EeseDharmaSanātana Library
33अध्याय 33
Śukla Yajurveda Mādhyaṃdina ka Adhyay 33.
96 shlokअ॒स्याजरा॑सो द॒माम॒रित्रा॑ अ॒र्चद्धू॑मासो अ॒ग्नय॑: पाव॒काः ।
श्वि॒ती॒चय॑: श्वा॒त्रासो॑ भुर॒ण्यवो॑ वन॒र्षदो॑ वा॒यवो॒ न सोमा॑: ।। १ ।।
a॒syājarā॑so da॒māma॒ritrā॑ a॒rcaddhū॑māso a॒gnaya॑: pāva॒kāḥ | śvi॒tī॒caya॑: śvā॒trāso॑ bhura॒ṇyavo॑ vana॒rṣado॑ vā॒yavo॒ na somā॑: | | १ | |
हर॑यो धू॒मके॑तवो॒ वात॑जूता॒ उप॒ द्यवि॑ । यत॑न्ते॒ वृथ॑ग॒ग्नय॑: ।। २ ।।
hara॑yo dhū॒make॑tavo॒ vāta॑jūtā॒ upa॒ dyavi॑ | yata॑nte॒ vṛtha॑ga॒gnaya॑: | | २ | |
यजा॑ नो मि॒त्रावरु॑णा॒ यजा॑ दे॒वाँ२ ऋ॒तं बृ॒हत् ।
अग्ने॒ यक्षि॒ स्वं दम॑म् ।। ३ ।।
yajā॑ no mi॒trāvaru॑ṇā॒ yajā॑ de॒vām̐२ ṛ॒taṃ bṛ॒hat | agne॒ yakṣi॒ svaṃ dama॑m | | ३ | |
यु॒क्ष्वा हि दे॑व॒हूत॑माँ॒२ अश्वाँ॑२ अग्ने र॒थीरि॑व । नि होता॑ पू॒र्व्यः स॑दः ।। ४ ।।
yu॒kṣvā hi de॑va॒hūta॑mām॒̐२ aśvām̐॑२ agne ra॒thīri॑va | ni hotā॑ pū॒rvyaḥ sa॑daḥ | | ४ | |
द्वे विरू॑पे चरत॒: स्वर्थे॑ अ॒न्याऽन्या॑ व॒त्समुप॑ धापयेते ।
हरि॑र॒न्यस्यां॒ भव॑ति स्व॒धावा॑ञ्छु॒क्रो अ॒न्यस्यां॑ ददृशे सु॒वर्चा॑: ।। ५ ।।
dve virū॑pe carata॒: svarthe॑ a॒nyā’nyā॑ va॒tsamupa॑ dhāpayete | hari॑ra॒nyasyāṃ॒ bhava॑ti sva॒dhāvā॑ñchu॒kro a॒nyasyāṃ॑ dadṛśe su॒varcā॑: | | ५ | |
अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्य॑: ।
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॒ वि॒शे-वि॑शे ।। ६ ।।
a॒yami॒ha pra॑tha॒mo dhā॑yi dhā॒tṛbhi॒rhotā॒ yaji॑ṣṭho adhva॒reṣvīḍya॑: | yamapna॑vāno॒ bhṛga॑vo viruru॒curvane॑ṣu ci॒traṃ vi॒bhvaṃ॒ vi॒śe-vi॑śe | | ६ | |
त्रीणि॑ श॒ता त्री स॒हस्रा॑ण्य॒ग्निं त्रि॒ᳪशच्च॑ दे॒वा नव॑ चासपर्यन् ।
औक्ष॑न् घृ॒तैरस्तृ॑णन् ब॒र्हिर॑स्मा॒ आदिद्धोता॑रं॒ न्य॒सादयन्त ।। ७ ।।
trīṇi॑ śa॒tā trī sa॒hasrā॑ṇya॒gniṃ tri॒ᳪśacca॑ de॒vā nava॑ cāsaparyan | aukṣa॑n ghṛ॒tairastṛ॑ṇan ba॒rhira॑smā॒ ādiddhotā॑raṃ॒ nya॒sādayanta | | ७ | |
मू॒र्धानं॑ दि॒वो अ॑र॒तिं पृ॑थि॒व्या वै॑श्वान॒रमृ॒त आ जा॒तम॒ग्निम् ।
क॒विᳪ स॒म्राज॒मति॑थिं॒ जना॑नामा॒सन्ना पात्रं॑ जनयन्त दे॒वाः ।। ८ ।।
mū॒rdhānaṃ॑ di॒vo a॑ra॒tiṃ pṛ॑thi॒vyā vai॑śvāna॒ramṛ॒ta ā jā॒tama॒gnim | ka॒viᳪ sa॒mrāja॒mati॑thiṃ॒ janā॑nāmā॒sannā pātraṃ॑ janayanta de॒vāḥ | | ८ | |
अ॒ग्निर्वृ॒त्राणि॑ जङ्घनद्द्रविण॒स्युर्वि॑प॒न्यया॑ । समि॑द्धः शु॒क्र आहु॑तः ।। ९ ।।
a॒gnirvṛ॒trāṇi॑ jaṅghanaddraviṇa॒syurvi॑pa॒nyayā॑ | sami॑ddhaḥ śu॒kra āhu॑taḥ | | ९ | |
विश्वे॑भिः सो॒म्यं मध्वग्न॒ इन्द्रे॑ण वा॒युना॑ । पिबा॑ मि॒त्रस्य॒ धाम॑भिः ।। १० ।।
viśve॑bhiḥ so॒myaṃ madhvagna॒ indre॑ṇa vā॒yunā॑ | pibā॑ mi॒trasya॒ dhāma॑bhiḥ | | १० | |
आ यदि॒षे नृ॒पतिं॒ तेज॒ आन॒ट् शुचि॒ रेतो॒ निषि॑क्तं॒ द्यौर॒भीके॑ ।
अ॒ग्निः शर्ध॑मनव॒द्यं युवा॑नᳪ स्वा॒ध्यं॒ जनयत् सू॒दय॑च्च ।। ११ ।।
ā yadi॒ṣe nṛ॒patiṃ॒ teja॒ āna॒ṭ śuci॒ reto॒ niṣi॑ktaṃ॒ dyaura॒bhīke॑ | a॒gniḥ śardha॑manava॒dyaṃ yuvā॑naᳪ svā॒dhyaṃ॒ janayat sū॒daya॑cca | | ११ | |
अग्ने॒ शर्ध॑ मह॒ते सौ॑भगाय॒ तव॑ द्यु॒म्नान्यु॑त्त॒मानि॑ सन्तु ।
सं जा॑स्प॒त्यᳪ सु॒यम॒मा कृ॑णुष्व शत्रूय॒ताम॒भि ति॑ष्ठा॒ महा॑ᳪसि ।। १२ ।।
agne॒ śardha॑ maha॒te sau॑bhagāya॒ tava॑ dyu॒mnānyu॑tta॒māni॑ santu | saṃ jā॑spa॒tyaᳪ su॒yama॒mā kṛ॑ṇuṣva śatrūya॒tāma॒bhi ti॑ṣṭhā॒ mahā॑ᳪsi | | १२ | |
त्वाᳪ हि म॒न्द्रत॑ममर्कशो॒कैर्व॑वृ॒महे॒ महि॑ न॒: श्रोष्य॑ग्ने ।
