EeseDharmaSanātana Library
20अध्याय 20
Śukla Yajurveda Mādhyaṃdina ka Adhyay 20.
89 shlokक्ष॒त्रस्य॒ योनि॑रसि क्ष॒त्रस्य॒ नाभि॑रसि । मा त्वा॑ हिᳪसी॒न्मा मा॑ हिᳪसीः ।। १ ।।
kṣa॒trasya॒ yoni॑rasi kṣa॒trasya॒ nābhi॑rasi | mā tvā॑ hiᳪsī॒nmā mā॑ hiᳪsīḥ | | १ | |
नि ष॑साद घृ॒तव्र॑तो॒ वरु॑णः प॒स्त्यास्वा । साम्रा॑ज्याय सु॒क्रतु॑: । मृ॒त्योः पा॑हि वि॒द्योत्पा॑हि ।। २ ।।
ni ṣa॑sāda ghṛ॒tavra॑to॒ varu॑ṇaḥ pa॒styāsvā | sāmrā॑jyāya su॒kratu॑: | mṛ॒tyoḥ pā॑hi vi॒dyotpā॑hi | | २ | |
दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
अ॒श्विनोर्भैष॑ज्येन॒ तेज॑से ब्रह्मवर्च॒साया॒भि षि॑ञ्चामि॒ सर॑स्वत्यै॒ भैष॑ज्येन वी॒र्या॒या॒न्नाद्या॑या॒भि षि॑ञ्चा॒मीन्द्र॑स्येन्द्रि॒येण॒ बला॑य श्रियै॒ यश॑से॒ऽभि षि॑ञ्चामि ।। ३ ।।
de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyām | a॒śvinorbhaiṣa॑jyena॒ teja॑se brahmavarca॒sāyā॒bhi ṣi॑ñcāmi॒ sara॑svatyai॒ bhaiṣa॑jyena vī॒ryā॒yā॒nnādyā॑yā॒bhi ṣi॑ñcā॒mīndra॑syendri॒yeṇa॒ balā॑ya śriyai॒ yaśa॑se॒’bhi ṣi॑ñcāmi | | ३ | |
को॑ऽसि कत॒मो॒ऽसि॒ कस्मै॑ त्वा॒ काय॑ त्वा । सुश्लो॑क॒ सुम॑ङ्गल॒ सत्य॑राजन् ।। ४ ।।
ko॑’si kata॒mo॒’si॒ kasmai॑ tvā॒ kāya॑ tvā | suślo॑ka॒ suma॑ṅgala॒ satya॑rājan | | ४ | |
शिरो॑ मे॒ श्रीर्यशो॒ मुखं॒ त्विषि॒: केशा॑श्च॒ श्मश्रू॑णि । राजा॑ मे प्रा॒णो अ॒मृत॑ᳪ स॒म्राट् चक्षु॑र्वि॒राट् श्रोत्र॑म् ।। ५ ।।
śiro॑ me॒ śrīryaśo॒ mukhaṃ॒ tviṣi॒: keśā॑śca॒ śmaśrū॑ṇi | rājā॑ me prā॒ṇo a॒mṛta॑ᳪ sa॒mrāṭ cakṣu॑rvi॒rāṭ śrotra॑m | | ५ | |
जि॒ह्वा मे॑ भ॒द्रं वाङ्महो॒ मनो॑ म॒न्युः स्व॒राड् भाम॑: । मोदा॑: प्रमो॒दा अ॒ङ्गुली॒रङ्गा॑नि मि॒त्रं मे॒ सह॑: ।। ६ ।।
ji॒hvā me॑ bha॒draṃ vāṅmaho॒ mano॑ ma॒nyuḥ sva॒rāḍ bhāma॑: | modā॑: pramo॒dā a॒ṅgulī॒raṅgā॑ni mi॒traṃ me॒ saha॑: | | ६ | |
बा॒हू मे॒ बल॑मिन्द्रि॒यᳪ हस्तौ॑ मे॒ कर्म॑ वी॒र्य॒म् । आ॒त्मा क्ष॒त्रमुरो॒ मम॑ ।। ७ ।।
bā॒hū me॒ bala॑mindri॒yaᳪ hastau॑ me॒ karma॑ vī॒rya॒m | ā॒tmā kṣa॒tramuro॒ mama॑ | | ७ | |
पृ॒ष्ठीर्मे॑ रा॒ष्ट्रमु॒दर॒मᳪसौ॑ ग्री॒वाश्च॒ श्रोणी॑ । ऊ॒रू अ॑र॒त्नी जानु॑नी॒ विशो॒ मेऽङ्गा॑नि स॒र्वत॑: ।। ८ ।।
pṛ॒ṣṭhīrme॑ rā॒ṣṭramu॒dara॒maᳪsau॑ grī॒vāśca॒ śroṇī॑ | ū॒rū a॑ra॒tnī jānu॑nī॒ viśo॒ me’ṅgā॑ni sa॒rvata॑: | | ८ | |
नाभि॑र्मे चि॒त्तं वि॒ज्ञानं॑ पा॒युर्मेऽप॑चितिर्भ॒सत् । आ॒न॒न्द॒न॒न्दावा॒ण्डौ मे॒ भग॒: सौभा॑ग्यं॒ पस॑: ।
जङ्घा॑भ्यां प॒द्भ्यां धर्मो॑ऽस्मि वि॒शि राजा॒ प्रति॑ष्ठितः ।। ९ ।।
nābhi॑rme ci॒ttaṃ vi॒jñānaṃ॑ pā॒yurme’pa॑citirbha॒sat | ā॒na॒nda॒na॒ndāvā॒ṇḍau me॒ bhaga॒: saubhā॑gyaṃ॒ pasa॑: | jaṅghā॑bhyāṃ pa॒dbhyāṃ dharmo॑’smi vi॒śi rājā॒ prati॑ṣṭhitaḥ | | ९ | |
प्रति॑ क्ष॒त्रे प्रति॑ तिष्ठामि रा॒ष्ट्रे प्रत्यश्वे॑षु॒ प्रति॑ तिष्ठामि॒ गोषु॑ ।
प्रत्यङ्गे॑षु॒ प्रति॑ तिष्ठाम्या॒त्मन् प्रति॑ प्रा॒णेषु॒ प्रति॑ तिष्ठामि पु॒ष्टे प्रति॒ द्यावा॑पृथि॒व्योः प्रति॑ तिष्ठामि य॒ज्ञे।। १ ०।।
त्र॒या दे॒वा एका॑दश त्रयस्त्रि॒ᳪशाः सु॒राध॑सः ।
बृह॒स्पति॑पुरोहिता दे॒वस्य॑ सवि॒तुः स॒वे । दे॒वा दे॒वैर॑वन्तु मा ।। ११ ।।
