EeseDharmaSanātana Library
28अध्याय 28
Śukla Yajurveda Mādhyaṃdina ka Adhyay 28.
46 shlokहोता॑ यक्षत्स॒मिधेन्द्र॑मि॒डस्प॒दे नाभा॑ पृथि॒व्या अधि॑ ।
दि॒वो वर्ष्म॒न्त्समि॑ध्यत॒ ओजि॑ष्ठश्चर्षणी॒सहां॒ वेत्वाज्य॑स्य॒ होत॒र्यज॑ ।। १ ।।
hotā॑ yakṣatsa॒midhendra॑mi॒ḍaspa॒de nābhā॑ pṛthi॒vyā adhi॑ | di॒vo varṣma॒ntsami॑dhyata॒ oji॑ṣṭhaścarṣaṇī॒sahāṃ॒ vetvājya॑sya॒ hota॒ryaja॑ | | १ | |
होता॑ यक्ष॒त्तनू॒नपा॑तमू॒तिभि॒र्जेता॑र॒मप॑राजितम् ।
इन्द्रं॑ दे॒वᳪ स्व॒र्विदं॑ प॒थिभि॒र्मधु॑मत्तमै॒र्नरा॒शᳪसे॑न॒ तेज॑सा॒ वेत्वाज्य॑स्य॒ होत॒र्यज॑ ।। २ ।।
hotā॑ yakṣa॒ttanū॒napā॑tamū॒tibhi॒rjetā॑ra॒mapa॑rājitam | indraṃ॑ de॒vaᳪ sva॒rvidaṃ॑ pa॒thibhi॒rmadhu॑mattamai॒rnarā॒śaᳪse॑na॒ teja॑sā॒ vetvājya॑sya॒ hota॒ryaja॑ | | २ | |
होता॑ यक्ष॒दिडा॑भि॒रिन्द्र॑मीडि॒तमा॒जुह्वा॑न॒मम॑र्त्यम् ।
दे॒वो दे॒वै: सवी॑र्यो॒ वज्र॑हस्तः पुरन्द॒रो वेत्वाज्य॑स्य॒ होत॒र्यज॑ ।। ३ ।।
hotā॑ yakṣa॒diḍā॑bhi॒rindra॑mīḍi॒tamā॒juhvā॑na॒mama॑rtyam | de॒vo de॒vai: savī॑ryo॒ vajra॑hastaḥ puranda॒ro vetvājya॑sya॒ hota॒ryaja॑ | | ३ | |
होता॒ यक्षद्ब॒र्हिषीन्द्रं॑ निषद्व॒रं वृ॑ष॒भं नर्या॑पसम् ।
वसु॑भी रु॒द्रैरा॑दि॒त्यैः सु॒युग्भि॑र्ब॒र्हिरास॑द॒द्वेत्वाज्य॑स्य॒ होत॒र्यज॑ ।। ४ ।।
hotā॒ yakṣadba॒rhiṣīndraṃ॑ niṣadva॒raṃ vṛ॑ṣa॒bhaṃ naryā॑pasam | vasu॑bhī ru॒drairā॑di॒tyaiḥ su॒yugbhi॑rba॒rhirāsa॑da॒dvetvājya॑sya॒ hota॒ryaja॑ | | ४ | |
होता॑ यक्ष॒दोजो॒ न वी॒र्यᳪ सहो॒ द्वार॒ इन्द्र॑मवर्धयन् ।
सुप्रा॒य॒णा अ॒स्मिन्य॒ज्ञे वि श्र॑यन्तामृता॒वृधो॒ द्वार॒ इन्द्रा॑य मी॒ढुषे॒ व्यन्त्वाज्य॑स्य॒ होत॒र्यज॑ ।। ५ ।।
hotā॑ yakṣa॒dojo॒ na vī॒ryaᳪ saho॒ dvāra॒ indra॑mavardhayan | suprā॒ya॒ṇā a॒sminya॒jñe vi śra॑yantāmṛtā॒vṛdho॒ dvāra॒ indrā॑ya mī॒ḍhuṣe॒ vyantvājya॑sya॒ hota॒ryaja॑ | | ५ | |
होता॑ यक्षदु॒षे इन्द्र॑स्य धे॒नू सु॒दुघे॑ मा॒तरा॑ म॒ही ।
स॒वा॒तरौ॒ न तेज॑सा व॒त्समिन्द्र॑मवर्धतां वी॒तामाज्य॑स्य॒ होत॒र्यज॑ ।। ६ ।।
hotā॑ yakṣadu॒ṣe indra॑sya dhe॒nū su॒dughe॑ mā॒tarā॑ ma॒hī | sa॒vā॒tarau॒ na teja॑sā va॒tsamindra॑mavardhatāṃ vī॒tāmājya॑sya॒ hota॒ryaja॑ | | ६ | |
होता॑ यक्ष॒द्दैव्या॒ होता॑रा भि॒षजा॒ सखा॑या ह॒विषेन्द्रं॑ भिषज्यतः ।
क॒वी देवौ॒ प्रचे॑तसा॒विन्द्रा॑य धत्त इन्द्रि॒यं वी॒तामाज्य॑स्य॒ होत॒र्यज॑ ।। ७ ।।
