EeseDharmaSanātana Library
3अध्याय 3
Śukla Yajurveda Mādhyaṃdina ka Adhyay 3.
63 shlokस॒मिधा॒ऽग्निं दु॑वस्यत घृतैर्बो॑धय॒ताति॑थिम् । आस्मि॑न् ह॒व्या जु॑होतन ।। १ ।।
sa॒midhā॒’gniṃ du॑vasyata ghṛtairbo॑dhaya॒tāti॑thim | āsmi॑n ha॒vyā ju॑hotana | | १ | |
सुस॑मिद्धाय शो॒चिषे॑ घृ॒तं ती॒व्रं जु॑होतन । अ॒ग्नये॑ जा॒तवे॑दसे ।। २ ।।
susa॑middhāya śo॒ciṣe॑ ghṛ॒taṃ tī॒vraṃ ju॑hotana | a॒gnaye॑ jā॒tave॑dase | | २ | |
तं त्वा॑ स॒मिद्भि॑रङ्गिरो घृ॒तेन॑ वर्धयामसि । बृ॒हच्छो॑चा यविष्ठ्य ।। ३ ।।
taṃ tvā॑ sa॒midbhi॑raṅgiro ghṛ॒tena॑ vardhayāmasi | bṛ॒haccho॑cā yaviṣṭhya | | ३ | |
उप॑ त्वाऽग्ने ह॒विष्म॑तीर्घृ॒ताची॑र्यन्तु हर्यत । जु॒षस्व॑ स॒मिधो॒ मम॑ ।। ४ ।।
upa॑ tvā’gne ha॒viṣma॑tīrghṛ॒tācī॑ryantu haryata | ju॒ṣasva॑ sa॒midho॒ mama॑ | | ४ | |
भूर्भुव॒: स्वर्द्यौरि॑व भू॒म्ना पृ॑थि॒वीव॑ वरि॒म्णा । तस्या॑स्ते पृथिवि देवयजनि पृ॒ष्ठेऽग्निम॑न्ना॒दम॒न्नाद्या॒याद॑धे ।। ५ ।।
bhūrbhuva॒: svardyauri॑va bhū॒mnā pṛ॑thi॒vīva॑ vari॒mṇā | tasyā॑ste pṛthivi devayajani pṛ॒ṣṭhe’gnima॑nnā॒dama॒nnādyā॒yāda॑dhe | | ५ | |
आयं गौः पृश्नि॑रक्रमी॒दस॑दन् मा॒तरं॑ पु॒रः । पि॒तरं॑ च प्र॒यन्त्स्व॑: ।। ६ ।।
āyaṃ gauḥ pṛśni॑rakramī॒dasa॑dan mā॒taraṃ॑ pu॒raḥ | pi॒taraṃ॑ ca pra॒yantsva॑: | | ६ | |
अ॒न्तश्च॑रति रोच॒नास्य प्रा॒णादपा॑न॒ती । व्य॑ख्यन् महि॒षो दिव॑म् ।। ७ ।।
a॒ntaśca॑rati roca॒nāsya prā॒ṇādapā॑na॒tī | vya॑khyan mahi॒ṣo diva॑m | | ७ | |
त्रि॒jशद्धाम॒ वि रा॑जति॒ वाक् प॑त॒ङ्गाय॑ धीयते । प्रति॒ वस्तो॒रह॒ द्युभि॑: ।। ८ ।।
tri॒jśaddhāma॒ vi rā॑jati॒ vāk pa॑ta॒ṅgāya॑ dhīyate | prati॒ vasto॒raha॒ dyubhi॑: | | ८ | |
अ॒ग्निर्ज्योति॒र्ज्योति॑र॒ग्निः स्वाहा॑ । सूर्यो॒ ज्योति॒र्ज्योति॒: सूर्य॒: स्वाहा॑ ।
अ॒ग्निर्वर्चो॒ ज्योति॒र्वर्चः॒ स्वाहा॑ । सूर्यो॒ वर्चो॒ ज्योति॒र्वर्चः॒ स्वाहा॑ । ज्योति॒: सूर्य॒: सूर्यो॒ ज्योति॒: स्वाहा॑ ।। ९ ।।
