EeseDharmaSanātana Library
27अध्याय 27
Śukla Yajurveda Mādhyaṃdina ka Adhyay 27.
45 shlokसमा॑स्त्वाग्न ऋ॒तवो॑ वर्धयन्तु संवत्स॒रा ऋष॑यो॒ यानि॑ स॒त्या ।
सं दि॒व्येन॑ दीदिहि रोच॒नेन॒ विश्वा॒ आ भा॑हि प्र॒दिश॒श्चत॑स्रः ।। १ ।।
samā॑stvāgna ṛ॒tavo॑ vardhayantu saṃvatsa॒rā ṛṣa॑yo॒ yāni॑ sa॒tyā | saṃ di॒vyena॑ dīdihi roca॒nena॒ viśvā॒ ā bhā॑hi pra॒diśa॒ścata॑sraḥ | | १ | |
सं चे॒ध्यस्वा॑ग्ने॒ प्र च॑ बोधयैन॒मुच्च॑ तिष्ठ मह॒ते सौ॑भगाय ।
मा च॑ रिषदुपस॒त्ता ते॑ अग्ने ब्र॒ह्माण॑स्ते य॒शस॑: सन्तु॒ मान्ये ।। २ ।।
saṃ ce॒dhyasvā॑gne॒ pra ca॑ bodhayaina॒mucca॑ tiṣṭha maha॒te sau॑bhagāya | mā ca॑ riṣadupasa॒ttā te॑ agne bra॒hmāṇa॑ste ya॒śasa॑: santu॒ mānye | | २ | |
त्वाम॑ग्ने वृणते ब्राह्म॒णा इ॒मे शि॒वो अ॑ग्ने सं॒वर॑णे भवा नः ।
स॒प॒त्न॒हा नो॑ अभिमाति॒जिच्च॒ स्वे गये॑ गागृ॒ह्यप्र॑युच्छन् ।। ३ ।।
tvāma॑gne vṛṇate brāhma॒ṇā i॒me śi॒vo a॑gne saṃ॒vara॑ṇe bhavā naḥ | sa॒pa॒tna॒hā no॑ abhimāti॒jicca॒ sve gaye॑ gāgṛ॒hyapra॑yucchan | | ३ | |
इ॒है॒वाग्ने॒ अधि॑ धारया र॒यिं मा त्वा॒ नि क्र॑न्पूर्व॒चितो॑ निका॒रिण॑: ।
क्ष॒त्रम॑ग्ने सु॒यम॑मस्तु॒ तुभ्य॑मुपस॒त्ता व॑र्धतां ते॒ अनि॑ष्टृतः ।। ४ ।।
i॒hai॒vāgne॒ adhi॑ dhārayā ra॒yiṃ mā tvā॒ ni kra॑npūrva॒cito॑ nikā॒riṇa॑: | kṣa॒trama॑gne su॒yama॑mastu॒ tubhya॑mupasa॒ttā va॑rdhatāṃ te॒ ani॑ṣṭṛtaḥ | | ४ | |
क्ष॒त्रेणा॑ग्ने॒ स्वायु॒: सᳪ र॑भस्व मि॒त्रेणा॑ग्ने मित्र॒धेये॑ यतस्व ।
स॒जा॒तानां॑ मध्यम॒स्था ए॑धि॒ राज्ञा॑मग्ने विह॒व्यो॒ दीदिही॒ह ।। ५ ।।
kṣa॒treṇā॑gne॒ svāyu॒: saᳪ ra॑bhasva mi॒treṇā॑gne mitra॒dheye॑ yatasva | sa॒jā॒tānāṃ॑ madhyama॒sthā e॑dhi॒ rājñā॑magne viha॒vyo॒ dīdihī॒ha | | ५ | |
अति॒ निहो॒ अति॒ स्रिधोऽत्यचि॑त्ति॒मत्यरा॑तिमग्ने ।
