EeseDharmaSanātana Library
35अध्याय 35
Śukla Yajurveda Mādhyaṃdina ka Adhyay 35.
22 shlokअपे॒तो य॑न्तु प॒णयोऽसु॑म्ना देवपी॒यव॑: । अ॒स्य लो॒कः सु॒ताव॑तः ।
द्युभि॒रहो॑भिर॒क्तुभि॒र्व्य॒क्तं य॒मो द॑दात्वव॒सान॑मस्मै ।। १ ।।
ape॒to ya॑ntu pa॒ṇayo’su॑mnā devapī॒yava॑: | a॒sya lo॒kaḥ su॒tāva॑taḥ | dyubhi॒raho॑bhira॒ktubhi॒rvya॒ktaṃ ya॒mo da॑dātvava॒sāna॑masmai | | १ | |
स॒वि॒ता ते॒ शरी॑रेभ्यः पृथि॒व्याँल्लो॒कमि॑च्छतु । तस्मै॑ युज्यन्तामु॒स्रिया॑: ।। २ ।।
sa॒vi॒tā te॒ śarī॑rebhyaḥ pṛthi॒vyām̐llo॒kami॑cchatu | tasmai॑ yujyantāmu॒sriyā॑: | | २ | |
वा॒युः पु॑नातु स॑वि॒ता पु॑नात्व॒ग्नेर्भ्राज॑सा॒ सूर्य॑स्य॒ वर्च॑सा । वि मु॑च्यन्तामु॒स्रिया॑: ।। ३ ।।
vā॒yuḥ pu॑nātu sa॑vi॒tā pu॑nātva॒gnerbhrāja॑sā॒ sūrya॑sya॒ varca॑sā | vi mu॑cyantāmu॒sriyā॑: | | ३ | |
अ॒श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता ।
गो॒भाज॒ इत्किला॑सथ॒ यत्स॒नव॑थ॒ पूरु॑षम् ।। ४ ।।
a॒śva॒tthe vo॑ ni॒ṣada॑naṃ pa॒rṇe vo॑ vasa॒tiṣkṛ॒tā | go॒bhāja॒ itkilā॑satha॒ yatsa॒nava॑tha॒ pūru॑ṣam | | ४ | |
स॒वि॒ता ते॒ शरी॑राणि मा॒तुरु॒पस्थ॒ आ व॑पतु । तस्मै॑ पृथिवि॒ शं भ॑व ।। ५ ।।
sa॒vi॒tā te॒ śarī॑rāṇi mā॒turu॒pastha॒ ā va॑patu | tasmai॑ pṛthivi॒ śaṃ bha॑va | | ५ | |
प्र॒जाप॑तौ त्वा दे॒वता॑या॒मुपो॑दके लो॒के नि द॑धाम्यसौ । अप॑ न॒: शोशु॑चद॒घम् ।। ६ ।।
pra॒jāpa॑tau tvā de॒vatā॑yā॒mupo॑dake lo॒ke ni da॑dhāmyasau | apa॑ na॒: śośu॑cada॒gham | | ६ | |
परं॑ मृत्यो॒ अनु॒ परे॑हि॒ पन्थां॒ यस्ते॑ अ॒न्य इत॑रो देव॒याना॑त् ।
चक्षु॑ष्मते शृण्व॒ते ते॑ ब्रवीमि॒ मा न॑: प्र॒जाᳪ री॑रिषो॒ मोत वी॒रान् ।। ७ ।।
paraṃ॑ mṛtyo॒ anu॒ pare॑hi॒ panthāṃ॒ yaste॑ a॒nya ita॑ro deva॒yānā॑t | cakṣu॑ṣmate śṛṇva॒te te॑ bravīmi॒ mā na॑: pra॒jāᳪ rī॑riṣo॒ mota vī॒rān | | ७ | |
शं वात॒: शᳪ हि ते॒ घृणि॒: शं ते॑ भव॒न्त्विष्ट॑काः ।
शं ते॑ भवन्त्व॒ग्नय॒: पार्थि॑वासो॒ मा त्वा॒ऽभि शू॑शुचन् ।। ८ ।।