prati॑ kṣa॒tre prati॑ tiṣṭhāmi rā॒ṣṭre pratyaśve॑ṣu॒ prati॑ tiṣṭhāmi॒ goṣu॑ | pratyaṅge॑ṣu॒ prati॑ tiṣṭhāmyā॒tman prati॑ prā॒ṇeṣu॒ prati॑ tiṣṭhāmi pu॒ṣṭe prati॒ dyāvā॑pṛthi॒vyoḥ prati॑ tiṣṭhāmi ya॒jñe | | १ ० | | tra॒yā de॒vā ekā॑daśa trayastri॒ᳪśāḥ su॒rādha॑saḥ | bṛha॒spati॑purohitā de॒vasya॑ savi॒tuḥ sa॒ve | de॒vā de॒vaira॑vantu mā | | ११ | |
प्र॒थ॒मा द्वि॒तीयै॑र्द्वि॒तीया॑स्तृ॒तीयै॑स्तृ॒तीया॑: स॒त्येन॑ स॒त्यं य॒ज्ञेन॑ य॒ज्ञो यजु॑र्भि॒र्यजू॑ᳪषि॒ साम॑भि॒: सामा॑न्यृ॒ग्भिरृच॑: पुरोऽनुवा॒क्या॒भिः पुरोऽनुवा॒क्या॒ या॒ज्या॒भिर्या॒ज्या॒ वषट्का॒रैर्व॑षट्का॒रा आहु॑तिभि॒राहु॑तयो मे॒ कामा॒न्त्सम॑र्धयन्तु॒ भूः स्वाहा॑ ।। १२ ।।
pra॒tha॒mā dvi॒tīyai॑rdvi॒tīyā॑stṛ॒tīyai॑stṛ॒tīyā॑: sa॒tyena॑ sa॒tyaṃ ya॒jñena॑ ya॒jño yaju॑rbhi॒ryajū॑ᳪṣi॒ sāma॑bhi॒: sāmā॑nyṛ॒gbhirṛca॑: puro’nuvā॒kyā॒bhiḥ puro’nuvā॒kyā॒ yā॒jyā॒bhiryā॒jyā॒ vaṣaṭkā॒rairva॑ṣaṭkā॒rā āhu॑tibhi॒rāhu॑tayo me॒ kāmā॒ntsama॑rdhayantu॒ bhūḥ svāhā॑ | | १२ | |
लोमा॑नि॒ प्रय॑ति॒र्मम॒ त्वङ्म॒ आन॑ति॒राग॑तिः । मा॒ᳪसं म॒ उप॑नति॒र्वस्वस्थि॑ म॒ज्जा म॒ आन॑तिः ।। १३ ।।
lomā॑ni॒ praya॑ti॒rmama॒ tvaṅma॒ āna॑ti॒rāga॑tiḥ | mā॒ᳪsaṃ ma॒ upa॑nati॒rvasvasthi॑ ma॒jjā ma॒ āna॑tiḥ | | १३ | |
यद्दे॑वा देव॒हेड॑नं॒ देवा॑सश्चकृ॒मा व॒यम् । अ॒ग्निर्मा॒ तस्मा॒देन॑सो॒ विश्वा॑न्मुञ्च॒त्वᳪह॑सः ।। १४ ।।
yadde॑vā deva॒heḍa॑naṃ॒ devā॑saścakṛ॒mā va॒yam | a॒gnirmā॒ tasmā॒dena॑so॒ viśvā॑nmuñca॒tvaᳪha॑saḥ | | १४ | |
यदि॒ दिवा॒ यदि॒ नक्त॒मेना॑ᳪसि चकृ॒मा व॒यम् । वा॒युर्मा॒ तस्मा॒देन॑सो॒ विश्वा॑न्मुञ्च॒त्वᳪह॑सः ।। १५ ।।
yadi॒ divā॒ yadi॒ nakta॒menā॑ᳪsi cakṛ॒mā va॒yam | vā॒yurmā॒ tasmā॒dena॑so॒ viśvā॑nmuñca॒tvaᳪha॑saḥ | | १५ | |
यदि॒ जाग्र॒द्यदि॒ स्वप्न॒ एना॑ᳪसि चकृ॒मा व॒यम् । सूर्यो॑ मा॒ तस्मा॒देन॑सो॒ विश्वा॑न्मुञ्च॒त्वᳪह॑सः ।। १६ ।।
yadi॒ jāgra॒dyadi॒ svapna॒ enā॑ᳪsi cakṛ॒mā va॒yam | sūryo॑ mā॒ tasmā॒dena॑so॒ viśvā॑nmuñca॒tvaᳪha॑saḥ | | १६ | |
यद्ग्रामे॒ यदर॑ण्ये॒ यत्स॒भायां॒ यदि॑न्द्रि॒ये ।
यच्छू॒द्रे यदर्ये॒ यदेन॑श्चकृ॒मा व॒यं यदेक॒स्याधि॒ धर्म॑णि॒ तस्या॑व॒यज॑नमसि ।। १७ ।।
yadgrāme॒ yadara॑ṇye॒ yatsa॒bhāyāṃ॒ yadi॑ndri॒ye | yacchū॒dre yadarye॒ yadena॑ścakṛ॒mā va॒yaṃ yadeka॒syādhi॒ dharma॑ṇi॒ tasyā॑va॒yaja॑namasi | | १७ | |
यदापो॑ अ॒घ्न्या इति॒ वरु॒णेति॒ शपा॑महे॒ ततो॑ वरुण नो मुञ्च । अव॑भृथ निचुम्पुण निचे॒रुर॑सि निचुम्पु॒णः ।
अव॑ दे॒वैर्दे॒वकृ॑त॒मेनो॑ऽय॒क्ष्यव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि ।। १८ ।।
yadāpo॑ a॒ghnyā iti॒ varu॒ṇeti॒ śapā॑mahe॒ tato॑ varuṇa no muñca | ava॑bhṛtha nicumpuṇa nice॒rura॑si nicumpu॒ṇaḥ | ava॑ de॒vairde॒vakṛ॑ta॒meno॑’ya॒kṣyava॒ martyai॒rmartya॑kṛtaṃ puru॒rāvṇo॑ deva ri॒ṣaspā॑hi | | १८ | |
स॑मु॒द्रे ते॒ हृद॑यम॒प्स्वन्तः सं त्वा॑ विश॒न्त्वोष॑धीरु॒ताप॑: ।
सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान्द्वेष्टि॒ यं च॑ व॒यं द्वि॒ष्मः ।। १९ ।।
sa॑mu॒dre te॒ hṛda॑yama॒psvantaḥ saṃ tvā॑ viśa॒ntvoṣa॑dhīru॒tāpa॑: | su॒mi॒tri॒yā na॒ āpa॒ oṣa॑dhayaḥ santu durmitri॒yāstasmai॑ santu॒ yo’smāndveṣṭi॒ yaṃ ca॑ va॒yaṃ dvi॒ṣmaḥ | | १९ | |
द्रु॒प॒दादि॑व मुमुचा॒नः स्वि॒न्नः स्ना॒तो मला॑दिव । पू॒तं प॒वित्रे॑णे॒वाज्य॒माप॑: शुन्धन्तु मैन॑सः ।। २० ।।
