EeseDharmaSanātana Library
36अध्याय 36
Śukla Yajurveda Mādhyaṃdina ka Adhyay 36.
24 shlokऋचं॒ वाचं॒ प्र प॑द्ये॒ मनो॒ यजु॒: प्र प॑द्ये॒ साम॑ प्रा॒णं प्र प॑द्ये॒ चक्षु॒: श्रोत्रं॒ प्र प॑द्ये ।
वागोज॑: स॒हौजो॒ मयि॑ प्राणापा॒नौ ।। १ ।।
ṛcaṃ॒ vācaṃ॒ pra pa॑dye॒ mano॒ yaju॒: pra pa॑dye॒ sāma॑ prā॒ṇaṃ pra pa॑dye॒ cakṣu॒: śrotraṃ॒ pra pa॑dye | vāgoja॑: sa॒haujo॒ mayi॑ prāṇāpā॒nau | | १ | |
यन्मे॑ छि॒द्रं चक्षु॑षो॒ हृद॑यस्य॒ मन॑सो॒ वाति॑तृण्णं॒ बृह॒स्पति॑र्मे॒ तद्द॑धातु ।
शं नो॑ भवतु॒ भुव॑नस्य॒ यस्पति॑: ।। २ ।।
yanme॑ chi॒draṃ cakṣu॑ṣo॒ hṛda॑yasya॒ mana॑so॒ vāti॑tṛṇṇaṃ॒ bṛha॒spati॑rme॒ tadda॑dhātu | śaṃ no॑ bhavatu॒ bhuva॑nasya॒ yaspati॑: | | २ | |
भूर्भुव॒: स्व॒: तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि ।
धियो॒ यो न॑: प्रचो॒दया॑त् ।। ३ ।।
bhūrbhuva॒: sva॒: tatsa॑vi॒turvare॑ṇyaṃ॒ bhargo॑ de॒vasya॑ dhīmahi | dhiyo॒ yo na॑: praco॒dayā॑t | | ३ | |
कया॑ नश्चि॒त्र आ भु॑वदू॒ती स॒दावृ॑ध॒: सखा॑ । कया॒ शचि॑ष्ठया वृ॒ता ।। ४ ।।
kayā॑ naści॒tra ā bhu॑vadū॒tī sa॒dāvṛ॑dha॒: sakhā॑ | kayā॒ śaci॑ṣṭhayā vṛ॒tā | | ४ | |
कस्त्वा॑ स॒त्यो मदा॑नां॒ मᳪहि॑ष्ठो मत्स॒दन्ध॑सः । दृ॒ढा चि॑दा॒रुजे॒ वसु॑ ।। ५ ।।
kastvā॑ sa॒tyo madā॑nāṃ॒ maᳪhi॑ṣṭho matsa॒dandha॑saḥ | dṛ॒ḍhā ci॑dā॒ruje॒ vasu॑ | | ५ | |
अ॒भी षु ण॒: सखी॑नामवि॒ता ज॑रितॄ॒णाम् । श॒तं भ॑वास्यू॒तिभि॑: ।। ६ ।।
a॒bhī ṣu ṇa॒: sakhī॑nāmavi॒tā ja॑ritṝ॒ṇām | śa॒taṃ bha॑vāsyū॒tibhi॑: | | ६ | |
कया॒ त्वं न ऊ॒त्याभि प्र म॑न्दसे वृषन् । कया॑ स्तो॒तृभ्य॒ आ भ॑र ।। ७ ।।
kayā॒ tvaṃ na ū॒tyābhi pra ma॑ndase vṛṣan | kayā॑ sto॒tṛbhya॒ ā bha॑ra | | ७ | |
इन्द्रो॒ विश्व॑स्य राजति । शं नो॑ अस्तु द्वि॒पदे॒ शं चतु॑ष्पदे ।। ८ ।।
indro॒ viśva॑sya rājati | śaṃ no॑ astu dvi॒pade॒ śaṃ catu॑ṣpade | | ८ | |
शं नो॑ मि॒त्र: शं वरु॑ण॒: शं नो॑ भवत्वर्य॒मा ।
शं न॒ इन्द्रो॒ बृह॒स्पति॒: शं नो॒ विष्णु॑रुरुक्र॒मः ।। ९ ।।
śaṃ no॑ mi॒tra: śaṃ varu॑ṇa॒: śaṃ no॑ bhavatvarya॒mā | śaṃ na॒ indro॒ bṛha॒spati॒: śaṃ no॒ viṣṇu॑rurukra॒maḥ | | ९ | |
