EeseDharmaSanātana Library
22अध्याय 22
Śukla Yajurveda Mādhyaṃdina ka Adhyay 22.
34 shlokतेजो॑ऽसि शु॒क्रम॒मृत॑मायु॒ष्पा आयु॑र्मे पाहि ।
दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्या॒मा द॑दे ।। १ ।।
tejo॑’si śu॒krama॒mṛta॑māyu॒ṣpā āyu॑rme pāhi | de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyā॒mā da॑de | | १ | |
इ॒माम॑गृभ्णन् रश॒नामृ॒तस्य॒ पूर्व॒ आयु॑षि वि॒दथे॑षु क॒व्या ।
सा नो॑ अ॒स्मिन्त्सु॒त आ ब॑भूव ऋ॒तस्य॒ साम॑न्त्स॒रमा॒रप॑न्ती ।। २ ।।
i॒māma॑gṛbhṇan raśa॒nāmṛ॒tasya॒ pūrva॒ āyu॑ṣi vi॒dathe॑ṣu ka॒vyā | sā no॑ a॒smintsu॒ta ā ba॑bhūva ṛ॒tasya॒ sāma॑ntsa॒ramā॒rapa॑ntī | | २ | |
अ॒भि॒धा अ॑सि॒ भुव॑नमसि य॒न्ताऽसि॑ ध॒र्ता ।
स त्वम॒ग्निं वै॑श्वान॒रᳪ सप्र॑थसं गच्छ॒ स्वाहा॑कृतः ।। ३ ।।
a॒bhi॒dhā a॑si॒ bhuva॑namasi ya॒ntā’si॑ dha॒rtā | sa tvama॒gniṃ vai॑śvāna॒raᳪ sapra॑thasaṃ gaccha॒ svāhā॑kṛtaḥ | | ३ | |
स्व॒गा त्वा॑ दे॒वेभ्य॑: प्र॒जाप॑तये॒ ब्रह्म॒न्नश्वं॑ भ॒न्त्स्यामि॑ दे॒वेभ्य॑: प्र॒जाप॑तये॒ तेन॑ राध्यासम् ।
तं ब॑धान दे॒वेभ्य॑: प्र॒जाप॑तये॒ तेन॑ राध्नुहि ।। ४ ।।
sva॒gā tvā॑ de॒vebhya॑: pra॒jāpa॑taye॒ brahma॒nnaśvaṃ॑ bha॒ntsyāmi॑ de॒vebhya॑: pra॒jāpa॑taye॒ tena॑ rādhyāsam | taṃ ba॑dhāna de॒vebhya॑: pra॒jāpa॑taye॒ tena॑ rādhnuhi | | ४ | |
प्र॒जाप॑तये त्वा॒ जुष्टं॒ प्रोक्षा॑मीन्द्रा॒ग्निभ्यां॑ त्वा॒ जुष्टं॒ प्रोक्षा॑मि वा॒यवे॑ त्वा॒ जुष्टं॒ प्रोक्षा॑मि॒
विश्वे॑भ्यस्त्वा दे॒वेभ्यो॒ जुष्टं॒ प्रोक्षा॑मि॒ सर्वे॑भ्यस्त्वा दे॒वेभ्यो॒ जुष्टं॒ प्रोक्षा॑मि ।
यो अर्व॑न्तं॒ जिघा॑ᳪसति॒ तम॒भ्य॒मीति॒ वरु॑णः| प॒रो मर्त॑: प॒रः श्वा ।। ५ ।।
pra॒jāpa॑taye tvā॒ juṣṭaṃ॒ prokṣā॑mīndrā॒gnibhyāṃ॑ tvā॒ juṣṭaṃ॒ prokṣā॑mi vā॒yave॑ tvā॒ juṣṭaṃ॒ prokṣā॑mi॒ viśve॑bhyastvā de॒vebhyo॒ juṣṭaṃ॒ prokṣā॑mi॒ sarve॑bhyastvā de॒vebhyo॒ juṣṭaṃ॒ prokṣā॑mi | yo arva॑ntaṃ॒ jighā॑ᳪsati॒ tama॒bhya॒mīti॒ varu॑ṇaḥ| pa॒ro marta॑: pa॒raḥ śvā | | ५ | |
अ॒ग्नये॒ स्वाहा॒ सोमा॑य॒ स्वाहा॒ ऽपां मोदा॑य॒ स्वाहा॑ सवि॒त्रे स्वाहा॑ वा॒यवे॒ स्वाहा॒ विष्ण॑वे॒ स्वाहेन्द्रा॑य॒ स्वाहा॒ बृह॒स्पत॑ये॒ स्वाहा॑ मि॒त्राय॒ स्वाहा॒ वरु॑णाय॒ स्वाहा॑ ।। ६ ।।