dru॒pa॒dādi॑va mumucā॒naḥ svi॒nnaḥ snā॒to malā॑diva | pū॒taṃ pa॒vitre॑ṇe॒vājya॒māpa॑: śundhantu maina॑saḥ | | २० | |
उद्व॒यं तम॑स॒स्परि॒ स्व: पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।। २१ ।।
udva॒yaṃ tama॑sa॒spari॒ sva: paśya॑nta॒ utta॑ram | de॒vaṃ de॑va॒trā sūrya॒maga॑nma॒ jyoti॑rutta॒mam | | २१ | |
अ॒पो अ॒द्यान्व॑चारिष॒ᳪ रसे॑न॒ सम॑सृक्ष्महि ।
पय॑स्वानग्न॒ आऽग॑मं॒ तं मा॒ सᳪ सृ॑ज॒ वर्च॑सा प्र॒जया॑ च॒ धने॑न च ।। २२ ।।
a॒po a॒dyānva॑cāriṣa॒ᳪ rase॑na॒ sama॑sṛkṣmahi | paya॑svānagna॒ ā’ga॑maṃ॒ taṃ mā॒ saᳪ sṛ॑ja॒ varca॑sā pra॒jayā॑ ca॒ dhane॑na ca | | २२ | |
एधो॑ऽस्येधिषी॒महि॑ स॒मिद॑सि॒ तेजो॑ऽसि॒ तेजो॒ मयि॑ धेहि ।
स॒माव॑वर्ति पृथि॒वी समु॒षाः समु॒ सूर्य॑: । समु॒ विश्व॑मि॒दं जग॑त् ।
वै॒श्वा॒न॒रज्यो॑तिर्भूयासं वि॒भून् कामा॒न् व्य॒श्नवै॒ भूः स्वाहा॑ ।। २३ ।।
edho॑’syedhiṣī॒mahi॑ sa॒mida॑si॒ tejo॑’si॒ tejo॒ mayi॑ dhehi | sa॒māva॑varti pṛthi॒vī samu॒ṣāḥ samu॒ sūrya॑: | samu॒ viśva॑mi॒daṃ jaga॑t | vai॒śvā॒na॒rajyo॑tirbhūyāsaṃ vi॒bhūn kāmā॒n vya॒śnavai॒ bhūḥ svāhā॑ | | २३ | |
अ॒भ्या द॑धामि स॒मिध॒मग्ने॑ व्रतपते॒ त्वयि॑ ।
व्र॒तं च॑ श्र॒द्धां चोपै॑मी॒न्धे त्वा॑ दीक्षि॒तो अ॒हम् ।। २४ ।।
a॒bhyā da॑dhāmi sa॒midha॒magne॑ vratapate॒ tvayi॑ | vra॒taṃ ca॑ śra॒ddhāṃ copai॑mī॒ndhe tvā॑ dīkṣi॒to a॒ham | | २४ | |
यत्र॒ ब्रह्म॑ च क्ष॒त्रं च॑ स॒म्यञ्चो॒ चर॑तः स॒ह ।
तँल्लो॒कं पुण्यं॒ प्रज्ञे॑षं॒ यत्र॑ दे॒वाः स॒हाग्निना॑ ।। २५ ।।
yatra॒ brahma॑ ca kṣa॒traṃ ca॑ sa॒myañco॒ cara॑taḥ sa॒ha | tam̐llo॒kaṃ puṇyaṃ॒ prajñe॑ṣaṃ॒ yatra॑ de॒vāḥ sa॒hāgninā॑ | | २५ | |
यत्रेन्द्र॑श्च वा॒युश्च॑ स॒म्यञ्चो॒ चर॑तः स॒ह । तँल्लो॒कं पुण्यं॒ प्रज्ञे॑षं॒ यत्र॑ से॒दिर्न वि॒द्यते॑ ।। २६ ।।
yatrendra॑śca vā॒yuśca॑ sa॒myañco॒ cara॑taḥ sa॒ha | tam̐llo॒kaṃ puṇyaṃ॒ prajñe॑ṣaṃ॒ yatra॑ se॒dirna vi॒dyate॑ | | २६ | |
अ॒ᳪशुना॑ ते अ॒ᳪशुः पृ॑च्यतां॒ परु॑षा॒ परु॑: । ग॒न्धस्ते॒ सोम॑मवतु॒ मदा॑य॒ रसो॒ अच्यु॑तः ।। २७ ।।
a॒ᳪśunā॑ te a॒ᳪśuḥ pṛ॑cyatāṃ॒ paru॑ṣā॒ paru॑: | ga॒ndhaste॒ soma॑mavatu॒ madā॑ya॒ raso॒ acyu॑taḥ | | २७ | |
सि॒ञ्चन्ति॒ परि॑ षिञ्च॒न्त्युत्सि॑ञ्चन्ति पु॒नन्ति॑ च । सुरा॑यै ब॒भ्र्वै॒ मदे॑ कि॒न्त्वो व॑दति कि॒न्त्वः ।। २८ ।।
si॒ñcanti॒ pari॑ ṣiñca॒ntyutsi॑ñcanti pu॒nanti॑ ca | surā॑yai ba॒bhrvai॒ made॑ ki॒ntvo va॑dati ki॒ntvaḥ | | २८ | |
धा॒नाव॑न्तं कर॒म्भिण॑मपू॒पव॑न्तमु॒क्थिन॑म् । इन्द्र॑ प्रा॒तर्जु॑षस्व नः ।। २९ ।।
dhā॒nāva॑ntaṃ kara॒mbhiṇa॑mapū॒pava॑ntamu॒kthina॑m | indra॑ prā॒tarju॑ṣasva naḥ | | २९ | |
बृ॒हदिन्द्रा॑य गायत॒ मरु॑तो वृत्र॒हन्त॑मम् । येन॒ ज्योति॒रज॑नयन्नृता॒वृधो॑ दे॒वं दे॒वाय॒ जागृ॑वि ।। ३० ।।
bṛ॒hadindrā॑ya gāyata॒ maru॑to vṛtra॒hanta॑mam | yena॒ jyoti॒raja॑nayannṛtā॒vṛdho॑ de॒vaṃ de॒vāya॒ jāgṛ॑vi | | ३० | |
अध्व॑र्यो॒ अद्रि॑भिः सु॒तᳪ सोमं॑ प॒वित्र॒ आ न॑य । पु॒ना॒हीन्द्रा॑य॒ पात॑वे ।। ३१ ।।
adhva॑ryo॒ adri॑bhiḥ su॒taᳪ somaṃ॑ pa॒vitra॒ ā na॑ya | pu॒nā॒hīndrā॑ya॒ pāta॑ve | | ३१ | |
यो भू॒ताना॒मधि॑पति॒र्यस्मिँ॑ल्लो॒का अधि॑ श्रि॒ताः ।
