EeseDharmaSanātana Library
16अध्याय 16
Śukla Yajurveda Mādhyaṃdina ka Adhyay 16.
66 shlokनम॑स्ते रुद्र म॒न्यव॑ उ॒तो त॒ इष॑वे॒ नम॑: । बा॒हुभ्या॑मु॒त ते॒ नम॑: ।। १ ।।
nama॑ste rudra ma॒nyava॑ u॒to ta॒ iṣa॑ve॒ nama॑: | bā॒hubhyā॑mu॒ta te॒ nama॑: | | १ | |
या ते॑ रुद्र शि॒वा त॒नूरघो॒राऽपा॑पकाशिनी । तया॑ नस्त॒न्वा शन्त॑मया॒ गिरि॑शन्ता॒भि चा॑कशीहि ।। २ ।।
yā te॑ rudra śi॒vā ta॒nūragho॒rā’pā॑pakāśinī | tayā॑ nasta॒nvā śanta॑mayā॒ giri॑śantā॒bhi cā॑kaśīhi | | २ | |
यामिषुं॑ गिरिशन्त॒ हस्ते॑ बि॒भर्ष्यस्त॑वे । शि॒वां गि॑रित्र॒ तां कु॑रु॒ मा हि॑ᳪसी॒: पुरु॑षं॒ जग॑त् ।। ३ ।।
yāmiṣuṃ॑ giriśanta॒ haste॑ bi॒bharṣyasta॑ve | śi॒vāṃ gi॑ritra॒ tāṃ ku॑ru॒ mā hi॑ᳪsī॒: puru॑ṣaṃ॒ jaga॑t | | ३ | |
शि॒वेन॒ वच॑सा त्वा गिरि॒शाच्छा॑ वदामसि । यथा॑ न॒: सर्व॒मिज्जग॑दय॒क्ष्मᳪ सु॒मना॒ अस॑त् ।। ४ ।।
śi॒vena॒ vaca॑sā tvā giri॒śācchā॑ vadāmasi | yathā॑ na॒: sarva॒mijjaga॑daya॒kṣmaᳪ su॒manā॒ asa॑t | | ४ | |
अध्य॑वोचदधिव॒क्ता प्र॑थ॒मो दैव्यो॑ भि॒षक् ।
अहीँ॑श्च॒ सर्वा॑ञ्ज॒म्भय॒न्त्सर्वा॑श्च यातुधा॒न्यो॒ऽध॒राची॒: परा॑ सुव ।। ५ ।।
adhya॑vocadadhiva॒ktā pra॑tha॒mo daivyo॑ bhi॒ṣak | ahīm̐॑śca॒ sarvā॑ñja॒mbhaya॒ntsarvā॑śca yātudhā॒nyo॒’dha॒rācī॒: parā॑ suva | | ५ | |
असौ॒ यस्ता॒म्रो अ॑रु॒ण उ॒त ब॒भ्रुः सु॑म॒ङ्गल॑: ।
ये चै॑नᳪ रु॒द्रा अ॒भितो॑ दि॒क्षु श्रि॒ताः स॑हस्र॒शोऽवै॑षा॒ᳪ हेड॑ ईमहे ।। ६ ।।
asau॒ yastā॒mro a॑ru॒ṇa u॒ta ba॒bhruḥ su॑ma॒ṅgala॑: | ye cai॑naᳪ ru॒drā a॒bhito॑ di॒kṣu śri॒tāḥ sa॑hasra॒śo’vai॑ṣā॒ᳪ heḍa॑ īmahe | | ६ | |
असौ॒ यो॑ऽव॒सर्प॑ति॒ नील॑ग्रीवो॒ विलो॑हितः । उ॒तैनं॑ गो॒पा अ॑दृश्र॒न्नदृ॑श्रन्नुदहा॒र्यः स दृ॒ष्टो मृ॑डयाति नः ।। ७ ।।
asau॒ yo॑’va॒sarpa॑ti॒ nīla॑grīvo॒ vilo॑hitaḥ | u॒tainaṃ॑ go॒pā a॑dṛśra॒nnadṛ॑śrannudahā॒ryaḥ sa dṛ॒ṣṭo mṛ॑ḍayāti naḥ | | ७ | |
नमो॑ऽस्तु॒ नील॑ग्रीवाय सहस्रा॒क्षाय॑ मी॒ढुषे॑ । अथो॒ ये अ॑स्य॒ सत्वा॑नो॒ऽहं तेभ्यो॑ऽकरं॒ नम॑: ।। ८ ।।
namo॑’stu॒ nīla॑grīvāya sahasrā॒kṣāya॑ mī॒ḍhuṣe॑ | atho॒ ye a॑sya॒ satvā॑no॒’haṃ tebhyo॑’karaṃ॒ nama॑: | | ८ | |
प्रमु॑ञ्च॒ धन्व॑न॒स्त्वमु॒भयो॒रार्त्न्यो॒र्ज्याम् । याश्च॑ ते॒ हस्त॒ इष॑व॒: परा॒ ता भ॑गवो वप ।। ९ ।।
pramu॑ñca॒ dhanva॑na॒stvamu॒bhayo॒rārtnyo॒rjyām | yāśca॑ te॒ hasta॒ iṣa॑va॒: parā॒ tā bha॑gavo vapa | | ९ | |
विज्यं॒ धनु॑: कप॒र्दिनो॒ विश॑ल्यो॒ वाण॑वाँ२ उ॒त । अने॑शन्नस्य॒ या इष॑व आ॒भुर॑स्य निषङ्ग॒धिः ।। १० ।।
vijyaṃ॒ dhanu॑: kapa॒rdino॒ viśa॑lyo॒ vāṇa॑vām̐२ u॒ta | ane॑śannasya॒ yā iṣa॑va ā॒bhura॑sya niṣaṅga॒dhiḥ | | १० | |
या ते॑ हे॒तिर्मी॑ढुष्टम॒ हस्ते॑ ब॒भूव॑ ते॒ धनु॑: । तया॒ऽस्मान्वि॒श्वत॒स्त्वम॑य॒क्ष्मया॒ परि॑ भुज ।। ११ ।।