a॒gnirjyoti॒rjyoti॑ra॒gniḥ svāhā॑ | sūryo॒ jyoti॒rjyoti॒: sūrya॒: svāhā॑ | a॒gnirvarco॒ jyoti॒rvarcaḥ॒ svāhā॑ | sūryo॒ varco॒ jyoti॒rvarcaḥ॒ svāhā॑ | jyoti॒: sūrya॒: sūryo॒ jyoti॒: svāhā॑ | | ९ | |
स॒जूर्दे॒वेन॑ सवि॒त्रा स॒जू रात्र्येन्द्र॑वत्या । जु॑षा॒णो अ॒ग्निर्वे॑तु॒ स्वाहा॑ ।
स॒जूर्दे॒वेन॑ सवि॒त्रा स॒जूरु॒षसेन्द्र॑वत्या ।जु॑षा॒णः सूर्यो॑ वेतु॒ स्वाहा॑ ।। १० ।।
sa॒jūrde॒vena॑ savi॒trā sa॒jū rātryendra॑vatyā | ju॑ṣā॒ṇo a॒gnirve॑tu॒ svāhā॑ | sa॒jūrde॒vena॑ savi॒trā sa॒jūru॒ṣasendra॑vatyā | ju॑ṣā॒ṇaḥ sūryo॑ vetu॒ svāhā॑ | | १० | |
उ॒प॒प्र॒यन्तो॑ अध्व॒रं मन्त्रं॑ वोचेमा॒ग्नये॑ । आ॒रे अ॒स्मे च॑ शृण्व॒ते ।। ११ ।।
u॒pa॒pra॒yanto॑ adhva॒raṃ mantraṃ॑ vocemā॒gnaye॑ | ā॒re a॒sme ca॑ śṛṇva॒te | | ११ | |
अ॒ग्निर्मू॒र्धा दि॒वः क॒कुत्पति॑: पृथि॒व्या अ॒यम् । अ॒पाᳪरेता॑ᳪसि जिन्वति ।। १२ ।।
a॒gnirmū॒rdhā di॒vaḥ ka॒kutpati॑: pṛthi॒vyā a॒yam | a॒pāᳪretā॑ᳪsi jinvati | | १२ | |
उ॒भा वा॑मिन्द्राग्नी आहु॒वध्या॑ उ॒भा राध॑सः स॒ह मा॑द॒यध्यै॑ ।
उ॒भा दा॒तारा॑वि॒षाᳪर॑यी॒णामु॒भा वाज॑स्य सा॒तये॑ हुवे वाम् ।। १३ ।।
u॒bhā vā॑mindrāgnī āhu॒vadhyā॑ u॒bhā rādha॑saḥ sa॒ha mā॑da॒yadhyai॑ | u॒bhā dā॒tārā॑vi॒ṣāᳪra॑yī॒ṇāmu॒bhā vāja॑sya sā॒taye॑ huve vām | | १३ | |
अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः । तं जा॒नन्न॑ग्न॒ आरो॒हाथा॑ नो वर्धया र॒यिम् ।। १४ ।।
a॒yaṃ te॒ yoni॑rṛ॒tviyo॒ yato॑ jā॒to aro॑cathāḥ | taṃ jā॒nanna॑gna॒ āro॒hāthā॑ no vardhayā ra॒yim | | १४ | |
अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्य॑: ।
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॒ वि॒शेवि॑शे ।। १५ ।।
a॒yami॒ha pra॑tha॒mo dhā॑yi dhā॒tṛbhi॒rhotā॒ yaji॑ṣṭho adhva॒reṣvīḍya॑: | yamapna॑vāno॒ bhṛga॑vo viruru॒curvane॑ṣu ci॒traṃ vi॒bhvaṃ॒ vi॒śevi॑śe | | १५ | |
अ॒स्य प्र॒त्नामनु॒ द्युत॑ᳪशु॒क्रं दु॑दुह्रे॒ अह्र॑यः । पय॑: सहस्र॒सामृषि॑म् ।। १६ ।।
a॒sya pra॒tnāmanu॒ dyuta॑ᳪśu॒kraṃ du॑duhre॒ ahra॑yaḥ | paya॑: sahasra॒sāmṛṣi॑m | | १६ | |