य ईशे॑ मह॒तो म॒हाँस्तेन॑ गृह्णामि॒ त्वाम॒हं मयि॑ गृह्णामि॒ त्वाम॒हम् ।। ३२ ।।
yo bhū॒tānā॒madhi॑pati॒ryasmim̐॑llo॒kā adhi॑ śri॒tāḥ | ya īśe॑ maha॒to ma॒hām̐stena॑ gṛhṇāmi॒ tvāma॒haṃ mayi॑ gṛhṇāmi॒ tvāma॒ham | | ३२ | |
उ॒प॒या॒मगृ॑हीतोऽस्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्ण॑ ए॒ष ते॒ योनि॑र॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑ ।। ३३ ।।
u॒pa॒yā॒magṛ॑hīto’sya॒śvibhyāṃ॑ tvā॒ sara॑svatyai॒ tvendrā॑ya tvā su॒trāmṇa॑ e॒ṣa te॒ yoni॑ra॒śvibhyāṃ॑ tvā॒ sara॑svatyai॒ tvendrā॑ya tvā su॒trāmṇe॑ | | ३३ | |
प्रा॒ण॒पा मे॑ अपान॒पाश्च॑क्षु॒ष्पाः श्रो॑त्र॒पाश्च॑ मे ।
वाचो॑ मे वि॒श्वभे॑षजो॒ मन॑सोऽसि वि॒लाय॑कः ।। ३४ ।।
prā॒ṇa॒pā me॑ apāna॒pāśca॑kṣu॒ṣpāḥ śro॑tra॒pāśca॑ me | vāco॑ me vi॒śvabhe॑ṣajo॒ mana॑so’si vi॒lāya॑kaḥ | | ३४ | |
अ॒श्विन॑कृतस्य ते॒ सर॑स्वतिकृत॒स्येन्द्रे॑ण सु॒त्राम्णा॑ कृ॒तस्य॑ ।
उप॑हूत॒ उप॑हूतस्य भक्षयामि ।। ३५ ।।
a॒śvina॑kṛtasya te॒ sara॑svatikṛta॒syendre॑ṇa su॒trāmṇā॑ kṛ॒tasya॑ | upa॑hūta॒ upa॑hūtasya bhakṣayāmi | | ३५ | |
समि॑द्ध॒ इन्द्र॑ उ॒षसा॒मनी॑के पुरो॒रुचा॑ पूर्व॒कृद्वा॑वृधा॒नः ।
त्रि॒भिर्दे॒वैस्त्रि॒ᳪशता॒ वज्र॑बाहुर्ज॒घान॑ वृ॒त्रं वि दुरो॑ ववार ।। ३६ ।।
sami॑ddha॒ indra॑ u॒ṣasā॒manī॑ke puro॒rucā॑ pūrva॒kṛdvā॑vṛdhā॒naḥ | tri॒bhirde॒vaistri॒ᳪśatā॒ vajra॑bāhurja॒ghāna॑ vṛ॒traṃ vi duro॑ vavāra | | ३६ | |
नरा॒शᳪस॒: प्रति॒ शूरो॒ मिमा॑न॒स्तनू॒नपा॒त्प्रति॑ य॒ज्ञस्य॒ धाम॑ ।
गोभि॑र्व॒पावा॒न् मधु॑ना सम॒ञ्जन् हिर॑ण्यैश्च॒न्द्री य॑जति॒ प्रचे॑ताः ।। ३७ ।।
narā॒śaᳪsa॒: prati॒ śūro॒ mimā॑na॒stanū॒napā॒tprati॑ ya॒jñasya॒ dhāma॑ | gobhi॑rva॒pāvā॒n madhu॑nā sama॒ñjan hira॑ṇyaiśca॒ndrī ya॑jati॒ prace॑tāḥ | | ३७ | |
ई॒डि॒तो दे॒वैर्हरि॑वाँ२ अभि॒ष्टिरा॒जुह्वा॑नो ह॒विषा॒ शर्ध॑मानः ।
पु॒र॒न्द॒रो गो॑त॒भिद्वज्र॑बाहु॒रा या॑तु य॒ज्ञमुप॑ नो जुषा॒णः ।। ३८ ।।
ī॒ḍi॒to de॒vairhari॑vām̐२ abhi॒ṣṭirā॒juhvā॑no ha॒viṣā॒ śardha॑mānaḥ | pu॒ra॒nda॒ro go॑ta॒bhidvajra॑bāhu॒rā yā॑tu ya॒jñamupa॑ no juṣā॒ṇaḥ | | ३८ | |
जु॒षा॒णो ब॒र्हिर्हरि॑वान् न॒ इन्द्र॑: प्रा॒चीन॑ᳪ सीदत् प्र॒दिशा॑ पृथि॒व्याः ।
उ॒रु॒प्रथा॒: प्रथ॑मानᳪ स्यो॒नमा॑दि॒त्यैर॒क्तं वसु॑भिः स॒जोषा॑: ।। ३९ ।।
ju॒ṣā॒ṇo ba॒rhirhari॑vān na॒ indra॑: prā॒cīna॑ᳪ sīdat pra॒diśā॑ pṛthi॒vyāḥ | u॒ru॒prathā॒: pratha॑mānaᳪ syo॒namā॑di॒tyaira॒ktaṃ vasu॑bhiḥ sa॒joṣā॑: | | ३९ | |
इन्द्रं॒ दुर॑: कव॒ष्यो धाव॑माना॒ वृषा॑णं यन्तु॒ जन॑यः सु॒पत्नी॑: ।
द्वारो॑ दे॒वीर॒भितो॒ वि श्र॑यन्ताᳪ सु॒वीरा॑ वी॒रं प्रथ॑माना॒ महो॑भिः ।। ४० ।।
indraṃ॒ dura॑: kava॒ṣyo dhāva॑mānā॒ vṛṣā॑ṇaṃ yantu॒ jana॑yaḥ su॒patnī॑: | dvāro॑ de॒vīra॒bhito॒ vi śra॑yantāᳪ su॒vīrā॑ vī॒raṃ pratha॑mānā॒ maho॑bhiḥ | | ४० | |
उ॒षासा॒नक्ता॑ बृह॒ती बृ॒हन्तं॒ पय॑स्वती सु॒दुघे॒ शूर॒मिन्द्र॑म् ।
तन्तुं॑ त॒तं पेश॑सा सं॒वय॑न्ती दे॒वानां॑ दे॒वं य॑जतः सुरु॒क्मे ।। ४१ ।।
u॒ṣāsā॒naktā॑ bṛha॒tī bṛ॒hantaṃ॒ paya॑svatī su॒dughe॒ śūra॒mindra॑m | tantuṃ॑ ta॒taṃ peśa॑sā saṃ॒vaya॑ntī de॒vānāṃ॑ de॒vaṃ ya॑jataḥ suru॒kme | | ४१ | |
दैव्या॒ मिमा॑ना॒ मनु॑षः पुरु॒त्रा होता॑रा॒विन्द्रं॑ प्रथ॒मा सु॒वाचा॑ ।