a॒gnaye॒ svāhā॒ somā॑ya॒ svāhā॒ ’pāṃ modā॑ya॒ svāhā॑ savi॒tre svāhā॑ vā॒yave॒ svāhā॒ viṣṇa॑ve॒ svāhendrā॑ya॒ svāhā॒ bṛha॒spata॑ye॒ svāhā॑ mi॒trāya॒ svāhā॒ varu॑ṇāya॒ svāhā॑ | | ६ | |
हि॒ङ्का॒राय॒ स्वाहा॒ हिङ्कृ॑ताय॒ स्वाहा॒ क्रन्द॑ते॒ स्वाहा॑ ऽवक्र॒न्दाय॒ स्वाहा॒ प्रोथ॑ते॒ स्वाहा॑ प्रप्रो॒थाय॒ स्वाहा॑ ग॒न्धाय॒ स्वाहा॑ घ्रा॒ताय॒ स्वाहा॒ निवि॑ष्टाय॒ स्वाहोप॑विष्टाय॒ स्वाहा॒ सन्दि॑ताय॒ स्वाहा॒ वल्ग॑ते॒ स्वाहा ऽऽसी॑नाय॒ स्वाहा॑ शया॑नाय॒ स्वाहा॒ स्वप॑ते॒ स्वाहा॒ जाग्र॑ते॒ स्वाहा॒ कूज॑ते॒ स्वाहा॒ प्रबु॑द्धाय॒ स्वाहा॑ वि॒जृम्भ॑माणाय॒ स्वाहा॒ विचृ॑ताय॒ स्वाहा॒ सᳪहा॑नाय॒ स्वाहोप॑स्थिताय॒ स्वाहाऽऽय॑नाय॒ स्वाहा॒ प्राय॑णाय॒ स्वाहा॑ ।। ७ ।।
hi॒ṅkā॒rāya॒ svāhā॒ hiṅkṛ॑tāya॒ svāhā॒ kranda॑te॒ svāhā॑ ’vakra॒ndāya॒ svāhā॒ protha॑te॒ svāhā॑ prapro॒thāya॒ svāhā॑ ga॒ndhāya॒ svāhā॑ ghrā॒tāya॒ svāhā॒ nivi॑ṣṭāya॒ svāhopa॑viṣṭāya॒ svāhā॒ sandi॑tāya॒ svāhā॒ valga॑te॒ svāhā ’’sī॑nāya॒ svāhā॑ śayā॑nāya॒ svāhā॒ svapa॑te॒ svāhā॒ jāgra॑te॒ svāhā॒ kūja॑te॒ svāhā॒ prabu॑ddhāya॒ svāhā॑ vi॒jṛmbha॑māṇāya॒ svāhā॒ vicṛ॑tāya॒ svāhā॒ saᳪhā॑nāya॒ svāhopa॑sthitāya॒ svāhā’’ya॑nāya॒ svāhā॒ prāya॑ṇāya॒ svāhā॑ | | ७ | |
य॒ते स्वाहा॒ धाव॑ते॒ स्वाहो॑द्द्रा॒वाय॒ स्वाहोद्द्रु॑ताय॒ स्वाहा॑ शूका॒राय॒ स्वाहा॒ शूकृ॑ताय॒ स्वाहा॒ निष॑ण्णाय॒ स्वाहोत्थि॑ताय॒ स्वाहा॑ ज॒वाय॒ स्वाहा॒ बला॑य॒ स्वाहा॑ वि॒वर्त॑मानाय॒ स्वाहा॒ विवृ॑त्ताय॒ स्वाहा॑ विधून्वा॒नाय॒ स्वाहा॒ विधू॑ताय॒ स्वाहा॒ शुश्रू॑षमाणाय॒ स्वाहा॑ शृण्व॒ते स्वाहेक्ष॑माणाय॒ स्वाहे॑क्षि॒ताय॒ स्वाहा॒ वी॒क्षिताय॒ स्वाहा॑ निमे॒षाय॒ स्वाहा॒ यदत्ति॒ तस्मै॒ स्वाहा॒ यत् पिब॑ति॒ तस्मै॒ स्वाहा॒ यन्मूत्रं॑ क॒रोति॒ तस्मै॒ स्वाहा॑ कुर्व॒ते स्वाहा॑ कृ॒ताय॒ स्वाहा॑ ।। ८ ।।