इन्द्रं॒ न त्वा॒ शव॑सा दे॒वता॑ वा॒युं पृ॑णन्ति॒ राध॑सा॒ नृत॑माः ।। १३ ।।
tvāᳪ hi ma॒ndrata॑mamarkaśo॒kairva॑vṛ॒mahe॒ mahi॑ na॒: śroṣya॑gne | indraṃ॒ na tvā॒ śava॑sā de॒vatā॑ vā॒yuṃ pṛ॑ṇanti॒ rādha॑sā॒ nṛta॑māḥ | | १३ | |
त्वे अ॑ग्ने स्वाहुत प्रि॒यास॑: सन्तु सू॒रय॑: ।
य॒न्तारो॒ ये म॒घवा॑नो॒ जना॑नामू॒र्वान् दय॑न्त॒ गोना॑म् ।। १४ ।।
tve a॑gne svāhuta pri॒yāsa॑: santu sū॒raya॑: | ya॒ntāro॒ ye ma॒ghavā॑no॒ janā॑nāmū॒rvān daya॑nta॒ gonā॑m | | १४ | |
श्रु॒धि श्रु॑त्कर्ण॒ वह्नि॑भिर्दे॒वैर॑ग्ने स॒याव॑भिः ।
आ सी॑दन्तु ब॒र्हिषि॑ मि॒त्रो अ॑र्य॒मा प्रा॑त॒र्यावा॑णो अध्व॒रम् ।। १५ ।।
śru॒dhi śru॑tkarṇa॒ vahni॑bhirde॒vaira॑gne sa॒yāva॑bhiḥ | ā sī॑dantu ba॒rhiṣi॑ mi॒tro a॑rya॒mā prā॑ta॒ryāvā॑ṇo adhva॒ram | | १५ | |
विश्वे॑षा॒मदि॑तिर्य॒ज्ञिया॑नां॒ विश्वे॑षा॒मति॑थि॒र्मानु॑षाणाम् ।
अ॒ग्निर्दे॒वाना॒मव॑ आवृणा॒नः सु॑मृडी॒को भ॑वतु जा॒तवे॑दाः ।। १६ ।।
viśve॑ṣā॒madi॑tirya॒jñiyā॑nāṃ॒ viśve॑ṣā॒mati॑thi॒rmānu॑ṣāṇām | a॒gnirde॒vānā॒mava॑ āvṛṇā॒naḥ su॑mṛḍī॒ko bha॑vatu jā॒tave॑dāḥ | | १६ | |
म॒हो अ॒ग्नेः स॑मिधा॒नस्य॒ शर्म॒ण्यना॑गा मि॒त्रे वरु॑णे स्व॒स्तये॑ ।
श्रेष्ठे॑ स्याम सवि॒तुः सवी॑मनि॒ तद्दे॒वाना॒मवो॑ अ॒द्या वृ॑णीमहे ।। १७ ।।
ma॒ho a॒gneḥ sa॑midhā॒nasya॒ śarma॒ṇyanā॑gā mi॒tre varu॑ṇe sva॒staye॑ | śreṣṭhe॑ syāma savi॒tuḥ savī॑mani॒ tadde॒vānā॒mavo॑ a॒dyā vṛ॑ṇīmahe | | १७ | |
आप॑श्चित्पिप्यु स्त॒र्यो न गावो॒ नक्ष॑न्नृ॒तं ज॑रि॒तार॑स्त इन्द्र ।
या॒हि वा॒युर्न नि॒युतो॑ नो॒ अच्छा॒ त्वᳪ हि धी॒भिर्दय॑से॒ वि वाजा॑न् ।। १८ ।।
āpa॑ścitpipyu sta॒ryo na gāvo॒ nakṣa॑nnṛ॒taṃ ja॑ri॒tāra॑sta indra | yā॒hi vā॒yurna ni॒yuto॑ no॒ acchā॒ tvaᳪ hi dhī॒bhirdaya॑se॒ vi vājā॑n | | १८ | |
गाव॒ उपा॑वताव॒तं म॒ही य॒ज्ञस्य॑ र॒प्सुदा॑ । उ॒भा कर्णा॑ हिर॒ण्यया॑ ।। १९ ।।
gāva॒ upā॑vatāva॒taṃ ma॒hī ya॒jñasya॑ ra॒psudā॑ | u॒bhā karṇā॑ hira॒ṇyayā॑ | | १९ | |
यद॒द्य सूर॒ उदि॒तेऽना॑गा मि॒त्रो अ॑र्य॒मा ।
सु॒वाति॑ सवि॒ता भग॑: ।। २० ।।
yada॒dya sūra॒ udi॒te’nā॑gā mi॒tro a॑rya॒mā | su॒vāti॑ savi॒tā bhaga॑: | | २० | |
आ सु॒ते सि॑ञ्चत॒ श्रिय॒ᳪ रोद॑स्योरभि॒श्रिय॑म् । र॒सा द॑धीत वृष॒भम् ।।तं प्र॒त्नथा॒ ऽयं वे॒न: ।। २१ ।।
ā su॒te si॑ñcata॒ śriya॒ᳪ roda॑syorabhi॒śriya॑m | ra॒sā da॑dhīta vṛṣa॒bham | | taṃ pra॒tnathā॒ ’yaṃ ve॒na: | | २१ | |
आ॒तिष्ठ॑न्तं॒ परि॒ विश्वे॑ अभूष॒ञ्छ्रियो॒ वसा॑नश्चरति॒ स्वरो॑चिः ।
म॒हत्तद्वृष्णो॒ असु॑रस्य॒ नामा वि॒श्वरू॑पो अ॒मृता॑नि तस्थौ ।। २२ ।।
ā॒tiṣṭha॑ntaṃ॒ pari॒ viśve॑ abhūṣa॒ñchriyo॒ vasā॑naścarati॒ svaro॑ciḥ | ma॒hattadvṛṣṇo॒ asu॑rasya॒ nāmā vi॒śvarū॑po a॒mṛtā॑ni tasthau | | २२ | |
प्र वो॑ म॒हे मन्द॑माना॒यान्ध॒सोऽर्चा॑ वि॒श्वान॑राय विश्वा॒भुवे॑ ।
इन्द्र॑स्य॒ यस्य॒ सुम॑ख॒ᳪ सहो॒ महि॒ श्रवो॑ नृ॒म्णं च॒ रोद॑सी सप॒र्यत॑: ।। २३ ।।
pra vo॑ ma॒he manda॑mānā॒yāndha॒so’rcā॑ vi॒śvāna॑rāya viśvā॒bhuve॑ | indra॑sya॒ yasya॒ suma॑kha॒ᳪ saho॒ mahi॒ śravo॑ nṛ॒mṇaṃ ca॒ roda॑sī sapa॒ryata॑: | | २३ | |
बृ॒हन्निदि॒ध्म ए॑षां॒ भूरि॑ श॒स्तं पृ॒थुः स्वरु॑: । येषा॒मिन्द्रो॒ युवा॒ सखा॑ ।। २४ ।।
bṛ॒hannidi॒dhma e॑ṣāṃ॒ bhūri॑ śa॒staṃ pṛ॒thuḥ svaru॑: | yeṣā॒mindro॒ yuvā॒ sakhā॑ | | २४ | |
इन्द्रेहि॒ मत्स्यन्ध॑सो॒ विश्वे॑भिः सोम॒पर्व॑भिः ।
म॒हाँ२ अ॑भि॒ष्टिरोज॑सा ।। २५ ।।
indrehi॒ matsyandha॑so॒ viśve॑bhiḥ soma॒parva॑bhiḥ | ma॒hām̐२ a॑bhi॒ṣṭiroja॑sā | | २५ | |