त॑नू॒पा अ॑ग्नेऽसि त॒न्वं॒ मे पाह्यायु॒र्दा अ॑ग्ने॒ स्यायु॑र्मे देहि व॑र्चो॒दा अ॑ग्नेऽसि॒ वर्चो॑ मे देहि ।
अग्ने॒ यन्मे॑ त॒न्वा॒ ऊ॒नं तन्म॒ आपृ॑ण ।। १७ ।।
ta॑nū॒pā a॑gne’si ta॒nvaṃ॒ me pāhyāyu॒rdā a॑gne॒ syāyu॑rme dehi va॑rco॒dā a॑gne’si॒ varco॑ me dehi | agne॒ yanme॑ ta॒nvā॒ ū॒naṃ tanma॒ āpṛ॑ṇa | | १७ | |
इन्धा॑नास्त्वा श॒तᳪहिमा॑ द्यु॒मन्त॒ᳪसमि॑धीमहि । वय॑स्वन्तो वय॒स्कृत॒ सह॑स्वन्तः सह॒स्कृत॑म् ।
अग्ने॑ सपत्न॒दम्भ॑न॒मद॑ब्धासो॒ अदा॑भ्यम् । चित्रा॑वसो स्व॒स्ति ते॑ पा॒रम॑शीय ।। १८ ।।
indhā॑nāstvā śa॒taᳪhimā॑ dyu॒manta॒ᳪsami॑dhīmahi | vaya॑svanto vaya॒skṛta॒ saha॑svantaḥ saha॒skṛta॑m | agne॑ sapatna॒dambha॑na॒mada॑bdhāso॒ adā॑bhyam | citrā॑vaso sva॒sti te॑ pā॒rama॑śīya | | १८ | |
सं त्वम॑ग्ने॒ सूर्य॑स्य॒ वर्च॑सागथा॒: समृषी॑णाᳪ स्तु॒तेन॑ ।
सं प्रि॒येण॒ धाम्ना॒ सम॒हमायु॑षा॒ सं वर्च॑सा॒ सं प्र॒जया॒ सᳪ रा॒यस्पोषे॑ण ग्मिषीय ।। १९ ।।
saṃ tvama॑gne॒ sūrya॑sya॒ varca॑sāgathā॒: samṛṣī॑ṇāᳪ stu॒tena॑ | saṃ pri॒yeṇa॒ dhāmnā॒ sama॒hamāyu॑ṣā॒ saṃ varca॑sā॒ saṃ pra॒jayā॒ saᳪ rā॒yaspoṣe॑ṇa gmiṣīya | | १९ | |
अन्ध॒ स्थान्धो॑ वो भक्षीय॒ मह॑ स्थ॒ महो॑ वो भक्षी॒योर्ज॒ स्थोर्जं॑ वो भक्षीय रा॒यस्पोष॑ स्थ रा॒यस्पोषं॑ वो भक्षीय ।। २० ।।
andha॒ sthāndho॑ vo bhakṣīya॒ maha॑ stha॒ maho॑ vo bhakṣī॒yorja॒ sthorjaṃ॑ vo bhakṣīya rā॒yaspoṣa॑ stha rā॒yaspoṣaṃ॑ vo bhakṣīya | | २० | |
रेव॑ती॒ रम॑ध्वम॒स्मिन्योना॑व॒स्मिन् गो॒ष्ठेऽस्मिंल्लो॒के॒ऽस्मिन्क्षये॑ । इहै॒व स्त॒ माप॑गात ।। २१ ।।
reva॑tī॒ rama॑dhvama॒sminyonā॑va॒smin go॒ṣṭhe’smiṃllo॒ke॒’sminkṣaye॑ | ihai॒va sta॒ māpa॑gāta | | २१ | |
स॒ᳪहि॒तासि॑ विश्वरू॒प्यू॒र्जा मावि॑श गौप॒त्येन॑ । उप॑ त्वाग्ने दि॒वेदि॑वे॒ दोषा॑वस्तर्द्धि॒या व॒यम् ।
नमो॒ भर॑न्त॒ एम॑सि ।। २२ ।।
sa॒ᳪhi॒tāsi॑ viśvarū॒pyū॒rjā māvi॑śa gaupa॒tyena॑ | upa॑ tvāgne di॒vedi॑ve॒ doṣā॑vastarddhi॒yā va॒yam | namo॒ bhara॑nta॒ ema॑si | | २२ | |
राज॑न्तमध्व॒राणां॑ गो॒पामृ॒तस्य॒ दीदि॑विम् । वर्ध॑मान॒ᳪ स्वे दमे॑ ।। २३ ।।
