EeseDharmaSanātana Library
5अध्याय 5
Śukla Yajurveda Mādhyaṃdina ka Adhyay 5.
43 shlokअ॒ग्नेस्त॒नूर॑सि॒ विष्ण॑वे त्वा॒ सोम॑स्य त॒नूर॑सि॒ विष्ण॑वे॒ त्वा ऽति॑थेराति॒थ्यम॑सि॒ विष्ण॑वे त्वा श्ये॒नाय॑ त्वा सोम॒भृते॒ विष्ण॑वे त्वा॒ऽग्नये॑ त्वा रायस्पोष॒दे विष्ण॑वे त्वा ।। १ ।।
a॒gnesta॒nūra॑si॒ viṣṇa॑ve tvā॒ soma॑sya ta॒nūra॑si॒ viṣṇa॑ve॒ tvā ’ti॑therāti॒thyama॑si॒ viṣṇa॑ve tvā śye॒nāya॑ tvā soma॒bhṛte॒ viṣṇa॑ve tvā॒’gnaye॑ tvā rāyaspoṣa॒de viṣṇa॑ve tvā | | १ | |
अ॒ग्नेर्ज॒नित्र॑मसि वृष॑णौ स्थ उ॒र्वश्य॑स्या॒युर॑सि पुरू॒रवा॑ असि । गा॒य॒त्रेण॑ त्वा॒ छन्द॑सा मन्थामि॒ त्रै॑ष्टुभेन त्वा॒ छन्द॑सा मन्थामि॒ जाग॑तेन त्वा॒ छन्द॑सा मन्थामि ।। २ ।।
a॒gnerja॒nitra॑masi vṛṣa॑ṇau stha u॒rvaśya॑syā॒yura॑si purū॒ravā॑ asi | gā॒ya॒treṇa॑ tvā॒ chanda॑sā manthāmi॒ trai॑ṣṭubhena tvā॒ chanda॑sā manthāmi॒ jāga॑tena tvā॒ chanda॑sā manthāmi | | २ | |
भव॑तं न॒: सम॑नसौ॒ सचे॑तसावरे॒पसौ॑ । मा य॒ज्ञᳪ हि॑ᳪसिष्टं॒ मा य॒ज्ञप॑तिं जातवेदसौ शिवौ भ॑वतम॒द्य न॑: ।। ३ ।।
bhava॑taṃ na॒: sama॑nasau॒ sace॑tasāvare॒pasau॑ | mā ya॒jñaᳪ hi॑ᳪsiṣṭaṃ॒ mā ya॒jñapa॑tiṃ jātavedasau śivau bha॑vatama॒dya na॑: | | ३ | |
अ॒ग्नाव॒ग्निश्च॑रति॒ प्रवि॑ष्ट॒ ऋषी॑णां पु॒त्रो अ॑भिशस्ति॒पावा॑ । स न॑: स्यो॒नः सु॒यजा॑ यजे॒ह दे॒वेभ्यो॑ ह॒व्यᳪ सद॒मप्र॑युच्छ॒न्त्स्वाहा॑ ।। ४ ।।
a॒gnāva॒gniśca॑rati॒ pravi॑ṣṭa॒ ṛṣī॑ṇāṃ pu॒tro a॑bhiśasti॒pāvā॑ | sa na॑: syo॒naḥ su॒yajā॑ yaje॒ha de॒vebhyo॑ ha॒vyaᳪ sada॒mapra॑yuccha॒ntsvāhā॑ | | ४ | |
आप॑तये त्वा॒ परि॑पतये गृह्णामि॒ तनू॒नप्त्रे॑ शाक्व॒राय॒ शक्व॑न॒ ओजि॑ष्ठाय । अना॑धृष्टमस्यनाधृ॒ष्यं दे॒वाना॒मोजोऽन॑भिशस्त्यभिशस्ति॒पा अ॑नभिशस्ते॒न्यमञ्ज॑सा स॒त्यमुप॑गेषᳪ स्वि॒ते मा॑ धाः ।। ५ ।।
āpa॑taye tvā॒ pari॑pataye gṛhṇāmi॒ tanū॒naptre॑ śākva॒rāya॒ śakva॑na॒ oji॑ṣṭhāya | anā॑dhṛṣṭamasyanādhṛ॒ṣyaṃ de॒vānā॒mojo’na॑bhiśastyabhiśasti॒pā a॑nabhiśaste॒nyamañja॑sā sa॒tyamupa॑geṣaᳪ svi॒te mā॑ dhāḥ | | ५ | |
अग्ने॑ व्रतपा॒स्त्वे व्र॑त॒पा या तव॑ त॒नूरि॒यᳪ सा मयि॒ यो मम॑ त॒नूरे॒षा सा त्वयि॑ । स॒ह नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒र्मन्य॑ता॒मनु॒ तप॒स्तप॑स्पतिः ।। ६ ।।