विश्वा॒ ह्य॑ग्ने दुरि॒ता सह॒स्वाथा॒स्मभ्य॑ᳪ स॒हवी॑राᳪ र॒यिं दा॑: ।। ६ ।।
ati॒ niho॒ ati॒ sridho’tyaci॑tti॒matyarā॑timagne | viśvā॒ hya॑gne duri॒tā saha॒svāthā॒smabhya॑ᳪ sa॒havī॑rāᳪ ra॒yiṃ dā॑: | | ६ | |
अ॒ना॒धृ॒ष्यो जा॒तवे॑दा॒ अनि॑ष्टृतो वि॒राडग्ने॑ क्षत्र॒भृद्दी॑दिही॒ह ।
विश्वा॒ आशा॑: प्रमु॒ञ्चन्मानु॑षीर्भि॒यः शि॒वेभि॑र॒द्य परि॑ पाहि नो वृ॒धे ।। ७ ।।
a॒nā॒dhṛ॒ṣyo jā॒tave॑dā॒ ani॑ṣṭṛto vi॒rāḍagne॑ kṣatra॒bhṛddī॑dihī॒ha | viśvā॒ āśā॑: pramu॒ñcanmānu॑ṣīrbhi॒yaḥ śi॒vebhi॑ra॒dya pari॑ pāhi no vṛ॒dhe | | ७ | |
बृह॑स्पते सवितर्बो॒धयै॑न॒ᳪ सᳪशि॑तं चित्सन्त॒राᳪ सᳪ शि॑शाधि ।
व॒र्धयै॑नं मह॒ते सौ॑भगाय॒ विश्व॑ एन॒मनु॑ मदन्तु दे॒वाः ।। ८ ।।
bṛha॑spate savitarbo॒dhayai॑na॒ᳪ saᳪśi॑taṃ citsanta॒rāᳪ saᳪ śi॑śādhi | va॒rdhayai॑naṃ maha॒te sau॑bhagāya॒ viśva॑ ena॒manu॑ madantu de॒vāḥ | | ८ | |
अ॒मु॒त्र॒भूया॒दध॒ यद्य॒मस्य॒ बृह॑स्पते अ॒भिश॑स्ते॒रमु॑ञ्चः ।
प्रत्यौ॑हताम॒श्विना॑ मृ॒त्युम॑स्माद्दे॒वाना॑मग्ने भि॒षजा॒ शची॑भिः ।। ९ ।।
a॒mu॒tra॒bhūyā॒dadha॒ yadya॒masya॒ bṛha॑spate a॒bhiśa॑ste॒ramu॑ñcaḥ | pratyau॑hatāma॒śvinā॑ mṛ॒tyuma॑smādde॒vānā॑magne bhi॒ṣajā॒ śacī॑bhiḥ | | ९ | |
उद्व॒यं तम॑स॒स्परि॒ स्व: पश्य॑न्त॒ उत्त॑रम् ।
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।। १० ।।
udva॒yaṃ tama॑sa॒spari॒ sva: paśya॑nta॒ utta॑ram | de॒vaṃ de॑va॒trā sūrya॒maga॑nma॒ jyoti॑rutta॒mam | | १० | |
ऊ॒र्ध्वा अ॑स्य स॒मिधो॑ भवन्त्यू॒र्ध्वा शु॒क्रा शो॒चीᳪष्य॒ग्नेः ।
द्यु॒मत्त॑मा सु॒प्रती॑कस्य सू॒नोः ।। ११ ।।
ū॒rdhvā a॑sya sa॒midho॑ bhavantyū॒rdhvā śu॒krā śo॒cīᳪṣya॒gneḥ | dyu॒matta॑mā su॒pratī॑kasya sū॒noḥ | | ११ | |
तनू॒नपा॒दसु॑रो वि॒श्ववे॑दा दे॒वो दे॒वेषु॑ दे॒वः ।