hotā॑ yakṣa॒ddaivyā॒ hotā॑rā bhi॒ṣajā॒ sakhā॑yā ha॒viṣendraṃ॑ bhiṣajyataḥ | ka॒vī devau॒ prace॑tasā॒vindrā॑ya dhatta indri॒yaṃ vī॒tāmājya॑sya॒ hota॒ryaja॑ | | ७ | |
होता॑ यक्षत्ति॒स्रो दे॒वीर्न भे॑ष॒जं त्रय॑स्त्रि॒धात॑वो॒ऽपस॒ इडा॒ सर॑स्वती॒ भार॑ती म॒हीः ।
इन्द्र॑पत्नीर्ह॒विष्म॑ती॒र्व्यन्त्वाज्य॑स्य॒ होत॒र्यज॑ ।। ८ ।।
hotā॑ yakṣatti॒sro de॒vīrna bhe॑ṣa॒jaṃ traya॑stri॒dhāta॑vo॒’pasa॒ iḍā॒ sara॑svatī॒ bhāra॑tī ma॒hīḥ | indra॑patnīrha॒viṣma॑tī॒rvyantvājya॑sya॒ hota॒ryaja॑ | | ८ | |
होता॑ यक्ष॒त्त्वष्टा॑र॒मिन्द्रं॑ दे॒वं भि॒षज॑ᳪ सु॒यजं॑ घृत॒श्रिय॑म् ।
पु॒रु॒रूप॑ᳪ सु॒रेत॑सं म॒घोन॒मिन्द्रा॑य॒ त्वष्टा॒ दध॑दिन्द्रि॒याणि॒ वेत्वाज्य॑स्य॒ होत॒र्यज॑ ।। ९ ।।
hotā॑ yakṣa॒ttvaṣṭā॑ra॒mindraṃ॑ de॒vaṃ bhi॒ṣaja॑ᳪ su॒yajaṃ॑ ghṛta॒śriya॑m | pu॒ru॒rūpa॑ᳪ su॒reta॑saṃ ma॒ghona॒mindrā॑ya॒ tvaṣṭā॒ dadha॑dindri॒yāṇi॒ vetvājya॑sya॒ hota॒ryaja॑ | | ९ | |
होता॑ यक्ष॒द्वन॒स्पति॑ᳪ शमि॒तार॑ᳪ श॒तक्र॑तुं धि॒यो जो॒ष्टार॑मिन्द्रि॒यम् ।
मध्वा॑ सम॒ञ्जन्प॒थिभि॑: सु॒गेभि॒: स्वदा॑ति य॒ज्ञं मधु॑ना घृ॒तेन॒ वेत्वाज्य॑स्य॒ होत॒र्यज॑ ।। १० ।।
hotā॑ yakṣa॒dvana॒spati॑ᳪ śami॒tāra॑ᳪ śa॒takra॑tuṃ dhi॒yo jo॒ṣṭāra॑mindri॒yam | madhvā॑ sama॒ñjanpa॒thibhi॑: su॒gebhi॒: svadā॑ti ya॒jñaṃ madhu॑nā ghṛ॒tena॒ vetvājya॑sya॒ hota॒ryaja॑ | | १० | |
होता॑ यक्ष॒दिन्द्र॒ᳪ स्वाहाऽऽज्य॑स्य॒ स्वाहा॒ मेद॑स॒: स्वाहा॑ स्तो॒काना॒ᳪ स्वाहा॒ स्वाहा॑कृतीना॒ᳪ स्वाहा॑ ह॒व्यसू॑क्तीनाम् ।
स्वाहा॑ दे॒वा आ॑ज्य॒पा जु॑षा॒णा इन्द्र॒ आज्य॑स्य॒ व्यन्तु॒ होत॒र्यज॑ ।। ११ ।।
hotā॑ yakṣa॒dindra॒ᳪ svāhā’’jya॑sya॒ svāhā॒ meda॑sa॒: svāhā॑ sto॒kānā॒ᳪ svāhā॒ svāhā॑kṛtīnā॒ᳪ svāhā॑ ha॒vyasū॑ktīnām | svāhā॑ de॒vā ā॑jya॒pā ju॑ṣā॒ṇā indra॒ ājya॑sya॒ vyantu॒ hota॒ryaja॑ | | ११ | |
दे॒वं ब॒र्हिरिन्द्र॑ᳪ सुदे॒वं दे॒वैर्वी॒रव॑त्स्ती॒र्णं वेद्या॑मवर्धयत् ।
वस्तो॑र्वृ॒तं प्राक्तोर्भृ॒तᳪ रा॒या ब॒र्हिष्म॒तोऽत्य॑गाद्वसु॒वने॑ वसु॒धेय॑स्य वेतु॒ यज॑ ।। १२ ।।
de॒vaṃ ba॒rhirindra॑ᳪ sude॒vaṃ de॒vairvī॒rava॑tstī॒rṇaṃ vedyā॑mavardhayat | vasto॑rvṛ॒taṃ prāktorbhṛ॒taᳪ rā॒yā ba॒rhiṣma॒to’tya॑gādvasu॒vane॑ vasu॒dheya॑sya vetu॒ yaja॑ | | १२ | |
दे॒वीर्द्वार॒ इन्द्र॑ᳪ सङ्घा॒ते वी॒ड्वीर्याम॑न्नवर्धयन् ।
आ व॒त्सेन॒ तरु॑णेन कुमा॒रेण॑ च मीव॒तापार्वा॑णᳪ रे॒णुक॑काटं नुदन्तां वसु॒वने॑ वसु॒धेय॑स्य व्यन्तु॒ यज॑ ।। १३ ।।