agne॑ vratapā॒stve vra॑ta॒pā yā tava॑ ta॒nūri॒yaᳪ sā mayi॒ yo mama॑ ta॒nūre॒ṣā sā tvayi॑ | sa॒ha nau॑ vratapate vra॒tānyanu॑ me dī॒kṣāṃ dī॒kṣāpa॑ti॒rmanya॑tā॒manu॒ tapa॒stapa॑spatiḥ | | ६ | |
अ॒jशुर॑ᳪशुष्टे देव सो॒माप्या॑यता॒मिन्द्रा॑यैकधन॒विदे॑ । आ तुभ्य॒मिन्द्र॒: प्याय॑ता॒मा त्वमिन्द्रा॑य प्यायस्व । आ प्या॑यया॒स्मान्त्सखी॑न्त्स॒न्या मे॒धया॑ स्व॒स्ति ते॑ देव सोम सु॒त्याम॑शीय । एष्टा॒ राय॒: प्रेषे भगा॑य ऋ॒तमृ॑तवा॒दिभ्यो॒ नमो॒ द्यावा॑पृथि॒वीभ्या॑म् ।। ७ ।।
a॒jśura॑ᳪśuṣṭe deva so॒māpyā॑yatā॒mindrā॑yaikadhana॒vide॑ | ā tubhya॒mindra॒: pyāya॑tā॒mā tvamindrā॑ya pyāyasva | ā pyā॑yayā॒smāntsakhī॑ntsa॒nyā me॒dhayā॑ sva॒sti te॑ deva soma su॒tyāma॑śīya | eṣṭā॒ rāya॒: preṣe bhagā॑ya ṛ॒tamṛ॑tavā॒dibhyo॒ namo॒ dyāvā॑pṛthi॒vībhyā॑m | | ७ | |
या ते॑ अग्नेऽयःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
या ते॑ अग्ने रजःश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
या ते॑ अग्ने हरिश॒या त॒नूर्वर्षि॑ष्ठा गह्वरे॒ष्ठा । उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।। ८ ।।
yā te॑ agne’yaḥśa॒yā ta॒nūrvarṣi॑ṣṭhā gahvare॒ṣṭhā | u॒graṃ vaco॒ apā॑vadhīttve॒ṣaṃ vaco॒ apā॑vadhī॒tsvāhā॑ | yā te॑ agne rajaḥśa॒yā ta॒nūrvarṣi॑ṣṭhā gahvare॒ṣṭhā | u॒graṃ vaco॒ apā॑vadhīttve॒ṣaṃ vaco॒ apā॑vadhī॒tsvāhā॑ | yā te॑ agne hariśa॒yā ta॒nūrvarṣi॑ṣṭhā gahvare॒ṣṭhā | u॒graṃ vaco॒ apā॑vadhīttve॒ṣaṃ vaco॒ apā॑vadhī॒tsvāhā॑ | | ८ | |
त॒प्ताय॑नी मेऽसि वि॒त्ताय॑नी मेऽस्यव॑तान्मा नाथि॒तादव॑तान्मा व्यथि॒तात् । वि॒देद॒ग्निर्नभो॒ नामा ऽग्ने॑ अङ्गिर॒ आयु॑ना॒ नाम्नेहि॒
योऽस्यां पृ॑थि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे वि॒देद॒ग्निर्न॒भो॒ नामा ऽग्ने॑ अङ्गिर॒ आयु॑ना॒ नाम्नेहि॒
यो द्वि॒तीय॑स्यां पृथि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे वि॒देद॒ग्निर्न॒भो नामा ऽग्ने॑ अङ्गिर॒ आयु॑ना॒ नाम्नेहि॑ यस्तृ॒तीय॑स्यां पृथि॒व्यामसि॒ यत्तेऽना॑धृष्टं॒ नाम॑ य॒ज्ञियं॒ तेन॒ त्वा द॑धे । अनु॑ त्वा दे॒ववी॑तये ।। ९ ।।
