EeseDharmaSanātana Library
38अध्याय 38
Śukla Yajurveda Mādhyaṃdina ka Adhyay 38.
28 shlokदे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आ द॒देऽदि॑त्यै॒ रास्ना॑ऽसि ।। १ ।।
de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyām | ā da॒de’di॑tyai॒ rāsnā॑’si | | १ | |
इड॒ एह्यदि॑त॒ एहि॒ सर॑स्व॒त्त्येहि॑ । असा॒वेह्यसा॒वेह्यसा॒वेहि॑ ।। २ ।।
iḍa॒ ehyadi॑ta॒ ehi॒ sara॑sva॒ttyehi॑ | asā॒vehyasā॒vehyasā॒vehi॑ | | २ | |
अदि॑त्यै॒ रास्ना॑ऽसीन्द्रा॒ण्या उ॒ष्णीष॑: ।
पू॒षाऽसि॑ घ॒र्माय॑ दीष्व ।। ३ ।।
adi॑tyai॒ rāsnā॑’sīndrā॒ṇyā u॒ṣṇīṣa॑: | pū॒ṣā’si॑ gha॒rmāya॑ dīṣva | | ३ | |
अ॒श्विभ्यां॑ पिन्वस्व॒ सर॑स्वत्यै पिन्व॒स्वेन्द्रा॑य पिन्वस्व ।
स्वाहेन्द्र॑व॒त् स्वाहेन्द्र॑व॒त् स्वाहेन्द्र॑व॒त् ।। ४ ।।
a॒śvibhyāṃ॑ pinvasva॒ sara॑svatyai pinva॒svendrā॑ya pinvasva | svāhendra॑va॒t svāhendra॑va॒t svāhendra॑va॒t | | ४ | |
यस्ते॒ स्तन॑: शश॒यो यो म॑यो॒भूर्यो र॑त्न॒धा व॑सु॒विद्यः सु॒दत्र॑: ।
येन॒ विश्वा॒ पुष्य॑सि॒ वार्या॑णि॒ सर॑स्वति॒ तमि॒ह धात॑वेऽकः । उ॒र्वन्तरि॑क्ष॒मन्वे॑मि ।। ५ ।।
yaste॒ stana॑: śaśa॒yo yo ma॑yo॒bhūryo ra॑tna॒dhā va॑su॒vidyaḥ su॒datra॑: | yena॒ viśvā॒ puṣya॑si॒ vāryā॑ṇi॒ sara॑svati॒ tami॒ha dhāta॑ve’kaḥ | u॒rvantari॑kṣa॒manve॑mi | | ५ | |
गा॒य॒त्रं छन्दो॑ऽसि॒ त्रै॑ष्टुभं॒ छन्दो॑ऽसि॒ द्यावा॑पृथि॒वीभ्यां॑ त्वा॒ परि॑ गृह्णाम्य॒न्तरि॑क्षे॒णोप॑ यच्छामि ।
इन्द्रा॑श्विना॒ मधु॑नः सार॒घस्य॑ घ॒र्मं पा॑त॒ वस॑वो॒ यज॑त॒ वाट् ।
स्वाहा॒ सूर्य॑स्य र॒श्मये॑ वृष्टि॒वन॑ये ।। ६ ।।
gā॒ya॒traṃ chando॑’si॒ trai॑ṣṭubhaṃ॒ chando॑’si॒ dyāvā॑pṛthi॒vībhyāṃ॑ tvā॒ pari॑ gṛhṇāmya॒ntari॑kṣe॒ṇopa॑ yacchāmi | indrā॑śvinā॒ madhu॑naḥ sāra॒ghasya॑ gha॒rmaṃ pā॑ta॒ vasa॑vo॒ yaja॑ta॒ vāṭ | svāhā॒ sūrya॑sya ra॒śmaye॑ vṛṣṭi॒vana॑ye | | ६ | |