śaṃ vāta॒: śaᳪ hi te॒ ghṛṇi॒: śaṃ te॑ bhava॒ntviṣṭa॑kāḥ | śaṃ te॑ bhavantva॒gnaya॒: pārthi॑vāso॒ mā tvā॒’bhi śū॑śucan | | ८ | |
कल्प॑न्तां ते॒ दिश॒स्तुभ्य॒माप॑: शि॒वत॑मा॒स्तुभ्यं॑ भवन्तु॒ सिन्ध॑वः ।
अ॒न्तरि॑क्षᳪ शि॒वं तुभ्यं॒ कल्प॑न्तां ते॒ दिश॒: सर्वा॑: ।। ९ ।।
kalpa॑ntāṃ te॒ diśa॒stubhya॒māpa॑: śi॒vata॑mā॒stubhyaṃ॑ bhavantu॒ sindha॑vaḥ | a॒ntari॑kṣaᳪ śi॒vaṃ tubhyaṃ॒ kalpa॑ntāṃ te॒ diśa॒: sarvā॑: | | ९ | |
अश्म॑न्वती रीयते॒ सᳪ र॑भध्व॒मुत्ति॑ष्ठत॒ प्र त॑रता॒ सखा॑यः ।
अत्रा॑ जही॒मोऽशि॑वा॒ ये अस॑ञ्छि॒वान्व॒यमुत्त॑रेमा॒भि वाजा॑न् ।। १० ।।
aśma॑nvatī rīyate॒ saᳪ ra॑bhadhva॒mutti॑ṣṭhata॒ pra ta॑ratā॒ sakhā॑yaḥ | atrā॑ jahī॒mo’śi॑vā॒ ye asa॑ñchi॒vānva॒yamutta॑remā॒bhi vājā॑n | | १० | |
अपा॒घमप॒ किल्वि॑ष॒मप॑ कृ॒त्यामपो॒ रप॑: । अपा॑मार्ग॒ त्वम॒स्मदप॑ दु॒:ष्वप्न्य॑ᳪ सुव ।। ११ ।।
apā॒ghamapa॒ kilvi॑ṣa॒mapa॑ kṛ॒tyāmapo॒ rapa॑: | apā॑mārga॒ tvama॒smadapa॑ du॒:ṣvapnya॑ᳪ suva | | ११ | |
सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान्द्वेष्टि॒ यं च॑ व॒यं द्वि॒ष्मः ।। १२ ।।
su॒mi॒tri॒yā na॒ āpa॒ oṣa॑dhayaḥ santu durmitri॒yāstasmai॑ santu॒ yo’smāndveṣṭi॒ yaṃ ca॑ va॒yaṃ dvi॒ṣmaḥ | | १२ | |
अ॒न॒ड्वाह॑म॒न्वार॑भामहे॒ सौर॑भेयᳪ स्व॒स्तये॑ । स न॒ इन्द्र॑ इव दे॒वेभ्यो॒ वह्नि॑: स॒न्तार॑णो भव ।। १३ ।।
a॒na॒ḍvāha॑ma॒nvāra॑bhāmahe॒ saura॑bheyaᳪ sva॒staye॑ | sa na॒ indra॑ iva de॒vebhyo॒ vahni॑: sa॒ntāra॑ṇo bhava | | १३ | |
उद्व॒यं तम॑स॒स्परि॒ स्व: पश्य॑न्त॒ उत्त॑रम् ।
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।। १४ ।।
udva॒yaṃ tama॑sa॒spari॒ sva: paśya॑nta॒ utta॑ram | de॒vaṃ de॑va॒trā sūrya॒maga॑nma॒ jyoti॑rutta॒mam | | १४ | |
इ॒मं जी॒वेभ्य॑: परि॒धिं द॑धामि॒ मैषां॒ नु गा॒दप॑रो॒ अर्थ॑मे॒तम् ।
श॒तं जी॑वन्तु श॒रद॑: पुरू॒चीर॒न्तर्मृ॒त्युं द॑धतां॒ पर्व॑तेन ।। १५ ।।
i॒maṃ jī॒vebhya॑: pari॒dhiṃ da॑dhāmi॒ maiṣāṃ॒ nu gā॒dapa॑ro॒ artha॑me॒tam | śa॒taṃ jī॑vantu śa॒rada॑: purū॒cīra॒ntarmṛ॒tyuṃ da॑dhatāṃ॒ parva॑tena | | १५ | |
