EeseDharmaSanātana Library
2अध्याय 2
Śukla Yajurveda Mādhyaṃdina ka Adhyay 2.
34 shlokकृष्णो॑ऽस्याखरे॒ष्ठोऽग्नये॑ त्वा॒ जुष्टं॒ प्रोक्षा॑मि॒ वेदि॑रसि ब॒र्हिषे॑ त्वा॒ जुष्टां॒ प्रोक्षा॑मि ब॒र्हिर॑सि स्रु॒ग्भ्यस्त्वा॒ जुष्टं॒ प्रोक्षा॑मि ।। १ ।।
kṛṣṇo॑’syākhare॒ṣṭho’gnaye॑ tvā॒ juṣṭaṃ॒ prokṣā॑mi॒ vedi॑rasi ba॒rhiṣe॑ tvā॒ juṣṭāṃ॒ prokṣā॑mi ba॒rhira॑si sru॒gbhyastvā॒ juṣṭaṃ॒ prokṣā॑mi | | १ | |
अदि॑त्यै॒ व्युन्द॑नमसि॒ विष्णो॑ स्तु॒पोऽस्यूर्ण॑म्म्रदसं त्वा स्तृणामि स्वास॒स्थां दे॒वेभ्यो॒ भुव॑पतये॒ स्वाहा॒
भुव॑नपतये॒ स्वाहा॑ भू॒तानां॒ पत॑ये॒ स्वाहा॑ ।। २ ।।
adi॑tyai॒ vyunda॑namasi॒ viṣṇo॑ stu॒po’syūrṇa॑mmradasaṃ tvā stṛṇāmi svāsa॒sthāṃ de॒vebhyo॒ bhuva॑pataye॒ svāhā॒ bhuva॑napataye॒ svāhā॑ bhū॒tānāṃ॒ pata॑ye॒ svāhā॑ | | २ | |
ग॒न्ध॒र्वस्त्वा॑ वि॒श्वाव॑सुः॒ परि॑दधातु॒ विश्व॒स्यारि॑ष्टयै॒ यज॑मानस्य परि॒धिर॑स्य॒ग्निरि॒ड ई॑डि॒तः । इन्द्र॑स्य बा॒हुर॑सि॒ दक्षि॑णो॒ विश्व॒स्यारि॑ष्ट॒यै॒ यज॑मानस्य परि॒धिर॑स्य॒ग्निरि॒ड ई॑डि॒तः। मि॒त्रावरु॑णौ त्वोत्तर॒तः परि॑धत्तां ध्रु॒वेण॒ धर्म॑णा विश्व॒स्यारि॑ष्ट॒यै॒ यज॑मानस्य परि॒धिर॑स्य॒ग्निरि॒ड ई॑डि॒तः ।। ३ ।।
ga॒ndha॒rvastvā॑ vi॒śvāva॑suḥ॒ pari॑dadhātu॒ viśva॒syāri॑ṣṭayai॒ yaja॑mānasya pari॒dhira॑sya॒gniri॒ḍa ī॑ḍi॒taḥ | indra॑sya bā॒hura॑si॒ dakṣi॑ṇo॒ viśva॒syāri॑ṣṭa॒yai॒ yaja॑mānasya pari॒dhira॑sya॒gniri॒ḍa ī॑ḍi॒taḥ | mi॒trāvaru॑ṇau tvottara॒taḥ pari॑dhattāṃ dhru॒veṇa॒ dharma॑ṇā viśva॒syāri॑ṣṭa॒yai॒ yaja॑mānasya pari॒dhira॑sya॒gniri॒ḍa ī॑ḍi॒taḥ | | ३ | |
वी॒तिहो॑त्रं त्वा कवे द्यु॒मन्त॒ᳪ समि॑धीमहि । अग्ने॑ बृ॒हन्त॑मध्व॒रे ।। ४ ।।
vī॒tiho॑traṃ tvā kave dyu॒manta॒ᳪ sami॑dhīmahi | agne॑ bṛ॒hanta॑madhva॒re | | ४ | |