de॒vīrdvāra॒ indra॑ᳪ saṅghā॒te vī॒ḍvīryāma॑nnavardhayan | ā va॒tsena॒ taru॑ṇena kumā॒reṇa॑ ca mīva॒tāpārvā॑ṇaᳪ re॒ṇuka॑kāṭaṃ nudantāṃ vasu॒vane॑ vasu॒dheya॑sya vyantu॒ yaja॑ | | १३ | |
दे॒वी उ॒षासा॒नक्तेन्द्रं॑ य॒ज्ञे प्र॑य॒त्य॒ह्वेताम् ।
दैवी॒र्विश॒: प्राया॑सिष्टा॒ᳪ सुप्री॑ते॒ सुधि॑ते वसु॒वने॑ वसु॒धेय॑स्य वीतां॒ यज॑ ।। १४ ।।
de॒vī u॒ṣāsā॒naktendraṃ॑ ya॒jñe pra॑ya॒tya॒hvetām | daivī॒rviśa॒: prāyā॑siṣṭā॒ᳪ suprī॑te॒ sudhi॑te vasu॒vane॑ vasu॒dheya॑sya vītāṃ॒ yaja॑ | | १४ | |
दे॒वी जोष्ट्री॒ वसु॑धिती दे॒वमिन्द्र॑मवर्धताम् ।
अया॑व्य॒न्याघा द्वेषा॒ᳪस्यान्या व॑क्ष॒द्वसु॒ वार्या॑णि॒ यज॑मानाय शिक्षि॒ते व॑सु॒वने॑ वसु॒धेय॑स्य वीतां॒ यज॑ ।। १५ ।।
de॒vī joṣṭrī॒ vasu॑dhitī de॒vamindra॑mavardhatām | ayā॑vya॒nyāghā dveṣā॒ᳪsyānyā va॑kṣa॒dvasu॒ vāryā॑ṇi॒ yaja॑mānāya śikṣi॒te va॑su॒vane॑ vasu॒dheya॑sya vītāṃ॒ yaja॑ | | १५ | |
दे॒वी ऊ॒र्जाहु॑ती॒ दुघे॒ सु॒दुघे॒ पय॒सेन्द्र॑मवर्धताम् ।
इष॒मूर्ज॑म॒न्या व॑क्ष॒त्सग्धि॒ᳪ सपी॑तिम॒न्या नवे॑न॒ पूर्वं॒ दय॑माने पुरा॒णेन॒ नव॒मधा॑ता॒मूर्ज॑मू॒र्जाहु॑ती ऊ॒र्जय॑माने॒ वसु॒ वार्या॑णि॒ यज॑मानाय शिक्षि॒ते व॑सु॒वने॑ वसु॒धेय॑स्य वीतां॒ यज॑ ।। १६ ।।
de॒vī ū॒rjāhu॑tī॒ dughe॒ su॒dughe॒ paya॒sendra॑mavardhatām | iṣa॒mūrja॑ma॒nyā va॑kṣa॒tsagdhi॒ᳪ sapī॑tima॒nyā nave॑na॒ pūrvaṃ॒ daya॑māne purā॒ṇena॒ nava॒madhā॑tā॒mūrja॑mū॒rjāhu॑tī ū॒rjaya॑māne॒ vasu॒ vāryā॑ṇi॒ yaja॑mānāya śikṣi॒te va॑su॒vane॑ vasu॒dheya॑sya vītāṃ॒ yaja॑ | | १६ | |
दे॒वा दैव्या॒ होता॑रा दे॒वमिन्द्र॑मवर्धताम् ।
ह॒ताघ॑शᳪसा॒वाभा॑र्ष्टां॒ वसु॒ वार्या॑णि॒ यज॑मानाय शिक्षि॒तौ व॑सु॒वने॑ वसु॒धेय॑स्य वीतां॒ यज॑ ।। १७ ।।
de॒vā daivyā॒ hotā॑rā de॒vamindra॑mavardhatām | ha॒tāgha॑śaᳪsā॒vābhā॑rṣṭāṃ॒ vasu॒ vāryā॑ṇi॒ yaja॑mānāya śikṣi॒tau va॑su॒vane॑ vasu॒dheya॑sya vītāṃ॒ yaja॑ | | १७ | |
दे॒वीस्ति॒स्रस्ति॒स्रो दे॒वीः पति॒मिन्द्र॑मवर्धयन् ।
अस्पृ॑क्ष॒द्भार॑ती॒ दिव॑ᳪ रु॒द्रैर्य॒ज्ञᳪ सर॑स्व॒तीडा॑ वसु॑मती गृ॒हान् व॑सु॒वने॑ वसु॒धेय॑स्य व्यन्तु॒ यज॑ ।। १८ ।।
de॒vīsti॒srasti॒sro de॒vīḥ pati॒mindra॑mavardhayan | aspṛ॑kṣa॒dbhāra॑tī॒ diva॑ᳪ ru॒drairya॒jñaᳪ sara॑sva॒tīḍā॑ vasu॑matī gṛ॒hān va॑su॒vane॑ vasu॒dheya॑sya vyantu॒ yaja॑ | | १८ | |
दे॒व इन्द्रो॒ नरा॒शᳪस॑स्त्रिवरू॒थस्त्रि॑बन्धु॒रो दे॒वमिन्द्र॑मवर्धयत् ।
