EeseDharmaSanātana Library
40अध्याय 40
Śukla Yajurveda Mādhyaṃdina ka Adhyay 40.
17 shlokई॒शा वा॒स्य॒मि॒दᳪ सर्वं॒ यत्किं च॒ जग॑त्यां॒ जग॑त् ।
तेन॑ त्य॒क्तेन॑ भुञ्जीथा॒ मा गृ॑ध॒: कस्य॑ स्वि॒द्धन॑म् ।। १ ।।
ī॒śā vā॒sya॒mi॒daᳪ sarvaṃ॒ yatkiṃ ca॒ jaga॑tyāṃ॒ jaga॑t | tena॑ tya॒ktena॑ bhuñjīthā॒ mā gṛ॑dha॒: kasya॑ svi॒ddhana॑m | | १ | |
कु॒र्वन्ने॒वेह कर्मा॑णि जिजीवि॒षेच्छ॒तᳪ समा॑: ।
ए॒वं त्वयि॒ नान्यथे॒तो॒ऽस्ति॒ न कर्म॑ लिप्यते॒ नरे॑ ।। २ ।।
ku॒rvanne॒veha karmā॑ṇi jijīvi॒ṣeccha॒taᳪ samā॑: | e॒vaṃ tvayi॒ nānyathe॒to॒’sti॒ na karma॑ lipyate॒ nare॑ | | २ | |
अ॒सु॒र्या नाम॑ ते लो॒का अ॒न्धेन॒ तम॒सावृ॑ताः ।
ताँस्ते प्रेत्यापि॑ गच्छन्ति॒ ये के चा॑त्म॒हनो॒ जना॑: ।। ३ ।।
a॒su॒ryā nāma॑ te lo॒kā a॒ndhena॒ tama॒sāvṛ॑tāḥ | tām̐ste pretyāpi॑ gacchanti॒ ye ke cā॑tma॒hano॒ janā॑: | | ३ | |
अने॑ज॒देकं॒ मन॑सो॒ जवी॑यो नैन॑द्दे॒वा आ॑प्नुव॒न् पूर्व॒मर्श॑त् ।
तद्धाव॑तो॒ऽन्यानत्ये॑ति॒ तिष्ठ॒त्तस्मि॑न्न॒पो मा॑त॒रिश्वा॑ दधाति ।। ४ ।।
ane॑ja॒dekaṃ॒ mana॑so॒ javī॑yo naina॑dde॒vā ā॑pnuva॒n pūrva॒marśa॑t | taddhāva॑to॒’nyānatye॑ti॒ tiṣṭha॒ttasmi॑nna॒po mā॑ta॒riśvā॑ dadhāti | | ४ | |
तदे॑जति॒ तन्नैज॑ति॒ तद्दू॒॒रे तद्व॑न्ति॒के ।
तद॒न्तर॑स्य॒ सर्व॑स्य॒ तदु॒ सर्व॑स्यास्य बाह्य॒तः ।। ५ ।।
tade॑jati॒ tannaija॑ti॒ taddū॒॒re tadva॑nti॒ke | tada॒ntara॑sya॒ sarva॑sya॒ tadu॒ sarva॑syāsya bāhya॒taḥ | | ५ | |
यस्तु सर्वा॑णि भू॒तान्या॒त्मन्ने॒वानु॒पश्य॑ति ।
स॒र्व॒भू॒तेषु॑ चा॒त्मानं॒ ततो॒ न वि चि॑कित्सति ।। ६ ।।
yastu sarvā॑ṇi bhū॒tānyā॒tmanne॒vānu॒paśya॑ti | sa॒rva॒bhū॒teṣu॑ cā॒tmānaṃ॒ tato॒ na vi ci॑kitsati | | ६ | |
यस्मि॒न्त्सर्वा॑णि भू॒तान्यात्मै॒वाभू॑द्विजान॒तः ।
तत्र॒ को मोह॒: कः शोक॑ एक॒त्वम॑नु॒पश्य॑तः ।। ७ ।।
yasmi॒ntsarvā॑ṇi bhū॒tānyātmai॒vābhū॑dvijāna॒taḥ | tatra॒ ko moha॒: kaḥ śoka॑ eka॒tvama॑nu॒paśya॑taḥ | | ७ | |
स पर्य॑गाच्छु॒क्रम॑का॒यम॑व्र॒णम॑स्नावि॒रᳪ शु॒द्धमपा॑पविद्धम् ।
क॒विर्म॑नी॒षी प॑रि॒भूः स्व॑य॒म्भूर्या॑थातथ्य॒तोऽर्था॒न् व्य॒दधाच्छाश्व॒तीभ्य॒: समा॑भ्यः ।। ८ ।।
sa parya॑gācchu॒krama॑kā॒yama॑vra॒ṇama॑snāvi॒raᳪ śu॒ddhamapā॑paviddham | ka॒virma॑nī॒ṣī pa॑ri॒bhūḥ sva॑ya॒mbhūryā॑thātathya॒to’rthā॒n vya॒dadhācchāśva॒tībhya॒: samā॑bhyaḥ | | ८ | |