ya॒te svāhā॒ dhāva॑te॒ svāho॑ddrā॒vāya॒ svāhoddru॑tāya॒ svāhā॑ śūkā॒rāya॒ svāhā॒ śūkṛ॑tāya॒ svāhā॒ niṣa॑ṇṇāya॒ svāhotthi॑tāya॒ svāhā॑ ja॒vāya॒ svāhā॒ balā॑ya॒ svāhā॑ vi॒varta॑mānāya॒ svāhā॒ vivṛ॑ttāya॒ svāhā॑ vidhūnvā॒nāya॒ svāhā॒ vidhū॑tāya॒ svāhā॒ śuśrū॑ṣamāṇāya॒ svāhā॑ śṛṇva॒te svāhekṣa॑māṇāya॒ svāhe॑kṣi॒tāya॒ svāhā॒ vī॒kṣitāya॒ svāhā॑ nime॒ṣāya॒ svāhā॒ yadatti॒ tasmai॒ svāhā॒ yat piba॑ti॒ tasmai॒ svāhā॒ yanmūtraṃ॑ ka॒roti॒ tasmai॒ svāhā॑ kurva॒te svāhā॑ kṛ॒tāya॒ svāhā॑ | | ८ | |
तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो न॑: प्रचो॒दया॑त् ।। ९ ।।
tatsa॑vi॒turvare॑ṇyaṃ॒ bhargo॑ de॒vasya॑ dhīmahi | dhiyo॒ yo na॑: praco॒dayā॑t | | ९ | |
हिर॑ण्यपाणिमू॒तये॑ सवि॒तार॒मुप॑ ह्वये । स चेत्ता॑ दे॒वता॑ प॒दम् ।। १० ।।
hira॑ṇyapāṇimū॒taye॑ savi॒tāra॒mupa॑ hvaye | sa cettā॑ de॒vatā॑ pa॒dam | | १० | |
दे॒वस्य॒ चेत॑तो म॒हीं प्र स॑वि॒तुर्ह॑वामहे । सु॒म॒तिᳪ स॒त्यरा॑धसम् ।। ११ ।।
de॒vasya॒ ceta॑to ma॒hīṃ pra sa॑vi॒turha॑vāmahe | su॒ma॒tiᳪ sa॒tyarā॑dhasam | | ११ | |
सु॒ष्टु॒तिᳪ सु॑मती॒वृधो॑ रा॒तिᳪ स॑वि॒तुरी॑महे । प्र दे॒वाय॑ मती॒विदे॑ ।। १२ ।।
su॒ṣṭu॒tiᳪ su॑matī॒vṛdho॑ rā॒tiᳪ sa॑vi॒turī॑mahe | pra de॒vāya॑ matī॒vide॑ | | १२ | |
रा॒तिᳪ सत्प॑तिं म॒हे स॑वि॒तार॒मुप॑ ह्वये । आ॒स॒वं दे॒ववी॑तये ।। १३ ।।
rā॒tiᳪ satpa॑tiṃ ma॒he sa॑vi॒tāra॒mupa॑ hvaye | ā॒sa॒vaṃ de॒vavī॑taye | | १३ | |
दे॒वस्य॑ सवि॒तुर्म॒तिमा॑स॒वं वि॒श्वदे॑व्यम् । धि॒या भगं॑ मनामहे ।। १४ ।।
de॒vasya॑ savi॒turma॒timā॑sa॒vaṃ vi॒śvade॑vyam | dhi॒yā bhagaṃ॑ manāmahe | | १४ | |
अ॒ग्निᳪ स्तोमे॑न बोधय समिधा॒नो अम॑र्त्यम् । ह॒व्या दे॒वेषु॑ नो दधत् ।। १५ ।।
a॒gniᳪ stome॑na bodhaya samidhā॒no ama॑rtyam | ha॒vyā de॒veṣu॑ no dadhat | | १५ | |
स ह॑व्य॒वाडम॑र्त्य उ॒शिग्दू॒तश्चनो॑हितः । अ॒ग्निर्धि॒या समृ॑ण्वति ।। १६ ।।
sa ha॑vya॒vāḍama॑rtya u॒śigdū॒taścano॑hitaḥ | a॒gnirdhi॒yā samṛ॑ṇvati | | १६ | |
अ॒ग्निं दू॒तं पु॒रो द॑धे हव्य॒वाह॒मुप॑ ब्रुवे । दे॒वाँ२ आ सा॑दयादि॒ह ।। १७ ।।
a॒gniṃ dū॒taṃ pu॒ro da॑dhe havya॒vāha॒mupa॑ bruve | de॒vām̐२ ā sā॑dayādi॒ha | | १७ | |
अजी॑जनो॒ हि प॑वमान॒ सूर्यं॑ वि॒धारे॒ शक्म॑ना॒ पय॑: । गोजी॑रया॒ रᳪह॑माण॒: पुर॑न्ध्या ।। १८ ।।
ajī॑jano॒ hi pa॑vamāna॒ sūryaṃ॑ vi॒dhāre॒ śakma॑nā॒ paya॑: | gojī॑rayā॒ raᳪha॑māṇa॒: pura॑ndhyā | | १८ | |