स॒मिद॑सि सूर्य॑स्त्वा पु॒रस्ता॑त् पातु॒ कस्या॑श्चिद॒भिश॑स्त्यै । सवि॒तुर्बा॒हू स्थ॒ ऊर्ण॑म्म्रदसं त्वा स्तृणामि स्वास॒स्थं दे॒वेभ्य॒ आ त्वा॒ वस॑वो रु॒द्रा आ॑दि॒त्याः स॑दन्तु ।। ५ ।।
sa॒mida॑si sūrya॑stvā pu॒rastā॑t pātu॒ kasyā॑ścida॒bhiśa॑styai | savi॒turbā॒hū stha॒ ūrṇa॑mmradasaṃ tvā stṛṇāmi svāsa॒sthaṃ de॒vebhya॒ ā tvā॒ vasa॑vo ru॒drā ā॑di॒tyāḥ sa॑dantu | | ५ | |
घृ॒ताच्य॑सि जु॒हूर्नाम्ना॒ सेदं प्रि॒येण॒ धाम्ना॑ प्रि॒यᳪ सद॒ आसी॑द घृ॒ताच्य॑स्युप॒भृन्नाम्ना॒ सेदं प्रि॒येण॒ धाम्ना॑ प्रि॒यᳪ सद॒ आसी॑द घृ॒ताच्य॑सि ध्रु॒वा नाम्ना॒ सेदं प्रि॒येण॒ धाम्ना॑ प्रि॒यᳪ सद॒ आसी॑द प्रि॒येण॒ धाम्ना॑ प्रि॒यᳪ सद॒ आसी॑द । ध्रु॒वा अ॑सदन्नृ॒तस्य॒ योनौ॒ ता वि॑ष्णो पाहि पा॒हि य॒ज्ञं पा॒हि य॒ज्ञप॑तिं पा॒हि मां य॑ज्ञ॒न्य॒म् ।। ६ ।।
ghṛ॒tācya॑si ju॒hūrnāmnā॒ sedaṃ pri॒yeṇa॒ dhāmnā॑ pri॒yaᳪ sada॒ āsī॑da ghṛ॒tācya॑syupa॒bhṛnnāmnā॒ sedaṃ pri॒yeṇa॒ dhāmnā॑ pri॒yaᳪ sada॒ āsī॑da ghṛ॒tācya॑si dhru॒vā nāmnā॒ sedaṃ pri॒yeṇa॒ dhāmnā॑ pri॒yaᳪ sada॒ āsī॑da pri॒yeṇa॒ dhāmnā॑ pri॒yaᳪ sada॒ āsī॑da | dhru॒vā a॑sadannṛ॒tasya॒ yonau॒ tā vi॑ṣṇo pāhi pā॒hi ya॒jñaṃ pā॒hi ya॒jñapa॑tiṃ pā॒hi māṃ ya॑jña॒nya॒m | | ६ | |
अग्ने॑ वाजजि॒द्वाजं॑ त्वा सरि॒ष्यन्तं॑ वाज॒जित॒ᳪ सम्मा॑र्ज्मि । नमो॑ दे॒वेभ्य॑: स्व॒धा पि॒तृभ्य॑: सु॒यमे॑ मे भूयास्त॒म् ।। ७ ।।
agne॑ vājaji॒dvājaṃ॑ tvā sari॒ṣyantaṃ॑ vāja॒jita॒ᳪ sammā॑rjmi | namo॑ de॒vebhya॑: sva॒dhā pi॒tṛbhya॑: su॒yame॑ me bhūyāsta॒m | | ७ | |
अस्क॑न्नम॒द्य दे॒वेभ्य॒ आज्य॒ᳪ संभ्रि॑यास॒मङि्॑घ्रणा विष्णो॒ मा त्वाव॑क्रमिषं वसु॑मतीमग्ने ते छा॒यामुप॑स्थेषं॒ विष्णो॒ स्थान॑मसीत इन्द्रो॑ वी॒र्य॒मकृणोदू॒र्ध्वो॑ऽध्व॒र आस्था॑त् ।। ८ ।।