श॒तेन॑ शितिपृ॒ष्ठाना॒माहि॑तः स॒हस्रे॑ण॒ प्र व॑र्तते मि॒त्रावरु॒णेद॑स्य हो॒त्रमर्ह॑तो॒ बृह॒स्पति॑ स्तो॒त्रम॒श्विनाध्व॑र्यवं वसु॒वने॑ वसु॒धेय॑स्य वेत्तु॒ यज॑ ।। १९ ।।
de॒va indro॒ narā॒śaᳪsa॑strivarū॒thastri॑bandhu॒ro de॒vamindra॑mavardhayat | śa॒tena॑ śitipṛ॒ṣṭhānā॒māhi॑taḥ sa॒hasre॑ṇa॒ pra va॑rtate mi॒trāvaru॒ṇeda॑sya ho॒tramarha॑to॒ bṛha॒spati॑ sto॒trama॒śvinādhva॑ryavaṃ vasu॒vane॑ vasu॒dheya॑sya vettu॒ yaja॑ | | १९ | |
दे॒वो देवै॒र्वन॒स्पति॒र्हिर॑ण्यपर्णो॒ मधु॑शाखः सुपिप्प॒लो दे॒वमिन्द्र॑मवर्धयत् ।
दिव॒मग्रे॑णास्पृक्ष॒दान्तरि॑क्षं पृथि॒वीम॑दृᳪहीद्वसु॒वने॑ वसु॒धेय॑स्य वेतु॒ यज॑ ।। २० ।।
de॒vo devai॒rvana॒spati॒rhira॑ṇyaparṇo॒ madhu॑śākhaḥ supippa॒lo de॒vamindra॑mavardhayat | diva॒magre॑ṇāspṛkṣa॒dāntari॑kṣaṃ pṛthi॒vīma॑dṛᳪhīdvasu॒vane॑ vasu॒dheya॑sya vetu॒ yaja॑ | | २० | |
दे॒वं ब॒र्हिर्वारि॑तीनां दे॒वमिन्द्र॑मवर्धयत् ।
स्वा॒स॒स्थमिन्द्रे॒णास॑न्नम॒न्या ब॒र्हीᳪष्य॒भ्य॒भूद्वसु॒वने॑ वसु॒धेय॑स्य वेतु॒ यज॑ ।। २१ ।।
de॒vaṃ ba॒rhirvāri॑tīnāṃ de॒vamindra॑mavardhayat | svā॒sa॒sthamindre॒ṇāsa॑nnama॒nyā ba॒rhīᳪṣya॒bhya॒bhūdvasu॒vane॑ vasu॒dheya॑sya vetu॒ yaja॑ | | २१ | |
दे॒वो अ॒ग्निः स्वि॑ष्ट॒कृद्दे॒वमिन्द्र॑मवर्धयत् ।
स्वि॑ष्टं कु॒र्वन्त्स्वि॑ष्ट॒कृत्स्वि॑ष्टम॒द्य क॑रोतु नो वसु॒वने॑ वसु॒धेय॑स्य वेतु॒ यज॑ ।। २२ ।।
de॒vo a॒gniḥ svi॑ṣṭa॒kṛdde॒vamindra॑mavardhayat | svi॑ṣṭaṃ ku॒rvantsvi॑ṣṭa॒kṛtsvi॑ṣṭama॒dya ka॑rotu no vasu॒vane॑ vasu॒dheya॑sya vetu॒ yaja॑ | | २२ | |
अ॒ग्निम॒द्य होता॑रमवृणीता॒यं यज॑मान॒: पच॒न्पक्ती॒: पच॑न्पुरो॒डाशं॑ ब॒ध्नन्निन्द्रा॑य॒ छाग॑म् ।
सू॒प॒स्था अ॒द्य दे॒वो वन॒स्पति॑रभव॒दिन्द्रा॑य॒ छागे॑न । अघ॒त्तं मे॑द॒स्तः प्रति॑ पच॒ताग्र॑भी॒दवी॑वृधत्पुरो॒डाशे॑न ।
त्वाम॒द्य ऋ॑षे ।। २३ ।।
a॒gnima॒dya hotā॑ramavṛṇītā॒yaṃ yaja॑māna॒: paca॒npaktī॒: paca॑npuro॒ḍāśaṃ॑ ba॒dhnannindrā॑ya॒ chāga॑m | sū॒pa॒sthā a॒dya de॒vo vana॒spati॑rabhava॒dindrā॑ya॒ chāge॑na | agha॒ttaṃ me॑da॒staḥ prati॑ paca॒tāgra॑bhī॒davī॑vṛdhatpuro॒ḍāśe॑na | tvāma॒dya ṛ॑ṣe | | २३ | |
होता॑ यक्षत्समिधा॒नं म॒हद्यश॒: सुस॑मिद्धं॒ वरे॑ण्यम॒ग्निमिन्द्रं॑ वयो॒धस॑म् ।
गा॒य॒त्रीं छन्द॑ इन्द्रि॒यं त्र्यविं॒ गां वयो॒ दध॒द्वेत्वाज्य॑स्य॒ होत॒र्यज॑ ।। २४ ।।