वि॒भूर्मा॒त्रा प्र॒भूः पि॒त्राऽश्वो॑ऽसि॒ हयो॒ऽस्यत्यो॑ऽसि॒ मयो॒ऽस्यर्वा॑ऽसि॒ सप्ति॑रसि वा॒ज्य॒सि॒ वृषा॑ऽसि नृ॒मणा॑ असि । ययु॒र्नामा॑ऽसि॒ शिशु॒र्नामा॑स्यादि॒त्यानां॒ पत्वाऽन्वि॑हि॒ देवा॑ आशापाला ए॒तं दे॒वेभ्योऽश्वं॒ मेधा॑य॒ प्रोक्षि॑तᳪ रक्षते॒ह रन्ति॑ रि॒ह र॑मतामि॒ह धृति॑रि॒ह स्वधृ॑ति॒: स्वाहा॑ ।। १९ ।।
vi॒bhūrmā॒trā pra॒bhūḥ pi॒trā’śvo॑’si॒ hayo॒’syatyo॑’si॒ mayo॒’syarvā॑’si॒ sapti॑rasi vā॒jya॒si॒ vṛṣā॑’si nṛ॒maṇā॑ asi | yayu॒rnāmā॑’si॒ śiśu॒rnāmā॑syādi॒tyānāṃ॒ patvā’nvi॑hi॒ devā॑ āśāpālā e॒taṃ de॒vebhyo’śvaṃ॒ medhā॑ya॒ prokṣi॑taᳪ rakṣate॒ha ranti॑ ri॒ha ra॑matāmi॒ha dhṛti॑ri॒ha svadhṛ॑ti॒: svāhā॑ | | १९ | |
काय॒ स्वाहा॒ कस्मै॒ स्वाहा॑ कत॒मस्मै॒ स्वाहा॒ स्वाहा॒ऽऽधिमाधी॑ताय॒ स्वाहा॒ मन॑: प्र॒जाप॑तये॒ स्वाहा॑ चि॒त्तं विज्ञा॑ता॒यादि॑त्यै॒ स्वाहा ऽदि॑त्यै मह्यै॒ स्वाहा ऽदि॑त्यै सुमृडी॒कायै॒ स्वाहा॒ सर॑स्वत्यै॒ स्वाहा॒ सर॑स्वत्यै पाव॒कायै॒ स्वाहा॒ सर॑स्वत्यै बृहत्यै॒ स्वाहा॑ पू॒ष्णे स्वाहा॑ पू॒ष्णे प्र॑प॒थ्या॒य॒ स्वाहा॑ पू॒ष्णे न॒रन्धि॑षाय॒ स्वाहा॒ त्वष्ट्रे॒ स्वाहा॒ त्वष्ट्रे॑ तु॒रीपा॑य॒ स्वाहा॒ त्वष्ट्रे॑ पुरु॒रूपा॑य॒ स्वाहा॒ विष्ण॑वे॒ स्वाहा॒ विष्ण॑वे निभूय॒पाय॒ स्वाहा॒ विष्ण॑वे शिपिवि॒ष्टाय॒ स्वाहा॑ ।। २० ।।
kāya॒ svāhā॒ kasmai॒ svāhā॑ kata॒masmai॒ svāhā॒ svāhā॒’’dhimādhī॑tāya॒ svāhā॒ mana॑: pra॒jāpa॑taye॒ svāhā॑ ci॒ttaṃ vijñā॑tā॒yādi॑tyai॒ svāhā ’di॑tyai mahyai॒ svāhā ’di॑tyai sumṛḍī॒kāyai॒ svāhā॒ sara॑svatyai॒ svāhā॒ sara॑svatyai pāva॒kāyai॒ svāhā॒ sara॑svatyai bṛhatyai॒ svāhā॑ pū॒ṣṇe svāhā॑ pū॒ṣṇe pra॑pa॒thyā॒ya॒ svāhā॑ pū॒ṣṇe na॒randhi॑ṣāya॒ svāhā॒ tvaṣṭre॒ svāhā॒ tvaṣṭre॑ tu॒rīpā॑ya॒ svāhā॒ tvaṣṭre॑ puru॒rūpā॑ya॒ svāhā॒ viṣṇa॑ve॒ svāhā॒ viṣṇa॑ve nibhūya॒pāya॒ svāhā॒ viṣṇa॑ve śipivi॒ṣṭāya॒ svāhā॑ | | २० | |
विश्वो॑ दे॒वस्य॑ ने॒तुर्मर्तो॑ वुरीत स॒ख्यम् ।
विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॒ स्वाहा॑ ।। २१ ।।
viśvo॑ de॒vasya॑ ne॒turmarto॑ vurīta sa॒khyam | viśvo॑ rā॒ya i॑ṣudhyati dyu॒mnaṃ vṛ॑ṇīta pu॒ṣyase॒ svāhā॑ | | २१ | |