aska॑nnama॒dya de॒vebhya॒ ājya॒ᳪ saṃbhri॑yāsa॒maṅi॑ghraṇā viṣṇo॒ mā tvāva॑kramiṣaṃ vasu॑matīmagne te chā॒yāmupa॑stheṣaṃ॒ viṣṇo॒ sthāna॑masīta indro॑ vī॒rya॒makṛṇodū॒rdhvo॑’dhva॒ra āsthā॑t | | ८ | |
अग्ने॒ वेर्हो॒त्रं वेर्दू॒त्यमव॑तां॒ त्वां द्यावा॑पृथि॒वी अव॒ त्वं द्यावा॑पृथि॒वी स्वि॑ष्ट॒कृद्दे॒वेभ्य इन्द्र॒ आज्ये॑न ह॒विषा॑ भू॒त्स्वाहा॒ सं ज्योति॑षा॒ ज्योति॑: ।। ९ ।।
agne॒ verho॒traṃ verdū॒tyamava॑tāṃ॒ tvāṃ dyāvā॑pṛthi॒vī ava॒ tvaṃ dyāvā॑pṛthi॒vī svi॑ṣṭa॒kṛdde॒vebhya indra॒ ājye॑na ha॒viṣā॑ bhū॒tsvāhā॒ saṃ jyoti॑ṣā॒ jyoti॑: | | ९ | |
मयी॒दमिन्द्र॑ इन्द्रि॒यं द॑धात्व॒स्मान् रायो॑ म॒घवा॑नः सचन्ताम् । अ॒स्माक॑ᳪ सन्त्वा॒शिष॑: स॒त्या न॑: सन्त्वा॒शिष॒ उप॑हूता पृथि॒वी मा॒तोप॒ मां पृ॑थि॒वी मा॒ता ह्व॑यताम॒ग्निराग्नी॑ध्रा॒त्स्वाहा॑ ।। १० ।।
mayī॒damindra॑ indri॒yaṃ da॑dhātva॒smān rāyo॑ ma॒ghavā॑naḥ sacantām | a॒smāka॑ᳪ santvā॒śiṣa॑: sa॒tyā na॑: santvā॒śiṣa॒ upa॑hūtā pṛthi॒vī mā॒topa॒ māṃ pṛ॑thi॒vī mā॒tā hva॑yatāma॒gnirāgnī॑dhrā॒tsvāhā॑ | | १० | |
उप॑हूतो॒ द्यौष्पि॒तोप॒ मां द्यौ॑ष्पि॒ता ह्व॑यताम॒ग्निराग्नी॑ध्रा॒त्स्वाहा॑ । दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । प्रति॑गृह्णाम्य॒ग्नेष्ट्वा॒स्ये॒न॒ प्राश्ना॑मि ।। ११ ।।
upa॑hūto॒ dyauṣpi॒topa॒ māṃ dyau॑ṣpi॒tā hva॑yatāma॒gnirāgnī॑dhrā॒tsvāhā॑ | de॒vasya॑ tvā savi॒tuḥ pra॑sa॒ve’śvino॑rbā॒hubhyāṃ॑ pū॒ṣṇo hastā॑bhyām | prati॑gṛhṇāmya॒gneṣṭvā॒sye॒na॒ prāśnā॑mi | | ११ | |
ए॒तं ते॑ देव सवितर्य॒ज्ञं प्राहु॒र्बृह॒स्पत॑ये ब्र॒ह्मणे॑ । तेन॑ य॒ज्ञम॑व॒ तेन॑ य॒ज्ञप॑तिं॒ तेन॒ माम॑व ।। १२ ।।
e॒taṃ te॑ deva savitarya॒jñaṃ prāhu॒rbṛha॒spata॑ye bra॒hmaṇe॑ | tena॑ ya॒jñama॑va॒ tena॑ ya॒jñapa॑tiṃ॒ tena॒ māma॑va | | १२ | |