hotā॑ yakṣatsamidhā॒naṃ ma॒hadyaśa॒: susa॑middhaṃ॒ vare॑ṇyama॒gnimindraṃ॑ vayo॒dhasa॑m | gā॒ya॒trīṃ chanda॑ indri॒yaṃ tryaviṃ॒ gāṃ vayo॒ dadha॒dvetvājya॑sya॒ hota॒ryaja॑ | | २४ | |
होता॑ यक्ष॒त्तनू॒नपा॑तमु॒द्भिदं॒ यं गर्भ॒मदि॑तिर्द॒धे शुचि॒मिन्द्रं॑ वयो॒धस॑म् ।
उ॒ष्णिहं॒ छन्द॑ इन्द्रि॒यं दि॑त्य॒वाहं॒ गां वयो॒ दध॒द्वेत्वाज्य॑स्य॒ होत॒र्यज॑ ।। २५ ।।
hotā॑ yakṣa॒ttanū॒napā॑tamu॒dbhidaṃ॒ yaṃ garbha॒madi॑tirda॒dhe śuci॒mindraṃ॑ vayo॒dhasa॑m | u॒ṣṇihaṃ॒ chanda॑ indri॒yaṃ di॑tya॒vāhaṃ॒ gāṃ vayo॒ dadha॒dvetvājya॑sya॒ hota॒ryaja॑ | | २५ | |
होता॑ यक्षदी॒डेन्य॑मीडि॒तं वृ॑त्र॒हन्त॑म॒मिडा॑भि॒रीड्यँ॒ सह॒: सोम॒मिन्द्रँ॑ वयो॒धस॑म् ।
अ॒नु॒ष्टुभं॒ छन्द॑ इन्द्रि॒यं पञ्चा॑विं॒ गां वयो॒ दध॒द्वेत्वाज्य॑स्य॒ होत॒र्यज॑ ।। २६ ।।
hotā॑ yakṣadī॒ḍenya॑mīḍi॒taṃ vṛ॑tra॒hanta॑ma॒miḍā॑bhi॒rīḍyam॒̐ saha॒: soma॒mindram̐॑ vayo॒dhasa॑m | a॒nu॒ṣṭubhaṃ॒ chanda॑ indri॒yaṃ pañcā॑viṃ॒ gāṃ vayo॒ dadha॒dvetvājya॑sya॒ hota॒ryaja॑ | | २६ | |
होता॑ यक्षत्सुब॒र्हिषं॑ पूष॒ण्वन्त॒मम॑र्त्य॒ᳪ सीद॑न्तं ब॒र्हिषि॑ प्रि॒येऽमृतेन्द्रं॑ वयो॒धस॑म् ।
बृ॒ह॒तीं छन्द॑ इन्द्रि॒यं त्रि॑व॒त्सं गां वयो॒ दध॒द्वेत्वाज्य॑स्य॒ होत॒र्यज॑ ।। २७ ।।
hotā॑ yakṣatsuba॒rhiṣaṃ॑ pūṣa॒ṇvanta॒mama॑rtya॒ᳪ sīda॑ntaṃ ba॒rhiṣi॑ pri॒ye’mṛtendraṃ॑ vayo॒dhasa॑m | bṛ॒ha॒tīṃ chanda॑ indri॒yaṃ tri॑va॒tsaṃ gāṃ vayo॒ dadha॒dvetvājya॑sya॒ hota॒ryaja॑ | | २७ | |
होता॑ यक्ष॒द्व्यच॑स्वतीः सुप्राय॒णा ऋ॑ता॒वृधो॒ द्वारो॑ दे॒वीर्हि॑र॒ण्ययी॑र्ब्र॒ह्माण॒मिन्द्रं॑ वयो॒धस॑म् ।
प॒ङ्क्तिं छन्द॑ इ॒हेन्द्रि॒यं तु॑र्य॒वाहं॒ गां वयो॒ दध॒द्व्यन्त्वाज्य॑स्य॒ होत॒र्यज॑ ।। २८ ।।
hotā॑ yakṣa॒dvyaca॑svatīḥ suprāya॒ṇā ṛ॑tā॒vṛdho॒ dvāro॑ de॒vīrhi॑ra॒ṇyayī॑rbra॒hmāṇa॒mindraṃ॑ vayo॒dhasa॑m | pa॒ṅktiṃ chanda॑ i॒hendri॒yaṃ tu॑rya॒vāhaṃ॒ gāṃ vayo॒ dadha॒dvyantvājya॑sya॒ hota॒ryaja॑ | | २८ | |
होता॑ यक्षत्सु॒पेश॑सा सुशि॒ल्पे बृ॑ह॒ती उ॒भे नक्तो॒षासा॒ न द॑र्श॒ते विश्व॒मिन्द्रं॑ वयो॒धस॑म् ।
त्रि॒ष्टुभं॒ छन्द॑ इ॒हेन्द्रि॒यं प॑ष्ठ॒वाहं॒ गां वयो॒ दध॑द्वी॒तामाज्य॑स्य॒ होत॒र्यज॑ ।। २९ ।।
hotā॑ yakṣatsu॒peśa॑sā suśi॒lpe bṛ॑ha॒tī u॒bhe nakto॒ṣāsā॒ na da॑rśa॒te viśva॒mindraṃ॑ vayo॒dhasa॑m | tri॒ṣṭubhaṃ॒ chanda॑ i॒hendri॒yaṃ pa॑ṣṭha॒vāhaṃ॒ gāṃ vayo॒ dadha॑dvī॒tāmājya॑sya॒ hota॒ryaja॑ | | २९ | |