अग्न॒ आयू॑ᳪषि पवस्व॒ आ सु॒वोर्ज॒मिषं॑ च नः । आ॒रे बा॑धस्व दु॒च्छुना॑म् ।। १६ ।।
agna॒ āyū॑ᳪṣi pavasva॒ ā su॒vorja॒miṣaṃ॑ ca naḥ | ā॒re bā॑dhasva du॒cchunā॑m | | १६ | |
आयु॑ष्मानग्ने ह॒विषा॑ वृधा॒नो घृ॒तप्र॑तीको घृ॒तयो॑निरेधि ।
घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रम॒भि र॑क्षतादि॒मान्त्स्वाहा॑ ।। १७ ।।
āyu॑ṣmānagne ha॒viṣā॑ vṛdhā॒no ghṛ॒tapra॑tīko ghṛ॒tayo॑niredhi | ghṛ॒taṃ pī॒tvā madhu॒ cāru॒ gavyaṃ॑ pi॒teva॑ pu॒trama॒bhi ra॑kṣatādi॒māntsvāhā॑ | | १७ | |
परी॒मे गाम॑नेषत॒ पर्य॒ग्निम॑हृषत । दे॒वेष्व॑क्रत॒ श्रव॒: क इ॒माँ२ आ द॑धर्षति ।। १८ ।।
parī॒me gāma॑neṣata॒ parya॒gnima॑hṛṣata | de॒veṣva॑krata॒ śrava॒: ka i॒mām̐२ ā da॑dharṣati | | १८ | |
क्र॒व्याद॑म॒ग्निं प्र हि॑णोमि दू॒रं य॑म॒राज्यं॑ गच्छतु रिप्रवा॒हः ।
इहै॒वायमित॑रो जा॒तवे॑दा दे॒वेभ्यो॑ ह॒व्यं व॑हतु प्रजा॒नन् ।। १९ ।।
kra॒vyāda॑ma॒gniṃ pra hi॑ṇomi dū॒raṃ ya॑ma॒rājyaṃ॑ gacchatu ripravā॒haḥ | ihai॒vāyamita॑ro jā॒tave॑dā de॒vebhyo॑ ha॒vyaṃ va॑hatu prajā॒nan | | १९ | |
वह॑ व॒पां जा॑तवेदः पि॒तृभ्यो॒ यत्रै॑ना॒न्वेत्थ॒ निहि॑तान् परा॒के ।
मेद॑सः कु॒ल्या उप॒ तान्त्स्र॑वन्तु स॒त्या ए॑षामा॒शिष॒: सं न॑मन्ता॒ᳪ स्वाहा॑ ।। २० ।।
vaha॑ va॒pāṃ jā॑tavedaḥ pi॒tṛbhyo॒ yatrai॑nā॒nvettha॒ nihi॑tān parā॒ke | meda॑saḥ ku॒lyā upa॒ tāntsra॑vantu sa॒tyā e॑ṣāmā॒śiṣa॒: saṃ na॑mantā॒ᳪ svāhā॑ | | २० | |
स्यो॒ना पृ॑थिवि नो भवानृक्ष॒रा नि॒वेश॑नी । यच्छा॑ न॒: शर्म॑ स॒प्रथा॑: ।
अप॑ न॒: शोशु॑चद॒घम् ।। २१ ।।
syo॒nā pṛ॑thivi no bhavānṛkṣa॒rā ni॒veśa॑nī | yacchā॑ na॒: śarma॑ sa॒prathā॑: | apa॑ na॒: śośu॑cada॒gham | | २१ | |
अ॒स्मात्त्वमधि॑ जा॒तो॒ऽसि॒ त्वद॒यं जा॑यतां॒ पुन॑: । अ॒सौ स्व॒र्गाय॑ लो॒काय॒ स्वाहा॑ ।। २२ ।।
a॒smāttvamadhi॑ jā॒to॒’si॒ tvada॒yaṃ jā॑yatāṃ॒ puna॑: | a॒sau sva॒rgāya॑ lo॒kāya॒ svāhā॑ | | २२ | |