मू॒र्धन् य॒ज्ञस्य॒ मधु॑ना॒ दधा॑ना प्रा॒चीनं॒ ज्योति॑र्ह॒विषा॑ वृधातः ।। ४२ ।।
daivyā॒ mimā॑nā॒ manu॑ṣaḥ puru॒trā hotā॑rā॒vindraṃ॑ pratha॒mā su॒vācā॑ | mū॒rdhan ya॒jñasya॒ madhu॑nā॒ dadhā॑nā prā॒cīnaṃ॒ jyoti॑rha॒viṣā॑ vṛdhātaḥ | | ४२ | |
ति॒स्रो दे॒वीर्ह॒विषा॒ वर्ध॑माना॒ इन्द्रं॑ जुषा॒णा जन॑यो॒ न पत्नी॑: ।
अच्छि॑न्नं॒ तन्तुं॒ पय॑सा॒ सर॑स्व॒तीडा॑ दे॒वी भार॑ती वि॒श्वतू॑र्तिः ।। ४३ ।।
ti॒sro de॒vīrha॒viṣā॒ vardha॑mānā॒ indraṃ॑ juṣā॒ṇā jana॑yo॒ na patnī॑: | acchi॑nnaṃ॒ tantuṃ॒ paya॑sā॒ sara॑sva॒tīḍā॑ de॒vī bhāra॑tī vi॒śvatū॑rtiḥ | | ४३ | |
त्वष्टा॒ दध॒च्छुष्म॒मिन्द्रा॑य॒ वृष्णेऽपा॒कोऽचि॑ष्टुर्य॒शसे॑ पु॒रूणि॑ ।
वृषा॒ यज॒न्वृष॑णं॒ भूरि॑रेता मू॒र्धन् य॒ज्ञस्य॒ सम॑नक्तु दे॒वान् ।। ४४ ।।
tvaṣṭā॒ dadha॒cchuṣma॒mindrā॑ya॒ vṛṣṇe’pā॒ko’ci॑ṣṭurya॒śase॑ pu॒rūṇi॑ | vṛṣā॒ yaja॒nvṛṣa॑ṇaṃ॒ bhūri॑retā mū॒rdhan ya॒jñasya॒ sama॑naktu de॒vān | | ४४ | |
वन॒स्पति॒रव॑सृष्टो॒ न पाशै॒स्त्मन्या॑ सम॒ञ्जञ्छ॑मि॒ता न दे॒वः ।
इन्द्र॑स्य ह॒व्यैर्ज॒ठरं॑ पृणा॒नः स्वदा॑ति य॒ज्ञं मधु॑ना घृ॒तेन॑ ।। ४५ ।।
vana॒spati॒rava॑sṛṣṭo॒ na pāśai॒stmanyā॑ sama॒ñjañcha॑mi॒tā na de॒vaḥ | indra॑sya ha॒vyairja॒ṭharaṃ॑ pṛṇā॒naḥ svadā॑ti ya॒jñaṃ madhu॑nā ghṛ॒tena॑ | | ४५ | |
स्तो॒काना॒मिन्दुं॒ प्रति॒ शूर॒ इन्द्रो॑ वृषा॒यमा॑णो वृष॒भस्तु॑रा॒षाट् ।
घृ॒त॒प्रुषा॒ मन॑सा॒ मोद॑माना॒: स्वाहा॑ दे॒वा अ॒मृता॑ मादयन्ताम् ।। ४६ ।।
sto॒kānā॒minduṃ॒ prati॒ śūra॒ indro॑ vṛṣā॒yamā॑ṇo vṛṣa॒bhastu॑rā॒ṣāṭ | ghṛ॒ta॒pruṣā॒ mana॑sā॒ moda॑mānā॒: svāhā॑ de॒vā a॒mṛtā॑ mādayantām | | ४६ | |
आ या॒त्विन्द्रोऽव॑स॒ उप॑ न इ॒ह स्तु॒तः स॑ध॒मद॑स्तु॒ शूर॑: ।
वा॒वृ॒धा॒नस्तवि॑षी॒र्यस्य॑ पू॒र्वीर्द्यौर्न क्ष॒त्रम॒भिभू॑ति॒ पुष्या॑त् ।। ४७ ।।
ā yā॒tvindro’va॑sa॒ upa॑ na i॒ha stu॒taḥ sa॑dha॒mada॑stu॒ śūra॑: | vā॒vṛ॒dhā॒nastavi॑ṣī॒ryasya॑ pū॒rvīrdyaurna kṣa॒trama॒bhibhū॑ti॒ puṣyā॑t | | ४७ | |
आ न॒ इन्द्रो॑ दू॒रादा न॑ आ॒साद॑भिष्टि॒कृदव॑से यासदु॒ग्रः ।
ओजि॑ष्ठेभिर्नृ॒पति॒र्वज्र॑बाहुः स॒ङ्गे स॒मत्सु॑ तु॒र्वणि॑: पृत॒न्यून् ।। ४८ ।।
ā na॒ indro॑ dū॒rādā na॑ ā॒sāda॑bhiṣṭi॒kṛdava॑se yāsadu॒graḥ | oji॑ṣṭhebhirnṛ॒pati॒rvajra॑bāhuḥ sa॒ṅge sa॒matsu॑ tu॒rvaṇi॑: pṛta॒nyūn | | ४८ | |
आ न॒ इन्द्रो॒ हरि॑भिर्या॒त्वच्छा॑र्वाची॒नोऽव॑से॒ राध॑से च ।
तिष्ठा॑ति व॒ज्री म॒घवा॑ विर॒प्शीमं य॒ज्ञमनु॑ नो॒ वाज॑सातौ ।। ४९ ।।
ā na॒ indro॒ hari॑bhiryā॒tvacchā॑rvācī॒no’va॑se॒ rādha॑se ca | tiṣṭhā॑ti va॒jrī ma॒ghavā॑ vira॒pśīmaṃ ya॒jñamanu॑ no॒ vāja॑sātau | | ४९ | |
त्रा॒तार॒मिन्द्र॑मवि॒तार॒मिन्द्र॒ᳪ हवे॑ – हवे सु॒हव॒ᳪ शूर॒मिन्द्र॑म् ।
ह्वया॑मि श॒क्रं पु॑रुहू॒तमिन्द्र॑ᳪ स्व॒स्ति नो॑ म॒घवा॑ धा॒त्विन्द्र॑: ।। ५० ।।
trā॒tāra॒mindra॑mavi॒tāra॒mindra॒ᳪ have॑ – have su॒hava॒ᳪ śūra॒mindra॑m | hvayā॑mi śa॒kraṃ pu॑ruhū॒tamindra॑ᳪ sva॒sti no॑ ma॒ghavā॑ dhā॒tvindra॑: | | ५० | |
इन्द्र॑: सु॒त्रामा॒ स्ववाँ॒२ अवो॑भिः सुमृडी॒को भ॑वतु वि॒श्ववे॑दाः ।
बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम ।। ५१ ।।