yā te॑ he॒tirmī॑ḍhuṣṭama॒ haste॑ ba॒bhūva॑ te॒ dhanu॑: | tayā॒’smānvi॒śvata॒stvama॑ya॒kṣmayā॒ pari॑ bhuja | | ११ | |
परि॑ ते॒ धन्व॑नो हे॒तिर॒स्मान्वृ॑णक्तु वि॒श्वत॑: । अथो॒ य इ॑षु॒धिस्तवा॒रे अ॒स्मन्नि धे॑हि॒ तम् ।। १२ ।।
pari॑ te॒ dhanva॑no he॒tira॒smānvṛ॑ṇaktu vi॒śvata॑: | atho॒ ya i॑ṣu॒dhistavā॒re a॒smanni dhe॑hi॒ tam | | १२ | |
अ॒व॒तत्य॒ धनु॒ष्ट्वᳪ सह॑स्राक्ष॒ शते॑षुधे । नि॒शीर्य॑ श॒ल्यानां॒ मुखा॑ शि॒वो न॑: सु॒मना॑ भव ।। १३ ।।
a॒va॒tatya॒ dhanu॒ṣṭvaᳪ saha॑srākṣa॒ śate॑ṣudhe | ni॒śīrya॑ śa॒lyānāṃ॒ mukhā॑ śi॒vo na॑: su॒manā॑ bhava | | १३ | |
नम॑स्त॒ आयु॑धा॒याना॑तताय धृ॒ष्णवे॑ । उ॒भाभ्या॑मु॒त ते॒ नमो॑ बा॒हुभ्यां॒ तव॒ धन्व॑ने ।। १४ ।।
nama॑sta॒ āyu॑dhā॒yānā॑tatāya dhṛ॒ṣṇave॑ | u॒bhābhyā॑mu॒ta te॒ namo॑ bā॒hubhyāṃ॒ tava॒ dhanva॑ne | | १४ | |
मा नो॑ म॒हान्त॑मु॒त मा नो॑ अर्भ॒कं मा न॒ उक्ष॑न्तमु॒त मा न॑ उक्षि॒तम् ।
मा नो॑ वधीः पि॒तरं॒ मोत मा॒तरं॒ मा न॑: प्रि॒यास्त॒न्वो॒ रुद्र रीरिषः ।। १५ ।।
mā no॑ ma॒hānta॑mu॒ta mā no॑ arbha॒kaṃ mā na॒ ukṣa॑ntamu॒ta mā na॑ ukṣi॒tam | mā no॑ vadhīḥ pi॒taraṃ॒ mota mā॒taraṃ॒ mā na॑: pri॒yāsta॒nvo॒ rudra rīriṣaḥ | | १५ | |
मा न॑स्तो॒के तन॑ये॒ मा न॒ आयु॑षि॒ मा नो॒ गोषु॒ मा नो॒ अश्वे॑षु रीरिषः ।
मा नो॑ वी॒रान् रु॑द्र भा॒मिनो॑ वधीर्ह॒विष्म॑न्त॒: सद॒मित् त्वा॑ हवामहे ।। १६ ।।
mā na॑sto॒ke tana॑ye॒ mā na॒ āyu॑ṣi॒ mā no॒ goṣu॒ mā no॒ aśve॑ṣu rīriṣaḥ | mā no॑ vī॒rān ru॑dra bhā॒mino॑ vadhīrha॒viṣma॑nta॒: sada॒mit tvā॑ havāmahe | | १६ | |
नमो॒ हिर॑ण्यबाहवे सेना॒न्ये॒ दि॒शां च॒ पत॑ये॒ नमो॒ नमो॑ वृ॒क्षेभ्यो॒ हरि॑केशेभ्यः पशू॒नां पत॑ये॒ नमो॒ नम॑: श॒ष्पिञ्ज॑राय॒ त्विषी॑मते पथी॒नां पत॑ये॒ नमो॒ नमो॒ हरि॑केशायोपवी॒तिने॑ पु॒ष्टानां॒ पत॑ये॒ नम॑: ।। १७ ।।
namo॒ hira॑ṇyabāhave senā॒nye॒ di॒śāṃ ca॒ pata॑ye॒ namo॒ namo॑ vṛ॒kṣebhyo॒ hari॑keśebhyaḥ paśū॒nāṃ pata॑ye॒ namo॒ nama॑: śa॒ṣpiñja॑rāya॒ tviṣī॑mate pathī॒nāṃ pata॑ye॒ namo॒ namo॒ hari॑keśāyopavī॒tine॑ pu॒ṣṭānāṃ॒ pata॑ye॒ nama॑: | | १७ | |
नमो॑ बभ्लु॒शाय॑ व्या॒धिने ऽन्ना॑नां॒ पत॑ये॒ नमो॒ नमो॑ भ॒वस्य॑ हेत्यै॒ जग॑तां॒ पत॑ये॒ नमो॒ नमो॑ रु॒द्राया॑तता॒यिने॒ क्षेत्रा॑णां॒ पत॑ये॒ नमो॒ नम॑: सू॒तायाह॑न्त्यै॒ वना॑नां॒ पत॑ये॒ नम॑: ।। १८ ।।
namo॑ babhlu॒śāya॑ vyā॒dhine ’nnā॑nāṃ॒ pata॑ye॒ namo॒ namo॑ bha॒vasya॑ hetyai॒ jaga॑tāṃ॒ pata॑ye॒ namo॒ namo॑ ru॒drāyā॑tatā॒yine॒ kṣetrā॑ṇāṃ॒ pata॑ye॒ namo॒ nama॑: sū॒tāyāha॑ntyai॒ vanā॑nāṃ॒ pata॑ye॒ nama॑: | | १८ | |
नमो॒ रोहि॑ताय स्थ॒पत॑ये वृ॒क्षाणां॒ पत॑ये॒ नमो॒ नमो॑ भुव॒न्तये॑ वारिवस्कृ॒तायौष॑धीनां॒ पत॑ये॒ नमो॒ नमो॑ म॒न्त्रिणे॑ वाणि॒जाय॒ कक्षा॑णां॒ पत॑ये॒ नमो॒ नम॑ उ॒च्चैर्घो॑षायाक्र॒न्दय॑ते पत्ती॒नां पत॑ये॒ नम॑: ।। १९ ।।