प॒थो अ॑नक्तु॒ मध्वा॑ घृ॒तेन॑ ।। १२ ।।
tanū॒napā॒dasu॑ro vi॒śvave॑dā de॒vo de॒veṣu॑ de॒vaḥ | pa॒tho a॑naktu॒ madhvā॑ ghṛ॒tena॑ | | १२ | |
मध्वा॑ य॒ज्ञं न॑क्षसे प्रीणा॒नो नरा॒शᳪसो॑ अग्ने ।
सु॒कृद्दे॒वः स॑वि॒ता वि॒श्ववा॑रः ।। १३ ।।
madhvā॑ ya॒jñaṃ na॑kṣase prīṇā॒no narā॒śaᳪso॑ agne | su॒kṛdde॒vaḥ sa॑vi॒tā vi॒śvavā॑raḥ | | १३ | |
अच्छा॒यमे॑ति॒ शव॑सा घृ॒तेने॑डा॒नो वह्नि॒र्नम॑सा ।
अ॒ग्निᳪ स्रुचो॑ अध्व॒रेषु॑ प्र॒यत्सु॑ ।। १४ ।।
acchā॒yame॑ti॒ śava॑sā ghṛ॒tene॑ḍā॒no vahni॒rnama॑sā | a॒gniᳪ sruco॑ adhva॒reṣu॑ pra॒yatsu॑ | | १४ | |
स य॑क्षदस्य महि॒मान॑म॒ग्नेः स ईं॑ म॒न्द्रा सु॑प्र॒यस॑: ।
वसु॒श्चेति॑ष्ठो वसु॒धात॑मश्च ।। १५ ।।
sa ya॑kṣadasya mahi॒māna॑ma॒gneḥ sa īṃ॑ ma॒ndrā su॑pra॒yasa॑: | vasu॒śceti॑ṣṭho vasu॒dhāta॑maśca | | १५ | |
द्वारो॑ दे॒वीरन्व॑स्य॒ विश्वे॑ व्र॒ता द॑दन्ते अ॒ग्नेः ।
उ॒रु॒व्यच॑सो॒ धाम्ना॒ पत्य॑मानाः ।। १६ ।।
dvāro॑ de॒vīranva॑sya॒ viśve॑ vra॒tā da॑dante a॒gneḥ | u॒ru॒vyaca॑so॒ dhāmnā॒ patya॑mānāḥ | | १६ | |
ते अ॑स्य॒ योष॑णे दि॒व्ये न योना॑ उ॒षासा॒नक्ता॑ ।
इ॒मं य॒ज्ञमव॑तामध्व॒रं न॑: ।। १७ ।।
te a॑sya॒ yoṣa॑ṇe di॒vye na yonā॑ u॒ṣāsā॒naktā॑ | i॒maṃ ya॒jñamava॑tāmadhva॒raṃ na॑: | | १७ | |
दै॑व्या॒ होतारा ऊ॒र्ध्वम॑ध्व॒रं नो॒ऽग्नेर्जु॒ह्वाम॒भि गृ॑णीतम् ।
कृ॒णु॒तं न॒: स्वि॒ष्टम् ।। १८ ।।
dai॑vyā॒ hotārā ū॒rdhvama॑dhva॒raṃ no॒’gnerju॒hvāma॒bhi gṛ॑ṇītam | kṛ॒ṇu॒taṃ na॒: svi॒ṣṭam | | १८ | |
ति॒स्रो दे॒वीर्ब॒र्हिरेदᳪ स॑द॒न्त्विडा॒ सर॑स्वती॒ भार॑ती ।
म॒ही गृ॑णा॒ना ।। १९ ।।
ti॒sro de॒vīrba॒rhiredaᳪ sa॑da॒ntviḍā॒ sara॑svatī॒ bhāra॑tī | ma॒hī gṛ॑ṇā॒nā | | १९ | |
तन्न॑स्तु॒रीप॒मद्भु॑तं पुरु॒क्षु त्वष्टा॑ सु॒वीर्य॑म् ।