इन्द्रो॑ वृ॒त्रम॑वृणो॒च्छर्ध॑नीति॒: प्र मा॒यिना॑ममिना॒द्वर्प॑णीतिः ।
अह॒न् व्य॒ᳪसमु॒शध॒ग्वने॑ष्वा॒विर्धेना॑ अकृणोद्रा॒म्याणा॑म् ।। २६ ।।
indro॑ vṛ॒trama॑vṛṇo॒cchardha॑nīti॒: pra mā॒yinā॑maminā॒dvarpa॑ṇītiḥ | aha॒n vya॒ᳪsamu॒śadha॒gvane॑ṣvā॒virdhenā॑ akṛṇodrā॒myāṇā॑m | | २६ | |
कुत॒स्त्वमि॑न्द्र॒ माहि॑न॒: सन्नेको॑ यासि सत्पते॒ किं त॑ इ॒त्था ।
सं पृ॑च्छसे समरा॒णः शु॑भा॒नैर्वो॒चेस्तन्नो॑ हरिवो॒ यत्ते॑ अ॒स्मे ।
म॒हाँ२ इन्द्रो॒ य ओज॑सा क॒दा च॒न स्त॒रीर॑सि क॒दा च॒न प्र यु॑च्छसि ।। २७ ।।
kuta॒stvami॑ndra॒ māhi॑na॒: sanneko॑ yāsi satpate॒ kiṃ ta॑ i॒tthā | saṃ pṛ॑cchase samarā॒ṇaḥ śu॑bhā॒nairvo॒cestanno॑ harivo॒ yatte॑ a॒sme | ma॒hām̐२ indro॒ ya oja॑sā ka॒dā ca॒na sta॒rīra॑si ka॒dā ca॒na pra yu॑cchasi | | २७ | |
आ तत्त॑ इन्द्रा॒यव॑: पनन्ता॒भि य ऊ॒र्वं गोम॑न्तं॒ तितृ॑त्सान् ।
स॒कृ॒त्स्वं ये पु॑रुपु॒त्रां म॒हीᳪ स॒हस्र॑धारां बृह॒तीं दुदु॑क्षन् ।। २८ ।।
ā tatta॑ indrā॒yava॑: panantā॒bhi ya ū॒rvaṃ goma॑ntaṃ॒ titṛ॑tsān | sa॒kṛ॒tsvaṃ ye pu॑rupu॒trāṃ ma॒hīᳪ sa॒hasra॑dhārāṃ bṛha॒tīṃ dudu॑kṣan | | २८ | |
इ॒मां ते॒ धियं॒ प्र भ॑रे म॒हो म॒हीम॒स्य स्तो॒त्रे धि॒षणा॒ यत्त॑ आन॒जे ।
तमु॑त्स॒वे च॑ प्रस॒वे च॑ सास॒हिमिन्द्रं॑ दे॒वास॒: शव॑सामद॒न्ननु॑ ।। २९ ।।
i॒māṃ te॒ dhiyaṃ॒ pra bha॑re ma॒ho ma॒hīma॒sya sto॒tre dhi॒ṣaṇā॒ yatta॑ āna॒je | tamu॑tsa॒ve ca॑ prasa॒ve ca॑ sāsa॒himindraṃ॑ de॒vāsa॒: śava॑sāmada॒nnanu॑ | | २९ | |
वि॒भ्राड् बृ॒हत्पि॑बतु सो॒म्यं मध्वायु॒र्दध॑द्य॒ज्ञप॑ता॒ववि॑ह्रुतम् ।
वात॑जूतो॒ यो अ॑भि॒रक्ष॑ति॒ त्मना॑ प्र॒जाः पु॑पोष पुरु॒धा वि रा॑जति ।। ३० ।।
vi॒bhrāḍ bṛ॒hatpi॑batu so॒myaṃ madhvāyu॒rdadha॑dya॒jñapa॑tā॒vavi॑hrutam | vāta॑jūto॒ yo a॑bhi॒rakṣa॑ti॒ tmanā॑ pra॒jāḥ pu॑poṣa puru॒dhā vi rā॑jati | | ३० | |
उदु॒ त्यं जा॒तवे॑दसं दे॒वं व॑हन्ति के॒तव॑: । दृ॒शे विश्वा॑य॒ सूर्य॑म् ।। ३१ ।।
udu॒ tyaṃ jā॒tave॑dasaṃ de॒vaṃ va॑hanti ke॒tava॑: | dṛ॒śe viśvā॑ya॒ sūrya॑m | | ३१ | |
येना॑ पावक॒ चक्ष॑सा भुर॒ण्यन्तं॒ जनाँ॒२ अनु॑ । त्वं व॑रुण॒ पश्य॑सि ।। ३२ ।।
yenā॑ pāvaka॒ cakṣa॑sā bhura॒ṇyantaṃ॒ janām॒̐२ anu॑ | tvaṃ va॑ruṇa॒ paśya॑si | | ३२ | |
दैव्या॑वध्वर्यू॒ आ ग॑त॒ᳪ रथे॑न॒ सूर्य॑त्वचा । मध्वा॑ य॒ज्ञᳪ सम॑ञ्जाथे ।
तं प्र॒त्नथा॒ ऽयं वे॒नश्चि॒त्रं दे॒वाना॑म् ।। ३३ ।।
daivyā॑vadhvaryū॒ ā ga॑ta॒ᳪ rathe॑na॒ sūrya॑tvacā | madhvā॑ ya॒jñaᳪ sama॑ñjāthe | taṃ pra॒tnathā॒ ’yaṃ ve॒naści॒traṃ de॒vānā॑m | | ३३ | |
आ न॒ इडा॑भिर्वि॒दथे॑ सुश॒स्ति वि॒श्वान॑रः सवि॒ता दे॒व ए॑तु ।
अपि॒ यथा॑ युवानो॒ मत्स॑था नो॒ विश्वं॒ जग॑दभिपि॒त्वे म॑नी॒षा ।। ३४ ।।
ā na॒ iḍā॑bhirvi॒dathe॑ suśa॒sti vi॒śvāna॑raḥ savi॒tā de॒va e॑tu | api॒ yathā॑ yuvāno॒ matsa॑thā no॒ viśvaṃ॒ jaga॑dabhipi॒tve ma॑nī॒ṣā | | ३४ | |
यद॒द्य कच्च॑ वृत्रहन्नु॒दगा॑ अ॒भि सू॑र्य । सर्वं॒ तदि॑न्द्र ते॒ वशे॑ ।। ३५ ।।
yada॒dya kacca॑ vṛtrahannu॒dagā॑ a॒bhi sū॑rya | sarvaṃ॒ tadi॑ndra te॒ vaśe॑ | | ३५ | |
त॒रणि॑र्वि॒श्वद॑र्शतो ज्योति॒ष्कृद॑सि सूर्य । विश्व॒मा भा॑सि रोच॒नम् ।। ३६ ।।
ta॒raṇi॑rvi॒śvada॑rśato jyoti॒ṣkṛda॑si sūrya | viśva॒mā bhā॑si roca॒nam | | ३६ | |
तत्सूर्य॑स्य देव॒त्वं तन्म॑हि॒त्वं म॒ध्या कर्तो॒र्वित॑त॒ᳪ सं ज॑भार ।
य॒देदयु॑क्त ह॒रित॑: स॒धस्था॒दाद्रात्री॒ वास॑स्तनुते सि॒मस्मै॑ ।। ३७ ।।
tatsūrya॑sya deva॒tvaṃ tanma॑hi॒tvaṃ ma॒dhyā karto॒rvita॑ta॒ᳪ saṃ ja॑bhāra | ya॒dedayu॑kta ha॒rita॑: sa॒dhasthā॒dādrātrī॒ vāsa॑stanute si॒masmai॑ | | ३७ | |