namo॒ rohi॑tāya stha॒pata॑ye vṛ॒kṣāṇāṃ॒ pata॑ye॒ namo॒ namo॑ bhuva॒ntaye॑ vārivaskṛ॒tāyauṣa॑dhīnāṃ॒ pata॑ye॒ namo॒ namo॑ ma॒ntriṇe॑ vāṇi॒jāya॒ kakṣā॑ṇāṃ॒ pata॑ye॒ namo॒ nama॑ u॒ccairgho॑ṣāyākra॒ndaya॑te pattī॒nāṃ pata॑ye॒ nama॑: | | १९ | |
नम॑: कृत्स्नाय॒तया॒ धाव॑ते॒ सत्व॑नां॒ पत॑ये॒ नमो॒ नम॒: सह॑मानाय निव्या॒धिन॑ आव्या॒धिनी॑नां॒ पत॑ये॒ नमो॒ नमो॑ निष॒ङ्गिणे॑ ककु॒भाय॑ स्ते॒नानां॒ पत॑ये॒ नमो॒ नमो॑ निचे॒रवे॑ परिच॒रायार॑ण्यानां॒ पत॑ये॒ नम॑: ।। २० ।।
nama॑: kṛtsnāya॒tayā॒ dhāva॑te॒ satva॑nāṃ॒ pata॑ye॒ namo॒ nama॒: saha॑mānāya nivyā॒dhina॑ āvyā॒dhinī॑nāṃ॒ pata॑ye॒ namo॒ namo॑ niṣa॒ṅgiṇe॑ kaku॒bhāya॑ ste॒nānāṃ॒ pata॑ye॒ namo॒ namo॑ nice॒rave॑ parica॒rāyāra॑ṇyānāṃ॒ pata॑ye॒ nama॑: | | २० | |
नमो॒ वञ्च॑ते परि॒वञ्च॑ते स्तायू॒नां पत॑ये॒ नमो॒ नमो॑ निष॒ङ्गिण॑ इषुधि॒मते॒ तस्क॑राणां॒ पत॑ये॒ नमो॒ नम॑: सृका॒यिभ्यो॒ जिघा॑ᳪसद्भ्यो मुष्ण॒तां पत॑ये॒ नमो॒ नमो॑ऽसि॒मद्भ्यो॒ नक्त॒ञ्चर॑द्भ्यो विकृ॒न्तानां॒ पत॑ये॒ नम॑: ।। २१ ।।
namo॒ vañca॑te pari॒vañca॑te stāyū॒nāṃ pata॑ye॒ namo॒ namo॑ niṣa॒ṅgiṇa॑ iṣudhi॒mate॒ taska॑rāṇāṃ॒ pata॑ye॒ namo॒ nama॑: sṛkā॒yibhyo॒ jighā॑ᳪsadbhyo muṣṇa॒tāṃ pata॑ye॒ namo॒ namo॑’si॒madbhyo॒ nakta॒ñcara॑dbhyo vikṛ॒ntānāṃ॒ pata॑ye॒ nama॑: | | २१ | |
नम॑ उष्णी॒षिणे॑ गिरिच॒राय॑ कुलु॒ञ्चानां॒ पत॑ये॒ नमो॒ नम॑ इषु॒मद्भ्यो॑ धन्वा॒यिभ्य॑श्च वो॒ नमो॒ नम॑ आतन्वा॒नेभ्य॑: प्रति॒दधा॑नेभ्यश्च वो॒ नमो॒ नम॑ आ॒यच्छ॒द्भ्यो ऽस्य॑द्भ्यश्च वो॒ नम॑: ।। २२ ।।
nama॑ uṣṇī॒ṣiṇe॑ girica॒rāya॑ kulu॒ñcānāṃ॒ pata॑ye॒ namo॒ nama॑ iṣu॒madbhyo॑ dhanvā॒yibhya॑śca vo॒ namo॒ nama॑ ātanvā॒nebhya॑: prati॒dadhā॑nebhyaśca vo॒ namo॒ nama॑ ā॒yaccha॒dbhyo ’sya॑dbhyaśca vo॒ nama॑: | | २२ | |
नमो॑ विसृ॒जद्भ्यो॒ विध्य॑द्भ्यश्च वो॒ नमो॒ नम॑: स्व॒पद्भ्यो॒ जाग्र॑द्भ्यश्च वो॒ नमो॒ नम॒: शया॑नेभ्य॒ आसी॑नेभ्यश्च वो॒ नमो॒ नम॒स्तिष्ठ॑द्भ्यो॒ धाव॑द्भ्यश्च वो॒ नम॑: ।। २३ ।।
namo॑ visṛ॒jadbhyo॒ vidhya॑dbhyaśca vo॒ namo॒ nama॑: sva॒padbhyo॒ jāgra॑dbhyaśca vo॒ namo॒ nama॒: śayā॑nebhya॒ āsī॑nebhyaśca vo॒ namo॒ nama॒stiṣṭha॑dbhyo॒ dhāva॑dbhyaśca vo॒ nama॑: | | २३ | |
नम॑: स॒भाभ्य॑: स॒भाप॑तिभ्यश्च वो॒ नमो॒ नमोऽश्वे॒भ्यो ऽश्व॑पतिभ्यश्च वो॒ नमो॒ नम॑ आव्या॒धिनी॑भ्यो वि॒विध्य॑न्तीभ्यश्च वो॒ नमो॒ नम॒ उग॑णाभ्यस्तृᳪह॒तीभ्य॑श्च वो॒ नम॑: ।। २४ ।।
nama॑: sa॒bhābhya॑: sa॒bhāpa॑tibhyaśca vo॒ namo॒ namo’śve॒bhyo ’śva॑patibhyaśca vo॒ namo॒ nama॑ āvyā॒dhinī॑bhyo vi॒vidhya॑ntībhyaśca vo॒ namo॒ nama॒ uga॑ṇābhyastṛᳪha॒tībhya॑śca vo॒ nama॑: | | २४ | |