ta॒ptāya॑nī me’si vi॒ttāya॑nī me’syava॑tānmā nāthi॒tādava॑tānmā vyathi॒tāt | vi॒deda॒gnirnabho॒ nāmā ’gne॑ aṅgira॒ āyu॑nā॒ nāmnehi॒ yo’syāṃ pṛ॑thi॒vyāmasi॒ yatte’nā॑dhṛṣṭaṃ॒ nāma॑ ya॒jñiyaṃ॒ tena॒ tvā da॑dhe vi॒deda॒gnirna॒bho॒ nāmā ’gne॑ aṅgira॒ āyu॑nā॒ nāmnehi॒ yo dvi॒tīya॑syāṃ pṛthi॒vyāmasi॒ yatte’nā॑dhṛṣṭaṃ॒ nāma॑ ya॒jñiyaṃ॒ tena॒ tvā da॑dhe vi॒deda॒gnirna॒bho nāmā ’gne॑ aṅgira॒ āyu॑nā॒ nāmnehi॑ yastṛ॒tīya॑syāṃ pṛthi॒vyāmasi॒ yatte’nā॑dhṛṣṭaṃ॒ nāma॑ ya॒jñiyaṃ॒ tena॒ tvā da॑dhe | anu॑ tvā de॒vavī॑taye | | ९ | |
सि॒jह्य॒सि सपत्नसा॒ही दे॒वेभ्य॑: कल्पस्व सि॒jह्य॒सि सपत्नसा॒ही दे॒वेभ्य॑:शुन्धस्व सि॒jह्य॒सि सपत्नसा॒ही दे॒वेभ्य॑: शुम्भस्व ।। १० ।।
si॒jhya॒si sapatnasā॒hī de॒vebhya॑: kalpasva si॒jhya॒si sapatnasā॒hī de॒vebhya॑:śundhasva si॒jhya॒si sapatnasā॒hī de॒vebhya॑: śumbhasva | | १० | |
इ॒न्द्र॒घो॒षस्त्वा॒ वसु॑भिः पु॒रस्ता॑त्पातु प्रचे॑तास्त्वा रुद्रैः प॒श्चात्पा॑तु मनो॑जवास्त्वा पि॒तृभि॑र्दक्षिण॒तः पा॑तु
वि॒श्वक॑र्मा त्वाऽऽदि॒त्यैरु॑त्तर॒तः पा॑त्वि॒दम॒हं त॒प्तं वार्ब॑हि॒र्धा य॒ज्ञान्निः सृ॑जामि ।। ११ ।।
i॒ndra॒gho॒ṣastvā॒ vasu॑bhiḥ pu॒rastā॑tpātu prace॑tāstvā rudraiḥ pa॒ścātpā॑tu mano॑javāstvā pi॒tṛbhi॑rdakṣiṇa॒taḥ pā॑tu vi॒śvaka॑rmā tvā’’di॒tyairu॑ttara॒taḥ pā॑tvi॒dama॒haṃ ta॒ptaṃ vārba॑hi॒rdhā ya॒jñānniḥ sṛ॑jāmi | | ११ | |
सि॒jह्य॒सि॒ स्वाहा॑ सि॒jह्य॒स्यादित्य॒वनि॒: स्वाहा॑ सि॒jह्य॒सि ब्रह्म॒वनि॑: क्षत्र॒वनि॒: स्वाहा॑
सि॒jह्य॒सि सुप्रजा॒वनी॑ रायस्पोष॒वनि॒: स्वाहा॑ सि॒jह्यस्याव॑ह दे॒वान् यज॑मानाय॒ स्वाहा॑
भू॒तेभ्य॑स्त्वा ।। १२ ।।
si॒jhya॒si॒ svāhā॑ si॒jhya॒syāditya॒vani॒: svāhā॑ si॒jhya॒si brahma॒vani॑: kṣatra॒vani॒: svāhā॑ si॒jhya॒si suprajā॒vanī॑ rāyaspoṣa॒vani॒: svāhā॑ si॒jhyasyāva॑ha de॒vān yaja॑mānāya॒ svāhā॑ bhū॒tebhya॑stvā | | १२ | |
ध्रु॒वो॒ऽसि पृथि॒वीं दृ॑ᳪह ध्रुव॒क्षिद॑स्य॒न्तरि॑क्षं दृᳪहाच्युत॒क्षिद॑सि॒ दिवं॑ दृᳪहा॒ग्नेः पुरी॑षमसि ।। १३ ।।
dhru॒vo॒’si pṛthi॒vīṃ dṛ॑ᳪha dhruva॒kṣida॑sya॒ntari॑kṣaṃ dṛᳪhācyuta॒kṣida॑si॒ divaṃ॑ dṛᳪhā॒gneḥ purī॑ṣamasi | | १३ | |
यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चित॑: ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुति॒: स्वाहा॑ ।। १४ ।।
yu॒ñjate॒ mana॑ u॒ta yu॑ñjate॒ dhiyo॒ viprā॒ vipra॑sya bṛha॒to vi॑pa॒ścita॑: | vi hotrā॑ dadhe vayunā॒videka॒ inma॒hī de॒vasya॑ savi॒tuḥ pari॑ṣṭuti॒: svāhā॑ | | १४ | |
