्वहू॑तौ ।। ५९ ।।
sa॒nnaḥ sindhu॑ravabhṛ॒thāyodya॑taḥ samu॒dro॒’bhyavahri॒yamā॑ṇaḥ sa॑li॒laḥ praplu॑to yayo॒roja॑sā skabhi॒tā rajā॑ᳪsi vī॒rye॑bhirvī॒rata॑mā॒ śavi॑ṣṭhā | yā patye॑te॒ apra॑tītā॒ saho॑bhi॒rviṣṇū॑ aga॒nvaru॑ṇā pū॒rvahū॑tau | | ५९ | |
दे॒वान्दिव॑मगन्य॒ज्ञस्ततो॑ मा॒ द्रवि॑णमष्टु मनु॒ष्या॒न॒न्तरि॑क्षमगन्य॒ज्ञस्ततो॑ मा॒ द्रवि॑णमष्टु
पि॒तॄन्पृ॑थि॒वीम॑गन्य॒ज्ञस्ततो॑ मा॒ द्रवि॑णमष्टु॒ यं कं च॑ लो॒कमग॑न्य॒ज्ञस्ततो॑ मे भ॒द्रंम॑भूत् ।। ६० ।।
de॒vāndiva॑maganya॒jñastato॑ mā॒ dravi॑ṇamaṣṭu manu॒ṣyā॒na॒ntari॑kṣamaganya॒jñastato॑ mā॒ dravi॑ṇamaṣṭu pi॒tṝnpṛ॑thi॒vīma॑ganya॒jñastato॑ mā॒ dravi॑ṇamaṣṭu॒ yaṃ kaṃ ca॑ lo॒kamaga॑nya॒jñastato॑ me bha॒draṃma॑bhūt | | ६० | |
चतु॑स्त्रिᳪश॒त्तन्त॑वो॒ ये वित॑त्नि॒रे य इ॒मं य॒ज्ञᳪ स्व॒धया॒ दद॑न्ते ।
तेषां॑ छि॒न्नᳪ सम्वे॒तद्द॑धामि॒ स्वाहा॑ घ॒र्मो अप्ये॑तु दे॒वान् ।। ६१ ।।
catu॑striᳪśa॒ttanta॑vo॒ ye vita॑tni॒re ya i॒maṃ ya॒jñaᳪ sva॒dhayā॒ dada॑nte | teṣāṃ॑ chi॒nnaᳪ samve॒tadda॑dhāmi॒ svāhā॑ gha॒rmo apye॑tu de॒vān | | ६१ | |
य॒ज्ञस्य॒ दोहो॒ वित॑तः पुरु॒त्रा सो अ॑ष्ट॒धा दिव॑म॒न्वात॑तान ।
स य॑ज्ञ धुक्ष्व॒ महि॑ मे प्र॒जा या॑ᳪ रा॒यस्पोषं॒ विश्व॒मायु॑रशीय॒ स्वाहा॑ ।। ६२ ।।
ya॒jñasya॒ doho॒ vita॑taḥ puru॒trā so a॑ṣṭa॒dhā diva॑ma॒nvāta॑tāna | sa ya॑jña dhukṣva॒ mahi॑ me pra॒jā yā॑ᳪ rā॒yaspoṣaṃ॒ viśva॒māyu॑raśīya॒ svāhā॑ | | ६२ | |
आ प॑वस्व॒ हिर॑ण्यव॒दश्व॑वत्सोम वी॒रव॑त् । वाजं॒ गोम॑न्त॒मा भ॑र॒ स्वाहा॑ ।। ६३ ।।
ā pa॑vasva॒ hira॑ṇyava॒daśva॑vatsoma vī॒rava॑t | vājaṃ॒ goma॑nta॒mā bha॑ra॒ svāhā॑ | | ६३ | |