नमो॑ ग॒णेभ्यो॑ ग॒णप॑तिभ्यश्च वो॒ नमो॒ नमो॒ व्राते॑भ्यो॒ व्रात॑पतिभ्यश्च वो॒ नमो॒ नमो॒ गृत्से॑भ्यो॒ गृत्स॑पतिभ्यश्च वो॒ नमो॒ नमो॒ विरू॑पेभ्यो वि॒श्वरू॑पेभ्यश्च वो॒ नम॑: ।। २५ ।।
namo॑ ga॒ṇebhyo॑ ga॒ṇapa॑tibhyaśca vo॒ namo॒ namo॒ vrāte॑bhyo॒ vrāta॑patibhyaśca vo॒ namo॒ namo॒ gṛtse॑bhyo॒ gṛtsa॑patibhyaśca vo॒ namo॒ namo॒ virū॑pebhyo vi॒śvarū॑pebhyaśca vo॒ nama॑: | | २५ | |
नम॒: सेना॑भ्यः सेना॒निभ्य॑श्च वो॒ नमो॒ नमो॑ र॒थिभ्यो॑ अर॒तेभ्य॑श्च वो॒ नमो॒ नम॑: क्ष॒त्तृभ्य॑: संग्रही॒तृभ्य॑श्च वो॒ नमो॒ नमो॑ म॒हद्भ्यो॑ अर्भ॒केभ्य॑श्च वो॒ नम॑: ।। २६ ।।
nama॒: senā॑bhyaḥ senā॒nibhya॑śca vo॒ namo॒ namo॑ ra॒thibhyo॑ ara॒tebhya॑śca vo॒ namo॒ nama॑: kṣa॒ttṛbhya॑: saṃgrahī॒tṛbhya॑śca vo॒ namo॒ namo॑ ma॒hadbhyo॑ arbha॒kebhya॑śca vo॒ nama॑: | | २६ | |
नम॒स्तक्ष॑भ्यो रथका॒रेभ्य॑श्च वो॒ नमो॒ नम॒: कुला॑लेभ्यः कु॒र्मारे॑भ्यश्च वो॒ नमो॒ नमो॑ निषा॒देभ्य॑: पु॒ञ्जिष्टे॑भ्यश्च वो॒ नमो॒ नम॑: श्व॒निभ्यो॑ मृग॒युभ्य॑श्च वो॒ नम॑: ।। २७ ।।
nama॒stakṣa॑bhyo rathakā॒rebhya॑śca vo॒ namo॒ nama॒: kulā॑lebhyaḥ ku॒rmāre॑bhyaśca vo॒ namo॒ namo॑ niṣā॒debhya॑: pu॒ñjiṣṭe॑bhyaśca vo॒ namo॒ nama॑: śva॒nibhyo॑ mṛga॒yubhya॑śca vo॒ nama॑: | | २७ | |
नम॒: श्वभ्य॒: श्वप॑तिभ्यश्च वो॒ नमो॒ नमो॑ भ॒वाय॑ च रु॒द्राय॑ च॒ नम॑: श॒र्वाय॑ च पशु॒पत॑ये च॒ नमो॒ नील॑ग्रीवाय च शिति॒कण्ठा॑य च ।। २८ ।।
nama॒: śvabhya॒: śvapa॑tibhyaśca vo॒ namo॒ namo॑ bha॒vāya॑ ca ru॒drāya॑ ca॒ nama॑: śa॒rvāya॑ ca paśu॒pata॑ye ca॒ namo॒ nīla॑grīvāya ca śiti॒kaṇṭhā॑ya ca | | २८ | |
नम॑: कप॒र्दिने॑ च॒ व्यु॒प्तकेशाय च॒ नम॑: सहस्रा॒क्षाय॑ च श॒तध॑न्वने च॒ नमो॑ गिरिश॒याय॑ च शिपिवि॒ष्टाय॑ च॒ नमो॑ मी॒ढुष्ट॑माय॒ चेषु॑मते
च ।। २९ ।।
nama॑: kapa॒rdine॑ ca॒ vyu॒ptakeśāya ca॒ nama॑: sahasrā॒kṣāya॑ ca śa॒tadha॑nvane ca॒ namo॑ giriśa॒yāya॑ ca śipivi॒ṣṭāya॑ ca॒ namo॑ mī॒ḍhuṣṭa॑māya॒ ceṣu॑mate ca | | २९ | |
नमो॑ ह्र॒स्वाय॑ च वाम॒नाय॑ च॒ नमो॑ बृह॒ते च॒ वर्षी॑यसे च॒ नमो॑ वृ॒द्धाय॑ च स॒वृधे॑ च॒ नमोऽग्र्या॑य च प्रथ॒माय॑ च ।। ३० ।।
namo॑ hra॒svāya॑ ca vāma॒nāya॑ ca॒ namo॑ bṛha॒te ca॒ varṣī॑yase ca॒ namo॑ vṛ॒ddhāya॑ ca sa॒vṛdhe॑ ca॒ namo’gryā॑ya ca pratha॒māya॑ ca | | ३० | |
नम॑ आ॒शवे॑ चाजि॒राय॑ च॒ नम॒: शीघ्र्या॑य च॒ शीभ्या॑य च॒ नम॒ ऊर्म्या॑य चावस्व॒न्या॒य च॒ नमो॑ नादे॒याय॑ च॒ द्वीप्या॑य च ।। ३१ ।।
nama॑ ā॒śave॑ cāji॒rāya॑ ca॒ nama॒: śīghryā॑ya ca॒ śībhyā॑ya ca॒ nama॒ ūrmyā॑ya cāvasva॒nyā॒ya ca॒ namo॑ nāde॒yāya॑ ca॒ dvīpyā॑ya ca | | ३१ | |
नमो॑ ज्ये॒ष्ठाय॑ च कनि॒ष्ठाय॑ च॒ नम॑: पूर्व॒जाय॑ चापर॒जाय॑ च॒ नमो॑ मध्य॒माय॑ चापग॒ल्भाय॑ च॒ नमो॑ जघ॒न्या॒य च बु॒ध्न्या॒य च ।। ३२ ।।