रा॒यस्पोषं॒ वि ष्य॑तु॒ नाभि॑म॒स्मे ।। २० ।।
tanna॑stu॒rīpa॒madbhu॑taṃ puru॒kṣu tvaṣṭā॑ su॒vīrya॑m | rā॒yaspoṣaṃ॒ vi ṣya॑tu॒ nābhi॑ma॒sme | | २० | |
वन॑स्प॒तेऽव॑ सृजा॒ ररा॑ण॒स्त्मना॑ दे॒वेषु॑ ।
अ॒ग्निर्ह॒व्यᳪ श॑मि॒ता सू॑दयाति ।। २१ ।।
vana॑spa॒te’va॑ sṛjā॒ rarā॑ṇa॒stmanā॑ de॒veṣu॑ | a॒gnirha॒vyaᳪ śa॑mi॒tā sū॑dayāti | | २१ | |
अग्ने॒ स्वाहा॑ कृणुहि जातवेद॒ इन्द्रा॑य ह॒व्यम् ।
विश्वे॑ दे॒वा ह॒विरि॒दं जु॑षन्ताम् ।। २२ ।।
agne॒ svāhā॑ kṛṇuhi jātaveda॒ indrā॑ya ha॒vyam | viśve॑ de॒vā ha॒viri॒daṃ ju॑ṣantām | | २२ | |
पीवो॑ अन्ना रयि॒वृध॑: सुमे॒धाः श्वे॒तः सि॑षक्ति नि॒युता॑मभि॒श्रीः ।
ते वा॒यवे॒ सम॑नसो॒ वि त॑स्थु॒र्विश्वेन्नर॑: स्वप॒त्यानि॑ चक्रुः ।। २३ ।।
pīvo॑ annā rayi॒vṛdha॑: sume॒dhāḥ śve॒taḥ si॑ṣakti ni॒yutā॑mabhi॒śrīḥ | te vā॒yave॒ sama॑naso॒ vi ta॑sthu॒rviśvennara॑: svapa॒tyāni॑ cakruḥ | | २३ | |
रा॒ये नु यं ज॒ज्ञतू॒ रोद॑सी॒मे रा॒ये दे॒वी धि॒षणा॑ धाति दे॒वम् ।
अध॑ वा॒युं नि॒युत॑: सश्चत॒ स्वा उ॒त श्वे॒तं वसु॑धितिं निरे॒के ।। २४ ।।
rā॒ye nu yaṃ ja॒jñatū॒ roda॑sī॒me rā॒ye de॒vī dhi॒ṣaṇā॑ dhāti de॒vam | adha॑ vā॒yuṃ ni॒yuta॑: saścata॒ svā u॒ta śve॒taṃ vasu॑dhitiṃ nire॒ke | | २४ | |
आपो॑ ह॒ यद्बृ॑ह॒तीर्विश्व॒माय॒न् गर्भं॒ दधा॑ना ज॒नय॑न्तीर॒ग्निम् ।
ततो॑ दे॒वाना॒ᳪ सम॑वर्त॒तासु॒रेक॒: कस्मै॑ दे॒वाय॑ ह॒विषा॑ विधेम ।। २५ ।।
āpo॑ ha॒ yadbṛ॑ha॒tīrviśva॒māya॒n garbhaṃ॒ dadhā॑nā ja॒naya॑ntīra॒gnim | tato॑ de॒vānā॒ᳪ sama॑varta॒tāsu॒reka॒: kasmai॑ de॒vāya॑ ha॒viṣā॑ vidhema | | २५ | |
यश्चि॒दापो॑ महि॒ना प॒र्यप॑श्य॒द्दक्षं॒ दधा॑ना ज॒नय॑न्तीर्य॒ज्ञम् ।
यो दे॒वेष्वधि॑ दे॒व एक॒ आसी॒त् कस्मै॑ दे॒वाय॑ ह॒विषा॑ विधेम ।। २६ ।।