शं नो॒ वात॑: पवता॒ᳪ शं न॑स्तपतु॒ सूर्य॑: ।
शं न॒: कनि॑क्रदद्दे॒वः प॒र्जन्यो॑ अ॒भि व॑र्षतु ।। १० ।।
śaṃ no॒ vāta॑: pavatā॒ᳪ śaṃ na॑stapatu॒ sūrya॑: | śaṃ na॒: kani॑kradadde॒vaḥ pa॒rjanyo॑ a॒bhi va॑rṣatu | | १० | |
अहा॑नि॒ शं भव॑न्तु न॒: शᳪ रात्री॒: प्रति॑ धीयताम् ।
शं न॑ इन्द्रा॒ग्नी भ॑वता॒मवो॑भि॒: शं न॒ इन्द्रा॒वरु॑णा रा॒तह॑व्या ।
शं न॑ इन्द्रापू॒षणा॒ वाज॑सातौ॒ शमिन्द्रा॒सोमा॑ सुवि॒ताय॒ शं योः ।। ११ ।।
ahā॑ni॒ śaṃ bhava॑ntu na॒: śaᳪ rātrī॒: prati॑ dhīyatām | śaṃ na॑ indrā॒gnī bha॑vatā॒mavo॑bhi॒: śaṃ na॒ indrā॒varu॑ṇā rā॒taha॑vyā | śaṃ na॑ indrāpū॒ṣaṇā॒ vāja॑sātau॒ śamindrā॒somā॑ suvi॒tāya॒ śaṃ yoḥ | | ११ | |
शं नो॑ दे॒वीर॒भिष्ट॑य॒ आपो॑ भवन्तु पी॒तये॑ ।
शं योर॒भि स्र॑वन्तु नः ।। १२ ।।
śaṃ no॑ de॒vīra॒bhiṣṭa॑ya॒ āpo॑ bhavantu pī॒taye॑ | śaṃ yora॒bhi sra॑vantu naḥ | | १२ | |
स्यो॒ना पृ॑थिवि नो भवानृक्ष॒रा नि॒वेश॑नी ।
यच्छा॑ न॒: शर्म॑ स॒प्रथा॑: ।। १३ ।।
syo॒nā pṛ॑thivi no bhavānṛkṣa॒rā ni॒veśa॑nī | yacchā॑ na॒: śarma॑ sa॒prathā॑: | | १३ | |
आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ।। १४ ।।
āpo॒ hi ṣṭhā ma॑yo॒bhuva॒stā na॑ ū॒rje da॑dhātana | ma॒he raṇā॑ya॒ cakṣa॑se | | १४ | |
यो व॑: शि॒वत॑मो॒ रस॒स्तस्य॑ भाजयते॒ह न॑: । उ॒श॒तीरि॑व मा॒तर॑: ।। १५ ।।
yo va॑: śi॒vata॑mo॒ rasa॒stasya॑ bhājayate॒ha na॑: | u॒śa॒tīri॑va mā॒tara॑: | | १५ | |
तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ।। १६ ।।
tasmā॒ araṃ॑ gamāma vo॒ yasya॒ kṣayā॑ya॒ jinva॑tha | āpo॑ ja॒naya॑thā ca naḥ | | १६ | |
द्यौ: शान्ति॑र॒न्तरि॑क्ष॒ᳪ शान्ति॑: पृथि॒वी शान्ति॒राप॒: शान्ति॒रोष॑धय॒: शान्ति॑: ।
वन॒स्पत॑य॒: शान्ति॒र्विश्वे॑ दे॒वाः शान्ति॒र्ब्रह्म॒ शान्ति॒: सर्व॒ᳪ शान्ति॒: शान्ति॑रे॒व शान्ति॒: सा मा॒ शान्ति॑रेधि ।। १७ ।।
dyau: śānti॑ra॒ntari॑kṣa॒ᳪ śānti॑: pṛthi॒vī śānti॒rāpa॒: śānti॒roṣa॑dhaya॒: śānti॑: | vana॒spata॑ya॒: śānti॒rviśve॑ de॒vāḥ śānti॒rbrahma॒ śānti॒: sarva॒ᳪ śānti॒: śānti॑re॒va śānti॒: sā mā॒ śānti॑redhi | | १७ | |