rāja॑ntamadhva॒rāṇāṃ॑ go॒pāmṛ॒tasya॒ dīdi॑vim | vardha॑māna॒ᳪ sve dame॑ | | २३ | |
स न॑: पि॒तेव॑ सू॒नवेऽग्ने॑ सूपाय॒नो भ॑व । सच॑स्वा नः स्व॒स्तये॑ ।। २४ ।।
sa na॑: pi॒teva॑ sū॒nave’gne॑ sūpāya॒no bha॑va | saca॑svā naḥ sva॒staye॑ | | २४ | |
अग्ने॒ त्वं नो॒ अन्त॑म उ॒त त्रा॒ता शि॒वो भ॑वा वरू॒थ्य॒: ।
वसु॑र॒ग्निर्वसुश्र॑वा॒ अच्छा॑ नक्षि द्यु॒मत्त॑मᳪ र॒यिं दा॑: ।। २५ ।।
agne॒ tvaṃ no॒ anta॑ma u॒ta trā॒tā śi॒vo bha॑vā varū॒thya॒: | vasu॑ra॒gnirvasuśra॑vā॒ acchā॑ nakṣi dyu॒matta॑maᳪ ra॒yiṃ dā॑: | | २५ | |
तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ।
स नो॑ बोधि श्रु॒धी हव॑मुरु॒ष्या णो॑ अधाय॒तः सम॑स्मात् ।। २६ ।।
taṃ tvā॑ śociṣṭha dīdivaḥ su॒mnāya॑ nū॒namī॑mahe॒ sakhi॑bhyaḥ | sa no॑ bodhi śru॒dhī hava॑muru॒ṣyā ṇo॑ adhāya॒taḥ sama॑smāt | | २६ | |
इड॒ एह्यदि॑त॒ एहि॑ काम्या॒ एत॑ । मयि॑ वः काम॒धर॑णं भूयात् ।। २७ ।।
iḍa॒ ehyadi॑ta॒ ehi॑ kāmyā॒ eta॑ | mayi॑ vaḥ kāma॒dhara॑ṇaṃ bhūyāt | | २७ | |
सो॒मान॒ᳪ स्वर॑णं कृणु॒हि ब्र॑ह्मणस्पते । क॒क्षीव॑न्तं॒ य औ॑शि॒जः ।। २८ ।।
so॒māna॒ᳪ svara॑ṇaṃ kṛṇu॒hi bra॑hmaṇaspate | ka॒kṣīva॑ntaṃ॒ ya au॑śi॒jaḥ | | २८ | |
यो रे॒वान्यो अ॑मीव॒हा व॑सु॒वित्पु॑ष्टि॒वर्द्ध॑नः । स न॑: सिषक्तु॒ यस्तु॒रः ।। २९ ।।
yo re॒vānyo a॑mīva॒hā va॑su॒vitpu॑ṣṭi॒varddha॑naḥ | sa na॑: siṣaktu॒ yastu॒raḥ | | २९ | |
मा न॒: शᳪसो॒ अर॑रुषो धू॒र्तिः प्रण॒ङ मर्त्य॑स्य । रक्षा॑ णो ब्रह्मणस्पते ।। ३० ।।
mā na॒: śaᳪso॒ ara॑ruṣo dhū॒rtiḥ praṇa॒ṅa martya॑sya | rakṣā॑ ṇo brahmaṇaspate | | ३० | |
महि॑ त्री॒णामवो॑ऽस्तु द्यु॒क्षं मि॒त्रस्या॑र्य॒म्णः । दु॑रा॒धर्षं॒ वरु॑णस्य ।। ३१ ।।
mahi॑ trī॒ṇāmavo॑’stu dyu॒kṣaṃ mi॒trasyā॑rya॒mṇaḥ | du॑rā॒dharṣaṃ॒ varu॑ṇasya | | ३१ | |
न॒हि तेषा॑म॒मा च॒न नाध्व॑सु वार॒णेषु॑ । ईशे॑ रि॒पुर॒घश॑ᳪसः ।। ३२ ।।
na॒hi teṣā॑ma॒mā ca॒na nādhva॑su vāra॒ṇeṣu॑ | īśe॑ ri॒pura॒ghaśa॑ᳪsaḥ | | ३२ | |
ते हि पु॒त्रासो॒ अदि॑तेः॒ प्र जी॒वसे॒ मर्त्या॑य । ज्योति॒र्यच्छ॒न्त्यज॑स्रम् ।। ३३ ।।