मनो॑ जू॒तिर्जु॑षता॒माज्य॑स्य॒ बृह॒स्पति॑र्य॒ज्ञमि॒मं त॑नोत्वरि॑ष्टं य॒ज्ञᳪ समि॒मं द॑धातु । विश्वे॑ दे॒वास॑ इ॒ह मा॑दयन्ता॒मो३म्प्रति॑ष्ठ ।। १३ ।।
mano॑ jū॒tirju॑ṣatā॒mājya॑sya॒ bṛha॒spati॑rya॒jñami॒maṃ ta॑notvari॑ṣṭaṃ ya॒jñaᳪ sami॒maṃ da॑dhātu | viśve॑ de॒vāsa॑ i॒ha mā॑dayantā॒mo३mprati॑ṣṭha | | १३ | |
ए॒षा ते॑ अग्ने स॒मित्तया॒ वर्ध॑स्व॒ चा च॑ प्यायस्व । व॒र्धि॒षी॒महि॑ च व॒यमा च॑ प्यासिषीमहि ।
अग्ने॑ वाजजि॒द्वाजं॑ त्वा ससृ॒वाᳪसं॑ वाज॒जित॒ᳪ सम्मा॑र्ज्मि ।। १४ ।।
e॒ṣā te॑ agne sa॒mittayā॒ vardha॑sva॒ cā ca॑ pyāyasva | va॒rdhi॒ṣī॒mahi॑ ca va॒yamā ca॑ pyāsiṣīmahi | agne॑ vājaji॒dvājaṃ॑ tvā sasṛ॒vāᳪsaṃ॑ vāja॒jita॒ᳪ sammā॑rjmi | | १४ | |
अ॒ग्नीषोम॑यो॒रुज्जि॑ति॒मनूज्जे॑षं॒ वाज॑स्य मा प्रस॒वेन॒ प्रोहा॑मि ।
अ॒ग्नीषोमौ॒ तमप॑नुदतां॒ योऽस्मान्द्वेष्टि॒ यं च॑ व॒यं द्वि॒ष्मो वाज॑स्यैनं प्रस॒वेनापो॑हामि ।
इ॒न्द्रा॒ग्न्योरुज्जि॑ति॒मनूज्जे॑षं॒ वाज॑स्य मा प्रस॒वेन॒ प्रोहा॑मि ।
इ॒न्द्रा॒ग्नी तमप॑नुदतां॒ योऽस्मान्द्वेष्टि॒ यं च॑ व॒यं द्वि॒ष्मो वाज॑स्यैनं प्रस॒वेनापो॑हामि ।। १५ ।।
a॒gnīṣoma॑yo॒rujji॑ti॒manūjje॑ṣaṃ॒ vāja॑sya mā prasa॒vena॒ prohā॑mi | a॒gnīṣomau॒ tamapa॑nudatāṃ॒ yo’smāndveṣṭi॒ yaṃ ca॑ va॒yaṃ dvi॒ṣmo vāja॑syainaṃ prasa॒venāpo॑hāmi | i॒ndrā॒gnyorujji॑ti॒manūjje॑ṣaṃ॒ vāja॑sya mā prasa॒vena॒ prohā॑mi | i॒ndrā॒gnī tamapa॑nudatāṃ॒ yo’smāndveṣṭi॒ yaṃ ca॑ va॒yaṃ dvi॒ṣmo vāja॑syainaṃ prasa॒venāpo॑hāmi | | १५ | |
वसु॑भ्यस्त्वा रु॒द्रेभ्य॑स्त्वा ऽऽदि॒त्येभ्य॑स्त्वा॒ संजा॑नाथां द्यावापृथिवी मि॒त्रावरु॑णौ त्वा॒ वृष्ट्या॑वताम् ।
व्यन्तु॒ वयो॒क्तᳪ रिहा॑णा म॒रुतां॒ पृषतीर्गच्छ व॒शा पृश्नि॑र्भू॒त्वा दिवं॑ गच्छ॒ ततो॑ नो॒ वृष्टि॒माव॑ह ।