स॒मु॒द्राय॑ त्वा॒ वाता॑य॒ स्वाहा॑ सरि॒राय॑ त्वा॒ वाता॑य॒ स्वाहा॑ ।
अ॒ना॒धृ॒ष्याय॑ त्वा॒ वाता॑य॒ स्वाहा॑ ऽप्रतिधृ॒ष्याय॑ त्वा॒ वाता॑य॒ स्वाहा॑ ।
अ॒व॒स्यवे॑ त्वा॒ वाता॑य॒ स्वाहा॑ ऽशिमि॒दाय॑ त्वा॒ वाता॑य॒ स्वाहा॑ ।। ७ ।।
sa॒mu॒drāya॑ tvā॒ vātā॑ya॒ svāhā॑ sari॒rāya॑ tvā॒ vātā॑ya॒ svāhā॑ | a॒nā॒dhṛ॒ṣyāya॑ tvā॒ vātā॑ya॒ svāhā॑ ’pratidhṛ॒ṣyāya॑ tvā॒ vātā॑ya॒ svāhā॑ | a॒va॒syave॑ tvā॒ vātā॑ya॒ svāhā॑ ’śimi॒dāya॑ tvā॒ vātā॑ya॒ svāhā॑ | | ७ | |
इन्द्रा॑य त्वा॒ वसु॑मते रु॒द्रव॑ते॒ स्वाहेन्द्रा॑य त्वाऽऽदि॒त्यव॑ते॒ स्वाहेन्द्रा॑य त्वाऽभिमाति॒घ्ने स्वाहा ।
स॒वि॒त्रे त्व॑ ऋभु॒मते॑ विभु॒मते॒ वाज॑वते॒ स्वाहा॒ बृह॒स्पत॑ये त्वा वि॒श्वदे॑व्यावते॒ स्वाहा॑ ।। ८ ।।
indrā॑ya tvā॒ vasu॑mate ru॒drava॑te॒ svāhendrā॑ya tvā’’di॒tyava॑te॒ svāhendrā॑ya tvā’bhimāti॒ghne svāhā | sa॒vi॒tre tva॑ ṛbhu॒mate॑ vibhu॒mate॒ vāja॑vate॒ svāhā॒ bṛha॒spata॑ye tvā vi॒śvade॑vyāvate॒ svāhā॑ | | ८ | |
य॒माय॒ त्वाऽङ्गि॑रस्वते पितृ॒मते॒ स्वाहा॑ । स्वाहा॑ घ॒र्माय॒ स्वाहा॑ घ॒र्मः पि॒त्रे ।। ९ ।।
ya॒māya॒ tvā’ṅgi॑rasvate pitṛ॒mate॒ svāhā॑ | svāhā॑ gha॒rmāya॒ svāhā॑ gha॒rmaḥ pi॒tre | | ९ | |
विश्वा॒ आशा॑ दक्षिण॒सद्विश्वा॑न् दे॒वानया॑डि॒ह ।
स्वाहा॑कृतस्य घ॒र्मस्य॒ मधो॑: पिबतमश्विना ।। १० ।।
viśvā॒ āśā॑ dakṣiṇa॒sadviśvā॑n de॒vānayā॑ḍi॒ha | svāhā॑kṛtasya gha॒rmasya॒ madho॑: pibatamaśvinā | | १० | |
दि॒वि धा॑ इ॒मं य॒ज्ञमि॒मं य॒ज्ञं दि॒वि धा॑: । स्वाहा॒ऽग्नये॑ य॒ज्ञिया॑य॒ शं यजु॑र्भ्यः ।। ११ ।।
di॒vi dhā॑ i॒maṃ ya॒jñami॒maṃ ya॒jñaṃ di॒vi dhā॑: | svāhā॒’gnaye॑ ya॒jñiyā॑ya॒ śaṃ yaju॑rbhyaḥ | | ११ | |
अश्वि॑ना घ॒र्मं पा॑त॒ᳪ हार्द्वा॑न॒मह॑र्दि॒वाभि॑रू॒तिभि॑: । तन्त्रा॒यिणे॒ नमो॒ द्यावा॑पृथि॒वीभ्या॑म् ।। १२ ।।
aśvi॑nā gha॒rmaṃ pā॑ta॒ᳪ hārdvā॑na॒maha॑rdi॒vābhi॑rū॒tibhi॑: | tantrā॒yiṇe॒ namo॒ dyāvā॑pṛthi॒vībhyā॑m | | १२ | |