तन्मि॒त्रस्य॒ वरु॑णस्याभि॒चक्षे॒ सूर्यो॑ रू॒पं कृ॑णुते॒ द्योरु॒पस्थे॑ ।
अ॒न॒न्तम॒न्यद्रुश॑दस्य॒ पाज॑: कृ॒ष्णम॒न्यद्ध॒रित॒: सं भ॑रन्ति ।। ३८ ।।
tanmi॒trasya॒ varu॑ṇasyābhi॒cakṣe॒ sūryo॑ rū॒paṃ kṛ॑ṇute॒ dyoru॒pasthe॑ | a॒na॒ntama॒nyadruśa॑dasya॒ pāja॑: kṛ॒ṣṇama॒nyaddha॒rita॒: saṃ bha॑ranti | | ३८ | |
बण्म॒हाँ२ अ॑सि सूर्य॒ बडा॑दित्य म॒हाँ२ अ॑सि ।
म॒हस्ते॑ स॒तो म॑हि॒मा प॑नस्यते॒ऽद्धा दे॑व म॒हाँ२ अ॑सि ।। ३९ ।।
baṇma॒hām̐२ a॑si sūrya॒ baḍā॑ditya ma॒hām̐२ a॑si | ma॒haste॑ sa॒to ma॑hi॒mā pa॑nasyate॒’ddhā de॑va ma॒hām̐२ a॑si | | ३९ | |
बट् सू॑र्य॒ श्रव॑सा म॒हाँ२ अ॑सि स॒त्रा दे॑व म॒हाँ२ अ॑सि ।
म॒ह्ना दे॒वाना॑मसु॒र्य॒: पु॒रोहि॑तो वि॒भु ज्योति॒रदा॑भ्यम् ।। ४० ।।
baṭ sū॑rya॒ śrava॑sā ma॒hām̐२ a॑si sa॒trā de॑va ma॒hām̐२ a॑si | ma॒hnā de॒vānā॑masu॒rya॒: pu॒rohi॑to vi॒bhu jyoti॒radā॑bhyam | | ४० | |
श्राय॑न्त इव॒ सूर्यं॒ विश्वेदिन्द्र॑स्य भक्षत ।
वसू॑नि जा॒ते जन॑मान॒ ओज॑सा॒ प्रति॑ भा॒गं न दी॑धिम ।। ४१ ।।
śrāya॑nta iva॒ sūryaṃ॒ viśvedindra॑sya bhakṣata | vasū॑ni jā॒te jana॑māna॒ oja॑sā॒ prati॑ bhā॒gaṃ na dī॑dhima | | ४१ | |
अ॒द्या दे॑वा॒ उदि॑ता॒ सूर्य॑स्य॒ निरᳪह॑सः पिपृ॒ता निर॑व॒द्यात् ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौ: ।। ४२ ।।
a॒dyā de॑vā॒ udi॑tā॒ sūrya॑sya॒ niraᳪha॑saḥ pipṛ॒tā nira॑va॒dyāt | tanno॑ mi॒tro varu॑ṇo māmahantā॒madi॑ti॒: sindhu॑: pṛthi॒vī u॒ta dyau: | | ४२ | |
आ कृ॒ष्णेन॒ रज॑सा॒ वर्त॑मानो निवे॒शय॑न्न॒मृतं॒ मर्त्यं॑ च ।
हि॒र॒ण्यये॑न सवि॒ता रथे॒ना दे॒वो या॑ति॒ भुव॑नानि॒ पश्य॑न् ।। ४३ ।।
ā kṛ॒ṣṇena॒ raja॑sā॒ varta॑māno nive॒śaya॑nna॒mṛtaṃ॒ martyaṃ॑ ca | hi॒ra॒ṇyaye॑na savi॒tā rathe॒nā de॒vo yā॑ti॒ bhuva॑nāni॒ paśya॑n | | ४३ | |
प्र वा॑वृजे सुप्र॒या ब॒र्हिरे॑षा॒मा वि॒श्पती॑व॒ व्वीरि॑ट इयाते ।
वि॒शाम॒क्तोरु॒षस॑: पू॒र्वहू॑तौ वा॒युः पू॒षा स्व॒स्तये॑ नि॒युत्वा॑न् ।। ४४ ।।
pra vā॑vṛje supra॒yā ba॒rhire॑ṣā॒mā vi॒śpatī॑va॒ vvīri॑ṭa iyāte | vi॒śāma॒ktoru॒ṣasa॑: pū॒rvahū॑tau vā॒yuḥ pū॒ṣā sva॒staye॑ ni॒yutvā॑n | | ४४ | |
इ॒न्द्र॒वा॒यू बृह॒स्पतिं॑ मि॒त्राग्निं पू॒षणं भग॑म् । आ॒दि॒त्यान् मारु॑तं ग॒णम् ।। ४५ ।।
i॒ndra॒vā॒yū bṛha॒spatiṃ॑ mi॒trāgniṃ pū॒ṣaṇaṃ bhaga॑m | ā॒di॒tyān māru॑taṃ ga॒ṇam | | ४५ | |
वरु॑णः प्रावि॒ता भु॑वन्मि॒त्रो विश्वा॑भिरू॒तिभि॑: । कर॑तां नः सु॒राध॑सः ।। ४६ ।।
varu॑ṇaḥ prāvi॒tā bhu॑vanmi॒tro viśvā॑bhirū॒tibhi॑: | kara॑tāṃ naḥ su॒rādha॑saḥ | | ४६ | |
अधि॑ न इन्द्रैषां॒ विष्णो॑ सजा॒त्या॒नाम् । इ॒ता मरु॑तो॒ अश्वि॑ना ।
तं प्र॒त्नथा॒ ऽयं वे॒नो ये दे॑वास॒ आ न॒ इडा॑भि॒र्विश्वे॑भिः सो॒म्यं मध्वोमा॑सश्चर्षणीधृतः ।। ४७ ।।
adhi॑ na indraiṣāṃ॒ viṣṇo॑ sajā॒tyā॒nām | i॒tā maru॑to॒ aśvi॑nā | taṃ pra॒tnathā॒ ’yaṃ ve॒no ye de॑vāsa॒ ā na॒ iḍā॑bhi॒rviśve॑bhiḥ so॒myaṃ madhvomā॑saścarṣaṇīdhṛtaḥ | | ४७ | |
अग्न॒ इन्द्र॒ वरु॑ण॒ मित्र॒ देवा॒: शर्ध॒: प्र य॑न्त॒ मारु॑तो॒त वि॑ष्णो ।
उ॒भा नास॑त्या रु॒द्रो अध॒ ग्नाः पू॒षा भग॒: सर॑स्वती जुषन्त ।। ४८ ।।
agna॒ indra॒ varu॑ṇa॒ mitra॒ devā॒: śardha॒: pra ya॑nta॒ māru॑to॒ta vi॑ṣṇo | u॒bhā nāsa॑tyā ru॒dro adha॒ gnāḥ pū॒ṣā bhaga॒: sara॑svatī juṣanta | | ४८ | |
इ॒न्द्रा॒ग्नी मि॒त्रावरु॒णादि॑ति॒ᳪ स्व॑: पृथि॒वीं द्यां म॒रुत॒: पर्व॑ताँ२ अ॒पः ।