अ॒न्धं तम॒: प्रवि॑शन्ति॒ येऽसं॑भूतिमु॒पास॑ते ।
ततो॒ भूय॑ इव॒ ते तमो॒ य उ॒ सम्भू॑त्याᳪ र॒ताः ।। ९ ।।
a॒ndhaṃ tama॒: pravi॑śanti॒ ye’saṃ॑bhūtimu॒pāsa॑te | tato॒ bhūya॑ iva॒ te tamo॒ ya u॒ sambhū॑tyāᳪ ra॒tāḥ | | ९ | |
अ॒न्यदे॒वाहुः स॑म्भ॒वाद॒न्यदा॑हु॒रस॑म्भवात् ।
इति॑ शुश्रुम॒ धीरा॑णां॒ ये न॒स्तद्वि॑चचक्षि॒रे ।। १० ।।
a॒nyade॒vāhuḥ sa॑mbha॒vāda॒nyadā॑hu॒rasa॑mbhavāt | iti॑ śuśruma॒ dhīrā॑ṇāṃ॒ ye na॒stadvi॑cacakṣi॒re | | १० | |
सम्भू॑तिं च विना॒शं च॒ यस्तद्वेदो॒भय॑ᳪ स॒ह ।
वि॒ना॒शेन॑ मृ॒त्युं ती॒र्त्वा सम्भू॑त्या॒मृत॑मश्नुते ।। ११ ।।
sambhū॑tiṃ ca vinā॒śaṃ ca॒ yastadvedo॒bhaya॑ᳪ sa॒ha | vi॒nā॒śena॑ mṛ॒tyuṃ tī॒rtvā sambhū॑tyā॒mṛta॑maśnute | | ११ | |
अ॒न्धं तम॒: प्रवि॑शन्ति॒ येऽवि॑द्यामु॒पास॑ते ।
ततो॒ भूय॑ इव॒ ते तमो॒ य उ॑ वि॒द्याया॑ᳪ र॒ताः ।। १२ ।।
a॒ndhaṃ tama॒: pravi॑śanti॒ ye’vi॑dyāmu॒pāsa॑te | tato॒ bhūya॑ iva॒ te tamo॒ ya u॑ vi॒dyāyā॑ᳪ ra॒tāḥ | | १२ | |
अ॒न्यदे॒वाहुर्वि॒द्याया॑ अ॒न्यदा॑हु॒रवि॑द्यायाः ।
इति॑ शुश्रुम॒ धीरा॑णां॒ ये न॒स्तद्वि॑चचक्षि॒रे ।। १३ ।।
a॒nyade॒vāhurvi॒dyāyā॑ a॒nyadā॑hu॒ravi॑dyāyāḥ | iti॑ śuśruma॒ dhīrā॑ṇāṃ॒ ye na॒stadvi॑cacakṣi॒re | | १३ | |
वि॒द्यां चावि॑द्यां च॒ यस्तद्वेदो॒भय॑ᳪ स॒ह ।
अवि॑द्यया मृ॒त्युं ती॒र्त्वा वि॒द्यया॒ऽमृत॑मश्नुते ।। १४ ।।
vi॒dyāṃ cāvi॑dyāṃ ca॒ yastadvedo॒bhaya॑ᳪ sa॒ha | avi॑dyayā mṛ॒tyuṃ tī॒rtvā vi॒dyayā॒’mṛta॑maśnute | | १४ | |
वा॒युरनि॑लम॒मृत॒मथे॒दं भस्मा॑न्त॒ᳪ शरी॑रम् ।
ओ३म् क्रतो॑ स्मर । क्लि॒बे स्म॑र । कृ॒तᳪ स्म॑र ।। १५ ।।
vā॒yurani॑lama॒mṛta॒mathe॒daṃ bhasmā॑nta॒ᳪ śarī॑ram | o३m krato॑ smara | kli॒be sma॑ra | kṛ॒taᳪ sma॑ra | | १५ | |
अग्ने॒ नय॑ सु॒पथा॑ रा॒ये अ॒स्मान्विश्वा॑नि देव व॒युना॑नि वि॒द्वान् ।
यु॒यो॒ध्यस्मज्जु॑हुरा॒णमेनो॒ भुयि॑ष्ठां ते॒ नम॑ उक्तिं विधेम ।। १६ ।।
agne॒ naya॑ su॒pathā॑ rā॒ye a॒smānviśvā॑ni deva va॒yunā॑ni vi॒dvān | yu॒yo॒dhyasmajju॑hurā॒ṇameno॒ bhuyi॑ṣṭhāṃ te॒ nama॑ uktiṃ vidhema | | १६ | |
हि॒र॒ण्मये॑न॒ पात्रे॑ण स॒त्यस्यापि॑हितं॒ मुख॑म् । यो॒ऽसावा॑दि॒त्ये पुरु॑ष॒: सोऽसाव॒हम् ।
ओ३म् खं ब्रह्म॑ ।। १७ ।।
hi॒ra॒ṇmaye॑na॒ pātre॑ṇa sa॒tyasyāpi॑hitaṃ॒ mukha॑m | yo॒’sāvā॑di॒tye puru॑ṣa॒: so’sāva॒ham | o३m khaṃ brahma॑ | | १७ | |