अपा॑ताम॒श्विना॑ घ॒र्ममनु॒ द्यावा॑पृथि॒वी अ॑मᳪसाताम् । इहै॒व रा॒तय॑: सन्तु ।। १३ ।।
apā॑tāma॒śvinā॑ gha॒rmamanu॒ dyāvā॑pṛthi॒vī a॑maᳪsātām | ihai॒va rā॒taya॑: santu | | १३ | |
इ॒षे पि॑न्वस्वो॒र्जे पि॑न्वस्व॒ ब्रह्म॑णे पिन्वस्व क्ष॒त्राय॑ पिन्वस्व॒ द्यावा॑पृथि॒वीभ्यां॑ पिन्वस्व ।
धर्मा॑सि सु॒धर्मामे॑न्य॒स्मे नृ॒म्णानि॑ धारय॒ ब्रह्म॑ धारय क्ष॒त्रं धा॑रय॒ विशं॑ धारय ।। १४ ।।
i॒ṣe pi॑nvasvo॒rje pi॑nvasva॒ brahma॑ṇe pinvasva kṣa॒trāya॑ pinvasva॒ dyāvā॑pṛthi॒vībhyāṃ॑ pinvasva | dharmā॑si su॒dharmāme॑nya॒sme nṛ॒mṇāni॑ dhāraya॒ brahma॑ dhāraya kṣa॒traṃ dhā॑raya॒ viśaṃ॑ dhāraya | | १४ | |
स्वाहा॑ पू॒ष्णे शर॑से॒ स्वाहा॒ ग्राव॑भ्यः स्वाहा॑ प्रतिर॒वेभ्य॑: ।
स्वाहा॑ पि॒तृभ्य॑ ऊ॒र्ध्वब॑र्हिर्भ्यो घर्म॒पाव॑भ्य॒: स्वाहा॒ द्यावा॑पृथि॒वीभ्या॒ᳪ स्वाहा॒ विश्वे॑भ्यो दे॒वेभ्य॑: ।। १५ ।।
svāhā॑ pū॒ṣṇe śara॑se॒ svāhā॒ grāva॑bhyaḥ svāhā॑ pratira॒vebhya॑: | svāhā॑ pi॒tṛbhya॑ ū॒rdhvaba॑rhirbhyo gharma॒pāva॑bhya॒: svāhā॒ dyāvā॑pṛthi॒vībhyā॒ᳪ svāhā॒ viśve॑bhyo de॒vebhya॑: | | १५ | |
स्वाहा॑ रु॒द्राय॑ रु॒द्रहू॑तये॒ स्वाहा॒ सं ज्योति॑षा॒ ज्योति॑: ।
अह॑: के॒तुना॑ जुषताᳪ सु॒ज्योति॒र्ज्योति॑षा॒ स्वाहा॑ ।
रात्रि॑: के॒तुना॑ जुषताᳪ सु॒ज्योति॒र्ज्योति॑षा॒ स्वाहा॑ ।
मधु॑ हु॒तमिन्द्र॑तमे अ॒ग्नाव॒श्याम॑ ते देव॒ घर्म॒ नम॑स्ते अस्तु॒ मा मा॑ हिᳪसीः ।। १६ ।।
svāhā॑ ru॒drāya॑ ru॒drahū॑taye॒ svāhā॒ saṃ jyoti॑ṣā॒ jyoti॑: | aha॑: ke॒tunā॑ juṣatāᳪ su॒jyoti॒rjyoti॑ṣā॒ svāhā॑ | rātri॑: ke॒tunā॑ juṣatāᳪ su॒jyoti॒rjyoti॑ṣā॒ svāhā॑ | madhu॑ hu॒tamindra॑tame a॒gnāva॒śyāma॑ te deva॒ gharma॒ nama॑ste astu॒ mā mā॑ hiᳪsīḥ | | १६ | |
अ॒भीमं म॑हि॒मा दिवं॒ विप्रो॑ बभूव स॒प्रथा॑: ।
उ॒त श्रव॑सा पृथि॒वीᳪ सᳪ सी॑दस्व म॒हाँ२ अ॑सि॒ रोच॑स्व देव॒वीत॑मः ।। १७ ।।