होता॑ यक्ष॒त्प्रचे॑तसा दे॒वाना॑मुत्त॒मं यशो॒ होता॑रा दैव्या क॒वी स॒युजेन्द्रं॑ वयो॒धस॑म् ।
जग॑तीं॒ छन्द॑ इन्द्रि॒यम॑न॒ड्वाहं॒ गां वयो॒ दध॑द्वी॒तामाज्य॑स्य॒ होत॒र्यज॑ ।। ३० ।।
hotā॑ yakṣa॒tprace॑tasā de॒vānā॑mutta॒maṃ yaśo॒ hotā॑rā daivyā ka॒vī sa॒yujendraṃ॑ vayo॒dhasa॑m | jaga॑tīṃ॒ chanda॑ indri॒yama॑na॒ḍvāhaṃ॒ gāṃ vayo॒ dadha॑dvī॒tāmājya॑sya॒ hota॒ryaja॑ | | ३० | |
होता॑ यक्ष॒त्पेश॑स्वतीस्ति॒स्रो दे॒वीर्हि॑र॒ण्ययी॒र्भार॑तीर्बृह॒तीर्म॒हीः पति॒मिन्द्रं॑ वयो॒धस॑म् ।
वि॒राजं॒ छन्द॑ इ॒हेन्द्रि॒यं धे॒नुं गां न वयो॒ दध॒द्व्यन्त्वाज्य॑स्य॒ होत॒र्यज॑ ।। ३१ ।।
hotā॑ yakṣa॒tpeśa॑svatīsti॒sro de॒vīrhi॑ra॒ṇyayī॒rbhāra॑tīrbṛha॒tīrma॒hīḥ pati॒mindraṃ॑ vayo॒dhasa॑m | vi॒rājaṃ॒ chanda॑ i॒hendri॒yaṃ dhe॒nuṃ gāṃ na vayo॒ dadha॒dvyantvājya॑sya॒ hota॒ryaja॑ | | ३१ | |
होता॑ यक्षत्सु॒रेत॑सं॒ त्वष्टा॑रं पुष्टि॒वर्ध॑नᳪ रू॒पाणि॒ बिभ्र॑तं॒ पृथ॒क् पुष्टि॒मिन्द्रं॑ वयो॒धस॑म् ।
द्वि॒पदं॒ छन्द॑ इन्द्रि॒यमु॒क्षाणं॒ गां न वयो॒ दध॒द्वेत्वाज्य॑स्य॒ होत॒र्यज॑ ।। ३२ ।।
hotā॑ yakṣatsu॒reta॑saṃ॒ tvaṣṭā॑raṃ puṣṭi॒vardha॑naᳪ rū॒pāṇi॒ bibhra॑taṃ॒ pṛtha॒k puṣṭi॒mindraṃ॑ vayo॒dhasa॑m | dvi॒padaṃ॒ chanda॑ indri॒yamu॒kṣāṇaṃ॒ gāṃ na vayo॒ dadha॒dvetvājya॑sya॒ hota॒ryaja॑ | | ३२ | |
होता॑ यक्ष॒द्वन॒स्पति॑ᳪ शमि॒तार॑ᳪ श॒तक्र॑तु॒ᳪ हिर॑ण्यपर्णमु॒क्थिन॑ᳪ रश॒नां बिभ्र॑तं व॒शिं भग॒मिन्द्रं॑ वयो॒धस॑म् ।
क॒कुभं॒ छन्द॑ इ॒हेन्द्रि॒यं व॒शां वे॒हतं॒ गां वयो॒ दध॒द्वेत्वाज्य॑स्य॒ होत॒र्यज॑ ।। ३३ ।।
hotā॑ yakṣa॒dvana॒spati॑ᳪ śami॒tāra॑ᳪ śa॒takra॑tu॒ᳪ hira॑ṇyaparṇamu॒kthina॑ᳪ raśa॒nāṃ bibhra॑taṃ va॒śiṃ bhaga॒mindraṃ॑ vayo॒dhasa॑m | ka॒kubhaṃ॒ chanda॑ i॒hendri॒yaṃ va॒śāṃ ve॒hataṃ॒ gāṃ vayo॒ dadha॒dvetvājya॑sya॒ hota॒ryaja॑ | | ३३ | |
होता॑ यक्ष॒त्स्वाहा॑कृतीर॒ग्निं गृ॒हप॑तिं॒ पृथ॒ग्वरु॑णं भेष॒जं क॒विं क्ष॒त्रमिन्द्रं॑ वयो॒धस॑म् ।
अति॑च्छन्दसं॒ छन्द॑ इन्द्रि॒यं बृ॒हदृ॑ष॒भं गां वयो॒ दध॒द्व्यन्त्वाज्य॑स्य॒ होत॒र्यज॑ ।। ३४ ।।
hotā॑ yakṣa॒tsvāhā॑kṛtīra॒gniṃ gṛ॒hapa॑tiṃ॒ pṛtha॒gvaru॑ṇaṃ bheṣa॒jaṃ ka॒viṃ kṣa॒tramindraṃ॑ vayo॒dhasa॑m | ati॑cchandasaṃ॒ chanda॑ indri॒yaṃ bṛ॒hadṛ॑ṣa॒bhaṃ gāṃ vayo॒ dadha॒dvyantvājya॑sya॒ hota॒ryaja॑ | | ३४ | |
दे॒वं ब॒र्हिर्व॑यो॒धसं॑ दे॒वमिन्द्र॑मवर्धयत् ।