इ॒दं विष्णु॒र्वि च॑क्रमे त्रे॒धा नि द॑धे प॒दम् । समू॑ढमस्य पाᳪसु॒रे स्वाहा॑ ।। १५ ।।
i॒daṃ viṣṇu॒rvi ca॑krame tre॒dhā ni da॑dhe pa॒dam | samū॑ḍhamasya pāᳪsu॒re svāhā॑ | | १५ | |
इरा॑वती धेनु॒मती॒ हि भू॒तᳪ सू॑यव॒सिनी॒ मन॑वे दश॒स्या । व्य॑स्कभ्ना॒ रोद॑सी विष्णवे॒ते दा॒धर्थ॑ पृथि॒वीम॒भितो॑ म॒यूखै॒: स्वाहा॑ ।। १६ ।।
irā॑vatī dhenu॒matī॒ hi bhū॒taᳪ sū॑yava॒sinī॒ mana॑ve daśa॒syā | vya॑skabhnā॒ roda॑sī viṣṇave॒te dā॒dhartha॑ pṛthi॒vīma॒bhito॑ ma॒yūkhai॒: svāhā॑ | | १६ | |
दे॒व॒श्रुतौ॑ दे॒वेष्वा घो॑षतं॒ प्राची॒ प्रेत॑मध्व॒रं क॒ल्पय॑न्ती ऊ॒र्ध्वं य॒ज्ञं न॑यतं॒ मा जि॑ह्वरतम् ।
स्वं गो॒ष्ठमा व॑दतं देवी दुर्ये॒ आयु॒र्मा निर्वा॑दिष्टं प्र॒जां मा निर्वा॑दिष्ट॒मत्र॑ रमेथां॒ वर्ष्म॑न् पृथि॒व्याः ।। १७ ।।
de॒va॒śrutau॑ de॒veṣvā gho॑ṣataṃ॒ prācī॒ preta॑madhva॒raṃ ka॒lpaya॑ntī ū॒rdhvaṃ ya॒jñaṃ na॑yataṃ॒ mā ji॑hvaratam | svaṃ go॒ṣṭhamā va॑dataṃ devī durye॒ āyu॒rmā nirvā॑diṣṭaṃ pra॒jāṃ mā nirvā॑diṣṭa॒matra॑ ramethāṃ॒ varṣma॑n pṛthi॒vyāḥ | | १७ | |
विष्णो॒र्नुकं॑ वी॒र्या॒णि॒ प्र वो॑चं॒ यः पार्थि॑वानि विम॒मे रजा॑ᳪसि ।
यो अस्क॑भाय॒दुत्त॑रᳪ स॒धस्थं॑ विचक्रमा॒णस्त्रे॒धोरु॑गा॒यो विष्ण॑वे त्वा ।। १८ ।।
viṣṇo॒rnukaṃ॑ vī॒ryā॒ṇi॒ pra vo॑caṃ॒ yaḥ pārthi॑vāni vima॒me rajā॑ᳪsi | yo aska॑bhāya॒dutta॑raᳪ sa॒dhasthaṃ॑ vicakramā॒ṇastre॒dhoru॑gā॒yo viṣṇa॑ve tvā | | १८ | |
दि॒वो वा॑ विष्ण उ॒त वा॑ पृथि॒व्या म॒हो वा॑ विष्ण उ॒रोर॒न्तरि॑क्षात् ।
उ॒भा हि हस्ता॒ वसु॑ना पृ॒णस्वा प्र य॑च्छ॒ दक्षि॑णा॒दोत स॒व्याद्विष्ण॑वे त्वा ।। १९ ।।
di॒vo vā॑ viṣṇa u॒ta vā॑ pṛthi॒vyā ma॒ho vā॑ viṣṇa u॒rora॒ntari॑kṣāt | u॒bhā hi hastā॒ vasu॑nā pṛ॒ṇasvā pra ya॑ccha॒ dakṣi॑ṇā॒dota sa॒vyādviṣṇa॑ve tvā | | १९ | |
प्र तद्विष्णु॑ स्तवते वी॒र्ये॒ण मृ॒गो न भी॒मः कु॑च॒रो गि॑रि॒ष्ठाः ।
यस्यो॒रुषु॑ त्रि॒षु वि॒क्रम॑णेष्वधिक्षि॒यन्ति॒ भुव॑नानि॒ विश्वा॑ ।। २० ।।
pra tadviṣṇu॑ stavate vī॒rye॒ṇa mṛ॒go na bhī॒maḥ ku॑ca॒ro gi॑ri॒ṣṭhāḥ | yasyo॒ruṣu॑ tri॒ṣu vi॒krama॑ṇeṣvadhikṣi॒yanti॒ bhuva॑nāni॒ viśvā॑ | | २० | |
विष्णो॑ र॒राट॑मसि॒ विष्णो॒: श्नप्त्रे॑ स्थो विष्णो॒: स्यूर॑सि॒ विष्णो॑र्ध्रु॒वो॒ऽसि ।
वै॒ष्ण॒वम॑सि॒ विष्ण॑वे त्वा ।। २१ ।।
viṣṇo॑ ra॒rāṭa॑masi॒ viṣṇo॒: śnaptre॑ stho viṣṇo॒: syūra॑si॒ viṣṇo॑rdhru॒vo॒’si | vai॒ṣṇa॒vama॑si॒ viṣṇa॑ve tvā | | २१ | |
दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आ द॑दे॒ नार्य॑सी॒दम॒हᳪ रक्ष॑सां ग्री॒वा अपि॑ कृन्तामि ।
बृ॒हन्न॑सि बृ॒हद्र॑वा बृह॒तीमिन्द्रा॑य॒ वाचं॑ वद ।। २२ ।।
de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyām | ā da॑de॒ nārya॑sī॒dama॒haᳪ rakṣa॑sāṃ grī॒vā api॑ kṛntāmi | bṛ॒hanna॑si bṛ॒hadra॑vā bṛha॒tīmindrā॑ya॒ vācaṃ॑ vada | | २२ | |
र॒क्षो॒हणं॑ वलग॒हनं॑ वैष्ण॒वी मि॒दम॒हं तं व॑ल॒गमुत्कि॑रामि॒ यं मे॒ निष्ट्यो॒ यम॒मात्यो॑ निच॒खाने॒दम॒हं तं व॑ल॒गमुत्कि॑रामि॒ यं मे॑ समा॒नो यमस॑मानो निच॒खाने॒दम॒हं तं व॑ल॒गमुत्कि॑रामि॒ यं मे॒ सब॑न्धु॒र्यमस॑बन्धुर्निच॒खाने॒दम॒हं तं व॑ल॒गमुत्कि॑रामि॒ यं मे॑ सजा॒तो यमस॑जातो निच॒खानोत्कृ॒त्यां कि॑रामि ।। २३ ।।
ra॒kṣo॒haṇaṃ॑ valaga॒hanaṃ॑ vaiṣṇa॒vī mi॒dama॒haṃ taṃ va॑la॒gamutki॑rāmi॒ yaṃ me॒ niṣṭyo॒ yama॒mātyo॑ nica॒khāne॒dama॒haṃ taṃ va॑la॒gamutki॑rāmi॒ yaṃ me॑ samā॒no yamasa॑māno nica॒khāne॒dama॒haṃ taṃ va॑la॒gamutki॑rāmi॒ yaṃ me॒ saba॑ndhu॒ryamasa॑bandhurnica॒khāne॒dama॒haṃ taṃ va॑la॒gamutki॑rāmi॒ yaṃ me॑ sajā॒to yamasa॑jāto nica॒khānotkṛ॒tyāṃ ki॑rāmi | | २३ | |
स्व॒राड॑सि सपत्न॒हा स॑त्र॒राड॑स्यभिमाति॒हा ज॑न॒राड॑सि रक्षो॒हा स॑र्व॒राड॑स्यमित्र॒हा ।। २४ ।।
sva॒rāḍa॑si sapatna॒hā sa॑tra॒rāḍa॑syabhimāti॒hā ja॑na॒rāḍa॑si rakṣo॒hā sa॑rva॒rāḍa॑syamitra॒hā | | २४ | |
र॒क्षो॒हणो॑ वो वलग॒हन॒: प्रोक्षा॑मि वैष्ण॒वान् र॑क्षो॒हणो॑ वो वलग॒हनोऽव॑नयामि वैष्ण॒वान् र॑क्षो॒हणो॑ वो वलग॒हनोऽव॑स्तृणामि वैष्ण॒वान्
र॑क्षो॒हणौ॑ वां वलग॒हना॒ उप॑ दधामि वैष्ण॒वी र॑क्षो॒हणौ॑ वां वलग॒हनौ॒ पर्यू॑हामि वैष्ण॒वी वै॑ष्ण॒वम॑सि वै॑ष्ण॒वा स्थ॑ ।। २५ ।।
ra॒kṣo॒haṇo॑ vo valaga॒hana॒: prokṣā॑mi vaiṣṇa॒vān ra॑kṣo॒haṇo॑ vo valaga॒hano’va॑nayāmi vaiṣṇa॒vān ra॑kṣo॒haṇo॑ vo valaga॒hano’va॑stṛṇāmi vaiṣṇa॒vān ra॑kṣo॒haṇau॑ vāṃ valaga॒hanā॒ upa॑ dadhāmi vaiṣṇa॒vī ra॑kṣo॒haṇau॑ vāṃ valaga॒hanau॒ paryū॑hāmi vaiṣṇa॒vī vai॑ṣṇa॒vama॑si vai॑ṣṇa॒vā stha॑ | | २५ | |
दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । आ द॑दे॒ नार्य॑सी॒दम॒हᳪ रक्ष॑सां ग्री॒वा अपि॑ कृन्तामि ।