a॒bhīmaṃ ma॑hi॒mā divaṃ॒ vipro॑ babhūva sa॒prathā॑: | u॒ta śrava॑sā pṛthi॒vīᳪ saᳪ sī॑dasva ma॒hām̐२ a॑si॒ roca॑sva deva॒vīta॑maḥ | | १७ | |
या ते॑ घर्म दि॒व्या शुग्या गा॑य॒त्र्याᳪ ह॑वि॒र्धाने॑ ।
सा त॒ आ प्या॑यतां॒ निष्टया॑यतां॒ तस्यै॑ ते॒ स्वाहा॑ ।
या ते॑ घर्मा॒न्तरि॑क्षे॒ शुग्या त्रि॒ष्टुभ्याग्नी॑ध्रे ।
सा त॒ आ प्या॑यतां॒ निष्टया॑यतां॒ तस्यै॑ ते॒ स्वाहा॑ ।
या ते॑ घर्म पृथि॒व्याᳪ शुग्या जग॑त्याᳪ सद॒स्या॒ ।
सा त॒ आ प्या॑यतां॒ निष्टया॑यतां॒ तस्यै॑ ते॒ स्वाहा॑ ।। १८ ।।
yā te॑ gharma di॒vyā śugyā gā॑ya॒tryāᳪ ha॑vi॒rdhāne॑ | sā ta॒ ā pyā॑yatāṃ॒ niṣṭayā॑yatāṃ॒ tasyai॑ te॒ svāhā॑ | yā te॑ gharmā॒ntari॑kṣe॒ śugyā tri॒ṣṭubhyāgnī॑dhre | sā ta॒ ā pyā॑yatāṃ॒ niṣṭayā॑yatāṃ॒ tasyai॑ te॒ svāhā॑ | yā te॑ gharma pṛthi॒vyāᳪ śugyā jaga॑tyāᳪ sada॒syā॒ | sā ta॒ ā pyā॑yatāṃ॒ niṣṭayā॑yatāṃ॒ tasyai॑ te॒ svāhā॑ | | १८ | |
क्ष॒त्रस्य॑ त्वा प॒रस्पा॑य॒ ब्रह्म॑णस्त॒न्वं॒ पाहि ।
विश॑स्त्वा॒ धर्म॑णा व॒यमनु॑ क्रामाम सुवि॒ताय॒ नव्य॑से ।। १९ ।।
kṣa॒trasya॑ tvā pa॒raspā॑ya॒ brahma॑ṇasta॒nvaṃ॒ pāhi | viśa॑stvā॒ dharma॑ṇā va॒yamanu॑ krāmāma suvi॒tāya॒ navya॑se | | १९ | |
चतु॑: स्रक्ति॒र्नाभि॑रृ॒तस्य॑ स॒प्रथा॒: स नो॑ वि॒श्वायु॑: स॒प्रथा॒: स न: स॒र्वायु॑: स॒प्रथा॑: ।
अप॒ द्वेषो॒ अप॒ ह्वरो॒ऽन्यव्र॑तस्य सश्चिम ।। २० ।।
catu॑: srakti॒rnābhi॑rṛ॒tasya॑ sa॒prathā॒: sa no॑ vi॒śvāyu॑: sa॒prathā॒: sa na: sa॒rvāyu॑: sa॒prathā॑: | apa॒ dveṣo॒ apa॒ hvaro॒’nyavra॑tasya saścima | | २० | |
घर्मै॒तत्ते॒ पुरी॑षं॒ तेन॒ वर्ध॑स्व॒ चा च॑ प्यायस्व । व॒र्धि॒षी॒महि॑ च व॒यमा च॑ प्यासिषीमहि ।। २१ ।।
gharmai॒tatte॒ purī॑ṣaṃ॒ tena॒ vardha॑sva॒ cā ca॑ pyāyasva | va॒rdhi॒ṣī॒mahi॑ ca va॒yamā ca॑ pyāsiṣīmahi | | २१ | |
अचि॑क्रद॒द्वृषा॒ हरि॑र्म॒हान्मि॒त्रो न॑ दर्श॒तः । सᳪ सूर्ये॑ण दिद्युतदुद॒धिर्नि॒धिः ।। २२ ।।