आ ब्रह्म॑न् ब्राह्म॒णो ब्र॑ह्मवर्च॒सी जा॑यता॒मा रा॒ष्ट्रे रा॑ज॒न्यः शूर॑ इष॒व्योऽतिव्या॒धी म॑हार॒थो जा॑यतां॒ दोग्ध्री॑ धे॒नुर्वोढा॑न॒ड्वाना॒शुः सप्ति॒: पुर॑न्धि॒र्योषा॑ जि॒ष्णू र॑थे॒ष्ठाः स॒भेयो॒ युवास्य यज॑मानस्य वी॒रो जा॑यतां॒ निका॒मे-नि॑कामे नः प॒र्जन्यो॑ वर्षतु॒ फल॑वत्यो न॒ ओष॑धयः पच्यन्तां योगक्षे॒मो न॑: कल्पताम् ।। २२ ।।
ā brahma॑n brāhma॒ṇo bra॑hmavarca॒sī jā॑yatā॒mā rā॒ṣṭre rā॑ja॒nyaḥ śūra॑ iṣa॒vyo’tivyā॒dhī ma॑hāra॒tho jā॑yatāṃ॒ dogdhrī॑ dhe॒nurvoḍhā॑na॒ḍvānā॒śuḥ sapti॒: pura॑ndhi॒ryoṣā॑ ji॒ṣṇū ra॑the॒ṣṭhāḥ sa॒bheyo॒ yuvāsya yaja॑mānasya vī॒ro jā॑yatāṃ॒ nikā॒me-ni॑kāme naḥ pa॒rjanyo॑ varṣatu॒ phala॑vatyo na॒ oṣa॑dhayaḥ pacyantāṃ yogakṣe॒mo na॑: kalpatām | | २२ | |
प्रा॒णाय॒ स्वाहा॑ ऽपा॒नाय॒ स्वाहा॑ व्या॒नाय॒ स्वाहा॒ चक्षु॑षे॒ स्वाहा॒ श्रोत्रा॑य॒ स्वाहा॑ वा॒चे स्वाहा॒ मन॑से॒ स्वाहा॑ ।। २३ ।।
prā॒ṇāya॒ svāhā॑ ’pā॒nāya॒ svāhā॑ vyā॒nāya॒ svāhā॒ cakṣu॑ṣe॒ svāhā॒ śrotrā॑ya॒ svāhā॑ vā॒ce svāhā॒ mana॑se॒ svāhā॑ | | २३ | |
प्राच्यै॑ दि॒शे स्वाहा॒ ऽर्वाच्यै॑ दि॒शे स्वाहा॒ दक्षि॑णायै दि॒शे स्वाहा॒ ऽर्वाच्यै॑ दि॒शे स्वाहा॑ प्र॒तीच्यै॑ दि॒शे स्वाहा॒ ऽर्वाच्यै॑ दि॒शे स्वाहोदी॑च्यै दि॒शे स्वाहा॒ ऽर्वाच्यै॑ दि॒शे स्वाहो॒र्ध्वायै॑ दि॒शे स्वाहा॒ ऽर्वाच्यै॑ दि॒शे स्वाहा ऽवा॑च्यै दि॒शे स्वाहा॒ ऽर्वाच्यै॑ दि॒शे स्वाहा॑ ।। २४ ।।
prācyai॑ di॒śe svāhā॒ ’rvācyai॑ di॒śe svāhā॒ dakṣi॑ṇāyai di॒śe svāhā॒ ’rvācyai॑ di॒śe svāhā॑ pra॒tīcyai॑ di॒śe svāhā॒ ’rvācyai॑ di॒śe svāhodī॑cyai di॒śe svāhā॒ ’rvācyai॑ di॒śe svāho॒rdhvāyai॑ di॒śe svāhā॒ ’rvācyai॑ di॒śe svāhā ’vā॑cyai di॒śe svāhā॒ ’rvācyai॑ di॒śe svāhā॑ | | २४ | |
अ॒द्भ्यः स्वाहा॑ वा॒र्भ्यः स्वाहो॑द॒काय॒ स्वाहा॒ तिष्ठ॑न्तीभ्य॒: स्वाहा॒ स्रव॑न्तीभ्य॒: स्वाहा॒ स्यन्द॑मानाभ्य॒: स्वाहा॒ कूप्या॑भ्य॒: स्वाहा॒ सूद्या॑भ्य॒: स्वाहा॒ धार्या॑भ्य॒: स्वाहा॑ ऽर्ण॒वाय॒ स्वाहा॑ समु॒द्राय॒ स्वाहा॑ सरि॒राय॒ स्वाहा॑ ।। २५ ।।