हु॒वे विष्णुं॑ पू॒षणं॒ ब्रह्म॑ण॒स्पतिं॒ भगं॒ नु शᳪस॑ᳪ सवि॒तार॑मू॒तये॑ ।। ४९ ।।
i॒ndrā॒gnī mi॒trāvaru॒ṇādi॑ti॒ᳪ sva॑: pṛthi॒vīṃ dyāṃ ma॒ruta॒: parva॑tām̐२ a॒paḥ | hu॒ve viṣṇuṃ॑ pū॒ṣaṇaṃ॒ brahma॑ṇa॒spatiṃ॒ bhagaṃ॒ nu śaᳪsa॑ᳪ savi॒tāra॑mū॒taye॑ | | ४९ | |
अ॒स्मे रु॒द्रा मे॒हना॒ पर्व॑तासो वृत्र॒हत्ये॒ भर॑हूतौ स॒जोषा॑: ।
यः शᳪस॑ते स्तुव॒ते धायि॑ प॒ज्र इन्द्र॑ज्येष्ठा अ॒स्माँ२ अ॑वन्तु दे॒वाः ।। ५० ।।
a॒sme ru॒drā me॒hanā॒ parva॑tāso vṛtra॒hatye॒ bhara॑hūtau sa॒joṣā॑: | yaḥ śaᳪsa॑te stuva॒te dhāyi॑ pa॒jra indra॑jyeṣṭhā a॒smām̐२ a॑vantu de॒vāḥ | | ५० | |
अ॒र्वाञ्चो॑ अ॒द्या भ॑वता यजत्रा॒ आ वो॒ हार्दि॒ भय॑मानो व्ययेयम् ।
त्राध्वं॑ नो देवा नि॒जुरो॒ वृक॑स्य॒ त्राध्वं॑ क॒र्ताद॑व॒पदो॑ यजत्राः ।। ५१ ।।
a॒rvāñco॑ a॒dyā bha॑vatā yajatrā॒ ā vo॒ hārdi॒ bhaya॑māno vyayeyam | trādhvaṃ॑ no devā ni॒juro॒ vṛka॑sya॒ trādhvaṃ॑ ka॒rtāda॑va॒pado॑ yajatrāḥ | | ५१ | |
विश्वे॑ अ॒द्य म॒रुतो॒ विश्व॑ ऊ॒ती विश्वे॑ भवन्त्व॒ग्नय॒: समि॑द्धाः ।
विश्वे॑ नो दे॒वा अव॒सा ग॑मन्तु॒ विश्व॑मस्तु॒ द्रवि॑णं॒ वाजो॑ अ॒स्मे ।। ५२ ।।
viśve॑ a॒dya ma॒ruto॒ viśva॑ ū॒tī viśve॑ bhavantva॒gnaya॒: sami॑ddhāḥ | viśve॑ no de॒vā ava॒sā ga॑mantu॒ viśva॑mastu॒ dravi॑ṇaṃ॒ vājo॑ a॒sme | | ५२ | |
विश्वे॑ देवाः शृणु॒तेमᳪ हवं॑ मे॒ ये अ॒न्तरि॑क्षे॒ य उप॒ द्यवि॒ ष्ठ ।
ये अ॑ग्निजि॒ह्वा उ॒त वा॒ यज॑त्रा आ॒सद्या॒स्मिन्ब॒र्हिषि॑ मादयध्वम् ।। ५३ ।।
viśve॑ devāḥ śṛṇu॒temaᳪ havaṃ॑ me॒ ye a॒ntari॑kṣe॒ ya upa॒ dyavi॒ ṣṭha | ye a॑gniji॒hvā u॒ta vā॒ yaja॑trā ā॒sadyā॒sminba॒rhiṣi॑ mādayadhvam | | ५३ | |
दे॒वेभ्यो॒ हि प्र॑थ॒मं य॒ज्ञिये॑भ्योऽमृत॒त्वᳪ सु॒वसि॑ भा॒गमु॑त्त॒मम् ।
आदिद्दा॒मान॑ᳪ सवित॒र्व्यू॒र्णुषेऽनूची॒ना जी॑वि॒ता मानु॑षेभ्यः ।। ५४ ।।
de॒vebhyo॒ hi pra॑tha॒maṃ ya॒jñiye॑bhyo’mṛta॒tvaᳪ su॒vasi॑ bhā॒gamu॑tta॒mam | ādiddā॒māna॑ᳪ savita॒rvyū॒rṇuṣe’nūcī॒nā jī॑vi॒tā mānu॑ṣebhyaḥ | | ५४ | |
प्र वा॒युमच्छा॑ बृह॒ती म॑नी॒षा बृ॒हद्र॑यिं वि॒श्ववा॑रᳪ रथ॒प्राम् ।
द्यु॒तद्या॑मा नि॒युत॒: पत्य॑मानः क॒विः क॒विमि॑यक्षसि प्रयज्यो ।। ५५ ।।
pra vā॒yumacchā॑ bṛha॒tī ma॑nī॒ṣā bṛ॒hadra॑yiṃ vi॒śvavā॑raᳪ ratha॒prām | dyu॒tadyā॑mā ni॒yuta॒: patya॑mānaḥ ka॒viḥ ka॒vimi॑yakṣasi prayajyo | | ५५ | |
इन्द्र॑वायू इ॒मे सु॒ता उप॒ प्रयो॑भि॒रा ग॑तम् । इन्द॑वो वामु॒शन्ति॒ हि ।। ५६ ।।
indra॑vāyū i॒me su॒tā upa॒ prayo॑bhi॒rā ga॑tam | inda॑vo vāmu॒śanti॒ hi | | ५६ | |
मि॒त्रᳪ हु॑वे पू॒तद॑क्षं॒ वरु॑णं च रि॒शाद॑सम् । धियं॑ घृ॒ताची॒ᳪ साध॑न्ता ।। ५७ ।।
mi॒traᳪ hu॑ve pū॒tada॑kṣaṃ॒ varu॑ṇaṃ ca ri॒śāda॑sam | dhiyaṃ॑ ghṛ॒tācī॒ᳪ sādha॑ntā | | ५७ | |
दस्रा॑ यु॒वाक॑वः सु॒ता नास॑त्या वृ॒क्तब॑र्हिषः । आ या॑तᳪ रुद्रवर्तनी ।। तं प्र॒त्नथा॒ ऽयं वे॒नः ।। ५ ८ ।।
वि॒दद्यदी॑ स॒रमा॑ रु॒ग्णमद्रे॒र्महि॒ पाथ॑: पू॒र्व्यᳪ स॒ध्र्य॒क्कः ।
अग्रं॑ नयत्सु॒पद्यक्ष॑राणा॒मच्छा॒ रवं॑ प्रथ॒मा जा॑न॒ती गा॑त् ।। ५९ ।।
dasrā॑ yu॒vāka॑vaḥ su॒tā nāsa॑tyā vṛ॒ktaba॑rhiṣaḥ | ā yā॑taᳪ rudravartanī | | taṃ pra॒tnathā॒ ’yaṃ ve॒naḥ | | ५ ८ | | vi॒dadyadī॑ sa॒ramā॑ ru॒gṇamadre॒rmahi॒ pātha॑: pū॒rvyaᳪ sa॒dhrya॒kkaḥ | agraṃ॑ nayatsu॒padyakṣa॑rāṇā॒macchā॒ ravaṃ॑ pratha॒mā jā॑na॒tī gā॑t | | ५९ | |
न॒हि स्पश॒मवि॑दन्न॒न्यम॒स्माद्वै॑श्वान॒रात्पु॑र ए॒तार॑म॒ग्नेः ।
एमे॑नमवृधन्न॒मृता॒ अम॑र्त्यं वैश्वान॒रं क्षै॑त्रजित्याय दे॒वाः ।। ६० ।।