namo॑ jye॒ṣṭhāya॑ ca kani॒ṣṭhāya॑ ca॒ nama॑: pūrva॒jāya॑ cāpara॒jāya॑ ca॒ namo॑ madhya॒māya॑ cāpaga॒lbhāya॑ ca॒ namo॑ jagha॒nyā॒ya ca bu॒dhnyā॒ya ca | | ३२ | |
नम॒: सोभ्या॑य च प्रतिस॒र्या॒य च॒ नमो॒ याम्या॑य च॒ क्षेम्या॑य च॒ नम॒: श्लोक्या॑य चावसा॒न्या॒य च॒ नम॑ उर्व॒र्या॒य च॒ खल्या॑य च ।। ३३ ।।
nama॒: sobhyā॑ya ca pratisa॒ryā॒ya ca॒ namo॒ yāmyā॑ya ca॒ kṣemyā॑ya ca॒ nama॒: ślokyā॑ya cāvasā॒nyā॒ya ca॒ nama॑ urva॒ryā॒ya ca॒ khalyā॑ya ca | | ३३ | |
नमो॒ वन्या॑य च॒ कक्ष्या॑य च॒ नम॑: श्र॒वाय॑ च प्रतिश्र॒वाय॑ च॒ नम॑ आ॒शुषे॑णाय चा॒शुर॑थाय च॒ नम॒: शूरा॑य चावभे॒दिने॑ च ।। ३४ ।।
namo॒ vanyā॑ya ca॒ kakṣyā॑ya ca॒ nama॑: śra॒vāya॑ ca pratiśra॒vāya॑ ca॒ nama॑ ā॒śuṣe॑ṇāya cā॒śura॑thāya ca॒ nama॒: śūrā॑ya cāvabhe॒dine॑ ca | | ३४ | |
नमो॑ बि॒ल्मिने॑ च कव॒चिने॑ च॒ नमो॑ व॒र्मिणे॑ च वरू॒थिने॑ च॒ नम॑: श्रु॒ताय॑ च श्रुतसे॒नाय॑ च॒ नमो॑ दुन्दु॒भ्या॒य चाहन॒न्या॒य च ।। ३५ ।।
namo॑ bi॒lmine॑ ca kava॒cine॑ ca॒ namo॑ va॒rmiṇe॑ ca varū॒thine॑ ca॒ nama॑: śru॒tāya॑ ca śrutase॒nāya॑ ca॒ namo॑ dundu॒bhyā॒ya cāhana॒nyā॒ya ca | | ३५ | |
नमो॑ धृ॒ष्णवे॑ च प्रमृ॒शाय॑ च॒ नमो॑ निष॒ङ्गिणे॑ चेषुधि॒मते॑ च॒ नम॑स्ती॒क्ष्णेष॑वे चायु॒धिने॑ च॒ नम॑: स्वायु॒धाय॑ च सु॒धन्व॑ने च ।। ३६ ।।
namo॑ dhṛ॒ṣṇave॑ ca pramṛ॒śāya॑ ca॒ namo॑ niṣa॒ṅgiṇe॑ ceṣudhi॒mate॑ ca॒ nama॑stī॒kṣṇeṣa॑ve cāyu॒dhine॑ ca॒ nama॑: svāyu॒dhāya॑ ca su॒dhanva॑ne ca | | ३६ | |
नम॒: स्रुत्या॑य च॒ पथ्या॑य च॒ नम॒: काट्या॑य च॒ नीप्या॑य च॒ नम॒: कुल्या॑य च सर॒स्या॒य च॒ नमो॑ नादे॒याय॑ च वैश॒न्ताय॑ च ।। ३७ ।।
nama॒: srutyā॑ya ca॒ pathyā॑ya ca॒ nama॒: kāṭyā॑ya ca॒ nīpyā॑ya ca॒ nama॒: kulyā॑ya ca sara॒syā॒ya ca॒ namo॑ nāde॒yāya॑ ca vaiśa॒ntāya॑ ca | | ३७ | |
नम॒: कूप्या॑य चाव॒ट्या॑य च॒ नमो॒ वीध्र्या॑य चात॒प्या॒य च॒ नमो॒ मेघ्या॑य च च विद्यु॒त्या॒य च॒ नमो॒ वर्ष्या॑य चाव॒र्ष्याय॑ च ।। ३८ ।।
nama॒: kūpyā॑ya cāva॒ṭyā॑ya ca॒ namo॒ vīdhryā॑ya cāta॒pyā॒ya ca॒ namo॒ meghyā॑ya ca ca vidyu॒tyā॒ya ca॒ namo॒ varṣyā॑ya cāva॒rṣyāya॑ ca | | ३८ | |
नमो॒ वात्या॑य च॒ रेष्म्या॑य च॒ नमो॑ वास्त॒व्या॒य च वास्तु॒पाय॑ च॒ नम॒: सोमा॑य च रु॒द्राय॑ च॒ नम॑स्ता॒म्राय॑ चारु॒णाय॑ च ।। ३९ ।।
namo॒ vātyā॑ya ca॒ reṣmyā॑ya ca॒ namo॑ vāsta॒vyā॒ya ca vāstu॒pāya॑ ca॒ nama॒: somā॑ya ca ru॒drāya॑ ca॒ nama॑stā॒mrāya॑ cāru॒ṇāya॑ ca | | ३९ | |
नम॑: श॒ङ्गवे॑ च पशु॒पत॑ये च॒ नम॑ उ॒ग्राय॑ च भी॒माय॑ च॒ नमो॑ऽग्रेव॒धाय॑ च दूरेव॒धाय॑ च॒ नमो॑ ह॒न्त्रे च॒ हनी॑यसे च॒ नमो॑ वृ॒क्षेभ्यो॒ हरि॑केशेभ्यो॒ नम॑स्ता॒राय॑ ।। ४० ।।
nama॑: śa॒ṅgave॑ ca paśu॒pata॑ye ca॒ nama॑ u॒grāya॑ ca bhī॒māya॑ ca॒ namo॑’greva॒dhāya॑ ca dūreva॒dhāya॑ ca॒ namo॑ ha॒ntre ca॒ hanī॑yase ca॒ namo॑ vṛ॒kṣebhyo॒ hari॑keśebhyo॒ nama॑stā॒rāya॑ | | ४० | |