indra॑: su॒trāmā॒ svavām॒̐२ avo॑bhiḥ sumṛḍī॒ko bha॑vatu vi॒śvave॑dāḥ | bādha॑tāṃ॒ dveṣo॒ abha॑yaṃ kṛṇotu su॒vīrya॑sya॒ pata॑yaḥ syāma | | ५१ | |
तस्य॑ व॒यᳪ सु॑म॒तौ य॒ज्ञिय॒स्यापि॑ भ॒द्रे सौ॑मन॒से स्या॑म ।
स सु॒त्रामा॒ स्ववाँ॒२ इन्द्रो॑ अ॒स्मे आ॒राच्चि॒द् द्वेष॑: सनु॒तर्यु॑योतु ।। ५२ ।।
tasya॑ va॒yaᳪ su॑ma॒tau ya॒jñiya॒syāpi॑ bha॒dre sau॑mana॒se syā॑ma | sa su॒trāmā॒ svavām॒̐२ indro॑ a॒sme ā॒rācci॒d dveṣa॑: sanu॒taryu॑yotu | | ५२ | |
आ म॒न्द्रैरि॑न्द्र॒ हरि॑भिर्या॒हि म॒यूर॑रोमभिः ।
मा त्वा॒ के चि॒न्नि य॑म॒न् विं ना पा॒शिनोऽति॒ धन्वे॑व॒ ताँ२ इ॑हि ।। ५३ ।।
ā ma॒ndrairi॑ndra॒ hari॑bhiryā॒hi ma॒yūra॑romabhiḥ | mā tvā॒ ke ci॒nni ya॑ma॒n viṃ nā pā॒śino’ti॒ dhanve॑va॒ tām̐२ i॑hi | | ५३ | |
ए॒वेदिन्द्रं॒ वृष॑णं॒ वज्र॑बाहुं॒ वसि॑ष्ठासो अ॒भ्य॒र्चन्त्य॒र्कैः ।
स न॑ स्तु॒तो वी॒रव॑द्धातु॒ गोम॑द्यू॒यं पा॑त स्व॒स्तिभि॒: सदा॑ नः ।। ५४ ।।
e॒vedindraṃ॒ vṛṣa॑ṇaṃ॒ vajra॑bāhuṃ॒ vasi॑ṣṭhāso a॒bhya॒rcantya॒rkaiḥ | sa na॑ stu॒to vī॒rava॑ddhātu॒ goma॑dyū॒yaṃ pā॑ta sva॒stibhi॒: sadā॑ naḥ | | ५४ | |
समि॑द्धो अ॒ग्निर॑श्विना त॒प्तो घ॒र्मो वि॒राट् सु॒तः । दु॒हे धे॒नुः सर॑स्वती॒ सोम॑ᳪ शु॒क्रमि॒हेन्द्रि॒यम् ।। ५५ ।।
sami॑ddho a॒gnira॑śvinā ta॒pto gha॒rmo vi॒rāṭ su॒taḥ | du॒he dhe॒nuḥ sara॑svatī॒ soma॑ᳪ śu॒krami॒hendri॒yam | | ५५ | |
त॒नू॒पा भि॒षजा॑ सु॒तेऽश्विनो॒भा सर॑स्वती । मध्वा॒ रजा॑ᳪसीन्द्रि॒यमिन्द्रा॑य प॒थिभि॑र्वहान् ।। ५६ ।।
ta॒nū॒pā bhi॒ṣajā॑ su॒te’śvino॒bhā sara॑svatī | madhvā॒ rajā॑ᳪsīndri॒yamindrā॑ya pa॒thibhi॑rvahān | | ५६ | |
इन्द्रा॒येन्दु॒ᳪ सर॑स्वती॒ नरा॒शᳪसे॑न न॒ग्नहु॑म् । अधा॑ताम॒श्विना॒ मधु॑ भेष॒जं भि॒षजा॑ सु॒ते ।। ५७ ।।
indrā॒yendu॒ᳪ sara॑svatī॒ narā॒śaᳪse॑na na॒gnahu॑m | adhā॑tāma॒śvinā॒ madhu॑ bheṣa॒jaṃ bhi॒ṣajā॑ su॒te | | ५७ | |
आ॒जुह्वा॑ना॒ सर॑स्व॒तीन्द्रा॑येन्द्रि॒याणि॑ वी॒र्य॒म् । इडा॑भिर॒श्विना॒विष॒ᳪ समूर्ज॒ᳪ सᳪ र॒यिं द॑धुः ।। ५८ ।।
ā॒juhvā॑nā॒ sara॑sva॒tīndrā॑yendri॒yāṇi॑ vī॒rya॒m | iḍā॑bhira॒śvinā॒viṣa॒ᳪ samūrja॒ᳪ saᳪ ra॒yiṃ da॑dhuḥ | | ५८ | |
अ॒श्विना॒ नमु॑चेः सु॒तᳪ सोम॑ᳪ शु॒क्रं प॑रि॒स्रुता॑ । सर॑स्वती॒ तमा ऽभ॑रद्ब॒र्हिषेन्द्रा॑य॒ पात॑वे ।। ५९ ।।
a॒śvinā॒ namu॑ceḥ su॒taᳪ soma॑ᳪ śu॒kraṃ pa॑ri॒srutā॑ | sara॑svatī॒ tamā ’bha॑radba॒rhiṣendrā॑ya॒ pāta॑ve | | ५९ | |
क॒व॒ष्यो न॒ व्यच॑स्वतीर॒श्विभ्यां॒ न दुरो॒ दिश॑: । इन्द्रो॒ न रोद॑सी उ॒भे दु॒हे का॒मान्त्सर॑स्वती ।। ६० ।।
ka॒va॒ṣyo na॒ vyaca॑svatīra॒śvibhyāṃ॒ na duro॒ diśa॑: | indro॒ na roda॑sī u॒bhe du॒he kā॒māntsara॑svatī | | ६० | |
उ॒षासा॒नक्त॑मश्विना॒ दिवेन्द्र॑ सा॒यमि॑न्द्रियैः । स॒ञ्जा॒ना॒ने सु॒पेश॑सा॒ सम॑ञ्जाते॒ सर॑स्वत्या ।। ६१ ।।
u॒ṣāsā॒nakta॑maśvinā॒ divendra॑ sā॒yami॑ndriyaiḥ | sa॒ñjā॒nā॒ne su॒peśa॑sā॒ sama॑ñjāte॒ sara॑svatyā | | ६१ | |
पा॒तं नो॑ अश्विना॒ दिवा॑ पा॒हि नक्त॑ᳪ सरस्वति । दैव्या॑ होतारा भिषजा पा॒तमिन्द्र॒ᳪ सचा॑ सु॒ते ।। ६२ ।।
pā॒taṃ no॑ aśvinā॒ divā॑ pā॒hi nakta॑ᳪ sarasvati | daivyā॑ hotārā bhiṣajā pā॒tamindra॒ᳪ sacā॑ su॒te | | ६२ | |
ति॒स्रस्त्रे॒धा सर॑स्वत्य॒श्विना॒ भार॒तीडा॑ । ती॒व्रं प॑रि॒स्रुता॒ सोम॒मिन्द्रा॑य सुषुवु॒र्मद॑म् ।। ६३ ।।