te hi pu॒trāso॒ adi॑teḥ॒ pra jī॒vase॒ martyā॑ya | jyoti॒ryaccha॒ntyaja॑sram | | ३३ | |
क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ । उ॒पोपेन्नु म॑घव॒न् भूय॒ इन्नु ते॒ दानं॑ दे॒वस्य॑ पृच्यते ।। ३४ ।।
ka॒dā ca॒na sta॒rīra॑si॒ nendra॑ saścasi dā॒śuṣe॑ | u॒popennu ma॑ghava॒n bhūya॒ innu te॒ dānaṃ॑ de॒vasya॑ pṛcyate | | ३४ | |
तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो न॑: प्रचो॒दया॑त् ।। ३५ ।।
tatsa॑vi॒turvare॑ṇyaṃ॒ bhargo॑ de॒vasya॑ dhīmahi | dhiyo॒ yo na॑: praco॒dayā॑t | | ३५ | |
परि॑ ते दू॒डभो॒ रथो॒ऽस्माँ२ अ॑श्नोतु वि॒श्वत॑: । येन॒ रक्ष॑सि दा॒शुष॑: ।। ३६ ।।
pari॑ te dū॒ḍabho॒ ratho॒’smām̐२ a॑śnotu vi॒śvata॑: | yena॒ rakṣa॑si dā॒śuṣa॑: | | ३६ | |
भूर्भुव॒: स्व॒: सुप्र॒जाः प्र॒जाभि॑: स्याᳪ सु॒वीरो॑ वी॒रैः सु॒पोष॒: पोषै॑: ।
नर्य॑ प्र॒जां मे॑ पाहि शᳪस्य॑ प॒शून्मे॑ पा॒ह्यथ॑र्य पि॒तुं मे॑ पाहि ।। ३७ ।।
bhūrbhuva॒: sva॒: supra॒jāḥ pra॒jābhi॑: syāᳪ su॒vīro॑ vī॒raiḥ su॒poṣa॒: poṣai॑: | narya॑ pra॒jāṃ me॑ pāhi śaᳪsya॑ pa॒śūnme॑ pā॒hyatha॑rya pi॒tuṃ me॑ pāhi | | ३७ | |
आ ग॑न्म वि॒श्ववे॑दसम॒स्मभ्यं॑ वसु॒वित्त॑मम् । अग्ने॑ सम्राड॒भि द्यु॒म्नम॒भि सह॒ आ य॑च्छस्व ।। ३८ ।।
ā ga॑nma vi॒śvave॑dasama॒smabhyaṃ॑ vasu॒vitta॑mam | agne॑ samrāḍa॒bhi dyu॒mnama॒bhi saha॒ ā ya॑cchasva | | ३८ | |
अ॒यम॒ग्निर्गृ॒हप॑ति॒र्गार्ह॑पत्यः प्र॒जाया॑ वसु॒वित्त॑मः । अग्ने॑ गृहपते॒ऽभि द्यु॒म्नम॒भि सह॒ आ य॑च्छस्व ।। ३९ ।।
a॒yama॒gnirgṛ॒hapa॑ti॒rgārha॑patyaḥ pra॒jāyā॑ vasu॒vitta॑maḥ | agne॑ gṛhapate॒’bhi dyu॒mnama॒bhi saha॒ ā ya॑cchasva | | ३९ | |
अ॒यम॒ग्निः पु॑री॒ष्यो॒ रयि॒मान् पु॑ष्टि॒वर्ध॑नः । अग्ने॑ पुरीष्या॒भि द्यु॒म्नम॒भि सह॒ आ य॑च्छस्व ।। ४० ।।
a॒yama॒gniḥ pu॑rī॒ṣyo॒ rayi॒mān pu॑ṣṭi॒vardha॑naḥ | agne॑ purīṣyā॒bhi dyu॒mnama॒bhi saha॒ ā ya॑cchasva | | ४० | |
गृहा॒ मा बि॑भीत॒ मा वे॑पध्व॒मूर्जं॑ बिभ्रत॒ एम॑सि । ऊर्जं॒ बिभ्र॑द्वः सु॒मना॑: सुमे॒धा गृ॒हानैमि॒ मन॑सा॒ मोद॑मानः ।। ४१ ।।