यवो॑ऽसि य॒वया॒स्मद्द्वेषो॑ य॒वयारा॑तीर्दि॒वे त्वा॒ऽन्तरि॑क्षाय त्वा पृथि॒व्यै त्वा शुन्ध॑न्तांल्लो॒काः पि॑तृ॒षद॑नाः पितृ॒षद॑नमसि ।। २६ ।।
de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyām | ā da॑de॒ nārya॑sī॒dama॒haᳪ rakṣa॑sāṃ grī॒vā api॑ kṛntāmi | yavo॑’si ya॒vayā॒smaddveṣo॑ ya॒vayārā॑tīrdi॒ve tvā॒’ntari॑kṣāya tvā pṛthi॒vyai tvā śundha॑ntāṃllo॒kāḥ pi॑tṛ॒ṣada॑nāḥ pitṛ॒ṣada॑namasi | | २६ | |
उद्दिव॑ᳪ स्तभाना॒न्तरि॑क्षं पृण॒ दृᳪह॑स्व पृथि॒व्याम् द्यु॑ता॒नास्त्वा॑ मारु॒तो मिनो॑तु मि॒त्रावरु॑णौ ध्रु॒वेण॒ धर्म॑णा ।
ब्र॒ह्म॒वनि॑ त्वा क्षत्र॒वनि॑ रायस्पोष॒वनि॒ पर्यू॑हामि । ब्रह्म॑ दृᳪह क्ष॒त्रं दृ॒ᳪहायु॑र्दृᳪह प्र॒जां दृ॑ᳪह ।। २७ ।।
uddiva॑ᳪ stabhānā॒ntari॑kṣaṃ pṛṇa॒ dṛᳪha॑sva pṛthi॒vyām dyu॑tā॒nāstvā॑ māru॒to mino॑tu mi॒trāvaru॑ṇau dhru॒veṇa॒ dharma॑ṇā | bra॒hma॒vani॑ tvā kṣatra॒vani॑ rāyaspoṣa॒vani॒ paryū॑hāmi | brahma॑ dṛᳪha kṣa॒traṃ dṛ॒ᳪhāyu॑rdṛᳪha pra॒jāṃ dṛ॑ᳪha | | २७ | |
ध्रु॒वासि॑ ध्रु॒वोऽयं यज॑मानो॒ऽस्मिन्ना॒यत॑ने प्र॒जया॑ प॒शुभि॑र्भूयात् ।
घृ॒तेन॑ द्यावापृथिवी पूर्येथा॒मिन्द्र॑स्य छ॒दिर॑सि विश्वज॒नस्य॑ छा॒या ।। २८ ।।
dhru॒vāsi॑ dhru॒vo’yaṃ yaja॑māno॒’sminnā॒yata॑ne pra॒jayā॑ pa॒śubhi॑rbhūyāt | ghṛ॒tena॑ dyāvāpṛthivī pūryethā॒mindra॑sya cha॒dira॑si viśvaja॒nasya॑ chā॒yā | | २८ | |
परि॑ त्वा गिर्वणो॒ गिर॑ इ॒मा भ॑वन्तु वि॒श्वत॑:। वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यः ।। २९ ।।
pari॑ tvā girvaṇo॒ gira॑ i॒mā bha॑vantu vi॒śvata॑: | vṛ॒ddhāyu॒manu॒ vṛddha॑yo॒ juṣṭā॑ bhavantu॒ juṣṭa॑yaḥ | | २९ | |
इन्द्र॑स्य॒ स्यूर॒सीन्द्र॑स्य ध्रु॒वो॑ऽसि । ऐ॒न्द्रम॑सि वैश्वदे॒वम॑सि ।। ३० ।।
indra॑sya॒ syūra॒sīndra॑sya dhru॒vo॑’si | ai॒ndrama॑si vaiśvade॒vama॑si | | ३० | |
वि॒भूर॑सि प्र॒वाह॑णो॒ वह्नि॑रसि हव्य॒वाह॑नः । श्वा॒त्रो॒ऽसि॒ प्रचे॑तास्तु॒थो॑ऽसि वि॒श्ववे॑दाः ।। ३१ ।।
vi॒bhūra॑si pra॒vāha॑ṇo॒ vahni॑rasi havya॒vāha॑naḥ | śvā॒tro॒’si॒ prace॑tāstu॒tho॑’si vi॒śvave॑dāḥ | | ३१ | |
उ॒शिग॑सि क॒विरङ्घा॑रिरसि॒ बम्भा॑रिरव॒स्यूर॑सि॒ दुव॑स्वाञ्छु॒न्ध्यूर॑सि मार्जा॒लीय॑: स॒म्राड॑सि कृ॒शानु॑: परि॒षद्यो॑ऽसि॒ पव॑मानो॒ नभो॑ऽसि प्र॒तक्वा॑
मृ॒ष्टो॒ऽसि हव्य॒सूद॑न ऋ॒त॒धा॑माऽसि॒ स्व॒र्ज्योतिः ।। ३२ ।।