ti॒srastre॒dhā sara॑svatya॒śvinā॒ bhāra॒tīḍā॑ | tī॒vraṃ pa॑ri॒srutā॒ soma॒mindrā॑ya suṣuvu॒rmada॑m | | ६३ | |
अ॒श्विना॑ भेष॒जं मधु॑ भेष॒जं न॒: सर॑स्वती । इन्द्रे॒ त्वष्टा॒ यश॒: श्रिय॑ᳪ रू॒पᳪ-रू॑पमधुः सु॒ते ।। ६४ ।।
a॒śvinā॑ bheṣa॒jaṃ madhu॑ bheṣa॒jaṃ na॒: sara॑svatī | indre॒ tvaṣṭā॒ yaśa॒: śriya॑ᳪ rū॒paᳪ-rū॑pamadhuḥ su॒te | | ६४ | |
ऋ॒तु॒थेन्द्रो॒ वन॒स्पति॑: शशमा॒नः प॑रि॒स्रुता॑ । की॒लाल॑म॒श्विभ्यां॒ मधु॑ दु॒हे धे॒नुः सर॑स्वती ।। ६५ ।।
ṛ॒tu॒thendro॒ vana॒spati॑: śaśamā॒naḥ pa॑ri॒srutā॑ | kī॒lāla॑ma॒śvibhyāṃ॒ madhu॑ du॒he dhe॒nuḥ sara॑svatī | | ६५ | |
गोभि॒र्न सोम॑मश्विना॒ मास॑रेण परि॒स्रुता॑ । सम॑धात॒ᳪ सर॑स्वत्या॒ स्वाहेन्द्रे॑ सु॒तं मधु॑ ।। ६६ ।।
gobhi॒rna soma॑maśvinā॒ māsa॑reṇa pari॒srutā॑ | sama॑dhāta॒ᳪ sara॑svatyā॒ svāhendre॑ su॒taṃ madhu॑ | | ६६ | |
अ॒श्विना॑ ह॒विरि॑न्द्रि॒यं नमु॑चेर्धि॒या सर॑स्वती । आ शु॒क्रमा॑सु॒राद्वसु॑ म॒घमिन्द्रा॑य जभ्रिरे ।। ६७ ।।
a॒śvinā॑ ha॒viri॑ndri॒yaṃ namu॑cerdhi॒yā sara॑svatī | ā śu॒kramā॑su॒rādvasu॑ ma॒ghamindrā॑ya jabhrire | | ६७ | |
यम॒श्विना॒ सर॑स्वती ह॒विषेन्द्र॒मव॑र्धयन् । स बि॑भेद व॒लं म॒घं नमु॑चावासु॒रे सचा॑ ।। ६८ ।।
yama॒śvinā॒ sara॑svatī ha॒viṣendra॒mava॑rdhayan | sa bi॑bheda va॒laṃ ma॒ghaṃ namu॑cāvāsu॒re sacā॑ | | ६८ | |
तमिन्द्रं॑ प॒शव॒: सचा॒श्विनो॒भा सर॑स्वती । दधा॑ना अ॒भ्य॒नूषत ह॒विषा॑ य॒ज्ञ इ॑न्द्रि॒यैः ।। ६९ ।।
tamindraṃ॑ pa॒śava॒: sacā॒śvino॒bhā sara॑svatī | dadhā॑nā a॒bhya॒nūṣata ha॒viṣā॑ ya॒jña i॑ndri॒yaiḥ | | ६९ | |
य इन्द्र॑ इन्द्रि॒यं द॒धुः स॑वि॒ता वरु॑णो॒ भग॑: । स सु॒त्रामा॑ ह॒विष्प॑ति॒र्यज॑मानाय सश्चत ।। ७० ।।
ya indra॑ indri॒yaṃ da॒dhuḥ sa॑vi॒tā varu॑ṇo॒ bhaga॑: | sa su॒trāmā॑ ha॒viṣpa॑ti॒ryaja॑mānāya saścata | | ७० | |
स॒वि॒ता वरु॑णो दध॒द्यज॑मानाय दा॒शुषे॑ । आद॑त्त॒ नमु॑चे॒र्वसु॑ सु॒त्रामा॒ बल॑मिन्द्रि॒यम् ।। ७१ ।।
sa॒vi॒tā varu॑ṇo dadha॒dyaja॑mānāya dā॒śuṣe॑ | āda॑tta॒ namu॑ce॒rvasu॑ su॒trāmā॒ bala॑mindri॒yam | | ७१ | |
वरु॑णः क्ष॒त्रमि॑न्द्रि॒यं भगे॑न सवि॒ता श्रिय॑म् । सु॒त्रामा॒ यश॑सा॒ बलं॒ दधा॑ना य॒ज्ञमा॑शत ।। ७२ ।।
varu॑ṇaḥ kṣa॒trami॑ndri॒yaṃ bhage॑na savi॒tā śriya॑m | su॒trāmā॒ yaśa॑sā॒ balaṃ॒ dadhā॑nā ya॒jñamā॑śata | | ७२ | |
अ॒श्विना॒ गोभि॑रिन्द्रि॒यमश्वे॑भिर्वी॒र्यं बल॑म् । ह॒विषेन्द्र॒ᳪ सर॑स्वती॒ यज॑मानमवर्धयन् ।। ७३ ।।
a॒śvinā॒ gobhi॑rindri॒yamaśve॑bhirvī॒ryaṃ bala॑m | ha॒viṣendra॒ᳪ sara॑svatī॒ yaja॑mānamavardhayan | | ७३ | |
ता नास॑त्या सु॒पेश॑सा॒ हिर॑ण्यवर्तनी॒ नरा॑ । सर॑स्वती ह॒विष्म॒तीन्द्र॒ कर्म॑सु नोऽवत ।। ७४ ।।
tā nāsa॑tyā su॒peśa॑sā॒ hira॑ṇyavartanī॒ narā॑ | sara॑svatī ha॒viṣma॒tīndra॒ karma॑su no’vata | | ७४ | |
ता भि॒षजा॑ सु॒कर्म॑णा॒ सा सु॒दुघा॒ सर॑स्वती । स वृ॑त्र॒हा श॒तक्र॑तु॒रिन्द्रा॑य दधुरिन्द्रि॒यम् ।। ७५ ।।
tā bhi॒ṣajā॑ su॒karma॑ṇā॒ sā su॒dughā॒ sara॑svatī | sa vṛ॑tra॒hā śa॒takra॑tu॒rindrā॑ya dadhurindri॒yam | | ७५ | |
यु॒वᳪ सु॒राम॑मश्विना॒ नमु॑चावासु॒रे सचा॑ । वि॒पि॒पा॒नाः सर॑स्व॒तीन्द्रं॒ कर्म॑स्वावत ।। ७६ ।।
yu॒vaᳪ su॒rāma॑maśvinā॒ namu॑cāvāsu॒re sacā॑ | vi॒pi॒pā॒nāḥ sara॑sva॒tīndraṃ॒ karma॑svāvata | | ७६ | |