नम॑: शम्भ॒वाय॑ च मयोभ॒वाय॑ च॒ नम॑: शङ्क॒राय॑ च मयस्क॒राय॑ च॒ नम॑: शि॒वाय॑ च शि॒वत॑राय च ।। ४१ ।।
nama॑: śambha॒vāya॑ ca mayobha॒vāya॑ ca॒ nama॑: śaṅka॒rāya॑ ca mayaska॒rāya॑ ca॒ nama॑: śi॒vāya॑ ca śi॒vata॑rāya ca | | ४१ | |
नम॒: पार्या॑य चावा॒र्या॒य च॒ नम॑: प्र॒तर॑णाय चो॒त्तर॑णाय च॒ नम॒स्तीर्थ्या॑य च॒ कूल्या॑य च॒ नम॒: शष्प्या॑य च॒ फेन्या॑य च ।। ४२ ।।
nama॒: pāryā॑ya cāvā॒ryā॒ya ca॒ nama॑: pra॒tara॑ṇāya co॒ttara॑ṇāya ca॒ nama॒stīrthyā॑ya ca॒ kūlyā॑ya ca॒ nama॒: śaṣpyā॑ya ca॒ phenyā॑ya ca | | ४२ | |
नम॑: सिक॒त्या॒य च प्रवा॒ह्या॒य च॒ नम॑: किᳪशि॒लाय॑ च क्षय॒णाय॑ च॒ नम॑: कप॒र्दिने॑ च पुल॒स्तये॑ च॒ नम॑ इरि॒ण्या॒य च प्रप॒थ्या॒य च ।। ४३ ।।
nama॑: sika॒tyā॒ya ca pravā॒hyā॒ya ca॒ nama॑: kiᳪśi॒lāya॑ ca kṣaya॒ṇāya॑ ca॒ nama॑: kapa॒rdine॑ ca pula॒staye॑ ca॒ nama॑ iri॒ṇyā॒ya ca prapa॒thyā॒ya ca | | ४३ | |
नमो॒ व्रज्या॑य च॒ गोष्ठ्या॑य च॒ नम॒स्तल्प्या॑य च॒ गेह्या॑य च॒ नमो॑ हृद॒य्या॒य च निवे॒ष्प्या॒य च॒ नम॒: काट्या॑य च गह्वरे॒ष्ठाय॑ च ।। ४४ ।।
namo॒ vrajyā॑ya ca॒ goṣṭhyā॑ya ca॒ nama॒stalpyā॑ya ca॒ gehyā॑ya ca॒ namo॑ hṛda॒yyā॒ya ca nive॒ṣpyā॒ya ca॒ nama॒: kāṭyā॑ya ca gahvare॒ṣṭhāya॑ ca | | ४४ | |
नम॒: शुष्क्या॑य च हरि॒त्या॒य च॒ नम॑: पाᳪस॒व्या॒य च रज॒स्या॒य च॒ नमो॒ लोप्या॑य चोल॒प्या॒य च॒ नम॒ ऊर्व्या॑य च॒ सूर्व्या॑य च ।। ४५ ।।
nama॒: śuṣkyā॑ya ca hari॒tyā॒ya ca॒ nama॑: pāᳪsa॒vyā॒ya ca raja॒syā॒ya ca॒ namo॒ lopyā॑ya cola॒pyā॒ya ca॒ nama॒ ūrvyā॑ya ca॒ sūrvyā॑ya ca | | ४५ | |
नम॑: प॒र्णाय॑ च पर्णश॒दाय॑ च॒ नम॑ उद्गु॒रमा॑णाय चाभिघ्न॒ते च॒ नम॑ आखिद॒ते च॑ प्रखिद॒ते च॒ नम॑ इषु॒कृद्भ्यो॑ धनु॒ष्कृद्भ्य॑श्च वो॒ नमो॒ नमो॑ वः किरि॒केभ्यो॑ दे॒वाना॒ᳪ हृद॑येभ्यो॒ नमो॑ विचिन्व॒त्केभ्यो॒ नमो॑ विक्षिण॒त्केभ्यो॒ नम॑ आनिर्ह॒तेभ्य॑: ।। ४६ ।।
nama॑: pa॒rṇāya॑ ca parṇaśa॒dāya॑ ca॒ nama॑ udgu॒ramā॑ṇāya cābhighna॒te ca॒ nama॑ ākhida॒te ca॑ prakhida॒te ca॒ nama॑ iṣu॒kṛdbhyo॑ dhanu॒ṣkṛdbhya॑śca vo॒ namo॒ namo॑ vaḥ kiri॒kebhyo॑ de॒vānā॒ᳪ hṛda॑yebhyo॒ namo॑ vicinva॒tkebhyo॒ namo॑ vikṣiṇa॒tkebhyo॒ nama॑ ānirha॒tebhya॑: | | ४६ | |
द्रापे॒ अन्ध॑सस्पते॒ दरि॑द्र॒ नील॑लोहित ।
आ॒सां प्र॒जाना॑मे॒षां प॑शू॒नां मा भे॒र्मा रो॒ङ्मो च॑ न॒: किंच॒नाम॑मत् ।। ४७ ।।
drāpe॒ andha॑saspate॒ dari॑dra॒ nīla॑lohita | ā॒sāṃ pra॒jānā॑me॒ṣāṃ pa॑śū॒nāṃ mā bhe॒rmā ro॒ṅmo ca॑ na॒: kiṃca॒nāma॑mat | | ४७ | |
इ॒मा रु॒द्राय॑ त॒वसे॑ कप॒र्दिने॑ क्ष॒यद्वी॑राय॒ प्र भ॑रामहे म॒तीः ।
यथा॒ शमस॑द् द्वि॒पदे॒ चतु॑ष्पदे॒ विश्वं॑ पु॒ष्टं ग्रामे॑ अ॒स्मिन्न॑नातु॒रम् ।। ४८ ।।