gṛhā॒ mā bi॑bhīta॒ mā ve॑padhva॒mūrjaṃ॑ bibhrata॒ ema॑si | ūrjaṃ॒ bibhra॑dvaḥ su॒manā॑: sume॒dhā gṛ॒hānaimi॒ mana॑sā॒ moda॑mānaḥ | | ४१ | |
येषा॑म॒ध्येति॑ प्र॒वस॒न्येषु॑ सौमन॒सो ब॒हुः । गृ॒हानुप॑ह्वयामहे॒ ते नो॑ जानन्तु जान॒तः ।। ४२ ।।
yeṣā॑ma॒dhyeti॑ pra॒vasa॒nyeṣu॑ saumana॒so ba॒huḥ | gṛ॒hānupa॑hvayāmahe॒ te no॑ jānantu jāna॒taḥ | | ४२ | |
उप॑हूता इ॒ह गाव॒ उप॑हूता अजा॒वय॑: । अथो॒ अन्न॑स्य की॒लाल॒ उप॑हूतो गृ॒हेषु॑ नः । क्षेमा॑य व॒: शान्त्यै॒ प्रप॑द्ये शि॒वᳪ श॒ग्मᳪ शं॒यो: शं॒यो: ।। ४३ ।।
upa॑hūtā i॒ha gāva॒ upa॑hūtā ajā॒vaya॑: | atho॒ anna॑sya kī॒lāla॒ upa॑hūto gṛ॒heṣu॑ naḥ | kṣemā॑ya va॒: śāntyai॒ prapa॑dye śi॒vaᳪ śa॒gmaᳪ śaṃ॒yo: śaṃ॒yo: | | ४३ | |
प्र॒घा॒सिनो॑ हवामहे म॒रुत॑श्च रि॒शाद॑सः । क॒र॒म्भेण॑ स॒जोष॑सः ।। ४४ ।।
pra॒ghā॒sino॑ havāmahe ma॒ruta॑śca ri॒śāda॑saḥ | ka॒ra॒mbheṇa॑ sa॒joṣa॑saḥ | | ४४ | |
यद्ग्रामे॒ यदर॑ण्ये॒ यत्स॒भायां॒ यदि॑न्द्रि॑ये । यदेन॑श्चकृ॒मा व॒यमि॒दं तदव॑यजामहे॒ स्वाहा॑ ।। ४५ ।।
yadgrāme॒ yadara॑ṇye॒ yatsa॒bhāyāṃ॒ yadi॑ndri॑ye | yadena॑ścakṛ॒mā va॒yami॒daṃ tadava॑yajāmahe॒ svāhā॑ | | ४५ | |
मो षू ण॑ इ॒न्द्रात्र॑ पृ॒त्सु दे॒वैरस्ति॒ हि ष्मा॑ ते शुष्मिन्नव॒याः ।
म॒हश्चि॒द्यस्य॑ मी॒ढुषो॑ य॒व्या ह॒विष्म॑तो म॒रुतो॒ वन्द॑ते॒ गीः ।। ४६ ।।
mo ṣū ṇa॑ i॒ndrātra॑ pṛ॒tsu de॒vairasti॒ hi ṣmā॑ te śuṣminnava॒yāḥ | ma॒haści॒dyasya॑ mī॒ḍhuṣo॑ ya॒vyā ha॒viṣma॑to ma॒ruto॒ vanda॑te॒ gīḥ | | ४६ | |
अक्र॒न् कर्म॑ कर्म॒कृत॑: स॒ह वा॒चा म॑यो॒भुवा॑ । दे॒वेभ्य॒: कर्म॑ कृ॒त्वास्तं॒ प्रेत॑ सचाभुवः ।। ४७ ।।
akra॒n karma॑ karma॒kṛta॑: sa॒ha vā॒cā ma॑yo॒bhuvā॑ | de॒vebhya॒: karma॑ kṛ॒tvāstaṃ॒ preta॑ sacābhuvaḥ | | ४७ | |
अव॑भृथ निचुम्पुण निचे॒रुर॑सि निचुम्पु॒णः ।
अव॑ दे॒वैर्दे॒वकृ॑त॒मेनो॑ऽयासिष॒मव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि ।। ४८ ।।