a॒dbhyaḥ svāhā॑ vā॒rbhyaḥ svāho॑da॒kāya॒ svāhā॒ tiṣṭha॑ntībhya॒: svāhā॒ srava॑ntībhya॒: svāhā॒ syanda॑mānābhya॒: svāhā॒ kūpyā॑bhya॒: svāhā॒ sūdyā॑bhya॒: svāhā॒ dhāryā॑bhya॒: svāhā॑ ’rṇa॒vāya॒ svāhā॑ samu॒drāya॒ svāhā॑ sari॒rāya॒ svāhā॑ | | २५ | |
वाता॑य॒ स्वाहा॑ धू॒माय॒ स्वाहा॒ ऽभ्राय॒ स्वाहा॑ मे॒घाय॒ स्वाहा॑ वि॒द्योत॑मानाय॒ स्वाहा॑ स्त॒नय॑ते॒ स्वाहा॑ ऽव॒स्फूर्ज॑ते॒ स्वाहा॒ वर्ष॑ते॒ स्वाहा॑ ऽव॒वर्ष॑ते॒ स्वाहो॒ग्रं वर्ष॑ते॒ स्वाहा॑ शी॒घ्रं वर्ष॑ते॒ स्वाहो॑द्गृह्ण॒ते स्वाहोद्गृ॑हीताय॒ स्वाहा॑ प्रुष्ण॒ते स्वाहा॑ शीकाय॒ते स्वाहा॒ प्रुष्वा॑भ्य॒: स्वाहा॑ ह्रा॒दुनी॑भ्य॒: स्वाहा॑ नीहा॒राय॒ स्वाहा॑ ।। २६ ।।
vātā॑ya॒ svāhā॑ dhū॒māya॒ svāhā॒ ’bhrāya॒ svāhā॑ me॒ghāya॒ svāhā॑ vi॒dyota॑mānāya॒ svāhā॑ sta॒naya॑te॒ svāhā॑ ’va॒sphūrja॑te॒ svāhā॒ varṣa॑te॒ svāhā॑ ’va॒varṣa॑te॒ svāho॒graṃ varṣa॑te॒ svāhā॑ śī॒ghraṃ varṣa॑te॒ svāho॑dgṛhṇa॒te svāhodgṛ॑hītāya॒ svāhā॑ pruṣṇa॒te svāhā॑ śīkāya॒te svāhā॒ pruṣvā॑bhya॒: svāhā॑ hrā॒dunī॑bhya॒: svāhā॑ nīhā॒rāya॒ svāhā॑ | | २६ | |
अ॒ग्नये॒ स्वाहा॒ सोमा॑य॒ स्वाहेन्द्रा॑य॒ स्वाहा॑ पृथिव्यै॒ स्वाहा॒ ऽन्तरि॑क्षाय॒ स्वाहा॑ दि॒वे स्वाहा॑ दि॒ग्भ्यः स्वाहा ऽऽशा॑भ्य॒: स्वाहो॒र्व्यै॒ दि॒शे स्वाहा॒ ऽर्वाच्यै॑ दि॒शे स्वाहा॑ ।। २७ ।।
a॒gnaye॒ svāhā॒ somā॑ya॒ svāhendrā॑ya॒ svāhā॑ pṛthivyai॒ svāhā॒ ’ntari॑kṣāya॒ svāhā॑ di॒ve svāhā॑ di॒gbhyaḥ svāhā ’’śā॑bhya॒: svāho॒rvyai॒ di॒śe svāhā॒ ’rvācyai॑ di॒śe svāhā॑ | | २७ | |
नक्ष॑त्रेभ्य॒: स्वाहा॑ नक्ष॒त्रिये॑भ्य॒: स्वाहा॑ ऽहोरा॒त्रेभ्य॒: स्वाहा॑ ऽर्धमा॒सेभ्य॒: स्वाहा॒ मासे॑भ्य॒: स्वाहा॑ ऋ॒तुभ्य॒: स्वाहा॑ ऽऽर्त॒वेभ्य॒: स्वाहा॑ संवत्स॒राय॒ स्वाहा॒ द्यावा॑पृथि॒वीभ्या॒ᳪ स्वाहा॑ च॒न्द्राय॒ स्वाहा॒ सूर्या॑य॒ स्वाहा॑ र॒श्मिभ्य॒: स्वाहा॒ वसु॑भ्य॒: स्वाहा॑ रु॒द्रेभ्य॒: स्वाहा॑ ऽऽदि॒त्येभ्य॒: स्वाहा॑ म॒रुद्भ्य॒: स्वाहा॒ विश्वे॑भ्यो दे॒वेभ्य॒: स्वाहा॒ मूले॑भ्य॒: स्वाहा॒ शाखा॑भ्य॒: स्वाहा॒ वन॒स्पति॑भ्य॒: स्वाहा॒ पुष्पे॑भ्य॒: स्वाहा॒ फले॑भ्य॒: स्वाहौष॑धीभ्य॒: स्वाहा॑ ।। २८ ।।