na॒hi spaśa॒mavi॑danna॒nyama॒smādvai॑śvāna॒rātpu॑ra e॒tāra॑ma॒gneḥ | eme॑namavṛdhanna॒mṛtā॒ ama॑rtyaṃ vaiśvāna॒raṃ kṣai॑trajityāya de॒vāḥ | | ६० | |
उ॒ग्रा वि॑घ॒निना॒ मृध॑ इन्द्रा॒ग्नी ह॑वामहे । ता नो॑ मृडात ई॒दृशे॑ ।। ६१ ।।
u॒grā vi॑gha॒ninā॒ mṛdha॑ indrā॒gnī ha॑vāmahe | tā no॑ mṛḍāta ī॒dṛśe॑ | | ६१ | |
उपा॑स्मै गायता नर॒: पव॑माना॒येन्द॑वे । अ॒भि दे॒वाँ२ इय॑क्षते ।। ६२ ।।
upā॑smai gāyatā nara॒: pava॑mānā॒yenda॑ve | a॒bhi de॒vām̐२ iya॑kṣate | | ६२ | |
ये त्वा॑ऽहि॒हत्ये॑ मघव॒न्नव॑र्ध॒न्ये शा॑म्ब॒रे ह॑रिवो॒ ये गवि॑ष्टौ ।
ये त्वा॑ नू॒नम॑नु॒मद॑न्ति॒ विप्रा॒: पिबे॑न्द्र॒ सोम॒ᳪ सग॑णो म॒रुद्भि॑: ।। ६३ ।।
ye tvā॑’hi॒hatye॑ maghava॒nnava॑rdha॒nye śā॑mba॒re ha॑rivo॒ ye gavi॑ṣṭau | ye tvā॑ nū॒nama॑nu॒mada॑nti॒ viprā॒: pibe॑ndra॒ soma॒ᳪ saga॑ṇo ma॒rudbhi॑: | | ६३ | |
जनि॑ष्ठा उ॒ग्रः सह॑से तु॒राय॑ म॒न्द्र ओजि॑ष्ठो बहु॒लाभि॑मानः ।
अव॑र्ध॒न्निन्द्रं॑ म॒रुत॑श्चि॒दत्र॑ मा॒ता यद्वी॒रं द॒धन॒द्धनि॑ष्ठा ।। ६४ ।।
jani॑ṣṭhā u॒graḥ saha॑se tu॒rāya॑ ma॒ndra oji॑ṣṭho bahu॒lābhi॑mānaḥ | ava॑rdha॒nnindraṃ॑ ma॒ruta॑ści॒datra॑ mā॒tā yadvī॒raṃ da॒dhana॒ddhani॑ṣṭhā | | ६४ | |
आ तू न॑ इन्द्र वृत्रहन्न॒स्माक॑म॒र्धमा ग॑हि । म॒हान्म॒हीभि॑रू॒तिभि॑: ।। ६५ ।।
ā tū na॑ indra vṛtrahanna॒smāka॑ma॒rdhamā ga॑hi | ma॒hānma॒hībhi॑rū॒tibhi॑: | | ६५ | |
त्वमि॑न्द्र॒ प्रतू॑र्तिष्व॒भि विश्वा॑ असि॒ स्पृध॑: ।
अ॒श॒स्ति॒हा ज॑नि॒ता वि॑श्व॒तूर॑सि॒ त्वं तू॑र्य तरुष्य॒तः ।। ६६ ।।
tvami॑ndra॒ pratū॑rtiṣva॒bhi viśvā॑ asi॒ spṛdha॑: | a॒śa॒sti॒hā ja॑ni॒tā vi॑śva॒tūra॑si॒ tvaṃ tū॑rya taruṣya॒taḥ | | ६६ | |
अनु॑ ते॒ शुष्मं॑ तु॒रय॑न्तमीयतुः क्षो॒णी शिशुं॒ न मा॒तरा॑ ।
विश्वा॑स्ते॒ स्पृध॑: श्नथयन्त म॒न्यवे॑ वृ॒त्रं यदि॑न्द्र॒ तूर्व॑सि ।। ६७ ।।
anu॑ te॒ śuṣmaṃ॑ tu॒raya॑ntamīyatuḥ kṣo॒ṇī śiśuṃ॒ na mā॒tarā॑ | viśvā॑ste॒ spṛdha॑: śnathayanta ma॒nyave॑ vṛ॒traṃ yadi॑ndra॒ tūrva॑si | | ६७ | |
य॒ज्ञो दे॒वानां॒ प्रत्ये॑ति सु॒म्नमादि॑त्यासो॒ भव॑ता मृड॒यन्त॑: ।
आ वो॒ऽर्वाची॑ सुम॒तिर्व॑वृत्याद॒ᳪहो॑श्चि॒द्या व॑रिवो॒वित्त॒रास॑त् ।। ६८ ।।
ya॒jño de॒vānāṃ॒ pratye॑ti su॒mnamādi॑tyāso॒ bhava॑tā mṛḍa॒yanta॑: | ā vo॒’rvācī॑ suma॒tirva॑vṛtyāda॒ᳪho॑ści॒dyā va॑rivo॒vitta॒rāsa॑t | | ६८ | |
अद॑ब्धेभिः सवितः पा॒युभि॒ष्ट्वᳪ शि॒वेभि॑र॒द्य परि॑ पाहि नो॒ गय॑म् ।
हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घश॑ᳪस ईशत ।। ६९ ।।
ada॑bdhebhiḥ savitaḥ pā॒yubhi॒ṣṭvaᳪ śi॒vebhi॑ra॒dya pari॑ pāhi no॒ gaya॑m | hira॑ṇyajihvaḥ suvi॒tāya॒ navya॑se॒ rakṣā॒ māki॑rno a॒ghaśa॑ᳪsa īśata | | ६९ | |
प्र वी॑र॒या शुच॑यो दद्रिरे वामध्व॒र्युभि॒र्मधु॑मन्तः सु॒तास॑: ।
वह॑ वायो नि॒युतो॑ या॒ह्यच्छा॒ पिबा॑ सु॒तस्यान्ध॑सो॒ मदा॑य ।। ७० ।।
pra vī॑ra॒yā śuca॑yo dadrire vāmadhva॒ryubhi॒rmadhu॑mantaḥ su॒tāsa॑: | vaha॑ vāyo ni॒yuto॑ yā॒hyacchā॒ pibā॑ su॒tasyāndha॑so॒ madā॑ya | | ७० | |
गाव॒ उपा॑वताव॒तं म॒ही य॒ज्ञस्य॑ र॒प्सुदा॑ । उ॒भा कर्णा॑ हिर॒ण्यया॑ ।। ७१ ।।
gāva॒ upā॑vatāva॒taṃ ma॒hī ya॒jñasya॑ ra॒psudā॑ | u॒bhā karṇā॑ hira॒ṇyayā॑ | | ७१ | |
काव्य॑योरा॒जाने॑षु॒ क्रत्वा॒ दक्ष॑स्य दुरो॒णे । रि॒शाद॑सा स॒धस्थ॒ आ ।। ७२ ।।
kāvya॑yorā॒jāne॑ṣu॒ kratvā॒ dakṣa॑sya duro॒ṇe | ri॒śāda॑sā sa॒dhastha॒ ā | | ७२ | |
दै॑व्यावध्वर्यू॒ आ ग॑त॒ᳪ रथे॑न॒ सूर्य॑त्वचा । मध्वा॑ य॒ज्ञᳪ सम॑ञ्जाथे ।
तं प्र॒त्नथा॒ ऽयं वे॒नः ।। ७३ ।।