गा॒य॒त्र्या छन्द॑सेन्द्रि॒यं चक्षु॒रिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ।। ३५ ।।
de॒vaṃ ba॒rhirva॑yo॒dhasaṃ॑ de॒vamindra॑mavardhayat | gā॒ya॒tryā chanda॑sendri॒yaṃ cakṣu॒rindre॒ vayo॒ dadha॑dvasu॒vane॑ vasu॒dheya॑sya vetu॒ yaja॑ | | ३५ | |
दे॒वीर्द्वारो॑ वयो॒धस॒ᳪ शुचि॒मिन्द्र॑मवर्धयन् ।
उ॒ष्णिहा॒ छन्द॑सेन्द्रि॒यं प्रा॒णमिन्द्रे॒ वयो॒ दध॑द्वसु॒वने॑ वसु॒धेय॑स्य व्यन्तु॒ यज॑ ।। ३६ ।।
de॒vīrdvāro॑ vayo॒dhasa॒ᳪ śuci॒mindra॑mavardhayan | u॒ṣṇihā॒ chanda॑sendri॒yaṃ prā॒ṇamindre॒ vayo॒ dadha॑dvasu॒vane॑ vasu॒dheya॑sya vyantu॒ yaja॑ | | ३६ | |
दे॒वी उ॒षासा॒नक्ता॑ दे॒वमिन्द्रं॑ वयो॒धसं॑ दे॒वी दे॒वम॑वर्धताम् ।
अ॒नु॒ष्टुभा॒ छन्द॑सेन्द्रि॒यं बल॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ।। ३७ ।।
de॒vī u॒ṣāsā॒naktā॑ de॒vamindraṃ॑ vayo॒dhasaṃ॑ de॒vī de॒vama॑vardhatām | a॒nu॒ṣṭubhā॒ chanda॑sendri॒yaṃ bala॒mindre॒ vayo॒ dadha॑dvasu॒vane॑ vasu॒dheya॑sya vītāṃ॒ yaja॑ | | ३७ | |
दे॒वी जोष्ट्री॒ वसु॑धिती दे॒वमिन्द्रं॑ वयो॒धसं॑ दे॒वी दे॒वम॑वर्धताम् ।
बृ॒ह॒त्या छन्द॑सेन्द्रि॒यᳪ श्रोत्र॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ।। ३८ ।।
de॒vī joṣṭrī॒ vasu॑dhitī de॒vamindraṃ॑ vayo॒dhasaṃ॑ de॒vī de॒vama॑vardhatām | bṛ॒ha॒tyā chanda॑sendri॒yaᳪ śrotra॒mindre॒ vayo॒ dadha॑dvasu॒vane॑ vasu॒dheya॑sya vītāṃ॒ yaja॑ | | ३८ | |
दे॒वी ऊ॒र्जाहु॑ती॒ दुघे॑ सु॒दु॒घे॒ पय॒सेन्द्रं॑ वयो॒धसं॑ दे॒वी दे॒वम॑वर्धताम् ।
प॒ङ्क्त्या छन्द॑सेन्द्रि॒यᳪ शु॒क्रमिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ।। ३९ ।।
de॒vī ū॒rjāhu॑tī॒ dughe॑ su॒du॒ghe॒ paya॒sendraṃ॑ vayo॒dhasaṃ॑ de॒vī de॒vama॑vardhatām | pa॒ṅktyā chanda॑sendri॒yaᳪ śu॒kramindre॒ vayo॒ dadha॑dvasu॒vane॑ vasu॒dheya॑sya vītāṃ॒ yaja॑ | | ३९ | |
दे॒वा दैव्या॒ होता॑रा दे॒वमिन्द्रं॑ वयो॒धसं॑ दे॒वौ दे॒वम॑वर्धताम् ।
त्रि॒ष्टुभा॒ छन्द॑सेन्द्रि॒यं त्विषि॒मिन्द्रे॒ वयो॒ दध॑द्वसु॒वने॑ वसु॒धेय॑स्य वीतां॒ यज॑ ।। ४० ।।
de॒vā daivyā॒ hotā॑rā de॒vamindraṃ॑ vayo॒dhasaṃ॑ de॒vau de॒vama॑vardhatām | tri॒ṣṭubhā॒ chanda॑sendri॒yaṃ tviṣi॒mindre॒ vayo॒ dadha॑dvasu॒vane॑ vasu॒dheya॑sya vītāṃ॒ yaja॑ | | ४० | |
दे॒वीस्ति॒स्रस्ति॒स्रो दे॒वीर्व॑यो॒धसं॒ पति॒मिन्द्र॑मवर्धयन् ।
जग॑त्या॒ छन्द॑सेन्द्रि॒यᳪ शूष॒मिन्द्रे॒ वयो॒ दध॑द्वसु॒वने॑ वसु॒धेय॑स्य व्यन्तु॒ यज॑ ।। ४१ ।।