yaści॒dāpo॑ mahi॒nā pa॒ryapa॑śya॒ddakṣaṃ॒ dadhā॑nā ja॒naya॑ntīrya॒jñam | yo de॒veṣvadhi॑ de॒va eka॒ āsī॒t kasmai॑ de॒vāya॑ ha॒viṣā॑ vidhema | | २६ | |
प्र याभि॒र्यासि॑ दा॒श्वाᳪस॒मच्छा॑ नि॒युद्भि॑र्वायवि॒ष्टये॑ दुरो॒णे ।
नि नो॑ र॒यिᳪ सु॒भोज॑सं युवस्व॒ नि वी॒रं गव्य॒मश्व्यं॑ च॒ राध॑: ।। २७ ।।
pra yābhi॒ryāsi॑ dā॒śvāᳪsa॒macchā॑ ni॒yudbhi॑rvāyavi॒ṣṭaye॑ duro॒ṇe | ni no॑ ra॒yiᳪ su॒bhoja॑saṃ yuvasva॒ ni vī॒raṃ gavya॒maśvyaṃ॑ ca॒ rādha॑: | | २७ | |
आ नो॑ नि॒युद्भि॑: श॒तिनी॑भिरध्व॒रᳪ स॑ह॒स्रिणी॑भि॒रुप॑ याहि य॒ज्ञम् ।
वायो॑ अ॒स्मिन्त्सव॑ने मादयस्व यू॒यं पा॑त स्व॒स्तिभि॒: सदा॑ नः ।। २८ ।।
ā no॑ ni॒yudbhi॑: śa॒tinī॑bhiradhva॒raᳪ sa॑ha॒sriṇī॑bhi॒rupa॑ yāhi ya॒jñam | vāyo॑ a॒smintsava॑ne mādayasva yū॒yaṃ pā॑ta sva॒stibhi॒: sadā॑ naḥ | | २८ | |
नि॒युत्वा॑न्वाय॒वा ग॑ह्य॒यᳪ शु॒क्रो अ॑यामि ते ।
गन्ता॑सि सुन्व॒तो गृ॒हम् ।। २९ ।।
ni॒yutvā॑nvāya॒vā ga॑hya॒yaᳪ śu॒kro a॑yāmi te | gantā॑si sunva॒to gṛ॒ham | | २९ | |
वायो॑ शु॒क्रो अ॑यामि ते॒ मध्वो॒ अग्रं॒ दिवि॑ष्टिषु ।
आ या॑हि॒ सोम॑पीतये स्पा॒र्हो दे॑व नि॒युत्व॑ता ।। ३० ।।
vāyo॑ śu॒kro a॑yāmi te॒ madhvo॒ agraṃ॒ divi॑ṣṭiṣu | ā yā॑hi॒ soma॑pītaye spā॒rho de॑va ni॒yutva॑tā | | ३० | |
वा॒युर॑ग्रे॒गा य॑ज्ञ॒प्रीः सा॒कं ग॒न्मन॑सा य॒ज्ञम् ।
शि॒वो नि॒युद्भि॑: शि॒वाभि॑: ।। ३१ ।।
vā॒yura॑gre॒gā ya॑jña॒prīḥ sā॒kaṃ ga॒nmana॑sā ya॒jñam | śi॒vo ni॒yudbhi॑: śi॒vābhi॑: | | ३१ | |
वायो॒ ये ते॑ सह॒स्रिणो॒ रथा॑स॒स्तेभि॒रा ग॑हि ।
नि॒युत्वा॒न्त्सोम॑पीतये ।। ३२ ।।
vāyo॒ ye te॑ saha॒sriṇo॒ rathā॑sa॒stebhi॒rā ga॑hi | ni॒yutvā॒ntsoma॑pītaye | | ३२ | |
एक॑या च द॒शभि॑श्च स्वभूते॒ द्वाभ्या॑मि॒ष्टये॑ विᳪश॒ती च॑ ।
ति॒सृभि॑श्च॒ वह॑से त्रि॒ᳪशता॑ च नि॒युद्भि॑र्वायवि॒ह ता वि मु॑ञ्च ।। ३३ ।।