दृते॒ दृᳪह॑ मा मि॒त्रस्य॑ मा॒ चक्षु॑षा॒ सर्वा॑णि भू॒तानि॒ समी॑क्षन्ताम् ।
मि॒त्रस्या॒हं चक्षु॑षा॒ सर्वा॑णि भू॒तानि॒ समी॑क्षे ।
मि॒त्रस्य॒ चक्षु॑षा॒ समी॑क्षामहे ।। १८ ।।
dṛte॒ dṛᳪha॑ mā mi॒trasya॑ mā॒ cakṣu॑ṣā॒ sarvā॑ṇi bhū॒tāni॒ samī॑kṣantām | mi॒trasyā॒haṃ cakṣu॑ṣā॒ sarvā॑ṇi bhū॒tāni॒ samī॑kṣe | mi॒trasya॒ cakṣu॑ṣā॒ samī॑kṣāmahe | | १८ | |
दृते॒ दृᳪह॑ मा । ज्योक्ते॑ स॒न्दृशि॑ जीव्यासं॒ ज्योक्ते॑ स॒न्दृशि॑ जीव्यासम् ।। १९ ।।
dṛte॒ dṛᳪha॑ mā | jyokte॑ sa॒ndṛśi॑ jīvyāsaṃ॒ jyokte॑ sa॒ndṛśi॑ jīvyāsam | | १९ | |
नम॑स्ते॒ हर॑से शो॒चिषे॒ नम॑स्ते अस्त्व॒र्चिषे॑ ।
अ॒न्याँस्ते॑ अ॒स्मत्त॑पन्तु हे॒तय॑: पाव॒को अ॒स्मभ्य॑ᳪ शि॒वो भ॑व ।। २० ।।
nama॑ste॒ hara॑se śo॒ciṣe॒ nama॑ste astva॒rciṣe॑ | a॒nyām̐ste॑ a॒smatta॑pantu he॒taya॑: pāva॒ko a॒smabhya॑ᳪ śi॒vo bha॑va | | २० | |
नम॑स्ते अस्तु वि॒द्युते॒ नम॑स्ते स्तनयि॒त्नवे॑ । नम॑स्ते भगवन्नस्तु॒ यत॒: स्व॒: स॒मीह॑से ।। २१ ।।
nama॑ste astu vi॒dyute॒ nama॑ste stanayi॒tnave॑ | nama॑ste bhagavannastu॒ yata॒: sva॒: sa॒mīha॑se | | २१ | |
यतो॑-यतः स॒मीह॑से॒ ततो॑ नो॒ अभ॑यं कुरु । शं न॑: कुरु प्र॒जाभ्योऽभ॑यं नः प॒शुभ्य॑: ।। २२ ।।
yato॑-yataḥ sa॒mīha॑se॒ tato॑ no॒ abha॑yaṃ kuru | śaṃ na॑: kuru pra॒jābhyo’bha॑yaṃ naḥ pa॒śubhya॑: | | २२ | |
सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान् द्वेष्टि॒ यं च॑ व॒यं द्वि॒ष्मः ।। २३ ।।
su॒mi॒tri॒yā na॒ āpa॒ oṣa॑dhayaḥ santu durmitri॒yāstasmai॑ santu॒ yo’smān dveṣṭi॒ yaṃ ca॑ va॒yaṃ dvi॒ṣmaḥ | | २३ | |
तच्चक्षु॑र्दे॒वहि॑तं पु॒रस्ता॑च्छु॒क्रमुच्च॑रत् । पश्ये॑म श॒रद॑: श॒तं जीवे॑म श॒रद॑: श॒तᳪ शृणु॑याम श॒रद॑: श॒तं प्र ब्र॑वाम श॒रद॑: श॒तमदी॑नाः स्याम श॒रद॑: श॒तं भूय॑श्च श॒रद॑: श॒तात् ।। २४ ।।
taccakṣu॑rde॒vahi॑taṃ pu॒rastā॑cchu॒kramucca॑rat | paśye॑ma śa॒rada॑: śa॒taṃ jīve॑ma śa॒rada॑: śa॒taᳪ śṛṇu॑yāma śa॒rada॑: śa॒taṃ pra bra॑vāma śa॒rada॑: śa॒tamadī॑nāḥ syāma śa॒rada॑: śa॒taṃ bhūya॑śca śa॒rada॑: śa॒tāt | | २४ | |