de॒vīsti॒srasti॒sro de॒vīrva॑yo॒dhasaṃ॒ pati॒mindra॑mavardhayan | jaga॑tyā॒ chanda॑sendri॒yaᳪ śūṣa॒mindre॒ vayo॒ dadha॑dvasu॒vane॑ vasu॒dheya॑sya vyantu॒ yaja॑ | | ४१ | |
दे॒वो नरा॒शᳪसो॑ दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
वि॒राजा॒ छन्द॑सेन्द्रि॒यᳪ रु॒पमिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ।। ४२ ।।
de॒vo narā॒śaᳪso॑ de॒vamindraṃ॑ vayo॒dhasaṃ॑ de॒vo de॒vama॑vardhayat | vi॒rājā॒ chanda॑sendri॒yaᳪ ru॒pamindre॒ vayo॒ dadha॑dvasu॒vane॑ vasu॒dheya॑sya vetu॒ yaja॑ | | ४२ | |
दे॒वो वन॒स्पति॑र्दे॒वमिन्द्रं॑ वयो॒धसं॑ दे॒वो दे॒वम॑वर्धयत् ।
द्विप॑दा॒ छन्द॑सेन्द्रि॒यं भग॒मिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ।। ४३ ।।
de॒vo vana॒spati॑rde॒vamindraṃ॑ vayo॒dhasaṃ॑ de॒vo de॒vama॑vardhayat | dvipa॑dā॒ chanda॑sendri॒yaṃ bhaga॒mindre॒ vayo॒ dadha॑dvasu॒vane॑ vasu॒dheya॑sya vetu॒ yaja॑ | | ४३ | |
दे॒वं ब॒र्हिर्वारि॑तीनां दे॒वमिन्द्रं॑ वयो॒धसं॑ दे॒वं दे॒वम॑वर्धयत् ।
क॒कुभा॒ छन्द॑सेन्द्रि॒यं यश॒ इन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ।। ४४ ।।
de॒vaṃ ba॒rhirvāri॑tīnāṃ de॒vamindraṃ॑ vayo॒dhasaṃ॑ de॒vaṃ de॒vama॑vardhayat | ka॒kubhā॒ chanda॑sendri॒yaṃ yaśa॒ indre॒ vayo॒ dadha॑dvasu॒vane॑ vasu॒dheya॑sya vetu॒ yaja॑ | | ४४ | |
दे॒वो अ॒ग्निः स्वि॑ष्ट॒कृद्दे॒वमिन्द्रं॑ वयो॒धसं॑ दे॒वम॑वर्धयत् ।
अति॑च्छन्दसा॒ छन्द॑सेन्द्रि॒यं क्ष॒त्रमिन्द्रे॒ वयो॒ दध॑द्वसु॒वने॑ वसु॒धेय॑स्य वेतु॒ यज॑ ।। ४५ ।।
de॒vo a॒gniḥ svi॑ṣṭa॒kṛdde॒vamindraṃ॑ vayo॒dhasaṃ॑ de॒vama॑vardhayat | ati॑cchandasā॒ chanda॑sendri॒yaṃ kṣa॒tramindre॒ vayo॒ dadha॑dvasu॒vane॑ vasu॒dheya॑sya vetu॒ yaja॑ | | ४५ | |
अ॒ग्निम॒द्य होता॑रमवृणीता॒यं यज॑मान॒: पच॒न्पक्ती॒: पच॑न्पुरो॒डाशं॑ ब॒ध्नन्निन्द्रा॑य वयो॒धसे॒ छाग॑म् ।
सू॒प॒स्था अ॒द्य दे॒वो वन॒स्पति॑रभव॒दिन्द्रा॑य वयो॒धसे॒ छागे॑न ।
अघ॒त्तं मे॑द॒स्तः प्रति॑पच॒ताग्र॑भी॒दवी॑वृधत्पुरो॒डाशे॑न । त्वाम॒द्य ऋ॑षे ।। ४६ ।।
a॒gnima॒dya hotā॑ramavṛṇītā॒yaṃ yaja॑māna॒: paca॒npaktī॒: paca॑npuro॒ḍāśaṃ॑ ba॒dhnannindrā॑ya vayo॒dhase॒ chāga॑m | sū॒pa॒sthā a॒dya de॒vo vana॒spati॑rabhava॒dindrā॑ya vayo॒dhase॒ chāge॑na | agha॒ttaṃ me॑da॒staḥ prati॑paca॒tāgra॑bhī॒davī॑vṛdhatpuro॒ḍāśe॑na | tvāma॒dya ṛ॑ṣe | | ४६ | |