eka॑yā ca da॒śabhi॑śca svabhūte॒ dvābhyā॑mi॒ṣṭaye॑ viᳪśa॒tī ca॑ | ti॒sṛbhi॑śca॒ vaha॑se tri॒ᳪśatā॑ ca ni॒yudbhi॑rvāyavi॒ha tā vi mu॑ñca | | ३३ | |
तव॑ वायवृतस्पते॒ त्वष्टु॑र्जामातरद्भुत ।
अवा॒ᳪस्या वृ॑णीमहे ।। ३४ ।।
tava॑ vāyavṛtaspate॒ tvaṣṭu॑rjāmātaradbhuta | avā॒ᳪsyā vṛ॑ṇīmahe | | ३४ | |
अ॒भि त्वा॑ शूर नोनु॒मोऽदु॑ग्धा इव धे॒नव॑: ।
ईशा॑नम॒स्य जग॑तः स्व॒र्दृश॒मीशा॑नमिन्द्र त॒स्थुष॑: ।। ३५ ।।
a॒bhi tvā॑ śūra nonu॒mo’du॑gdhā iva dhe॒nava॑: | īśā॑nama॒sya jaga॑taḥ sva॒rdṛśa॒mīśā॑namindra ta॒sthuṣa॑: | | ३५ | |
न त्वावाँ॑२ अ॒न्यो दि॒व्यो न पार्थि॑वो॒ न जा॒तो न ज॑निष्यते ।
अ॒श्वा॒यन्तो॑ मघवन्निन्द्र वा॒जिनो॑ ग॒व्यन्त॑स्त्वा हवामहे ।। ३६ ।।
na tvāvām̐॑२ a॒nyo di॒vyo na pārthi॑vo॒ na jā॒to na ja॑niṣyate | a॒śvā॒yanto॑ maghavannindra vā॒jino॑ ga॒vyanta॑stvā havāmahe | | ३६ | |
त्वामिद्धि हवा॑महे सा॒तौ वाज॑स्य का॒रव॑: ।
त्वां वृ॒त्रेष्वि॑न्द्र॒ सत्प॑तिं॒ नर॒स्त्वां काष्ठा॒स्वर्व॑तः ।। ३७ ।।
tvāmiddhi havā॑mahe sā॒tau vāja॑sya kā॒rava॑: | tvāṃ vṛ॒treṣvi॑ndra॒ satpa॑tiṃ॒ nara॒stvāṃ kāṣṭhā॒svarva॑taḥ | | ३७ | |
स त्वं न॑श्चित्र वज्रहस्त धृष्णु॒या म॒ह स्त॑वा॒नो अ॑द्रिवः ।
गामश्व॑ᳪ र॒थ्य॒मिन्द्र॒ सं कि॑र स॒त्रा वाजं॒ न जि॒ग्युषे॑ ।। ३८ ।।
sa tvaṃ na॑ścitra vajrahasta dhṛṣṇu॒yā ma॒ha sta॑vā॒no a॑drivaḥ | gāmaśva॑ᳪ ra॒thya॒mindra॒ saṃ ki॑ra sa॒trā vājaṃ॒ na ji॒gyuṣe॑ | | ३८ | |
कया॑ नश्चि॒त्र आ भु॑वदू॒ती स॒दावृ॑ध॒: सखा॑ ।
कया॒ शचि॑ष्ठया वृ॒ता ।। ३९ ।।
kayā॑ naści॒tra ā bhu॑vadū॒tī sa॒dāvṛ॑dha॒: sakhā॑ | kayā॒ śaci॑ṣṭhayā vṛ॒tā | | ३९ | |
कस्त्वा॑ स॒त्यो मदा॑नां॒ मᳪहि॑ष्ठो मत्स॒दन्ध॑सः ।
दृ॒ढा चि॑दा॒रुजे॒ वसु॑ ।। ४० ।।