पु॒त्रमि॑व पि॒तरा॑व॒श्विनो॒भेन्द्रा॒वथु॒: काव्यै॑र्द॒ᳪसना॑भिः ।यत्सु॒रामं॒ व्यपि॑ब॒: शची॑भि॒: सर॑स्वती त्वा मघवन्नभिष्णक् ।। ७७ ।।
pu॒trami॑va pi॒tarā॑va॒śvino॒bhendrā॒vathu॒: kāvyai॑rda॒ᳪsanā॑bhiḥ | yatsu॒rāmaṃ॒ vyapi॑ba॒: śacī॑bhi॒: sara॑svatī tvā maghavannabhiṣṇak | | ७७ | |
यस्मि॒न्नश्वा॑स ऋष॒भास॑ उ॒क्षणो॑ व॒शा मे॒षा अ॑वसृ॒ष्टास॒ आहु॑ताः ।
की॒ला॒ल॒पे सोम॑पृष्ठाय वे॒धसे॑ हृ॒दा म॒तिं ज॑नय॒ चारु॑म॒ग्नये॑ ।। ७८ ।।
yasmi॒nnaśvā॑sa ṛṣa॒bhāsa॑ u॒kṣaṇo॑ va॒śā me॒ṣā a॑vasṛ॒ṣṭāsa॒ āhu॑tāḥ | kī॒lā॒la॒pe soma॑pṛṣṭhāya ve॒dhase॑ hṛ॒dā ma॒tiṃ ja॑naya॒ cāru॑ma॒gnaye॑ | | ७८ | |
अहा॑व्यग्ने ह॒विरा॒स्ये॒ ते स्रु॒ची॒व घृ॒तं च॒म्वी॒व॒ सोम॑: ।
वा॒ज॒सनि॑ᳪ र॒यिम॒स्मे सु॒वीरं॑ प्रश॒स्तं धे॑हि य॒शसं॑ बृ॒हन्त॑म् ।। ७९ ।।
ahā॑vyagne ha॒virā॒sye॒ te sru॒cī॒va ghṛ॒taṃ ca॒mvī॒va॒ soma॑: | vā॒ja॒sani॑ᳪ ra॒yima॒sme su॒vīraṃ॑ praśa॒staṃ dhe॑hi ya॒śasaṃ॑ bṛ॒hanta॑m | | ७९ | |
अ॒श्विना॒ तेज॑सा॒ चक्षु॑: प्रा॒णेन॒ सर॑स्वती वी॒र्य॒म् । वा॒चेन्द्रो॒ बले॒नेन्द्रा॑य दधुरिन्द्रि॒यम् ।। ८० ।।
a॒śvinā॒ teja॑sā॒ cakṣu॑: prā॒ṇena॒ sara॑svatī vī॒rya॒m | vā॒cendro॒ bale॒nendrā॑ya dadhurindri॒yam | | ८० | |
गोम॑दू॒ षु णा॑सत्या॒श्वा॑वद्यातमश्विना । व॒र्ती रु॑द्रा नृ॒पाय्य॑म् ।। ८१ ।।
goma॑dū॒ ṣu ṇā॑satyā॒śvā॑vadyātamaśvinā | va॒rtī ru॑drā nṛ॒pāyya॑m | | ८१ | |
न यत्परो॒ नान्त॑र आद॒धर्ष॑द्वृषण्वसू । दु॒:शᳪसो॒ मर्त्यो॑ रि॒पुः ।। ८२ ।।
na yatparo॒ nānta॑ra āda॒dharṣa॑dvṛṣaṇvasū | du॒:śaᳪso॒ martyo॑ ri॒puḥ | | ८२ | |
ता न॒ आ वो॑ढमश्विना र॒यिं पि॒शङ्ग॑संदृशम् । धिष्ण्या॑ वरिवो॒विद॑म् ।। ८३ ।।
tā na॒ ā vo॑ḍhamaśvinā ra॒yiṃ pi॒śaṅga॑saṃdṛśam | dhiṣṇyā॑ varivo॒vida॑m | | ८३ | |
पा॒व॒का न॒: सर॑स्वती॒ वाजे॑भिर्वा॒जिनी॑वती । य॒ज्ञं व॑ष्टु धि॒याव॑सुः ।। ८४ ।।
pā॒va॒kā na॒: sara॑svatī॒ vāje॑bhirvā॒jinī॑vatī | ya॒jñaṃ va॑ṣṭu dhi॒yāva॑suḥ | | ८४ | |
चो॒द॒यि॒त्री सू॒नृता॑नां॒ चेत॑न्ती सुमती॒नाम् । य॒ज्ञं द॑धे॒ सर॑स्वती ।। ८५ ।।
co॒da॒yi॒trī sū॒nṛtā॑nāṃ॒ ceta॑ntī sumatī॒nām | ya॒jñaṃ da॑dhe॒ sara॑svatī | | ८५ | |
म॒हो अर्ण॒: सर॑स्वती॒ प्र चे॑तयति के॒तुना॑ । धियो॒ विश्वा॒ वि रा॑जति ।। ८६ ।।
ma॒ho arṇa॒: sara॑svatī॒ pra ce॑tayati ke॒tunā॑ | dhiyo॒ viśvā॒ vi rā॑jati | | ८६ | |
इन्द्रा या॑हि चित्रभानो सु॒ता इ॒मे त्वा॒यव॑: । अण्वी॑भि॒स्तना॑ पू॒तास॑: ।। ८७ ।।
indrā yā॑hi citrabhāno su॒tā i॒me tvā॒yava॑: | aṇvī॑bhi॒stanā॑ pū॒tāsa॑: | | ८७ | |
इन्द्रा या॑हि धि॒येषि॒तो विप्र॑जूतः सु॒ताव॑तः । उप॒ ब्रह्मा॑णि वा॒घत॑: ।। ८८ ।।
indrā yā॑hi dhi॒yeṣi॒to vipra॑jūtaḥ su॒tāva॑taḥ | upa॒ brahmā॑ṇi vā॒ghata॑: | | ८८ | |
इन्द्रा या॑हि॒ तूतु॑जान॒ उप॒ ब्रह्मा॑णि हरिवः । सु॒ते द॑धिष्व न॒श्चन॑: ।। ८९ ।।
indrā yā॑hi॒ tūtu॑jāna॒ upa॒ brahmā॑ṇi harivaḥ | su॒te da॑dhiṣva na॒ścana॑: | | ८९ | |
अ॒श्विना॑ पिबतां॒ मधु॒ सर॑स्वत्या स॒जोष॑सा ।
इन्द्र॑: सु॒त्रामा॑ वृत्र॒हा जु॒षन्ता॑ᳪ सो॒म्यं मधु॑ ।। ९० ।।
a॒śvinā॑ pibatāṃ॒ madhu॒ sara॑svatyā sa॒joṣa॑sā | indra॑: su॒trāmā॑ vṛtra॒hā ju॒ṣantā॑ᳪ so॒myaṃ madhu॑ | | ९० | |