dai॑vyāvadhvaryū॒ ā ga॑ta॒ᳪ rathe॑na॒ sūrya॑tvacā | madhvā॑ ya॒jñaᳪ sama॑ñjāthe | taṃ pra॒tnathā॒ ’yaṃ ve॒naḥ | | ७३ | |
ति॒र॒श्चीनो॒ वित॑तो र॒श्मिरे॑षाम॒धः स्वि॑दा॒सी३दु॒परि॑ स्विदासी३त् ।
रे॒तो॒धा आ॑सन्महि॒मान॑ आसन्त्स्व॒धा अ॒वस्ता॒त्प्रय॑तिः प॒रस्ता॑त् ।। ७४ ।।
ti॒ra॒ścīno॒ vita॑to ra॒śmire॑ṣāma॒dhaḥ svi॑dā॒sī३du॒pari॑ svidāsī३t | re॒to॒dhā ā॑sanmahi॒māna॑ āsantsva॒dhā a॒vastā॒tpraya॑tiḥ pa॒rastā॑t | | ७४ | |
आ रोद॑सी अपृण॒दा स्व॑र्म॒हज्जा॒तं यदे॑नम॒पसो॒ अधा॑रयन् ।
सो अ॑ध्व॒राय॒ परि॑ णीयते क॒विरत्यो॒ न वाज॑सातये॒ चनो॑हितः ।। ७५ ।।
ā roda॑sī apṛṇa॒dā sva॑rma॒hajjā॒taṃ yade॑nama॒paso॒ adhā॑rayan | so a॑dhva॒rāya॒ pari॑ ṇīyate ka॒viratyo॒ na vāja॑sātaye॒ cano॑hitaḥ | | ७५ | |
उ॒क्थेभि॑र्वृत्र॒हन्त॑मा॒ या म॑न्दा॒ना चि॒दा गि॒रा । आ॒ङ्गू॒षैरा॒विवा॑सतः ।। ७६ ।।
u॒kthebhi॑rvṛtra॒hanta॑mā॒ yā ma॑ndā॒nā ci॒dā gi॒rā | ā॒ṅgū॒ṣairā॒vivā॑sataḥ | | ७६ | |
उप॑ नः सू॒नवो॒ गिर॑: शृ॒ण्वन्त्व॒मृत॑स्य॒ ये । सु॒मृ॒डी॒का भ॑वन्तु नः ।। ७७ ।।
upa॑ naḥ sū॒navo॒ gira॑: śṛ॒ṇvantva॒mṛta॑sya॒ ye | su॒mṛ॒ḍī॒kā bha॑vantu naḥ | | ७७ | |
ब्रह्मा॑णि मे म॒तय॒: शᳪ सु॒तास॒: शुष्म॑ इयर्ति॒ प्रभृ॑तो मे॒ अद्रि॑: ।
आ शा॑सते॒ प्रति॑ हर्यन्त्यु॒क्थेमा हरी॑ वहत॒स्ता नो॒ अच्छ॑ ।। ७८ ।।
brahmā॑ṇi me ma॒taya॒: śaᳪ su॒tāsa॒: śuṣma॑ iyarti॒ prabhṛ॑to me॒ adri॑: | ā śā॑sate॒ prati॑ haryantyu॒kthemā harī॑ vahata॒stā no॒ accha॑ | | ७८ | |
अनु॑त्त॒मा ते॑ मघव॒न्नकि॒र्नु न त्वावाँ॑२ अस्ति दे॒वता॒ विदा॑नः ।
न जाय॑मानो॒ नश॑ते॒ न जा॒तो यानि॑ करि॒ष्या कृ॑णु॒हि प्र॑वृद्ध ।। ७९ ।।
anu॑tta॒mā te॑ maghava॒nnaki॒rnu na tvāvām̐॑२ asti de॒vatā॒ vidā॑naḥ | na jāya॑māno॒ naśa॑te॒ na jā॒to yāni॑ kari॒ṣyā kṛ॑ṇu॒hi pra॑vṛddha | | ७९ | |
तदिदा॑स॒ भुव॑नेषु॒ ज्येष्ठं॒ यतो॑ ज॒ज्ञ उ॒ग्रस्त्वे॒षनृ॑म्णः ।
स॒द्यो ज॑ज्ञा॒नो नि रि॑णाति॒ शत्रू॒ननु॒ यं विश्वे॒ मद॒न्त्यूमा॑: ।। ८० ।।
tadidā॑sa॒ bhuva॑neṣu॒ jyeṣṭhaṃ॒ yato॑ ja॒jña u॒grastve॒ṣanṛ॑mṇaḥ | sa॒dyo ja॑jñā॒no ni ri॑ṇāti॒ śatrū॒nanu॒ yaṃ viśve॒ mada॒ntyūmā॑: | | ८० | |
इ॒मा उ॑ त्वा पुरूवसो॒ गिरो॑ वर्धन्तु॒ या मम॑ ।
पा॒व॒कव॑र्णा॒: शुच॑यो विप॒श्चितो॒ऽभि स्तोमै॑रनूषत ।। ८१ ।।
i॒mā u॑ tvā purūvaso॒ giro॑ vardhantu॒ yā mama॑ | pā॒va॒kava॑rṇā॒: śuca॑yo vipa॒ścito॒’bhi stomai॑ranūṣata | | ८१ | |
यस्या॒यं विश्व॒ आर्यो॒ दास॑: शेवधि॒पा अ॒रिः ।
ति॒रश्चि॑द॒र्ये रु॒शमे॒ पवी॑रवि॒ तुभ्येत्सो अ॑ज्यते र॒यिः ।। ८२ ।।
yasyā॒yaṃ viśva॒ āryo॒ dāsa॑: śevadhi॒pā a॒riḥ | ti॒raści॑da॒rye ru॒śame॒ pavī॑ravi॒ tubhyetso a॑jyate ra॒yiḥ | | ८२ | |
अ॒यᳪ स॒हस्र॒मृषि॑भि॒: सह॑स्कृतः समु॒द्र इ॑व पप्रथे ।
स॒त्यः सो अ॑स्य महि॒मा गृ॑णे॒ शवो॑ य॒ज्ञेषु॑ विप्र॒राज्ये॑ ।। ८३ ।।
a॒yaᳪ sa॒hasra॒mṛṣi॑bhi॒: saha॑skṛtaḥ samu॒dra i॑va paprathe | sa॒tyaḥ so a॑sya mahi॒mā gṛ॑ṇe॒ śavo॑ ya॒jñeṣu॑ vipra॒rājye॑ | | ८३ | |
अद॑ब्धेभिः सवितः पा॒युभि॒ष्ट्वᳪ शि॒वेभि॑र॒द्य परि॑ पाहि नो॒ गय॑म् ।
हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घश॑ᳪस ईशत ।। ८४ ।।
ada॑bdhebhiḥ savitaḥ pā॒yubhi॒ṣṭvaᳪ śi॒vebhi॑ra॒dya pari॑ pāhi no॒ gaya॑m | hira॑ṇyajihvaḥ suvi॒tāya॒ navya॑se॒ rakṣā॒ māki॑rno a॒ghaśa॑ᳪsa īśata | | ८४ | |
आ नो॑ य॒ज्ञं दि॑वि॒स्पृशं॒ वायो॑ या॒हि सु॒मन्म॑भिः ।
अ॒न्तः प॒वित्र॑ उ॒परि॑ श्रीणा॒नोऽयᳪ शु॒क्रो अ॑यामि ते ।। ८५ ।।
ā no॑ ya॒jñaṃ di॑vi॒spṛśaṃ॒ vāyo॑ yā॒hi su॒manma॑bhiḥ | a॒ntaḥ pa॒vitra॑ u॒pari॑ śrīṇā॒no’yaᳪ śu॒kro a॑yāmi te | | ८५ | |