kastvā॑ sa॒tyo madā॑nāṃ॒ maᳪhi॑ṣṭho matsa॒dandha॑saḥ | dṛ॒ḍhā ci॑dā॒ruje॒ vasu॑ | | ४० | |
अ॒भी षु ण॒: सखी॑नामवि॒ता ज॑रितॄ॒णाम् ।
श॒तं भ॑वास्यू॒तये॑ ।। ४१ ।।
a॒bhī ṣu ṇa॒: sakhī॑nāmavi॒tā ja॑ritṝ॒ṇām | śa॒taṃ bha॑vāsyū॒taye॑ | | ४१ | |
य॒ज्ञा-य॑ज्ञा वो अ॒ग्नये॑ गि॒रा-गि॑रा च॒ दक्ष॑से ।
प्र-प्र॑ व॒यम॒मृतं॑ जा॒तवे॑दसं प्रि॒यं मि॒त्रं न श॑ᳪसिषम् ।। ४२ ।।
ya॒jñā-ya॑jñā vo a॒gnaye॑ gi॒rā-gi॑rā ca॒ dakṣa॑se | pra-pra॑ va॒yama॒mṛtaṃ॑ jā॒tave॑dasaṃ pri॒yaṃ mi॒traṃ na śa॑ᳪsiṣam | | ४२ | |
पा॒हि नो॑ अग्न॒ एक॑या पा॒ह्युत द्वि॒तीय॑या ।
पा॒हि गी॒र्भिस्ति॒सृभि॑रूर्जां पते पा॒हि च॑त॒सृभि॑र्वसो ।। ४३ ।।
pā॒hi no॑ agna॒ eka॑yā pā॒hyuta dvi॒tīya॑yā | pā॒hi gī॒rbhisti॒sṛbhi॑rūrjāṃ pate pā॒hi ca॑ta॒sṛbhi॑rvaso | | ४३ | |
ऊ॒र्जो नपा॑त॒ᳪ स हि॒नायम॑स्म॒युर्दाशे॑म ह॒व्यदा॑तये ।
भुव॒द्वाजे॑ष्ववि॒ता भुव॑द्वृ॒ध उ॒त त्रा॒ता त॒नूना॑म् ।। ४४ ।।
ū॒rjo napā॑ta॒ᳪ sa hi॒nāyama॑sma॒yurdāśe॑ma ha॒vyadā॑taye | bhuva॒dvāje॑ṣvavi॒tā bhuva॑dvṛ॒dha u॒ta trā॒tā ta॒nūnā॑m | | ४४ | |
सं॒व॒त्स॒रो॒ऽसि परिवत्स॒रो॒ऽसीदावत्स॒रो॒ऽसीद्वत्स॒रो॒ऽसि वत्स॒रो॒ऽसि ।
उ॒षस॑स्ते कल्पन्तामहोरा॒त्रास्ते॑ कल्पन्तामर्धमा॒सास्ते॑ कल्पन्तां मा॒सास्ते कल्पन्तामृ॒तव॑स्ते कल्पन्ताᳪ संवत्स॒रस्ते॑ कल्पताम् । प्रेत्या॒ एत्यै॒ सं चाञ्च॒ प्र च॑ सारय ।
सुप॒र्ण॒चिद॑सि॒ तया॑ दे॒वत॑याऽङ्गिर॒स्वद् ध्रु॒व: सी॑द ।। ४५ ।।
saṃ॒va॒tsa॒ro॒’si parivatsa॒ro॒’sīdāvatsa॒ro॒’sīdvatsa॒ro॒’si vatsa॒ro॒’si | u॒ṣasa॑ste kalpantāmahorā॒trāste॑ kalpantāmardhamā॒sāste॑ kalpantāṃ mā॒sāste kalpantāmṛ॒tava॑ste kalpantāᳪ saṃvatsa॒raste॑ kalpatām | pretyā॒ etyai॒ saṃ cāñca॒ pra ca॑ sāraya | supa॒rṇa॒cida॑si॒ tayā॑ de॒vata॑yā’ṅgira॒svad dhru॒va: sī॑da | | ४५ | |