ava॑bhṛtha nicumpuṇa nice॒rura॑si nicumpu॒ṇaḥ | ava॑ de॒vairde॒vakṛ॑ta॒meno॑’yāsiṣa॒mava॒ martyai॒rmartya॑kṛtaṃ puru॒rāvṇo॑ deva ri॒ṣaspā॑hi | | ४८ | |
पू॒र्णा द॑र्वि॒ परा॑ पत॒ सुपू॑र्णा॒ पुन॒रा प॑त । व॒स्नेव॒ विक्री॑णावहा॒ इष॒मूर्ज॑ᳪ शतक्रतो ।। ४९ ।।
pū॒rṇā da॑rvi॒ parā॑ pata॒ supū॑rṇā॒ puna॒rā pa॑ta | va॒sneva॒ vikrī॑ṇāvahā॒ iṣa॒mūrja॑ᳪ śatakrato | | ४९ | |
दे॒हि मे॒ ददा॑मि ते॒ नि मे॑ धेहि॒ नि त दधे । नि॒हारं॑ च॒ हरा॑सि मे नि॒हारं॒ नि ह॑राणि ते॒ स्वाहा॑ ।। ५० ।।
de॒hi me॒ dadā॑mi te॒ ni me॑ dhehi॒ ni ta dadhe | ni॒hāraṃ॑ ca॒ harā॑si me ni॒hāraṃ॒ ni ha॑rāṇi te॒ svāhā॑ | | ५० | |
अक्ष॒न्नमी॑मदन्त॒ ह्यव॑ प्रि॒या अ॑धूषत ।
अस्तो॑षत॒ स्वभा॑नवो॒ विप्रा॒ निवि॑ष्ठया म॒ती योजा॒ न्वि॒न्द्र ते॒ हरी॑ ।। ५१ ।।
akṣa॒nnamī॑madanta॒ hyava॑ pri॒yā a॑dhūṣata | asto॑ṣata॒ svabhā॑navo॒ viprā॒ nivi॑ṣṭhayā ma॒tī yojā॒ nvi॒ndra te॒ harī॑ | | ५१ | |
सु॒स॒न्दृशं॑ त्वा व॒यं मघ॑वन्वन्दिषी॒महि॑ ।
प्र नू॒नं पू॒र्णब॑न्धुर स्तु॒तो या॑सि॒ वशाँ॒२ अनु॒ योजा॒ न्वि॒न्द्र ते॒ हरी॑ ।। ५२ ।।
su॒sa॒ndṛśaṃ॑ tvā va॒yaṃ magha॑vanvandiṣī॒mahi॑ | pra nū॒naṃ pū॒rṇaba॑ndhura stu॒to yā॑si॒ vaśām॒̐२ anu॒ yojā॒ nvi॒ndra te॒ harī॑ | | ५२ | |
मनो॒ न्वाह्वा॑महे नाराश॒jसेन॒ स्तोमे॑न । पि॑तॄ॒णां च॒ मन्म॑भिः ।। ५३ ।।
mano॒ nvāhvā॑mahe nārāśa॒jsena॒ stome॑na | pi॑tṝ॒ṇāṃ ca॒ manma॑bhiḥ | | ५३ | |
आ न॑ एतु॒ मन॒: पुन॒: क्रत्वे॒ दक्षा॑य जी॒वसे॑ । ज्योक् च॒ सूर्यं॑ दृ॒शे ।। ५४ ।।
ā na॑ etu॒ mana॒: puna॒: kratve॒ dakṣā॑ya jī॒vase॑ | jyok ca॒ sūryaṃ॑ dṛ॒śe | | ५४ | |
पुन॑र्नः पितरो॒ मनो॒ ददा॑तु दैव्यो॒ जन॑: । जी॒वं व्रात॑ᳪ सचेमहि ।। ५५ ।।
puna॑rnaḥ pitaro॒ mano॒ dadā॑tu daivyo॒ jana॑: | jī॒vaṃ vrāta॑ᳪ sacemahi | | ५५ | |
व॒यᳪ सो॑म व्र॒ते तव॒ मन॑स्त॒नूषु॒ बिभ्र॑तः । प्र॒जाव॑न्तः सचेमहि ।। ५६ ।।
va॒yaᳪ so॑ma vra॒te tava॒ mana॑sta॒nūṣu॒ bibhra॑taḥ | pra॒jāva॑ntaḥ sacemahi | | ५६ | |
ए॒ष ते॑ रुद्र भा॒गः स॒ह स्वस्राम्बि॑कया॒ तं जु॑षस्व॒ स्वाहै॒ष ते॑ रुद्र भा॒ग आ॒खुस्ते॑ प॒शुः ।। ५७ ।।