च॒क्षु॒ष्पा अ॑ग्नेऽसि॒ चक्षु॑र्मे पाहि ।। १६ ।।
vasu॑bhyastvā ru॒drebhya॑stvā ’’di॒tyebhya॑stvā॒ saṃjā॑nāthāṃ dyāvāpṛthivī mi॒trāvaru॑ṇau tvā॒ vṛṣṭyā॑vatām | vyantu॒ vayo॒ktaᳪ rihā॑ṇā ma॒rutāṃ॒ pṛṣatīrgaccha va॒śā pṛśni॑rbhū॒tvā divaṃ॑ gaccha॒ tato॑ no॒ vṛṣṭi॒māva॑ha | ca॒kṣu॒ṣpā a॑gne’si॒ cakṣu॑rme pāhi | | १६ | |
यं प॑रि॒धिं प॒र्यध॑त्था॒ अग्ने॑ देव प॒णिभि॑र्गु॒ह्यमा॑नः ।
तं त॑ ए॒तमनु॒ जोषं॑ भराम्ये॒ष नेत्त्वद॑पचे॒तया॑ता अ॒ग्नेः प्रि॒यं पाथोऽपी॑तम् ।। १७ ।।
yaṃ pa॑ri॒dhiṃ pa॒ryadha॑tthā॒ agne॑ deva pa॒ṇibhi॑rgu॒hyamā॑naḥ | taṃ ta॑ e॒tamanu॒ joṣaṃ॑ bharāmye॒ṣa nettvada॑pace॒tayā॑tā a॒gneḥ pri॒yaṃ pātho’pī॑tam | | १७ | |
स॒k स्र॒वभा॑गा स्थे॒षा बृ॒हन्त॑: प्रस्तरे॒ष्ठाः प॑रि॒धेया॑श्च दे॒वाः ।
इ॒मां वाच॑म॒भि विश्वे॑ गृ॒णन्त॑ आ॒सद्या॒स्मिन् बर्हिषि॑ मादयध्व॒ ᳪ स्वाहा॒ वाट् ।। १८ ।।
sa॒k sra॒vabhā॑gā sthe॒ṣā bṛ॒hanta॑: prastare॒ṣṭhāḥ pa॑ri॒dheyā॑śca de॒vāḥ | i॒māṃ vāca॑ma॒bhi viśve॑ gṛ॒ṇanta॑ ā॒sadyā॒smin barhiṣi॑ mādayadhva॒ ᳪ svāhā॒ vāṭ | | १८ | |
घृ॒ताची॑ स्थो॒ धुर्यौ॑ पातᳪ सु॒म्ने स्थ॑: सु॒म्ने मा॑ धत्तम् ।
यज्ञ॒ नम॑श्च त॒ उप॑ च य॒ज्ञस्य॑ शि॒वे संति॑ष्ठस्व॒ स्विष्टे मे॒ संति॑ष्ठस्व ।। १९ ।।
ghṛ॒tācī॑ stho॒ dhuryau॑ pātaᳪ su॒mne stha॑: su॒mne mā॑ dhattam | yajña॒ nama॑śca ta॒ upa॑ ca ya॒jñasya॑ śi॒ve saṃti॑ṣṭhasva॒ sviṣṭe me॒ saṃti॑ṣṭhasva | | १९ | |
अग्ने॑ऽदब्धायोऽशीतम पा॒हि मा॑ दि॒द्योः पा॒हि प्रसि॑त्यै पा॒हि दुरि॑ष्टयै पा॒हि दु॑रद्म॒न्या अ॑वि॒षं न॑: पि॒तुं कृ॑णु
सु॒षदा॒ योनौ॒ स्वाहा॒ वाड॒ग्नये॑ संवे॒शप॑तये॒ स्वाहा॒ सर॑स्वत्यै यशोभ॒गिन्यै॒ स्वाहा॑ ।। २० ।।