i॒mā ru॒drāya॑ ta॒vase॑ kapa॒rdine॑ kṣa॒yadvī॑rāya॒ pra bha॑rāmahe ma॒tīḥ | yathā॒ śamasa॑d dvi॒pade॒ catu॑ṣpade॒ viśvaṃ॑ pu॒ṣṭaṃ grāme॑ a॒sminna॑nātu॒ram | | ४८ | |
या ते॑ रुद्र शि॒वा त॒नूः शि॒वा वि॒श्वाहा॑ भेष॒जी । शि॒वा रु॒तस्य॑ भेष॒जी तया॑ नो मृड जी॒वसे॑ ।। ४९ ।।
yā te॑ rudra śi॒vā ta॒nūḥ śi॒vā vi॒śvāhā॑ bheṣa॒jī | śi॒vā ru॒tasya॑ bheṣa॒jī tayā॑ no mṛḍa jī॒vase॑ | | ४९ | |
परि॑ नो रु॒द्रस्य॑ हे॒तिर्वृ॑णक्तु॒ परि॑ त्वे॒षस्य॑ दुर्म॒तिर॑घा॒योः ।
अव॑ स्थि॒रा म॒घव॑द्भ्यस्तनुष्व॒ मीढ्व॑स्तो॒काय॒ तन॑याय मृड ।। ५० ।।
pari॑ no ru॒drasya॑ he॒tirvṛ॑ṇaktu॒ pari॑ tve॒ṣasya॑ durma॒tira॑ghā॒yoḥ | ava॑ sthi॒rā ma॒ghava॑dbhyastanuṣva॒ mīḍhva॑sto॒kāya॒ tana॑yāya mṛḍa | | ५० | |
मीढु॑ष्टम॒ शिव॑तम शि॒वो न॑: सु॒मना॑ भव ।
प॒र॒मे वृ॒क्ष आयु॑धं नि॒धाय॒ कृत्तिं॒ वसा॑न॒ आ च॑र॒ पिना॑कं॒ बिभ्र॒दा ग॑हि ।। ५१ ।।
mīḍhu॑ṣṭama॒ śiva॑tama śi॒vo na॑: su॒manā॑ bhava | pa॒ra॒me vṛ॒kṣa āyu॑dhaṃ ni॒dhāya॒ kṛttiṃ॒ vasā॑na॒ ā ca॑ra॒ pinā॑kaṃ॒ bibhra॒dā ga॑hi | | ५१ | |
विकि॑रिद्र॒ विलो॑हित॒ नम॑स्ते अस्तु भगवः । यास्ते॑ स॒हस्र॑ᳪ हे॒तयो॒ऽन्यम॒स्मन्नि व॑पन्तु॒ ताः ।। ५२ ।।
viki॑ridra॒ vilo॑hita॒ nama॑ste astu bhagavaḥ | yāste॑ sa॒hasra॑ᳪ he॒tayo॒’nyama॒smanni va॑pantu॒ tāḥ | | ५२ | |
स॒हस्रा॑णि सहस्र॒शो बा॒ह्वोस्तव॑ हे॒तय॑: । तासा॒मीशा॑नो भगवः परा॒चीना॒ मुखा॑ कृधि ।। ५३ ।।
sa॒hasrā॑ṇi sahasra॒śo bā॒hvostava॑ he॒taya॑: | tāsā॒mīśā॑no bhagavaḥ parā॒cīnā॒ mukhā॑ kṛdhi | | ५३ | |
असं॑ख्याता स॒हस्रा॑णि॒ ये रु॒द्रा अधि॒ भूम्या॑म् । तेषा॑ᳪ सहस्रयोज॒नेऽव॒ धन्वा॑नि तन्मसि ।। ५४ ।।
asaṃ॑khyātā sa॒hasrā॑ṇi॒ ye ru॒drā adhi॒ bhūmyā॑m | teṣā॑ᳪ sahasrayoja॒ne’va॒ dhanvā॑ni tanmasi | | ५४ | |
अ॒स्मिन् म॑ह॒त्य॒र्ण॒वे ऽन्तरि॑क्षे भ॒वा अधि॑ । तेषा॑ᳪ सहस्रयोज॒नेऽव॒ धन्वा॑नि तन्मसि ।। ५५ ।।
a॒smin ma॑ha॒tya॒rṇa॒ve ’ntari॑kṣe bha॒vā adhi॑ | teṣā॑ᳪ sahasrayoja॒ne’va॒ dhanvā॑ni tanmasi | | ५५ | |
नील॑ग्रीवाः शिति॒कण्ठा॒ दिव॑ᳪ रु॒द्रा उप॑श्रिताः । तेषा॑ᳪ सहस्रयोज॒नेऽव॒ धन्वा॑नि तन्मसि ।। ५६ ।।
nīla॑grīvāḥ śiti॒kaṇṭhā॒ diva॑ᳪ ru॒drā upa॑śritāḥ | teṣā॑ᳪ sahasrayoja॒ne’va॒ dhanvā॑ni tanmasi | | ५६ | |
नील॑ग्रीवाः शिति॒कण्ठा॑: श॒र्वा अ॒धः क्ष॑माच॒राः । तेषा॑ᳪ सहस्रयोज॒नेऽव॒ धन्वा॑नि तन्मसि ।। ५७ ।।
nīla॑grīvāḥ śiti॒kaṇṭhā॑: śa॒rvā a॒dhaḥ kṣa॑māca॒rāḥ | teṣā॑ᳪ sahasrayoja॒ne’va॒ dhanvā॑ni tanmasi | | ५७ | |
ये वृ॒क्षेषु॑ श॒ष्पिञ्ज॑रा॒ नील॑ग्रीवा॒ विलो॑हिताः । तेषा॑ᳪ सहस्रयोज॒नेऽव॒ धन्वा॑नि तन्मसि ।। ५८ ।।
ye vṛ॒kṣeṣu॑ śa॒ṣpiñja॑rā॒ nīla॑grīvā॒ vilo॑hitāḥ | teṣā॑ᳪ sahasrayoja॒ne’va॒ dhanvā॑ni tanmasi | | ५८ | |