e॒ṣa te॑ rudra bhā॒gaḥ sa॒ha svasrāmbi॑kayā॒ taṃ ju॑ṣasva॒ svāhai॒ṣa te॑ rudra bhā॒ga ā॒khuste॑ pa॒śuḥ | | ५७ | |
अव॑ रु॒द्रम॑दीम॒ह्यव॑ दे॒वं त्र्य॑म्बकम् । यथा॑ नो॒ वस्य॑स॒स्कर॒द्यथा॑ न॒: श्रेय॑स॒स्कर॒द्यथा॑ नो व्यवसा॒यया॑त् ।। ५८ ।।
ava॑ ru॒drama॑dīma॒hyava॑ de॒vaṃ trya॑mbakam | yathā॑ no॒ vasya॑sa॒skara॒dyathā॑ na॒: śreya॑sa॒skara॒dyathā॑ no vyavasā॒yayā॑t | | ५८ | |
भे॒ष॒जम॑सि भेष॒जं गवेऽश्वा॑य॒ पुरु॑षाय भेष॒जम् । सु॒खं मे॒षाय॑ मेष्यै ।। ५९ ।।
bhe॒ṣa॒jama॑si bheṣa॒jaṃ gave’śvā॑ya॒ puru॑ṣāya bheṣa॒jam | su॒khaṃ me॒ṣāya॑ meṣyai | | ५९ | |
त्र्य॑म्बकं यजामहे सुग॒न्धिं पु॑ष्टि॒वर्ध॑नम् । उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ मामृता॑त् ।
त्र्य॑म्बकं यजामहे सुग॒न्धिं प॑ति॒वेद॑नम् । उ॒र्वा॒रु॒कमि॑व॒ बन्ध॑नादि॒तो मु॑क्षीय॒ मामुत॑: ।। ६० ।।
trya॑mbakaṃ yajāmahe suga॒ndhiṃ pu॑ṣṭi॒vardha॑nam | u॒rvā॒ru॒kami॑va॒ bandha॑nānmṛ॒tyormu॑kṣīya॒ māmṛtā॑t | trya॑mbakaṃ yajāmahe suga॒ndhiṃ pa॑ti॒veda॑nam | u॒rvā॒ru॒kami॑va॒ bandha॑nādi॒to mu॑kṣīya॒ māmuta॑: | | ६० | |
ए॒तत्ते॑ रुद्राव॒सं तेन॑ प॒रो मूज॑व॒तोऽती॑हि ।
अव॑ततधन्वा॒ पिना॑कावस॒: कृत्ति॑वासा॒ अहि॑ᳪसन्नः शि॒वोऽती॑हि ।। ६१ ।।
e॒tatte॑ rudrāva॒saṃ tena॑ pa॒ro mūja॑va॒to’tī॑hi | ava॑tatadhanvā॒ pinā॑kāvasa॒: kṛtti॑vāsā॒ ahi॑ᳪsannaḥ śi॒vo’tī॑hi | | ६१ | |
त्र्या॑यु॒षं ज॒मद॑ग्नेः क॒श्यप॑स्य त्र्यायु॒षम् । यद्दे॒वेषु॑ त्र्यायु॒षं तन्नो॑ अस्तु त्र्यायु॒षम् ।। ६२ ।।
tryā॑yu॒ṣaṃ ja॒mada॑gneḥ ka॒śyapa॑sya tryāyu॒ṣam | yadde॒veṣu॑ tryāyu॒ṣaṃ tanno॑ astu tryāyu॒ṣam | | ६२ | |
शि॒वो नामा॑सि॒ स्वधि॑तिस्ते पि॒ता नम॑स्ते अस्तु॒ मा मा॑ हिᳪसीः ।
नि व॑र्तयाम्यायु॑षे॒ऽन्नाद्या॑य॒ प्रजन॑नाय रा॒यस्पोषा॑य सुप्रजा॒स्त्वाय॑ सु॒वीर्या॑य ।। ६३ ।।
śi॒vo nāmā॑si॒ svadhi॑tiste pi॒tā nama॑ste astu॒ mā mā॑ hiᳪsīḥ | ni va॑rtayāmyāyu॑ṣe॒’nnādyā॑ya॒ prajana॑nāya rā॒yaspoṣā॑ya suprajā॒stvāya॑ su॒vīryā॑ya | | ६३ | |