nakṣa॑trebhya॒: svāhā॑ nakṣa॒triye॑bhya॒: svāhā॑ ’horā॒trebhya॒: svāhā॑ ’rdhamā॒sebhya॒: svāhā॒ māse॑bhya॒: svāhā॑ ṛ॒tubhya॒: svāhā॑ ’’rta॒vebhya॒: svāhā॑ saṃvatsa॒rāya॒ svāhā॒ dyāvā॑pṛthi॒vībhyā॒ᳪ svāhā॑ ca॒ndrāya॒ svāhā॒ sūryā॑ya॒ svāhā॑ ra॒śmibhya॒: svāhā॒ vasu॑bhya॒: svāhā॑ ru॒drebhya॒: svāhā॑ ’’di॒tyebhya॒: svāhā॑ ma॒rudbhya॒: svāhā॒ viśve॑bhyo de॒vebhya॒: svāhā॒ mūle॑bhya॒: svāhā॒ śākhā॑bhya॒: svāhā॒ vana॒spati॑bhya॒: svāhā॒ puṣpe॑bhya॒: svāhā॒ phale॑bhya॒: svāhauṣa॑dhībhya॒: svāhā॑ | | २८ | |
पृ॒थि॒व्यै स्वाहा॒ ऽन्तरि॑क्षाय॒ स्वाहा॑ दि॒वे स्वाहा॒ सूर्या॑य॒ स्वाहा॑ च॒न्द्राय॒ स्वाहा॒ नक्ष॑त्रेभ्य॒: स्वाहा॒ ऽद्भ्यः स्वाहौ॑षधीभ्य॒: स्वाहा॒ वन॒स्पति॑भ्य॒: स्वाहा॑ परिप्ल॒वेभ्य॒: स्वाहा॑ चराच॒रेभ्य॒: स्वाहा॑ सरीसृ॒पेभ्य॒: स्वाहा॑ ।। २९ ।।
pṛ॒thi॒vyai svāhā॒ ’ntari॑kṣāya॒ svāhā॑ di॒ve svāhā॒ sūryā॑ya॒ svāhā॑ ca॒ndrāya॒ svāhā॒ nakṣa॑trebhya॒: svāhā॒ ’dbhyaḥ svāhau॑ṣadhībhya॒: svāhā॒ vana॒spati॑bhya॒: svāhā॑ paripla॒vebhya॒: svāhā॑ carāca॒rebhya॒: svāhā॑ sarīsṛ॒pebhya॒: svāhā॑ | | २९ | |
अस॑वे॒ स्वाहा॒ वस॑वे॒ स्वाहा॑ वि॒भुवे॒ स्वाहा॒ विव॑स्वते॒ स्वाहा॑ गण॒श्रिये॒ स्वाहा॑ ग॒णप॑तये॒ स्वाहा॑ ऽभि॒भुवे॒ स्वाहा ऽधि॑पतये॒ स्वाहा॑ शू॒षाय॒ स्वाहा॑ सᳪस॒र्पाय॒ स्वाहा॑ च॒न्द्राय॒ स्वाहा॒ ज्योति॑षे॒ स्वाहा॑ मलिम्लु॒चाय॒ स्वाहा॒ दिवा॑ प॒तय॑ते॒ स्वाहा॑ ।। ३० ।।
asa॑ve॒ svāhā॒ vasa॑ve॒ svāhā॑ vi॒bhuve॒ svāhā॒ viva॑svate॒ svāhā॑ gaṇa॒śriye॒ svāhā॑ ga॒ṇapa॑taye॒ svāhā॑ ’bhi॒bhuve॒ svāhā ’dhi॑pataye॒ svāhā॑ śū॒ṣāya॒ svāhā॑ saᳪsa॒rpāya॒ svāhā॑ ca॒ndrāya॒ svāhā॒ jyoti॑ṣe॒ svāhā॑ malimlu॒cāya॒ svāhā॒ divā॑ pa॒taya॑te॒ svāhā॑ | | ३० | |
मध॑वे॒ स्वाहा॒ माध॑वाय॒ स्वाहा॑ शु॒क्राय॒ स्वाहा॒ शुच॑ये॒ स्वाहा॒ नभ॑से॒ स्वाहा॑ नभ॒स्या॒य॒ स्वाहे॒षाय॒ स्वाहो॒र्जाय॒ स्वाहा॒ सह॑से॒ स्वाहा॑ सह॒स्या॒य॒ स्वाहा॒ तप॑से॒ स्वाहा॑ तप॒स्या॒य॒ स्वाहा॑ ऽᳪहसस्प॒तये॒ स्वाहा॑ ।। ३१ ।।
madha॑ve॒ svāhā॒ mādha॑vāya॒ svāhā॑ śu॒krāya॒ svāhā॒ śuca॑ye॒ svāhā॒ nabha॑se॒ svāhā॑ nabha॒syā॒ya॒ svāhe॒ṣāya॒ svāho॒rjāya॒ svāhā॒ saha॑se॒ svāhā॑ saha॒syā॒ya॒ svāhā॒ tapa॑se॒ svāhā॑ tapa॒syā॒ya॒ svāhā॑ ’ᳪhasaspa॒taye॒ svāhā॑ | | ३१ | |