ये भू॒ताना॒मधि॑पतयो विशि॒खास॑: कप॒र्दिन॑: । तेषा॑ᳪ सहस्रयोज॒नेऽव॒ धन्वा॑नि तन्मसि ।। ५९ ।।
ye bhū॒tānā॒madhi॑patayo viśi॒khāsa॑: kapa॒rdina॑: | teṣā॑ᳪ sahasrayoja॒ne’va॒ dhanvā॑ni tanmasi | | ५९ | |
ये प॒थां प॑थि॒रक्ष॑य ऐलबृ॒दा आ॑यु॒र्युध॑: । तेषा॑ᳪ सहस्रयोज॒नेऽव॒ धन्वा॑नि तन्मसि ।। ६० ।।
ye pa॒thāṃ pa॑thi॒rakṣa॑ya ailabṛ॒dā ā॑yu॒ryudha॑: | teṣā॑ᳪ sahasrayoja॒ne’va॒ dhanvā॑ni tanmasi | | ६० | |
ये ती॒र्थानि॑ प्र॒चर॑न्ति सृ॒काह॑स्ता निष॒ङ्गिण॑: । तेषा॑ᳪ सहस्रयोज॒नेऽव॒ धन्वा॑नि तन्मसि ।। ६१ ।।
ye tī॒rthāni॑ pra॒cara॑nti sṛ॒kāha॑stā niṣa॒ṅgiṇa॑: | teṣā॑ᳪ sahasrayoja॒ne’va॒ dhanvā॑ni tanmasi | | ६१ | |
येऽन्ने॑षु वि॒विध्य॑न्ति॒ पात्रे॑षु॒ पिब॑तो॒ जना॑न् । तेषा॑ᳪ सहस्रयोज॒नेऽव॒ धन्वा॑नि तन्मसि ।। ६२ ।।
ye’nne॑ṣu vi॒vidhya॑nti॒ pātre॑ṣu॒ piba॑to॒ janā॑n | teṣā॑ᳪ sahasrayoja॒ne’va॒ dhanvā॑ni tanmasi | | ६२ | |
य ए॒ताव॑न्तश्च॒ भूया॑ᳪसश्च॒ दिशो॑ रु॒द्रा वि॑तस्थि॒रे । तेषा॑ᳪ सहस्रयोज॒नेऽव॒ धन्वा॑नि तन्मसि ।। ६३ ।।
ya e॒tāva॑ntaśca॒ bhūyā॑ᳪsaśca॒ diśo॑ ru॒drā vi॑tasthi॒re | teṣā॑ᳪ sahasrayoja॒ne’va॒ dhanvā॑ni tanmasi | | ६३ | |
नमो॑ऽस्तु रु॒द्रेभ्यो॒ ये दि॒वि येषां॑ व॒र्षमिष॑वः । तेभ्यो॒ दश॒ प्राची॒र्दश॑ दक्षि॒णा दश॑ प्र॒तीची॒र्दशोदी॑ची॒र्दशो॒र्ध्वाः ।
तेभ्यो॒ नमो॑ अस्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। ६४ ।।
namo॑’stu ru॒drebhyo॒ ye di॒vi yeṣāṃ॑ va॒rṣamiṣa॑vaḥ | tebhyo॒ daśa॒ prācī॒rdaśa॑ dakṣi॒ṇā daśa॑ pra॒tīcī॒rdaśodī॑cī॒rdaśo॒rdhvāḥ | tebhyo॒ namo॑ astu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | ६४ | |
नमो॑ऽस्तु रु॒द्रेभ्यो॒ येऽन्तरि॑क्षे॒ येषां॒ वात॒ इष॑वः । तेभ्यो॒ दश॒ प्राची॒र्दश॑ दक्षि॒णा दश॑ प्र॒तीची॒र्दशोदी॑ची॒र्दशो॒र्ध्वाः ।
तेभ्यो॒ नमो॑ अस्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। ६५ ।।
namo॑’stu ru॒drebhyo॒ ye’ntari॑kṣe॒ yeṣāṃ॒ vāta॒ iṣa॑vaḥ | tebhyo॒ daśa॒ prācī॒rdaśa॑ dakṣi॒ṇā daśa॑ pra॒tīcī॒rdaśodī॑cī॒rdaśo॒rdhvāḥ | tebhyo॒ namo॑ astu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | ६५ | |
नमो॑ऽस्तु रु॒द्रेभ्यो॒ ये पृ॑थि॒व्यां येषा॒मन्न॒मिष॑वः । तेभ्यो॒ दश॒ प्राची॒र्दश॑ दक्षि॒णा दश॑ प्र॒तीची॒र्दशोदी॑ची॒र्दशो॒र्ध्वाः ।
तेभ्यो॒ नमो॑ अस्तु॒ ते नो॑ऽवन्तु॒ ते नो॑ मृडयन्तु॒ ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः ।। ६६ ।।
namo॑’stu ru॒drebhyo॒ ye pṛ॑thi॒vyāṃ yeṣā॒manna॒miṣa॑vaḥ | tebhyo॒ daśa॒ prācī॒rdaśa॑ dakṣi॒ṇā daśa॑ pra॒tīcī॒rdaśodī॑cī॒rdaśo॒rdhvāḥ | tebhyo॒ namo॑ astu॒ te no॑’vantu॒ te no॑ mṛḍayantu॒ te yaṃ dvi॒ṣmo yaśca॑ no॒ dveṣṭi॒ tame॑ṣāṃ॒ jambhe॑ dadhmaḥ | | ६६ | |