aci॑krada॒dvṛṣā॒ hari॑rma॒hānmi॒tro na॑ darśa॒taḥ | saᳪ sūrye॑ṇa didyutaduda॒dhirni॒dhiḥ | | २२ | |
सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान् द्वेष्टि॒ यं च॑ व॒यं द्वि॒ष्मः ।। २३ ।।
su॒mi॒tri॒yā na॒ āpa॒ oṣa॑dhayaḥ santu durmitri॒yāstasmai॑ santu॒ yo’smān dveṣṭi॒ yaṃ ca॑ va॒yaṃ dvi॒ṣmaḥ | | २३ | |
उद्व॒यं तम॑स॒स्परि॒ स्व: पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।। २४ ।।
udva॒yaṃ tama॑sa॒spari॒ sva: paśya॑nta॒ utta॑ram | de॒vaṃ de॑va॒trā sūrya॒maga॑nma॒ jyoti॑rutta॒mam | | २४ | |
एधो॑ऽस्येधिषी॒महि॑ स॒मिद॑सि॒ तेजो॑ऽसि॒ तेजो॒ मयि॑ धेहि ।। २५ ।।
edho॑’syedhiṣī॒mahi॑ sa॒mida॑si॒ tejo॑’si॒ tejo॒ mayi॑ dhehi | | २५ | |
याव॑ती॒ द्यावा॑पृथि॒वी याव॑च्च स॒प्त सिन्ध॑वो वितस्थि॒रे ।
तव॑न्तमिन्द्र ते॒ ग्रह॑मू॒र्जा गृ॑ह्णा॒म्यक्षि॑तं॒ मयि॑ गृह्णा॒म्यक्षि॑तम् ।। २६ ।।
yāva॑tī॒ dyāvā॑pṛthi॒vī yāva॑cca sa॒pta sindha॑vo vitasthi॒re | tava॑ntamindra te॒ graha॑mū॒rjā gṛ॑hṇā॒myakṣi॑taṃ॒ mayi॑ gṛhṇā॒myakṣi॑tam | | २६ | |
मयि॒ त्यदि॑न्द्रि॒यं बृ॒हन्मयि॒ दक्षो॒ मयि॒ क्रतु॑: ।
घ॒र्मस्त्रि॒शुग्वि रा॑जति वि॒राजा॒ ज्योति॑षा स॒ह ब्रह्म॑णा॒ तेज॑सा स॒ह ।। २७ ।।
mayi॒ tyadi॑ndri॒yaṃ bṛ॒hanmayi॒ dakṣo॒ mayi॒ kratu॑: | gha॒rmastri॒śugvi rā॑jati vi॒rājā॒ jyoti॑ṣā sa॒ha brahma॑ṇā॒ teja॑sā sa॒ha | | २७ | |
पय॑सो॒ रेत॒ आभृ॑तं॒ तस्य॒ दोह॑मशीम॒ह्युत्त॑रामुत्तरा॒ᳪ समा॑म् ।
त्विष॑: सं॒वृक् क्रत्वे॒ दक्ष॑स्य ते सुषु॒म्णस्य॑ ते सुषुम्णाग्निहु॒तः ।
इन्द्र॑पीतस्य प्र॒जाप॑तिभक्षितस्य॒ मधु॑मत॒ उप॑हूत॒ उप॑हूतस्य भक्षयामि ।। २८ ।।
paya॑so॒ reta॒ ābhṛ॑taṃ॒ tasya॒ doha॑maśīma॒hyutta॑rāmuttarā॒ᳪ samā॑m | tviṣa॑: saṃ॒vṛk kratve॒ dakṣa॑sya te suṣu॒mṇasya॑ te suṣumṇāgnihu॒taḥ | indra॑pītasya pra॒jāpa॑tibhakṣitasya॒ madhu॑mata॒ upa॑hūta॒ upa॑hūtasya bhakṣayāmi | | २८ | |