agne॑’dabdhāyo’śītama pā॒hi mā॑ di॒dyoḥ pā॒hi prasi॑tyai pā॒hi duri॑ṣṭayai pā॒hi du॑radma॒nyā a॑vi॒ṣaṃ na॑: pi॒tuṃ kṛ॑ṇu su॒ṣadā॒ yonau॒ svāhā॒ vāḍa॒gnaye॑ saṃve॒śapa॑taye॒ svāhā॒ sara॑svatyai yaśobha॒ginyai॒ svāhā॑ | | २० | |
वे॒दो॒ऽसि॒ येन॒ त्वं दे॑व वेद दे॒वेभ्यो॑ वे॒दोऽभ॑व॒स्तेन॒ मह्यं॑ वे॒दो भू॑याः ।
देवा॑ गातुविदो गा॒तुं वि॒त्त्वा गा॒तुमि॑त ।
मन॑सस्पत इ॒मं दे॑व य॒ज्ञᳪ स्वाहा॒ वाते॑ धाः ।। २१ ।।
ve॒do॒’si॒ yena॒ tvaṃ de॑va veda de॒vebhyo॑ ve॒do’bha॑va॒stena॒ mahyaṃ॑ ve॒do bhū॑yāḥ | devā॑ gātuvido gā॒tuṃ vi॒ttvā gā॒tumi॑ta | mana॑saspata i॒maṃ de॑va ya॒jñaᳪ svāhā॒ vāte॑ dhāḥ | | २१ | |
संब॒र्हिर॑ङ्क्ताᳪ ह॒विषा॑ घृ॒तेन॒ समा॑दि॒त्यैर्वसु॑भि॒: सम्म॒रुद्भि॑: ।
समिन्द्रो॑ वि॒श्वदे॑वेभिरङ्क्तां दि॒व्यं नभो॑ गच्छतु॒ यत् स्वाहा॑ ।। २२ ।।
saṃba॒rhira॑ṅktāᳪ ha॒viṣā॑ ghṛ॒tena॒ samā॑di॒tyairvasu॑bhi॒: samma॒rudbhi॑: | samindro॑ vi॒śvade॑vebhiraṅktāṃ di॒vyaṃ nabho॑ gacchatu॒ yat svāhā॑ | | २२ | |
कस्त्वा॒ विमु॑ञ्चति॒ स त्वा॒ विमु॑ञ्चति॒ कस्मै॑ त्वा॒ विमु॑ञ्चति॒ तस्मै॑ त्वा॒ विमु॑ञ्चति ।
पोषा॑य॒ रक्ष॑सां भा॒गो॒ऽसि ।। २३ ।।
kastvā॒ vimu॑ñcati॒ sa tvā॒ vimu॑ñcati॒ kasmai॑ tvā॒ vimu॑ñcati॒ tasmai॑ tvā॒ vimu॑ñcati | poṣā॑ya॒ rakṣa॑sāṃ bhā॒go॒’si | | २३ | |
सं वर्च॑सा॒ पय॑सा॒ सं त॒नूभि॒रग॑न्महि॒ मन॑सा॒ सᳪ शि॒वेन॑ ।
त्वष्टा॑ सु॒दत्रो॒ विद॑धातु॒ रायोऽनु॑मार्ष्टु त॒न्वो यद्विलि॑ष्टम् ।। २४ ।।
saṃ varca॑sā॒ paya॑sā॒ saṃ ta॒nūbhi॒raga॑nmahi॒ mana॑sā॒ saᳪ śi॒vena॑ | tvaṣṭā॑ su॒datro॒ vida॑dhātu॒ rāyo’nu॑mārṣṭu ta॒nvo yadvili॑ṣṭam | | २४ | |