u॒śiga॑si ka॒viraṅghā॑rirasi॒ bambhā॑rirava॒syūra॑si॒ duva॑svāñchu॒ndhyūra॑si mārjā॒līya॑: sa॒mrāḍa॑si kṛ॒śānu॑: pari॒ṣadyo॑’si॒ pava॑māno॒ nabho॑’si pra॒takvā॑ mṛ॒ṣṭo॒’si havya॒sūda॑na ṛ॒ta॒dhā॑mā’si॒ sva॒rjyotiḥ | | ३२ | |
स॒मु॒द्रो॒ऽसि वि॒श्वव्य॑चा अ॒जोऽस्येक॑पा॒दहि॑रसि बु॒ध्न्यो वाग॑स्यै॒न्द्रम॑सि॒ सदो॒ऽस्यृत॑स्य द्वारौ॒ मा मा॒ सनता॑प्त॒मध्व॑नामध्वपते॒ प्र मा॑ तिर स्व॒स्ति मे॒ऽस्मिन्प॒थि दे॑व॒याने॑ भूयात् ।। ३३ ।।
sa॒mu॒dro॒’si vi॒śvavya॑cā a॒jo’syeka॑pā॒dahi॑rasi bu॒dhnyo vāga॑syai॒ndrama॑si॒ sado॒’syṛta॑sya dvārau॒ mā mā॒ sanatā॑pta॒madhva॑nāmadhvapate॒ pra mā॑ tira sva॒sti me॒’sminpa॒thi de॑va॒yāne॑ bhūyāt | | ३३ | |
मि॒त्रस्य॑ मा॒ चक्षु॑षेक्षध्व॒मग्न॑यः सगराः॒ सग॑रा स्थ॒ सग॑रेण॒ नाम्ना॒ रौद्रे॒णानी॑केन पा॒त मा॑ऽग्नयः पिपृ॒त मा॑ऽग्नयो गोपा॒यत॑ मा॒ नमो॑ वोऽस्तु॒ मा मा॑ हिᳪसिष्ट ।। ३४ ।।
mi॒trasya॑ mā॒ cakṣu॑ṣekṣadhva॒magna॑yaḥ sagarāḥ॒ saga॑rā stha॒ saga॑reṇa॒ nāmnā॒ raudre॒ṇānī॑kena pā॒ta mā॑’gnayaḥ pipṛ॒ta mā॑’gnayo gopā॒yata॑ mā॒ namo॑ vo’stu॒ mā mā॑ hiᳪsiṣṭa | | ३४ | |
ज्योति॑रसि वि॒श्वरू॑पं॒ विश्वे॑षां दे॒वाना॑ᳪ स॒मित् । त्वᳪ सो॑म तनू॒कृद्भ्यो॒ द्वेषो॑भ्यो॒ऽन्यकृ॑तेभ्य उ॒रु य॒न्तासि॒ वरू॑थ॒ᳪ स्वाहा॑
जुषा॒णो अ॒प्तुराज्य॑स्य वेतु॒ स्वाहा॑ ।। ३५ ।।
jyoti॑rasi vi॒śvarū॑paṃ॒ viśve॑ṣāṃ de॒vānā॑ᳪ sa॒mit | tvaᳪ so॑ma tanū॒kṛdbhyo॒ dveṣo॑bhyo॒’nyakṛ॑tebhya u॒ru ya॒ntāsi॒ varū॑tha॒ᳪ svāhā॑ juṣā॒ṇo a॒pturājya॑sya vetu॒ svāhā॑ | | ३५ | |
अग्ने॒ नय॑ सु॒पथा॑ रा॒ये अ॒स्मान्विश्वा॑नि देव व॒युना॑नि वि॒द्वान् ।
यु॒यो॒ध्यस्मज्जु॑हुरा॒णमेनो॒ भूयि॑ष्ठां ते॒ नम॑ उक्तिं विधेम ।। ३६ ।।
agne॒ naya॑ su॒pathā॑ rā॒ye a॒smānviśvā॑ni deva va॒yunā॑ni vi॒dvān | yu॒yo॒dhyasmajju॑hurā॒ṇameno॒ bhūyi॑ṣṭhāṃ te॒ nama॑ uktiṃ vidhema | | ३६ | |
अ॒यं नो॑ अ॒ग्निर्वरि॑वस्कृणोत्व॒यं मृध॑: पु॒र ए॑तु प्रभि॒न्दन् ।
अ॒यं वाजा॑ञ्जयतु॒ वाज॑साताव॒यᳪ शत्रू॑ञ्जयतु॒ जर्हृ॑षाण॒: स्वाहा॑ ।। ३७ ।।
a॒yaṃ no॑ a॒gnirvari॑vaskṛṇotva॒yaṃ mṛdha॑: pu॒ra e॑tu prabhi॒ndan | a॒yaṃ vājā॑ñjayatu॒ vāja॑sātāva॒yaᳪ śatrū॑ñjayatu॒ jarhṛ॑ṣāṇa॒: svāhā॑ | | ३७ | |
उ॒रु वि॑ष्णो॒ वि क्र॑मस्वो॒रु क्षया॑य नस्कृधि ।
घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑ ।। ३८ ।।