इ॒न्द्र॒वा॒यू सु॑स॒न्दृशा॑ सु॒हवे॒ह ह॑वामहे ।
यथा॑ न॒: सर्व॒ इज्जनो॑ऽनमी॒वः स॒ङ्गमे॑ सु॒मना॒ अस॑त् ।। ८६ ।।
i॒ndra॒vā॒yū su॑sa॒ndṛśā॑ su॒have॒ha ha॑vāmahe | yathā॑ na॒: sarva॒ ijjano॑’namī॒vaḥ sa॒ṅgame॑ su॒manā॒ asa॑t | | ८६ | |
ऋध॑गि॒त्था स मर्त्य॑: शश॒मे दे॒वता॑तये ।
यो नू॒नं मि॒त्रावरु॑णाव॒भिष्ट॑य आच॒क्रे ह॒व्यदा॑तये ।। ८७ ।।
ṛdha॑gi॒tthā sa martya॑: śaśa॒me de॒vatā॑taye | yo nū॒naṃ mi॒trāvaru॑ṇāva॒bhiṣṭa॑ya āca॒kre ha॒vyadā॑taye | | ८७ | |
आ या॑त॒मुप॑ भूषतं॒ मध्व॑: पिबतमश्विना ।
दु॒ग्धं पयो॑ वृषणा जेन्यावसू॒ मा नो॑ मर्धिष्ट॒मा ग॑तम् ।। ८८ ।।
ā yā॑ta॒mupa॑ bhūṣataṃ॒ madhva॑: pibatamaśvinā | du॒gdhaṃ payo॑ vṛṣaṇā jenyāvasū॒ mā no॑ mardhiṣṭa॒mā ga॑tam | | ८८ | |
प्रैतु॒ ब्रह्म॑ण॒स्पति॒: प्र दे॒व्ये॒तु सू॒नृता॑ । अच्छा॑ वी॒रं नर्यं॑ प॒ङ्क्तिरा॑धसं दे॒वा य॒ज्ञं न॑यन्तु नः ।। ८९ ।।
praitu॒ brahma॑ṇa॒spati॒: pra de॒vye॒tu sū॒nṛtā॑ | acchā॑ vī॒raṃ naryaṃ॑ pa॒ṅktirā॑dhasaṃ de॒vā ya॒jñaṃ na॑yantu naḥ | | ८९ | |
च॒न्द्रमा॑ अ॒प्स्वन्तरा सु॑प॒र्णो धा॑वते दि॒वि ।
र॒यिं पि॒शङ्गं॑ बहु॒लं पु॑रु॒स्पृह॒ᳪ हरि॑रेति॒ कनि॑क्रदत् ।। ९० ।।
ca॒ndramā॑ a॒psvantarā su॑pa॒rṇo dhā॑vate di॒vi | ra॒yiṃ pi॒śaṅgaṃ॑ bahu॒laṃ pu॑ru॒spṛha॒ᳪ hari॑reti॒ kani॑kradat | | ९० | |
दे॒वं-दे॑वं॒ वोऽव॑से दे॒वं-दे॑वम॒भिष्ट॑ये । दे॒वं-दे॑वᳪ हुवेम॒ वाज॑सातये गृ॒णन्तो॑ दे॒व्या धि॒या ।। ९१ ।।
de॒vaṃ-de॑vaṃ॒ vo’va॑se de॒vaṃ-de॑vama॒bhiṣṭa॑ye | de॒vaṃ-de॑vaᳪ huvema॒ vāja॑sātaye gṛ॒ṇanto॑ de॒vyā dhi॒yā | | ९१ | |
दि॒वि पृ॒ष्टो अ॑रोचता॒ग्निर्वै॑श्वान॒रो बृ॒हन् ।
क्ष्मया॑ वृधा॒न ओज॑सा॒ चनो॑हितो॒ ज्योति॑षा बाधते॒ तम॑: ।। ९२ ।।
di॒vi pṛ॒ṣṭo a॑rocatā॒gnirvai॑śvāna॒ro bṛ॒han | kṣmayā॑ vṛdhā॒na oja॑sā॒ cano॑hito॒ jyoti॑ṣā bādhate॒ tama॑: | | ९२ | |
इन्द्रा॑ग्नी अ॒पादि॒यं पूर्वागा॑त् प॒द्वती॑भ्यः ।
हि॒त्वी शिरो॑ जि॒ह्वया॒ वाव॑द॒च्चर॑त्त्रि॒ᳪशत्प॒दा न्य॑क्रमीत् ।। ९३ ।।
indrā॑gnī a॒pādi॒yaṃ pūrvāgā॑t pa॒dvatī॑bhyaḥ | hi॒tvī śiro॑ ji॒hvayā॒ vāva॑da॒ccara॑ttri॒ᳪśatpa॒dā nya॑kramīt | | ९३ | |
दे॒वासो॒ हि ष्मा॒ मन॑वे॒ सम॑न्यवो॒ विश्वे॑ सा॒कᳪ सरा॑तयः ।
ते नो॑ अ॒द्य ते अ॑प॒रं तु॒चे तु नो॒ भव॑न्तु वरिवो॒विद॑: ।। ९४ ।।
de॒vāso॒ hi ṣmā॒ mana॑ve॒ sama॑nyavo॒ viśve॑ sā॒kaᳪ sarā॑tayaḥ | te no॑ a॒dya te a॑pa॒raṃ tu॒ce tu no॒ bhava॑ntu varivo॒vida॑: | | ९४ | |
अपा॑धमद॒भिश॑स्तीरशस्ति॒हाथेन्द्रो॑ द्यु॒म्न्याभ॑वत् ।
द॒वास्त॑ इन्द्र स॒ख्याय॑ येमिरे॒ बृह॑द्भानो॒ मरु॑द्गण ।। ९५ ।।
apā॑dhamada॒bhiśa॑stīraśasti॒hāthendro॑ dyu॒mnyābha॑vat | da॒vāsta॑ indra sa॒khyāya॑ yemire॒ bṛha॑dbhāno॒ maru॑dgaṇa | | ९५ | |
प्र व॒ इन्द्रा॑य बृह॒ते मरु॑तो॒ ब्रह्मा॑र्चत ।
वृ॒त्रᳪ ह॑नति वृत्र॒हा श॒तक्र॑तु॒र्वज्रे॑ण श॒तप॑र्वणा ।। ९६ ।।
pra va॒ indrā॑ya bṛha॒te maru॑to॒ brahmā॑rcata | vṛ॒traᳪ ha॑nati vṛtra॒hā śa॒takra॑tu॒rvajre॑ṇa śa॒tapa॑rvaṇā | | ९६ | |
अ॒स्येदिन्द्रो॑ वावृधे॒ वृष्ण्य॒ᳪ शवो॒ मदे॑ सु॒तस्य॒ विष्ण॑वि ।
अ॒द्या तम॑स्य महि॒मान॑मा॒यवोऽनु॑ ष्टुवन्ति पू॒र्वथा॑ ।
इ॒मा उ॑ त्वा यस्या॒यम॒यᳪ स॒हस्र॑मू॒र्ध्व ऊ॒ षु ण॑: ।। ९७ ।।
a॒syedindro॑ vāvṛdhe॒ vṛṣṇya॒ᳪ śavo॒ made॑ su॒tasya॒ viṣṇa॑vi | a॒dyā tama॑sya mahi॒māna॑mā॒yavo’nu॑ ṣṭuvanti pū॒rvathā॑ | i॒mā u॑ tvā yasyā॒yama॒yaᳪ sa॒hasra॑mū॒rdhva ū॒ ṣu ṇa॑: | | ९७ | |