दि॒वि विष्णु॒र्व्य॒क्रᳪस्त॒ जाग॑तेन॒ छन्द॑सा॒ ततो॒ निर्भ॑क्तो॒ योऽस्मान्द्वेष्टि॒ यं च॑ व॒यं द्वि॒ष्मोऽन्तरि॑क्षे॒ विष्णु॒र्व्य॒क्रᳪस्त॒ त्रैष्टु॑भेन॒ छन्द॑सा॒ ततो॒ निर्भ॑क्तो॒ योऽस्मान्द्वेष्टि॒ यं च॑ व॒यं द्वि॒ष्मः पृ॑थि॒व्यां विष्णु॒र्व्य॒क्रᳪस्त गाय॒त्रेण॒ छन्द॑सा॒ ततो॒ निर्भ॑क्तो॒ योऽस्मान्द्वेष्टि॒ यं च॑ व॒यं द्वि॒ष्मोऽस्मादन्ना॑ द॒स्यै प्र॑ति॒ष्ठाया॒ अग॑न्म॒ स्वः सं ज्योति॑षाभूम ।। २५ ।।
di॒vi viṣṇu॒rvya॒kraᳪsta॒ jāga॑tena॒ chanda॑sā॒ tato॒ nirbha॑kto॒ yo’smāndveṣṭi॒ yaṃ ca॑ va॒yaṃ dvi॒ṣmo’ntari॑kṣe॒ viṣṇu॒rvya॒kraᳪsta॒ traiṣṭu॑bhena॒ chanda॑sā॒ tato॒ nirbha॑kto॒ yo’smāndveṣṭi॒ yaṃ ca॑ va॒yaṃ dvi॒ṣmaḥ pṛ॑thi॒vyāṃ viṣṇu॒rvya॒kraᳪsta gāya॒treṇa॒ chanda॑sā॒ tato॒ nirbha॑kto॒ yo’smāndveṣṭi॒ yaṃ ca॑ va॒yaṃ dvi॒ṣmo’smādannā॑ da॒syai pra॑ti॒ṣṭhāyā॒ aga॑nma॒ svaḥ saṃ jyoti॑ṣābhūma | | २५ | |
स्व॒यं॒भूर॑सि॒ श्रेष्ठो॑ र॒श्मिर्व॑र्चो॒दा अ॑सि॒ वर्चो॑ मे देहि । सूर्य॑स्या॒वृत॒मन्वाव॑र्ते ।। २६ ।।
sva॒yaṃ॒bhūra॑si॒ śreṣṭho॑ ra॒śmirva॑rco॒dā a॑si॒ varco॑ me dehi | sūrya॑syā॒vṛta॒manvāva॑rte | | २६ | |
अग्ने॑ गृहपते सुगृहप॒तिस्त्वया॑ग्ने॒ऽहं गृ॒हप॑तिना भूयासᳪ सुगृहप॒तिस्त्वं मया॑ऽग्ने गृ॒हप॑तिना भूयाः ।
अ॒स्थू॒रि णौ॒ गार्ह॑पत्यानि सन्तु श॒तᳪ हिमा॒: सूर्य॑स्या॒वृत॒मन्वाव॑र्ते ।। २७ ।।
agne॑ gṛhapate sugṛhapa॒tistvayā॑gne॒’haṃ gṛ॒hapa॑tinā bhūyāsaᳪ sugṛhapa॒tistvaṃ mayā॑’gne gṛ॒hapa॑tinā bhūyāḥ | a॒sthū॒ri ṇau॒ gārha॑patyāni santu śa॒taᳪ himā॒: sūrya॑syā॒vṛta॒manvāva॑rte | | २७ | |
अग्ने॑ व्रतपते व्र॒तम॑चारिषं॒ तद॑शकं॒ तन्मे॑ऽराधी॒दम॒हं य ए॒वास्मि॒ सो॒ऽस्मि ।। २८ ।।
agne॑ vratapate vra॒tama॑cāriṣaṃ॒ tada॑śakaṃ॒ tanme॑’rādhī॒dama॒haṃ ya e॒vāsmi॒ so॒’smi | | २८ | |
अ॒ग्नये॑ कव्य॒वाह॑नाय॒ स्वाहा॒ सोमा॑य पितृ॒मते॒ स्वाहा॑ । अप॑हता॒ असु॑रा॒ रक्षाँ॑सि वेदि॒षद॑: ।। २९ ।।