वाजा॑य॒ स्वाहा॑ प्रस॒वाय॒ स्वाहा॑ ऽपि॒जाय॒ स्वाहा॒ क्रत॑वे॒ स्वाहा॒ स्व: स्वाहा॑ मू॒र्ध्ने स्वाहा॑ व्यश्नु॒विने॒ स्वाहा ऽन्त्या॑य॒ स्वाहा ऽन्त्या॑य भौव॒नाय॒ स्वाहा॒ भुव॑नस्य॒ पत॑ये॒ स्वाहा ऽधि॑पतये॒ स्वाहा॑ प्र॒जाप॑तये॒ स्वाहा॑ ।। ३२ ।।
vājā॑ya॒ svāhā॑ prasa॒vāya॒ svāhā॑ ’pi॒jāya॒ svāhā॒ krata॑ve॒ svāhā॒ sva: svāhā॑ mū॒rdhne svāhā॑ vyaśnu॒vine॒ svāhā ’ntyā॑ya॒ svāhā ’ntyā॑ya bhauva॒nāya॒ svāhā॒ bhuva॑nasya॒ pata॑ye॒ svāhā ’dhi॑pataye॒ svāhā॑ pra॒jāpa॑taye॒ svāhā॑ | | ३२ | |
आयु॑र्य॒ज्ञेन॑ कल्पता॒ᳪ स्वाहा॑ प्रा॒णो य॒ज्ञेन॑ कल्पता॒ᳪ स्वाहा॑ ऽपा॒नो य॒ज्ञेन॑ कल्पता॒ᳪ स्वाहा॑ व्या॒नो य॒ज्ञेन॑ कल्पता॒ᳪ स्वाहो॑दा॒नो य॒ज्ञेन॑ कल्पता॒ᳪ स्वाहा॑ समा॒नो य॒ज्ञेन॑ कल्पता॒ᳪ स्वाहा॒ चक्षु॑र्य॒ज्ञेन॑ कल्पता॒ᳪ स्वाहा॒ श्रोत्रं॑ य॒ज्ञेन॑ कल्पता॒ᳪ स्वाहा॒ वाग्य॒ज्ञेन॑ कल्पता॒ᳪ स्वाहा॒ मनो॑ य॒ज्ञेन॑ कल्पता॒ᳪ स्वाहा॒ ऽऽत्मा य॒ज्ञेन॑ कल्पता॒ᳪ स्वाहा॑ ब्र॒ह्मा य॒ज्ञेन॑ कल्पता॒ᳪ स्वाहा॒ ज्योति॑र्य॒ज्ञेन॑ कल्पता॒ᳪ स्वाहा॒ स्व॒र्य॒ज्ञेन॑ कल्पता॒ᳪ स्वाहा॑ पृ॒ष्ठं य॒ज्ञेन॑ कल्पता॒ᳪ स्वाहा॑ य॒ज्ञो य॒ज्ञेन॑ कल्पता॒ᳪ स्वाहा॑ ।। ३३ ।।
āyu॑rya॒jñena॑ kalpatā॒ᳪ svāhā॑ prā॒ṇo ya॒jñena॑ kalpatā॒ᳪ svāhā॑ ’pā॒no ya॒jñena॑ kalpatā॒ᳪ svāhā॑ vyā॒no ya॒jñena॑ kalpatā॒ᳪ svāho॑dā॒no ya॒jñena॑ kalpatā॒ᳪ svāhā॑ samā॒no ya॒jñena॑ kalpatā॒ᳪ svāhā॒ cakṣu॑rya॒jñena॑ kalpatā॒ᳪ svāhā॒ śrotraṃ॑ ya॒jñena॑ kalpatā॒ᳪ svāhā॒ vāgya॒jñena॑ kalpatā॒ᳪ svāhā॒ mano॑ ya॒jñena॑ kalpatā॒ᳪ svāhā॒ ’’tmā ya॒jñena॑ kalpatā॒ᳪ svāhā॑ bra॒hmā ya॒jñena॑ kalpatā॒ᳪ svāhā॒ jyoti॑rya॒jñena॑ kalpatā॒ᳪ svāhā॒ sva॒rya॒jñena॑ kalpatā॒ᳪ svāhā॑ pṛ॒ṣṭhaṃ ya॒jñena॑ kalpatā॒ᳪ svāhā॑ ya॒jño ya॒jñena॑ kalpatā॒ᳪ svāhā॑ | | ३३ | |
एक॑स्मै॒ स्वाहा॒ द्वाभ्या॒ᳪ स्वाहा॑ श॒ताय॒ स्वाहैक॑शताय॒ स्वाहा॒ व्यु॒ष्ट्यै॒ स्वाहा॑ स्व॒र्गाय॒ स्वाहा॑ ।। ३४ ।।
eka॑smai॒ svāhā॒ dvābhyā॒ᳪ svāhā॑ śa॒tāya॒ svāhaika॑śatāya॒ svāhā॒ vyu॒ṣṭyai॒ svāhā॑ sva॒rgāya॒ svāhā॑ | | ३४ | |