u॒ru vi॑ṣṇo॒ vi kra॑masvo॒ru kṣayā॑ya naskṛdhi | ghṛ॒taṃ ghṛ॑tayone piba॒ prapra॑ ya॒jñapa॑tiṃ tira॒ svāhā॑ | | ३८ | |
देव॑ सवितरे॒ष ते॒ सोम॒स्तᳪ र॑क्षस्व॒ मा त्वा॑ दभन् ।
ए॒तत्त्वं दे॑व सोम दे॒वो दे॒वाँ२ उपा॑गा इ॒दम॒हं म॑नु॒ष्या॒न्त्स॒ह रा॒यस्पोषे॑ण स्वाहा॒ निर्वरु॑णस्य॒ पाशा॑न्मुच्ये ।। ३९ ।।
deva॑ savitare॒ṣa te॒ soma॒staᳪ ra॑kṣasva॒ mā tvā॑ dabhan | e॒tattvaṃ de॑va soma de॒vo de॒vām̐२ upā॑gā i॒dama॒haṃ ma॑nu॒ṣyā॒ntsa॒ha rā॒yaspoṣe॑ṇa svāhā॒ nirvaru॑ṇasya॒ pāśā॑nmucye | | ३९ | |
अग्ने॑ व्रतपा॒स्त्वे व्र॑त॒पा या तव॑ त॒नूर्मय्यभू॑दे॒षा सा त्वयि॒ यो मम॑ त॒नूस्त्वय्यभू॑दि॒यᳪ सा मयि॑ ।
य॒था॒य॒थं नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒रम॒ᳪस्तानु॒ तप॒स्तप॑स्पतिः ।। ४० ।।
agne॑ vratapā॒stve vra॑ta॒pā yā tava॑ ta॒nūrmayyabhū॑de॒ṣā sā tvayi॒ yo mama॑ ta॒nūstvayyabhū॑di॒yaᳪ sā mayi॑ | ya॒thā॒ya॒thaṃ nau॑ vratapate vra॒tānyanu॑ me dī॒kṣāṃ dī॒kṣāpa॑ti॒rama॒ᳪstānu॒ tapa॒stapa॑spatiḥ | | ४० | |
उ॒रु वि॑ष्णो॒ वि क्र॑मस्वो॒रु क्षया॑य नस्कृधि । घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑ ।। ४१ ।।
u॒ru vi॑ṣṇo॒ vi kra॑masvo॒ru kṣayā॑ya naskṛdhi | ghṛ॒taṃ ghṛ॑tayone piba॒ prapra॑ ya॒jñapa॑tiṃ tira॒ svāhā॑ | | ४१ | |
अत्य॒न्याँ२ अगां॒ नान्याँ२ उपा॑गाम॒र्वाक् त्वा॒ परे॒भ्योऽवि॑दं प॒रोऽव॑रेभ्यः ।
तं त्वा॑ जुषामहे देव वनस्पते देवय॒ज्यायै॑ दे॒वास्त्वा॑ देवय॒ज्यायै॑ जुषन्तां॒ विष्ण॑वे त्वा ।
ओष॑धे॒ त्राय॑स्व स्वधि॑ते॒ मैन॑ᳪ हिᳪसीः ।। ४२ ।।
atya॒nyām̐२ agāṃ॒ nānyām̐२ upā॑gāma॒rvāk tvā॒ pare॒bhyo’vi॑daṃ pa॒ro’va॑rebhyaḥ | taṃ tvā॑ juṣāmahe deva vanaspate devaya॒jyāyai॑ de॒vāstvā॑ devaya॒jyāyai॑ juṣantāṃ॒ viṣṇa॑ve tvā | oṣa॑dhe॒ trāya॑sva svadhi॑te॒ maina॑ᳪ hiᳪsīḥ | | ४२ | |
द्यां मा ले॑खीर॒न्तरि॑क्षं॒ मा हि॑ᳪसीः पृथि॒व्या सम्भ॑व ।
अ॒यᳪ हि त्वा॒ स्वधि॑ति॒स्तेति॑जानः प्रणि॒नाय॑ मह॒ते सौ॑भगाय ।
अत॒स्त्वं दे॑व वनस्पते श॒तव॑ल्शो॒ वि रो॑ह स॒हस्र॑वल्शा॒ वि व॒यᳪ रु॑हेम ।। ४३ ।।
dyāṃ mā le॑khīra॒ntari॑kṣaṃ॒ mā hi॑ᳪsīḥ pṛthi॒vyā sambha॑va | a॒yaᳪ hi tvā॒ svadhi॑ti॒steti॑jānaḥ praṇi॒nāya॑ maha॒te sau॑bhagāya | ata॒stvaṃ de॑va vanaspate śa॒tava॑lśo॒ vi ro॑ha sa॒hasra॑valśā॒ vi va॒yaᳪ ru॑hema | | ४३ | |