a॒gnaye॑ kavya॒vāha॑nāya॒ svāhā॒ somā॑ya pitṛ॒mate॒ svāhā॑ | apa॑hatā॒ asu॑rā॒ rakṣām̐॑si vedi॒ṣada॑: | | २९ | |
ये रू॒पाणि॑ प्रतिमु॒ञ्चमा॑ना॒ असु॑राः॒ सन्त॑: स्व॒धया॒ चर॑न्ति ।
प॒रा॒पुरो॑ नि॒पुरो॒ ये भर॑न्त्य॒ग्निष्टाल्लो॒कात्प्रणु॑दात्य॒स्मात् ।। ३० ।।
ye rū॒pāṇi॑ pratimu॒ñcamā॑nā॒ asu॑rāḥ॒ santa॑: sva॒dhayā॒ cara॑nti | pa॒rā॒puro॑ ni॒puro॒ ye bhara॑ntya॒gniṣṭāllo॒kātpraṇu॑dātya॒smāt | | ३० | |
अत्र॑ पितरो मादयध्वं यथाभा॒गमावृ॑षायध्वम् । अमी॑मदन्त पि॒तरो॑ यथाभा॒गमावृ॑षायिषत ।। ३१ ।।
atra॑ pitaro mādayadhvaṃ yathābhā॒gamāvṛ॑ṣāyadhvam | amī॑madanta pi॒taro॑ yathābhā॒gamāvṛ॑ṣāyiṣata | | ३१ | |
नमो॑ वः पितरो॒ रसा॑य॒ नमो॑ वः पितर॒: शोषा॑य॒ नमो॑ वः पितरो जी॒वाय॒ नमो॑ वः पितरः स्व॒धायै॒ नमो॑ वः पितरो घो॒राय॒ नमो॑ वः पितरो म॒न्यवे॒ नमो॑ वः पितर॒: पित॑रो॒ नमो॑ वो गृ॒हान्न॑: पितरो दत्त स॒तो व॑: पितरो देष्मै॒तद्व॑: पितरो॒ वास॒ आध॑त्त ।। ३२ ।।
namo॑ vaḥ pitaro॒ rasā॑ya॒ namo॑ vaḥ pitara॒: śoṣā॑ya॒ namo॑ vaḥ pitaro jī॒vāya॒ namo॑ vaḥ pitaraḥ sva॒dhāyai॒ namo॑ vaḥ pitaro gho॒rāya॒ namo॑ vaḥ pitaro ma॒nyave॒ namo॑ vaḥ pitara॒: pita॑ro॒ namo॑ vo gṛ॒hānna॑: pitaro datta sa॒to va॑: pitaro deṣmai॒tadva॑: pitaro॒ vāsa॒ ādha॑tta | | ३२ | |
आध॑त्त पितरो॒ गर्भं॑ कुमा॒रं पुष्क॑रस्रजम् । यथे॒ह पुरु॒षोऽस॑त् ।। ३३ ।।
ādha॑tta pitaro॒ garbhaṃ॑ kumā॒raṃ puṣka॑rasrajam | yathe॒ha puru॒ṣo’sa॑t | | ३३ | |
ऊर्जं॒ वह॑न्तीर॒मृतं॑ घृ॒तं पय॑: की॒लालं॑ परि॒स्रुत॑म् । स्व॒धा स्थ॑ त॒र्पय॑त मे पि॒तॄन् ।। ३४ ।।
ūrjaṃ॒ vaha॑ntīra॒mṛtaṃ॑ ghṛ॒taṃ paya॑: kī॒lālaṃ॑ pari॒sruta॑m | sva॒dhā stha॑ ta॒rpaya॑ta me pi॒tṝn | | ३४ | |